Kɔ’ɛ Ho Puti’irɛ Soŋa Ho San Ti’isa Ti Ho Keŋɛ Sukuu Pa’asɛ Bii Ho Da Keŋɛ

1-2. (a) Bunbilipaalesi nari ti ba kɔ’ɛ ba puti’irɛ la bem yele poan? (b) Ho keŋɛ sukuu pa’asɛ vuurɛ? (Bisɛ “Yelesum Vuurɛ.”)

HO SAN dɛna bunbilipaalega, daanse’ere nɛreba zo’e zo’e tabelɛ soke ho ti ba baŋɛ hon boti ho ta tum tuunse’ere beere sa’am. Tuunse’ere n gaŋɛ za’a ti ho wan ta’an tum dela tɛm woo na’am tuuma la. Ge la me wan nara ti ho ta’an bisa homea. (2 Tes. 3:10) Daanse’ere ho puɣum geele tuunse’ere ti ho wan bɔta ti ho ta tuna beere sa’am ta’an bisa homea.

² Bunbilipaalesi basɛba ni sɔsɛ mɛ la ba dɔɣereba ti ba baŋɛ ban wan ta tum tuunse’ere beere sa’am. Bala la, ba san keŋɛ sukuu paɛ beense’ere ti gɔmɛt la yeti la dela pɛ̃regerɛ bɔ’ɔra nɛra woo la, ba nyaa ta’an loe ti ba wan keŋɛ pa’asɛ bii ba kan keŋɛ.a Daanse’ere, hon me ta’an ti’isa ti ho keŋɛ sukuu pa’asɛ. La san dɛna bala, bem ti ho wan bɔta ti ho ta zamesɛ? Zaseŋɔ wa poan, to wan bisɛ Baabule naresum yɛla n wan soŋɛ tɔ ti to ta’an kɔ’ɛ to puti’irɛ soŋa sukuu kenɛ yɛla poan. To san ma’ɛ tomea ti’isa yɛla soŋa, la wan soŋɛ tɔ ti to ta’an kɔ’ɛ to puti’irɛ soŋa. La boi bim ti zaseŋɔ wa tɔɣeri la bunbilipaalesi yele ge la wan soŋɛ Kristakɔma za’a waabi n ti’iseri ti ba keŋɛ sukuu pa’asɛ. Naresum yɛla la ti to wan sɔsɛ la wan soŋɛ dɔɣereba ti ba ta’an soŋɛ ba kɔma ti ba kɔ’ɛ ba puti’irɛ soŋa sukuu kenɛ yɛla poan.

LA NARI TI HO KEŊƐ SUKUU PA’ASƐ?

3. Bem n wan ta’an basɛ ti Kristabia kɔ’ɛ a puti’irɛ ti a keŋɛ sukuu pa’asɛ?

³ Tisi ase’a poan, la yele ka pakɛ ti nɛra keŋɛ sukuu pa’asɛ ge ta’an nyɛ tuuma tuna bisa amea. Tisi ase’a me poan, nɛra san keŋɛ sukuu pa’asɛ, la ta’an soŋɛ en ti a nyɛ tuunsoma n kan dekera a saŋa zo’e zo’e. Kristabia san nyɛ tuuma n ani bala, la wan soŋɛ en ti a ta’an nyɛta nɛŋa tuna na’am mɔɔlegɔ tuuma la bii a tuna tuuma ase’a tansugere la poan. Sɛba n boti ba keŋɛ sukuu pa’asɛ la wan nara ti ba kɔ’ɛ ba puti’irɛ yɛla ase’a poan. Sukuu kenɛ me wan dekɛ ba saŋa, ba paŋa la ba ligeri.

4. Beni n sɔi ti la nara ti Kristabia mea kɔ’ɛ a puti’irɛ sukuu kenɛ yɛla poan? (Bisɛ tiŋanɔɔrɛ yelesum la.)

⁴ Baabule la yeti, “nɛra woo tare a zeero mɛ te a zi.” (Ga. 6:5) Bala la, Kristabia woo nari ti a kɔ’ɛ a puti’irɛ nyaa a wan keŋɛ sukuu pa’asɛ bii a kan keŋɛ.b Kɔma san nan daɣɛ bunkureba, la dela dɔɣereba zugbere yele ti ba kɔ’ɛ ba puti’irɛ ba kɔma sukuu kenɛ yɛla poan. (Ep. 6:1) Dɔɣereba la san te’ele soŋɛ ba kɔma, la wan soŋɛ kɔma la ti ba ta’an kɔ’ɛ ba puti’irɛ soŋa sukuu kenɛ yɛla poan ba san ta zo’e kura.—Mag. 22:6.

