Mary Dela Naayinɛ Ma?

Baabule la lebesego

Aayi, Baabule la ka pa’alɛ ti Mary dela Naayinɛ ma bii la pa’alɛ ti Kristakɔma pu’usa bii na’asa Mary.a Geele bisɛ:

Mary mea ka makɛ yeti eŋa dela Naayinɛ ma. Baabule la yeti, Mary yuun dɔɣɛ la “Naayinɛ Dayɔa” ge la ka yeti a dɔɣɛ la Naayinɛ mea.—Mark 1:1; Luke 1:32.
Yezu Krista me ka makɛ yeti Mary dela Naayinɛ ma bii a nari ti ba na’asa en. Se’em ma’a ti pɔka ayima yuun ba’ɛ pɛ̃ɣɛ Mary la a bia n de Yezu la, Yezu yuun tɔɣɛ demese pɔka wa yeti: ‘Pupeelum tuɣum bɔna la sɛba n keleseri Naayinɛ yelesum ge ita eŋa n boti ba ita se’em la!’—Luke 11:27, 28.
Nɛreba n yi’iri Mary ti “Naayinɛ Ma” la Theotokos (mina n dɔɣɛ Naayinɛ) daɣɛ sɛla n boi Baabule la poan.
Yetɔɣesebo n de ‘Pɔɣenaba N Sɔi Saazuo’ la n boi Baabule la poan la daɣɛ Mary n bala ge la dela pumpɔreŋɔ yinɛ ti Israeldoma sɛba n yuun ka doli Naayinɛ n boti se’em la pu’usa. (Yeremia 44:15-19) ‘Pɔɣenaba N Sɔi Saazuo’ la yuun ta’an dɛna Ishtar (Astarte) n de Babilondoma yinɛ.
Diimi Kristakɔma la yuun ka makɛ pu’usa Mary bii ba bɔ’ɔra en na’asegɔ n boi de to’ore. Nɛra n guleseri diimi yɛla yeti diimi Kristakɔma “yuun ka doli malema yooro, dɛna wuu bala ta’an basɛ ti ba dekɛ na’asegɔ n boi de to’ore bɔ’ɔra Mary ti la ana wuu a dela yinɛ ti ba pu’usa.”—In Quest of the Jewish Mary.
Baabule la yeti Naayinɛ kɔ’ɔn bɔna mɛ. (Yooma 90: 1, 2; Isaiah 40:28) Eŋa n ka tari pɔsega la, a me kan ta’an tara ma. Leyɛ’ɛsa, Mary kan ta’an tara Naayinɛ ti a bɔna a puuren; Baabule la basɛ ti la niɛ peelum ti hali saazuo la pɔ’ɛ mɛ ti la dɛna Naayinɛ kɛ̃’a zɛ’an.—1 Nadoma 8:27.

Mary Dela Yezu Ma Daɣɛ “Naayinɛ Ma”

Mary yuun dela Yudadoma buuri, a me yuun dela Naba David yaaŋa. (Luke 3:23-31) Eŋa n yuun tari yelemɛŋɛrɛ la sakerɛ la zuo, Naayinɛ yuun nɔŋɛ en mɛ. (Luke 1:28) Naayinɛ n yuun loe en ti a dɛna Yezu ma. (Luke 1:31, 35) Eŋa la a sira Yosef yuun tari kɔma mɛ.—Mark 6:3.

La boi bim ti Baabule la pa’alɛ ti Mary yuun lebege la Yezu podɔla ge Baabule la ka le tɔɣɛ a yele pa’asɛ gaŋɛ bala.—Tooma 1:14.

Beni N Sɔi Ti Nɛreba Basɛba Ti’isa Ti Mary Dela Naayinɛ Ma?

Yuun kɔbesɛka n pa’asɛ bunaasi Y.B. poan ti ba yuun pɔsɛ tara malema kana wa. Sankaŋa la, Katolik pu’usegɔ la yuun nyaa dela Arom Sɔ’ɔlum la pu’usegɔ. Bala la, ba zo’e zo’e n yuun de baɣa kãabereba yuun nyaa yeti bamam dela Kristakɔma. Pu’usegɔ kaŋa me yuun sakɛ bo Trinitaasoŋa pa’alegɔ n ka boi Baabule la poan la.

Trinitaasoŋa pa’alegɔ la yuun basɛ ti nɛreba zo’e zo’e n boi pu’usegɔ la poan la yeti Yezu san dɛna Naayinɛ, Mary me nari ti a dɛna Naayinɛ ma. Yuun 431 Y.B. poan, pu’usegɔ tigere n boi Epesus yuun nyaa tɔɣɛ ti la niɛ peelum ti Mary dela “Naayinɛ Ma.” Ban yuun biŋe nɔɔrɛ dena Epesus ba’asɛ la, ba yuun pɔsɛ na’asa Mary mɛ wuu Naayinɛ la. Sɛba n yuun kaaberi baɣa la yuun dekɛ bamea pa’asɛ pu’usegɔ la poan mɛ, bala Virege Maria fɔɔra yuun tee soe ba yina n de wuu Artemis (ti Aromdoma yi’ira Diana) la Isis.

Yuun 432 Y.B. poan, Pope Sixtus III yuun bo nɔɔrɛ ti ba mɛ pu’usegɔ deo dekɛ na’asɛ “Naayinɛ Ma.” Ba yuun mɛ ku la pu’usegɔ deo n lɛm Lucina, n de Aromdoma dɔɣum baɣerɛ la. Gɔngulesa ayima pa’alɛ ti pu’usegɔ deo la ti ba mɛ la dela “dãalesum n pa’alɛ ban dekɛ baɣa kaabereba yinɛ n de Ma Kãtɛ la laɣum la Mary, se’em ma’a ti Rome yuun lebege Kristakɔma tiŋa pooren la.”—Mary—The Complete Resource.

a Pu’usegɔdoma zo’e zo’e pa’alɛ ti Mary dela Naayinɛ ma. Ba ta’an yeti a dela “Pɔɣenaba N Sɔi Saazuo” bii Theotokos, n de Greek yelebire ti la vuurɛ dɛna “mina n dɔɣɛ Naayinɛ.”