Beni N Sɔi Ti Nɛreba Yaɛ Taaba?​—Baabule La Yeti Bem?

Ho san kɛlesa lasebaarɛ yɛla, ho wan kɔ’ɔn wuna la nɛreba nɛ’ɛsegɔ n basɛ ti ba tuura ge dina taaba, tuna gbire gbire tuuma, ŋmɛ’ɛra bii kuura sɛba n daɣɛ ba buuri nɛreba la zaba yɛla.

• November 15, 2023 ti The New York Times la yeti: “Israel la Gaza zaberɛ la, la nɛresɛba n nɔŋɛ gbire gbire tuuma la nyaa basɛ ti nɛreba ba’ɛ tuura ge dina la taaba dabesa ana wa.”

• November 3, 2023 ti Dennis Francis n de United Nations General Assembly bisegadaana la yeti: “Kɔ’ɔn pɔsɛ October 7, nɛreba nyaa ba’ɛ nɛ’ɛsa la taaba, ti yaarɛ la basɛ ti ba tuura taaba ge tuna gbire gbire tuuma.”

Zaberɛ, nɛreba n yaɛ taaba, tuura taaba, tuna gbire gbire tuuma ka le dɛna yelesaanɛ. Yelemɛŋɛrɛ, Baabule la pa’alɛ ti nɛreba basɛba yuun ‘tɛ̃ɛri la yetɔɣebe’ero wuu pɛɛma la,’ nɔŋɛ gbire gbire tuuma la zabera. (Yooma 64:3; 120:7; 140:1) Baabule la le yeti, nɛreba n dini taaba dabesa ana wa se’em la, pa’alɛ la sɛla.

Diŋo​—La pa’alɛ ti to boi la ba’asegɔ dabesa la poan

Baabule la pa’alɛ to yɛla ayi zuo ti nɛreba kɔ’ɔn yaɛ taaba bala zina.

1. 1. Ku tɔɣɛ biŋe ti, tomam dabesa wa poan, ‘nɛreba zo’e zo’e nɔŋerɛ wan ma’ɛ.’ (Matu 24:12) Nɛreba kan le nɔŋɛ taaba. Ba wan tuɣum tara la halese’a n wan basɛ ti ba dina taaba.​—2 Timoti 3:1-5.

2. 2. Sitaana Kolekpabɛ’a la n de putɔa la n basɛ ti nɛreba ba’ɛ dina taaba zina beere wa. Baabule la yeti, ‘tingɔŋɔ wa za’a boi la be’emdaana la nu’usin.’​—1 Yon 5:19; Liligere 12:9, 12.

Yelesonɛ la dela, Baabule la yeti la kan yue, Naayinɛ wan yese yelese’a woo n ta’asɛ ti nɛreba dina taaba la basɛ. Ge malum maalɛ daaŋɔ se’a woo n boi la. Baabule la pu’ulum biŋe ti:

• ‘Naayinɛ wan duuse ba nintam ba nini poan basɛ, ti kum kan le bɔna, susa’aŋɔ la kaasega la induma kan le bɔna. Yelekɛɣesi la tole ya.’​—Liligere 21:4.