5. Wani ma’a n nari ti nɛra ti’isa nyaa a keŋɛ sukuu pa’asɛ bii a da keŋɛ ge bem zuo? (Bisɛ foote.)

⁵ Bunbilipaalesi san keŋɛ sukuu paɛ beense’ere ti gɔmɛt la pa’alɛ la, ba ta’an kɔ’ɛ ba puti’irɛ nyaa ba keŋɛ sukuu pa’asɛ bii ba da keŋɛ. La wan ana soŋa ti bunbilipaalesi te’ele sɔsɛ yele wa la ba dɔɣereba ge nyaa kɔ’ɛ ba puti’irɛ. Bala wan soŋɛ bamam la ba dɔɣereba ti ba ta’an viisɛ baŋɛ sukuu sɛka n wan makɛ. Ba ta’an loe sɛla ti bunbilipaalega la nara ti a zamesɛ, ti la soŋɛ en ti a beere nyɛ tuuma bii la soŋɛ en, a san bɔta ti a keŋɛ sukuu pa’asɛ. La me daɣɛ pɛ̃regerɛ ti ba ni te’ele kɔ’ɛ ba puti’irɛ wana. (Mag. 21:5) Bunbilipaalesi basɛba ni keŋɛ sukuu paɛ la beense’ere ti gɔmɛt la pa’alɛ la, pɔsɛ tuuma, tuna sore ŋmɛ’a tuuma ge nyaa ni ti’isɛ nyaa ba keŋɛ sukuu pa’asɛ bii ba da keŋɛ. La ta’an puɣum yue mɛ ge ti nɛra nyaa ti’isa ti a keŋɛ sukuu pa’asɛ bii a da keŋɛ.

6. Bem n wan soŋɛ nɛra ti a ta’an kɔ’ɛ a puti’irɛ soŋa a san ti’isa ti a keŋɛ sukuu pa’asɛ bii a da keŋɛ?

⁶ Bem n wan soŋɛ hɔ ti ho ta’an kɔ’ɛ ho puti’irɛ soŋa, ho san ti’isa ti ho keŋɛ sukuu pa’asɛ bii ho da keŋɛ? Zusɛ Yehowa ti a soŋɛ hɔ. (Yam. 1:5) Leyɛ’ɛsa, geele yɛla ayi wa bisɛ. Yia, ti’isɛ bisɛ sɛla n sɔi ti ho bɔta ti ho keŋɛ sukuu la. (Ym. 26:2) Yi’i, geele bisɛ sukuu la n ta’an soŋɛ ho se’em, la daaŋɔ se’a n boi bim. (Mag. 14:15) Basɛ ya ti to sɔsɛ ya yɛla wa soŋa soŋa.

TI’ISƐ BISƐ SƐLA N SƆI TI HO BƆTA TI HO KEŊƐ SUKUU LA

7. Mabia san ti’isa ti a keŋɛ sukuu pa’asɛ, bem yɛla n nari ti a geele soŋa?

⁷ Ho san ti’isa ti ho keŋɛ sukuu pa’asɛ, la nari ti ho soke homea yeti, ‘Beni n sɔi ti mam bɔta ti n keŋɛ sukuu pa’asɛ?’ Nɛreba zo’e zo’e boti la ba keŋɛ sukuu pa’asɛ, lan wan eŋɛ se’em ti ba ta’an nyɛ tuuma ti ba bɔta bii tuuma n wan basɛ ti ba nyɛta ligeri zɔ’ɔra. Nɛra san ti’isa bala, la dela be’em? La nɔɔ daɣɛ be’em. (1 Tim. 5:8) Ge Baabule la kaɣɛ tɔ ti to da basɛ ti ligeri yele ba’ɛ pakɛ tɔ bii to ti’isa ti ligeri ma’a n wan ta’an soŋɛ tɔ. (Mag. 23:​4, 5; 1 Tim. 6:​8-10; 1 Yo. 2:17) Ho san ti’isa ti ho keŋɛ sukuu pa’asɛ ligeri zuo bii nɛreba bɔ’ɔra ho gilema zuo, la ta’an basɛ ti ho kan tara pupeelum ge me wan ta’an sa’am hon la Yehowa bɔnsoŋa la.

