Yehowa Wan Buɣelɛ Ho Suure

1. La yuun ani Yudadoma la wani ban yuun boi Babilon tiŋa la?

YUDADOMA la yuun zaɣesɛ Yehowa la yuuma zo’e zo’e. Bala yuun basɛ ti Babilondoma la sa’am ba tiŋa la mɛ ge dekɛ ba ti ba dɛna yamesi. Ban yuun boi bim la, la yuun ani ba la wani? (2 Yel. 36:​15, 16, 20, 21) Ban yuun boi Babilon la, ba yuun tari yɔ’ɔ mɛ ita ban boti se’em. (Yer. 29:​4-7) Ge la yuun daɣɛ naana bɔ’ɔra ba se’ere n sɔi la, daɣɛ ban boti se’em n bala. La yuun ani ba la wani la ban boi Babilon la? Yameŋa ayima yeti, ‘Babilon kolaasi la poan, ti tomam ta zĩ’a tĩɛ Zion yele, kɛla.’ (Ym. 137:1) Yudadoma wa yuun eeri la subuɣelegɔ. Ge ani n wan buɣelɛ ba suure?

2-3. (a) Yehowa yuun eŋɛ la bem bo Yudadoma la n yuun de yamesi la? (b) To wan sɔsɛ la bem zaseŋɔ wa poan?

² Yehowa dela ‘subuɣelegɔ Naayinɛ.’ (2 Ko. 1:3) Yehowa nɔŋɛ a nɛreba mɛ ge bɔta ti a buɣelɛ ba suure. Yehowa yuun mi ti Yudadoma la n boi Babilon la wan baŋɛ ti ba tue mɛ la ban ka nani en la ge nyaa lebe na pu’usa en. (Isa. 59:20) Yehowa yuun basɛ ti nɔdɛ’ɛsa Isaiah gulesɛ yele wa biŋe mɛ ti la gaŋɛ yuun 100 ge ti ba nyaa nyɔɣɛ Yudadoma wa keŋɛ Babilon. Yetɔɣebiŋere wa boi la Isaiah gɔŋɔ la poan. Yele ana wa yuun soŋɛ ba la wani? ‘Naayinɛ yeti, Kpemese ya mam nɛreba wa. Mam wan buɣelɛ ya suure.’ (Isa. 40:1) Yehowa yuun buɣelɛ Yudadoma wa suure mɛ ti la bɔna Isaiah gɔŋɔ la poan.

³ Wuu Yudadoma la, saŋa ase’a tomam me ni ɛɛra la subuɣelegɔ. Zaseŋɔ wa poan, to wan sɔsɛ sarɔtɔ tutã poan ti Yehowa yuun doose buɣelɛ Yudadoma la suure: (1) A yuun pu’ulum biŋe ti a wan di sugeri bo sɛba n basɛ ba be’em la, (2) a yuun basɛ ti ba tara la beere sa’am puti’irɛ, la (3) a yuun soŋɛ ba mɛ ti ba nyaŋɛ ba dabeem la. To wan le bisɛ Yehowa n buɣeli to suure se’em zina beere wa.

YEHOWA DITI LA SUGERI

4. Yehowa eŋɛ la bem pa’alɛ ti a zoti nɛreba nimbũ’ɔ? (Isaiah 55:7)

⁴ Yehowa dela ‘Sɔ se’em n zoti nɛreba nimbũ’ɔ.’ (2 Ko. 1:3) Yehowa yuun eŋɛ pa’alɛ ti a zoti nɛreba nimbũ’ɔ la eŋa n yuun yele Yudadoma la yeti a wan di sugeri bo ba la. (Kaalɛ Isaiah 55:7.) A yuun yeti, ‘N wan zɔta ho nimbũ’ɔ ge nɔŋɛ hɔ ti la ka tara tɛka.’ (Isa. 54:8) Yehowa wan zɔ ba nimbũ’ɔ la wani? La boi bim ti Yudadoma la n yuun ka nam Yehowa la zuo, ba wan bɔna Babilon ti la yue ge Yehowa yuun yele ba ti ba kan bɔna bim wuusa. (Isa. 40:2) Bisɛ yele wa n wan buɣelɛ Yudadoma sɛba n basɛ ba be’em ge lebe Yehowa zɛ’an na la suure se’em!

