Pu’usegɔ Woo Dela Buyina? Ba Za’a Wan Ta’an Basɛ Ti To Baŋɛ Naayinɛ?

Baabule la lebesego

Aayi, pu’usegɔ woo daɣɛ buyina. Baabule la tɔɣɛ la pu’usegɔ zo’e zo’e n ka peeri Naayinɛ puurɛ yele. Pu’usegɔ ana taaba boi la tɔka tɔka buyi.

1: Nɛreba n pu’useri pumpɔreŋɔ yina

Baabule la pa’alɛ pumpɔreŋɔ yina pu’usegɔ yele ti la dela ‘pã’asegɔ,’ ‘yoo’ ge me ‘ka tara vuurɛ.’ (Yeremia 10:​3-5; 16:19, 20) Yehowaa Naayinɛ yuun bo Israeldoma la nɔɔrɛ yeti: “Da tari ya yina pa’asɛ mam poan.” (Yɛhega 20:​3, 23; 23:24) Israeldoma la yuun ni san pu’usa yina ase’a, la yuun ni basɛ ti “Naayinɛ sunsɔa nyiisum taɛ basɛ ba zuo” mɛ.​—Kanlɛ 25:3; Malema 20:2; Kema 2:​13, 14.

Zina beere wa la ani Naayinɛ la bala mea nɔɔ la nɛreba n pu’useri ‘sɛla ti ba yi’ira yina’ la. (1 Korint 8:5, 6; Galatia 4:8) A yele nɛresɛba n boti ba pu’usa en la ti ba da dekɛ bamesi laɣum la pumpɔreŋɔ pu’usegɔdoma: “Yese yamea ba poan ge me yelege yamea.” (2 Korint 6:​14-​17) Pu’usegɔ woo san dɛna buyina ge me ta’an basɛ ti nɛreba baŋɛ Naayinɛ, A yi kan bo ni nɔɔrɛ wa.

2: Nɛreba n pu’useri yelemɛŋɛrɛ Naayinɛ la ge ti la ka dɔla eŋa n boti se’em

Saŋa ase’a, Israeldoma la yuun ni tara la pumpɔreŋɔ yina pu’usegɔ yɛla pu’usa Naayinɛ ge Yehowa yuun zaɣesɛ ba boti ba dekɛ yelemɛŋɛrɛ pu’usegɔ la pumpɔreŋɔ pu’usegɔ gɛregɛ taaba la mɛ. (Yɛhega 32:8; Tɛɛnhegɔ 12:​2-4) Yezu yuun zɛregɛ pu’usegɔ nɛŋadoma la mɛ la ba pu’useri Naayinɛ se’em la; ba ni ita nɛreba zɛ’an wuu bamam pu’useri la Naayinɛ la ge ba ni “zaɣesɛ ninmɔ’ɔrɛ yɛla la n boi pa’alegɔ la poan n de yelemɛŋɛrɛ la nimbɔ̃zore la birikinte” la mɛ.​—Matu 23:23.

Pu’usegɔ seko n de yelemɛŋɛrɛ ma’a n wan basɛ ti nɛreba baŋɛ Naayinɛ. Yelemɛŋɛrɛ wa boi la Baabule la poan. (Yon 4:24; 17:17; 2 Timoti 3:​16, 17) Pu’usegɔ se’a pa’alegɔ n ka makɛ la Baabule la basɛ ti nɛreba zaaɛ mɛ la Naayinɛ. Pa’alegɔ zo’e zo’e ti nɛreba ti’isɛ ti la ze’ele la Baabule la poan n de wuu Trinitaasoŋa, sia la ka kiire la tinmɔlega tuɣum ze’ele la pumpɔreŋɔ pu’usegɔ poan. Pu’usegɔ seko n pa’ali yele ana taaba dela ‘yoo’ bii ba ka tari vuurɛ se’ere n sɔi la, ba zaɣesɛ la Naayinɛ pa’alegɔ ge tuɣum dɔla asaala pa’alegɔ.​—Mark 7:​7, 8.

Naayinɛ kɔ’ɔn yaɛ pu’usegɔ seko n tari nigum nigum mɛ. (Titus 1:​16) Yelemɛŋɛrɛ pu’usegɔ soŋeri nɛreba mɛ ti ba vurege lɛna Naayinɛ. Ba tari ba pu’usegɔ yɛla la tuna tuuma mɛ ba vom poan daarewoo ge daɣɛ ba yeen ita kãabegɔ bii dɔla malema. Makerɛ, Baabule la yeti: “Nɛresɛka san ti’isɛ ti eŋa pu’useri la Naayinɛ ge ka gurɛ a zɛleŋa soŋa soŋa, a pã’aseri la amea suure ge ti a pu’usegɔ la me dɛna zaŋa. Pu’usegɔ seko n ani filam ge ka dɛɣɛ Naayinɛ to Sɔ la zɛ’an dela: to bisera kiibesi la pɔkɔpa la san wuna ba ge tara tomesi soŋa ti tingɔŋɔ wa dɛɣerɔ da taɛ tɔ.” (Yames 1:​26, 27).