8-9. (a) Kristakɔma nari ti ba geele sukuu kenɛ yele la wani? (Matu 6:33) (b) Hon zamesɛ la bem mabia Josefina, Morine, la Iris n tɔɣɛ sɛla la poan?

⁸ La nari ti ho geele sukuu kenɛ yele la wani? La ka nari ti to basɛ ti sɛla yele pakɛ tɔ gana Yehowa pu’usegɔ. (Mt. 22:​37, 38; Flp. 3:8) La boi bim ti sukuu kenɛ ta’an soŋɛ tɔ ti to ta’an bisa tomea ge sɛla n pakɛ paa dela to pu’usa Yehowa la to suure za’a.—Kaalɛ Matu 6:33.

⁹ Daalɛ basɛ sɛla n soŋɛ mabiisi basɛba ti ba ta’an geele sukuu kenɛ wuu Yehowa n geele de se’em la. Josefina n ze’ele Chile yeti: “Mam keŋɛ la sukuu pa’asɛ, lan wan eŋɛ se’em ti n ta’an nyɛ tuuma n wan bo mam yɔ’ɔ ti n nyɛta saŋa pu’usa Yehowa. Mam yuun basɛ ti Yehowa pu’usegɔ pakɛ mam mɛ gana n sukuu kenɛ la.” Mabipɔka yu’urɛ n de Morine dekɛ la yuunɛ keŋɛ sukuu ta zamesɛ zuto itigɔ. Beni n sɔi ti a eŋɛ bala? A yeti: “Mam yuun boti la n keŋɛ zɛ’an n eeri soŋerɛ ta mɔɔlɛ. Bala la, mam yuun bisɛ la mam n wan zamesɛ sɛla ti la soŋɛ mam ti n ta’an bisera n mea ge ta’an tuna na’am mɔɔlegɔ tuuma la. Mam n yuun ba’asɛ sukuu la, mam yuun pɔsɛ ita la zuto ta’an nyɛ laɣehɔ dekɛ keŋɛ zɛ’an n eeri soŋerɛ. Mam n yuun paɛ bim la, sɛla ti mam yuun zamesɛ sukuu poan la n yuun soŋɛ mam ti n nyɛ tuuma.” Iris me yuun keŋɛ la sukuu ta zamesɛ nyɛna yɛla. A yeti: “Ho san keŋɛ sukuu pa’asɛ, la ta’an soŋɛ hɔ ge daɣɛ sukuu la n wan basɛ ti ho sirum tara pupeelum. To san basɛ ti Yehowa yele pakɛ tɔ to vom poan, la wan basɛ ti to sirum tara pupeelum ge me nyɛ sɛla n pakɛ tɔ.” To san basɛ ti tomam la Yehowa bɔnsoŋa yele pakɛ tɔ, bala wan soŋɛ tɔ ti to ta’an kɔ’ɛ to puti’irɛ eŋɛ sɛla n wan basɛ ti to tara pupeelum wuusa.

TI’ISƐ BISƐ NYUURƆ SETO, LA DAAŊƆ SETO N BOI BIM

10. Naresum yele la n boi Tɛɛnhegɔ 32:29 la wan ta’an soŋɛ ho la wani ho san ti’isa ti ho keŋɛ sukuu pa’asɛ bii ho da keŋɛ?