5. Beni n sɔi ti to sakɛ ti Yehowa wan di sugeri bo to?

⁵ To zamesɛ la bem? Yehowa kɔ’ɔn bɔta la a di sugeri bo to. To eŋɛ la wani baŋɛ bala? To mi Yehowa n eŋɛ se’em ti a di sugeri bo to. Isaiah n yuun tɔɣɛ sɛla la, yuun kɔbesi pooren ti Yehowa yuun tum a Dayua ti a wa’ana ki bo nɛresaaleba. Yezu n ki bo to la zuo, Yehowa ‘saalum’ to be’em la za’a basɛ mɛ. (Tm. 3:19; Isa. 1:18; Ep. 1:7) Naayinɛ dela se’em n diti sugeri bɔ’ɔra tɔ!

6. To san ti’isa Yehowa n diti sugeri se’em la, la wan buɣelɛ to suure la wani? (Bisɛ foote la.)

⁶ To san tabelɛ tum be’em ge ti la kelum daana tɔ, Yehowa n yele sɛla ti la bɔna Isaiah 55:7 la wan ta’an buɣelɛ to suure. To san kelum namesa to be’em la zuo, la ta’an daana tɔ. Ge to san basɛ to be’em la, to tari puti’irɛ ti Yehowa wan di sugeri bo to. Yehowa me san di sugeri bo to, a ka le tɛ̃ra to be’em la yele. (Dekɛ makɛ Yeremia 31:34.) Bala la, Yehowa san ka ti’isa to be’em la yele, la me ka nari ti to ti’isa de yele. Yehowa biseri la sɛla ti to ita nananawa ge daɣɛ ton eŋɛ sɛla ti la tole la. (Eze. 33:​14-16) La kan yue, to Sɔ se’em n zoti nɛreba nimbũ’ɔ la wan yese yeledaaŋɔ se’a ti to be’em la ta’asɛ la.

7. To san tum be’em, bem n wan soŋɛ tɔ ti to purɛ to be’em la bo keendoma la?

⁷ Ho san tum be’em ge suɣera dɛ ti la daana hɔ, ho wan eŋɛ la wani? Baabule la ka’am tɔ ti to yele keendoma la ti ba soŋɛ tɔ. (Yam. 5:​14, 15) La daɣɛ naana ti to yele ba ton eŋɛ sɛla. Ge la nari ti to tɛ̃ra ti Yehowa ni doose la keendoma wa poan soŋɛ tɔ. Ba nɔŋɛ to mɛ ge me zɔta to nimbũ’ɔ wuu Yehowa la. To san tɛ̃ra bala ge me bɔta ti to basɛ to be’em la, to wan yele ba. To bisɛ Yehowa n yuun doose keendoma la poan soŋɛ mabia Arthura se’em. A yuun tum la be’em ti la daana en. Arthur yeti, “Mam yuun biseri la yalumfɔɔra ti la paɛ yuunɛ. Mam yuun wum la mabia n bo yetɔɣedaa n tɔɣeri putɛkeeŋa yele ti mam yuun purɛ n be’em la bo n pɔɣa la keendoma la. Mam n yuun yele ba ba’asɛ la, mam yuun vo’ose la fũu. Ge mam suure yuun kelum sa’am mɛ. Keendoma la yuun basɛ ti mam baŋɛ ti Yehowa ka zaɣesɛ mam. Eŋa n nɔŋɛ to la zuo ti a ni dɔlegɛ to tuberɛ. Ban yuun tɔɣɛ bãla bãla se’em la basɛ ti mam baŋɛ ti Yehowa sirum di sugeri bo mam mɛ.” Nananawa, Arthur nyaa dela keendoma soŋera la sore ŋmɛ’adaana. Ton mi ti to san basɛ to be’em Yehowa ni di sugeri bo to me la, ni basɛ ti to puurɛ pee mɛ!

YEHOWA BO TO LA BEERE SA’AM PUTI’IRƐ

8. (a) Yehowa yuun bo Yudadoma la bem beere sa’am puti’irɛ? (b) Wuu Isaiah 40:​29-31 n pa’alɛ se’em la, Yehowa beere sa’am puti’irɛ la yuun basɛ ti la ana Yudadoma sɛba n basɛ ba be’em la, la wani?

⁸ Yudadoma la yuun ta’an ti’isa ti ba kan le lebe bamea tiŋa. Babilondoma la yuun ka bo’ori ba yamesi yɔ’ɔ ti ba lɛbera bamea tiŋa. (Isa. 14:17) Ge Yehowa yuun bo a nɛreba la beere sa’am puti’irɛ. Yehowa yuun pu’ulum biŋe ti a wan faaɛ a nɛreba wa ti ba lebe kule bamea tiŋa. (Isa. 44:26; 55:12) Yehowa nɛŋan, Babilondoma la yuun ani wuu puusegɔ la. (Isa. 40:15) