Ba Yuun Boi La “Bɔŋsɛka N De Ma’an Na’ayenɛ Nɛŋa”

ZEKARIA yuun dela malemadaana n ze’ele Aron yizuo la poan. Yizuo wa yuun tari la malemadoma zo’e zo’e. Daarɛ deyima, la yuun nari ti Zekaria tum ninmu’urɛ tuunɛ. La yuun paɛ la eŋa zuo ti a nyɔ̃ nyuuŋo soŋɔ bunɔ, salema kaabegɔ bimbine la zuo, pu’usegɔ yire la poan. Tuunɛ wa yuun boi la de to’ore, se’ere n sɔi la malemadoma basɛba ni nyɔ̃ nyuuŋo soŋɔ bunɔ wa la buyina ba vom za’a poan. Bala la, Zekaria la a pɔɣa Elizabet puurɛ yuun pee mɛ paa la yɔ’ɔ wa.

Baabule la pa’alɛ ti Zekaria la Elizabet yuun tari la “bɔŋsɛka n de ma’an Na’ayenɛ nɛŋa.” Zekaria yuun di Elizabet ti la yue mɛ ti Naayinɛ me kã bo ba sarɔtɔ zo’e zo’e poan. Ge yele deyima n yuun pakɛ ba ti ba kɔ’ɔn ɛɛra. Ba yuun boti la bia. Baabule saŋa la, la yele yuun pakɛ mɛ ti nɛra la a pɔɣa tara kɔma. Zekaria la Elizabet me yuun nyaa “korogɛ mɛ.” Ge ba yuun kɔ’ɔn zusera la Naayinɛ ti a soŋɛ ba ti ba nyɛ bia. Ba yuun tari suure lua ti Naayinɛ wan kelese ba zusega, la san puɣum ana wuu ba kan makɛ ta’an dɔɣɛ kɔma.

Zekaria yuun kɛ̃ la pu’usegɔ yire la poan ge ti nɛrekuuŋɔ la bɔna yiŋa zusera. Se’em ma’a ti Zekaria yuun bɔna pu’usegɔ yire la poan la, bilam bilam ti Yehowa maleka yuun wa’ana ze’ele lɛm kaabegɔ bimbine la! A yuun yele Zekaria yeti, Naayinɛ kelese a zusega la mɛ. La me kan yue Elizabet wan nyɔkɛ puurɛ dɔɣɛ budibila. Maleka la yuun yele Zekaria yeti, a siɣɛ bia la yu’urɛ ti Yon. Bia la san ta zo’e, a wan tara ‘Naayinɛ vo’osum sɛka n yuun boi Eliya zɛ’an’ la. Yehowa n yuun loe en ti a tum tuunɛ n boi de to’ore. Yon yuun nari ti a pa’alɛ nɛreba ti ba ita sɛla n wan pee Yehowa puurɛ.

Zekaria yuun ka sakɛ ti maleka la n yele sɛla la wan tum. Bala la, Zekaria yuun soke maleka la ti a baŋɛ sɛla n wan eŋɛ pa’alɛ ti a yetɔɣum la wan tum tuuma. Ge maleka la yuun tĩɛ en la eŋa n de mina ge yeti: “Mam dela Gabriel ge me ze’a . . . Na’ayenɛ nɛŋa.” Maleka wa yuun dela Naayinɛ tuntuna bɔna saazuo. Bala la, la yuun ka nari ti Zekaria tara puti’ira ayi ayi la maleka la n tɔɣɛ sɛla la. Zekaria n yuun ka sakɛ sɛla ti Gabriel yele la zuo, Gabriel yuun yele en yeti a kan ta’an tɔɣɛ ta paɛ se’em ma’a ti Naayinɛ pu’ulumbiŋ’a la ta tum tuuma. Zekaria n yuun ta yese pu’usegɔ yire la poan la, a yuun ka ta’an tɔɣera. A yuun tari la a nu’usi yibesa pa’ala sɛla n paɛ en.

Zekaria yuun basɛ ti a pɔɣa bɔkɛ ti ba wan dɔɣɛ bia. Ti “la daa wa wa’an na” ti Elizabet nyɔkɛ puurɛ. A yuun kɔ’ɔn bɔna la yire ŋmaresi sinuu ge ka keŋɛ zɛ’an zɛ’an. A ŋmaresi siyoobe poan ti a suɔ Mary yuun keŋɛ ta bisɛ en. Mary yuun ze’ele la Nazaret ti a sɔ yu’urɛ dɛna Heli. Se’em ma’a ti Mary yuun kɛ̃ yire la poan la, bia la n boi Elizabet puuren la yuun tɛ̃begɛ mɛ la pupeelum. Sankaŋa ti Naayinɛ vo’osum la sige Elizabet zuo, ti a yuun baŋɛ ti Mary tari la puurɛ. A me yuun baŋɛ ti bia la n wan ta dɛna Mɛzaaya la. Bala la, a yuun yeti Mary dela to “Daana ma.” Elizabet nini yuun ka tɛ̃ti la Mary. A yuun tuɣum kpemese la Mary giila ge yele en yeti Yehowa wan soŋɛ en.