¹⁰ Ho ta’an tara tuunɛ wana mɔpi ho puti’iren ti ho bɔta ti ho zamesɛ. Ge la nari ti ho me geele tuuma ase’a me bisɛ. Ho ta’an bisɛ tuunɛ n wɔ̃ni la tuunsɛka ti ho ti’isa la bii tuuma ase’a me. (Dekɛ makɛ Magaha 18:17.) Zina beere wa, nɛreba ta’an doose sarɔtɔ to’ore to’ore poan keŋɛ sukuu. Makerɛ, nɛra ta’an doose intanɛt poan keŋɛ sukuu. Tɛ̃ra ti nɛra me ta’an bisera amea, a san puɣum ka keŋɛ sukuu pa’asɛ. Makerɛ, Johanna n ze’ele Finland yuun ka keŋɛ sukuu pa’asɛ. A yeti: “Mam yuun ka keŋɛ sukuu pa’asɛ. Mam yuun tuɣum ɛ la tuunɛ ti n wan ta’an dekɛ dabesa fii bakwai la poan tuna ge me tuna sore ŋmɛ’a tuuma la. Mam me nyɛ tuuma to’ore to’ore tum mɛ. Bala basɛ ti mam baŋɛ ti Yehowa n yeti a wan bɔ’ɔra tɔ sɛla n pakɛ tɔ la sirum dela yelemɛŋɛrɛ.” La yele pakɛ mɛ ti ho tɛ̃ra ti hon kɔ’ɛ ho puti’irɛ ti ho keŋɛ sukuu pa’asɛ bii hon boti ho zamesɛ sɛla sukuu la poan la tari nyuurɔ, la daaŋɔ mɛ. Bala la, soke homea yeti: ‘Nyuurɔ la wan zo’e gana yeledaaŋɔ la?’ (Kaalɛ Tɛɛnhegɔ 32:29; 1 Ko. 10:23) Basɛ ya ti to sɔsɛ yɛla ase’a n wan basɛ ti to nyɛ sokere wa lebesego.

11. Beni n sɔi ti la yele pakɛ ti ho ni geele hon wan dekɛ saŋa se’em kena sukuu bii zamesa tuuma? (Bisɛ fɔɔra la.)

¹¹ Hon wan dekɛ saŋa se’em zamesa. Geele bisɛ bakwai woo poan, hon wan dekɛ saŋa se’em kena sukuu, zamesa nu’o tuunɛ bii ita homework. Ho wan kelum nyɛta nɛŋa ita yelese’a n wan basɛ ti hon la Yehowa bɔnsoŋa la kpe’em? Ho me wan nyɛta saŋa tuna ho zugbere tuuma ya yire la poan? (Flp. 1:10) Ho sukuu kenɛ la wan basɛ ti tɔregɔ paɛ hɔ ti ho kan ta’an ni maasum soŋa keŋɛ zamesegɔ bii ho ita homea zamesegɔ? La yuun ani Jeroz n ze’ele India la bala. A yeti: “La yuun kpe’em bo mam mɛ ti n ta’an kena na’am mɔɔlegɔ soŋa soŋa. Mam me san ni keŋɛ zamesegɔ, mam ni ka ta’an kɛlesa soŋa. Saŋa ase’a, mam yuun ni vi’ira la zamesegɔ. Nananawa, mam baŋɛ ti mam yuun ka nari ti n keŋɛ sukuu wa. Sɛla n sɔi la, mam sa’am la n saŋa ge ti la me wuŋɛ mam.” Sukuu kenɛ ase’a ka diti saŋa. La ni dɛna la ho dekɛ saŋa fii keŋɛ sukuu la, ba me ka bo’ori homework zɔ’ɔra. Makerɛ, Rabeca n ze’ele Mozambique puurɛ pee mɛ la eŋa n yuun zamesɛ sɛla sukuu poan la. A yeti: “To yuun ni dekɛ la awa ayi zamesɛ dabeserɛ la poan. Bala yuun bo mam la yɔ’ɔ ti n ta’an kelum tuna sore ŋmɛ’a tuuma la.”

12. Nɛra wan ta’an soke amea la soke ani ti la soŋɛ en ti a ta’an dekɛ a saŋa tum soŋa soŋa? (Pa’ala 12:1)

¹² Lan wan yue se’em. Geele bisɛ hon wan dekɛ ŋmaresi se’em bii yuuma se’em ta’an ba’asɛ sukuu la. Hon wan dekɛ saŋa se’em keŋɛ sukuu la, wan makɛ bo ho? (Ep. 5:​15-17) Ho san dɛna bunbilipaalega, sukuu la ti ho wan keŋɛ la wan basɛ ti ho ta’an tuna zo’e zo’e bɔ’ɔra Yehowa, maɣesɛ wuu ho tuna tɛm woo na’am tuuma la? (Kaalɛ Pa’ala 12:1.) Ho wan ta’an dekɛ saŋa fii zamesɛ tuunse’ere ti ho bɔta la? Makerɛ, sukuu ase’a bii tuuma ase’a ta’an kumesɛ hɔ ti ho kan yue ge mina tuuma ge ti ho me kan yɔ paɛ wuu universitidoma n yɔɔri se’em la. Mario n ze’ele Chile yeti: “Mam yuun dekɛ la yuuma ayi keŋɛ sukuu ta zamesɛ tuunɛ. Mam n yuun yɔ se’em la ka paɛ university n yɔɔri se’em la. Mam yuun ni dekɛ la dabesa anaasi bakwai la poan keŋɛ sukuu la. Bala yuun basɛ ti mam nyɛta la saŋa tuna sore ŋmɛ’a tuuma la.”

13. Hon keni sukuu zɛ’an la, san zãɛ la yire bem daaŋɔ n wan ta’an paɛ hɔ?

¹³ Zɛsɛka ti ho wan bɔna ge kena sukuu la. Ho ta’an nyɛ sukuu n lɛm yire. Ge sukuu la san bɔna zɛ’an n zãɛ? Ge la san dɛna pɛ̃regerɛ ti ho bɔna sukuu la poan ge zamesa? Mina ti ho san ka naɛ la ho deodoma bɔna, yele yele wuu ho san naɛ la sɛba n daɣɛ mabiisi bɔna, bala ta’an basɛ ti dɛŋa paɛ hɔ vo’osum poan. (Mag. 22:3; 1 Ko. 15:33) Matias, n ze’ele Mozambique yuun dekɛ la yuunyinɛ keŋɛ sukuu. A me yuun ka ba’ɛ eŋɛ sanɛ. Ge a puurɛ ka pee la eŋa n yuun keŋɛ sukuu la. Beni n sɔi? A yeti: “Mam yuun kɔ’ɔn keŋɛ ta kɛ̃’ɛra la sukuu la poan. Ba yuun tuni la tuunbe’ero sukuu la poan ti la yuun daɣɛ naana bɔ’ɔra mam. Mam wan bɔta ti n yele nɛra woo yeti, la ka nari ti nɛra basɛ a deodoma ge keŋɛ zɛ’an ta kɛ̃’ɛra ge kena sukuu.” Mabipɔka n ze’ele Russia yeti: “Mam yuun naɛ la n dɔɣereba kɛ̃’ɛra ge kena sukuu, sɛla n sɔi la dɛŋa, la be’em tuuma n yuun boi sukuu la poan. Bala n sɔi ti mam yuun ka gã’a sukuu la poan la.” Ho me ta’an kɔ’ɛ ho puti’irɛ ti ho bɔna yire ge dɔla intanɛt poan zamesa.