Se’em ma’a ti Elizabet yuun dɔɣɛ la, a yire nɛreba, la a zɔdoma yuun keŋɛ ta bisɛ en mɛ. Ba yuun boti la ba dekɛ Zekaria yu’urɛ siɣɛ bia la. Ge Elizabet yuun ka tamɛ sɛla ti Gabriel yele a sira la. Gabriel yuun yele Zekaria yeti a ‘siɣɛ bia la Yon.’ Bala la, Elizabet yuun zaɣesɛ nɛreba la n yele sɛla la mɛ ge yeti: “A yu’urɛ yeti la de’a la Yon.” Ge nɛreba la yuun ka sakɛ Elizabet n yele sɛla la. Ba yuun soke la Zekaria eŋa n boti ba siɣɛ bia la se’em. Zekaria n yuun ka ta’an tɔɣera la zuo, a yuun gulesɛ eŋɛ la sɛla poan yeti: “Bia la yu’urɛ dela Yon.” Bilam bilam ti a nyaa pɔsɛ tɔɣera.

Zilam vo’osum n yuun sige Zekaria zuo ti a pɔsɛ tɔɣera Yehowa yɛla. Zekaria yuun basɛ ti nɛreba la tara puti’irɛ ti Yehowa wan zɔ ba nimbu’ɔ ge faaɛ ba basɛ. Zekaria yuun yeti eŋa bia Yon “wan tole to Daana [Yehowa] . . . nɛŋan la [a] ta maahom sore bo en.” Yon me yuun sirum eŋɛ la bala. Yezu n yuun pɔsɛ tɔɣera Naayinɛ Na’am la yɛla la, Yon Ko’om Musegadaana la yuun puɣum maasum nɛreba la mɛ, la wan eŋɛ se’em ti ba ta’an kelese Mɛzaaya la.

Mɛzaaya la n yuun nan ka wa’ana la, Naayinɛ yamesi zo’e zo’e yuun dekɛ la sukpe’ene zabɛ la Yehowa dindoma. Ge Yezu n yuun wa’ana la, a yuun pa’alɛ Naayinɛ nɛreba ti ba ka nari ti ba zabera la sɛba n ka pu’useri Naayinɛ, la sɛba n giiseri a nɛreba la. Bala la, zina beere wa, Yehowa ka boti a yamesi zabera. Ge la nari ti to kelum tara sukpe’ene. Sɛba n sakɛ bo Mɛzaaya la nari ti ba tɔɣera Naayinɛ, la Yezu yɛla wuu Zekaria la Elizabet n yuun eŋɛ se’em la.

Kaalɛ Baabule zɛ’ɛsi wa:

• Luke 1:​5-25, 36-45, 57-80

Sɔsɛ ya sokere wa:

Zekaria la Elizabet yuun eŋɛ la wani pa’alɛ ti ba tari sukpe’ene?

Viisɛ Pa’asɛ

1. 1. La boi bim ti Zekaria la Elizabet yuun ka di mi’a ge beni n sɔi ti Baabule la tɔɣɛ ba yele ti ba yuun boi la “bɔŋsɛka n de ma’an”? (Lu. 1:6; it-E “Blamelessness” ¶2)

   Lebese

1. 3. Gabriel yuun yele Zekaria ti a siɣɛ a bia la Yon. Yon vuurɛ dela bem? (it-E “John” ¶1)

   Lebese

2. 4. Baabule la yeti Zekaria yuun ka ta’an tɔɣera ge a me yuun ka ta’an wuna yoi? (w08-E 3/15 30 ¶6)

   Lebese

Ti’isɛ Hon Wan Dekɛ Tum Tuuma Se’em

• Yuda pu’usegɔ nɛŋadoma n yuun boi Zekaria saŋa la yuun sakɛ ti pɔka san ka dɔɣera, a sira ta’an basɛ en. Sireba wan ta’an zamesɛ la bem Zekaria zɛ’an la eŋa n yuun kɔ’ɔn bɔna la a pɔɣa la? Bisɛ foote B

  Lebese

  

• Elizabet yuun doose la a sira n pa’alɛ en se’em la, la ka pakɛ la a yidoma, la a kpɛ’ɛsi n yuun pɛ̃regeri en la. (Lu. 1:​58-61) Pɔɣesi wan ta’an zamesɛ la bem Elizabet zɛ’an?

  Lebese

• Ho wan eŋɛ la wani ta’an tɔɣesa Zekaria la Elizabet sukpe’ene la?

  Lebese

Ti’isɛ Taɣesɛ Yehowa Yele

• Zekaria la Elizabet yele wa pa’alɛ mam ti Yehowa ani la wani?

  Lebese

• Zekaria la Elizabet yele wa makɛ la Yehowa puti’irɛ la wani?

  Lebese

• La san dɛna ti Yehowa wan ta isige Zekaria la Elizabet kum poan ti ba vɔna tingɔŋɔ wa zuo, mam wan soke ba la bem?a

  Lebese

Zamesɛ Yɛla Pa’asɛ

Bisɛ sɛla n yuun eŋɛ, Zekaria n yuun nyaa ta’an tɔɣera ge pɛ̃ɣera Naayinɛ la.

‘A Yu’urɛ Dela Yon’ (6:59)

Yehowa yuun kpemese Mary giila la wani, se’em ma’a ti a yuun keŋɛ ta bisɛ Elizabet la? Tomam me wan ta’an zamesɛ la bem yele wa poan?

“A Wan Bo Ho Paŋa” (w23.10 14-15 ¶10-14)