14. Naresum yele la n boi Luke 14:28 la wan ta’an soŋɛ ho la wani ho san ti’isa ti ho keŋɛ sukuu pa’asɛ bii ho da keŋɛ?

¹⁴ Hon wan yɔ ligeri se’em ge ta’an keŋɛ sukuu la ta ba’asɛ. Sukuu basɛba ligeri yɔa ka zo’e bii gɔmɛt la n ni yɔ bo ba. La san dɛna bala, ho san keŋɛ sukuu pa’asɛ, la wan basɛ ti ho nyɛ mi’ilum la kumesegɔ n wan soŋɛ hɔ ti ho ta’an nyɛ tuuma. Ge zɛ’ɛsi ase’a me, ho san bɔta ti ho keŋɛ sukuu pa’asɛ, la ni eŋɛ la laɣehɔ. Makerɛ, la ta’an nara ti ho yɔ tikiya ti a zamesɛ hɔ yɛla ase’a pa’asɛ ge ti sukuu la nyaa sakɛ to’e ho. Nɛreba basɛba ni eŋɛ la sanɛ ta’an keŋɛ sukuu ge nyaa ni dekɛ yuuma zo’e zo’e ta’an yɔ ba’asɛ. Adilson n ze’ele Mozambique puurɛ ka pee la eŋa n yuun keŋɛ sukuu la. A yeti: “Mam deodoma yuun ŋmɛkɛ la puurɛ yuuma anaasi yɔ bo mam ti mam keŋɛ sukuu.” Ho san ti’isa ti ho keŋɛ sukuu pa’asɛ bii ho zamesɛ tuuma, soke homea yeti: ‘Mam wan yɔ ligeri zo’e la wani? Mam bii n deodoma wan ta’an yɔ ligeri la? N wan ta’an tee keŋɛ sukuu bii zamesɛ tuuma ti la yɔa ka ba’ɛ zo’e?’ (Kaalɛ Luke 14:28.) ‘N san eŋɛ sanɛ, la wan yue paɛ la wani ge ti n nyaa yɔ ba’asɛ? N san ta tuna, yɔɔrɛ la wan zo’e ti n ta’an bisa n mea ge me yɔ n sanɛ la ba’asɛ?’—Mag. 22:7.

15. Beni n sɔi ti la nara ti ho soke homea nyaa sɛla ti ho yeti ho keŋɛ ta zamesɛ la wan basɛ ti ho nyɛ tuuma?

¹⁵ La wan basɛ ti ho nyɛ tuuma? Ti’isɛ bisɛ tuunse’a n boi ho gingilega la poan bii hon kɛ̃’ɛri zɛ’an la. Hon yeti ho keŋɛ ta zamesɛ yelese’a la wan ta’an basɛ ti ho nyɛ tuuma? Sukuu course ase’a ni ka ta’an kumesɛ nɛra soŋa ti a ta’an nyɛ tuuma. Ba ni tuɣum pa’alɛ hɔ ti ho mina la gɔŋɔ ge ni ka ta’an kumesɛ hɔ ti ho ta’an tuna tuunɛ wana mɔpi. (Kol. 2:8) Mabipɔka n ze’ele India yeti: “Mam n zamesɛ sɛla sukuu la ka kumesɛ mam soŋa n wan ta’an basɛ ti n nyɛ tuuma. Bala n sɔi ti mam yuun ɛɛra tuuma ge ka nyɛ la.” Saŋa ase’a ho ta’an zamesɛ mina tuunɛ la soŋa ge tuuma la ka boi ti ho wan nyɛ tum. Sublime n ze’ele Central African Republic yuun keŋɛ sukuu ta zamesɛ la air condition maalegɔ. Ge a yeti: “Mam n kɛ̃’ɛri zɛ’an la nɛreba zo’e zo’e mea n maali ba lɔɣɔrɔ, bala la, la kpe’em mɛ ti ho nyɛ tuuma.”

16. Beni n sɔi ti la nara ti ho te’ele ti’isɛ bisɛ tuunsɛka ti ho wan tum, ho san ta ba’asɛ sukuu la?

¹⁶ Ho me ta’an te’ele ti’isɛ bisɛ tuunse’ere ti ho wan ta nyɛ ho san zamesɛ ba’asɛ. Ho puurɛ wan pee la tuunɛ la? (Pa. 3:​12, 13) Tuuma la zɛ’an wan ana la wani? Hon boti ho tum tuunse’ere la ta’an basɛ ti dɛŋa paɛ hɔ? Bii nɛresɛba n wan bɔna tuuma la poan la wan paɣera la taaba ge me wan pɛ̃regera hɔ ti ho ba’ɛ tuna? Ba wan yɔɔra ho la wani tuuma la poan? Ho yɔɔrɛ la wan ta’an basɛ ti ho bisa homea? Ho san tuna tuuma la, la wan nara ti ho ni makɛ keŋɛ sukuu pa’asɛ? Sɛla n de ninmu’urɛ dela, tuuma la wan bo ho yɔ’ɔ ti ho basɛ ti Yehowa pu’usegɔ deŋɛ nɛŋa ho vom poan? (Pa. 12:13) Tuuma san ka ba’ɛ zo’e hon boi zɛ’an la, la ta’an kpe’em ti ho gãsera tuuma. Ge hon kɔ’ɛ ho puti’irɛ ti ho keŋɛ sukuu ta zamesɛ sɛla la ta’an soŋɛ hɔ ti ho nyɛ tuuma. Tabitha, n ze’ele India yuun dekɛ la ŋmaresi siyoobe zamesɛ pi’a tuuma. A yeti: “Mam yuun kɔ’ɛ n puti’irɛ ti n dɛna la tɛɛla, sɛla n sɔi la bala wan bo mam yɔ’ɔ ti n ta’an tum sore ŋmɛ’a tuuma. Pi’a tuuma wan basɛ ti n nyɛta tuuma saŋa woo ge ti n me wan ta’an tuna sansɛka ti n bɔta. La me daɣɛ tuunse’ere ti n wan dekɛ ligeri zo’e zo’e ta’an pɔsɛ.” Tabitha n yuun zamesɛ tɛɛla pi’a la yuun soŋɛ en mɛ ti a ta’an bisa amea ge tuna sore ŋmɛ’a tuuma la.

17. (a) Ho wan nyɛ yɛla la bɛ ti la soŋɛ hɔ ti ho ta’an kɔ’ɛ ho puti’irɛ soŋa sukuu kenɛ yɛla poan? (b) Bem Baabule naresum yɛla n wan ta’an soŋɛ hɔ ti ho kɔ’ɛ ho puti’irɛ soŋa? (Bisɛ daka la zuo n de “Geele Baabule Naresum Yɛla.”)

¹⁷ Zaseŋɔ wa poan, to zamesɛ la yɛla zo’e zo’e ti to wan ta’an ti’isa de yele. Ho wan nyɛ yɛla la bɛ ti la soŋɛ hɔ ti ho ta’an kɔ’ɛ ho puti’irɛ soŋa? Ho ta’an keŋɛ sukuu la poan ta viisɛ baŋɛ hon boti ho zamesɛ sɛla la, bii ho keŋɛ sukuu la intanɛt tuuma zɛ’an ta kaalɛ de yele. Ti’isɛ bisɛ, hon yeti ho zamesɛ sɛla la wan basɛ ti ho nyɛ tuuma? Ho me ta’an sɔsɛ la sɛba n keŋɛ sukuu ta zamesɛ hon boti ho zamesɛ sɛla la, bii ho sɔsɛ la sɛba n tuni tuunsɛka ti ho bɔta la. (Mag. 13:10) Ho ta’an soke ba yeti, “Bem nyuurɔ bii bem yeledaaŋɔ n boi sukuu sɛka ti hon keŋɛ la bii tuunsɛka ti ho tuna la?” Sɔsɛ la sɛba n pu’useri Yehowa baŋɛ sukuu la tuuma yɛla n ani se’em. (Mag. 15:22) Ba ta’an yele ho la bem? Daanse’ere ba ta’an tɔɣɛ tuuma kasɛka yele bo ho ti ho puɣum ka ti’iseri ni de yele.

18. La nari ti to tɛ̃ra la bem?

¹⁸ Wuu ton zamesɛ se’em la, nɛra san kɔ’ɛ a puti’irɛ ti a keŋɛ sukuu pa’asɛ, nyuurɔ la yeledaaŋɔ boi bim mɛ. Bala la, zusɛ ge ti’isɛ de yele. La boi bim ti ho san keŋɛ sukuu pa’asɛ, la ta’an soŋɛ hɔ ti ho ta’an bisa homea. Ge tɛ̃ra ti sɛla n wan basɛ ti ho sirum tara pupeelum dela, hon wan tara bɔnsoŋa la Yehowa. (Ym. 16:​9, 11) Yehowa kɔ’ɔn bisa a nɛreba mɛ, la ka pakɛ la bamam n keŋɛ sukuu paɛ zɛ’an. (Heb. 13:5) Ho san kɔ’ɛ ho puti’irɛ ti ho keŋɛ sukuu pa’asɛ, bem n wan soŋɛ hɔ ti ho ta’an tara bɔnsoŋa la Yehowa ge kena sukuu la? To wan sɔsɛ yele wa zaseŋɔ seko n taɣelɛ la poan.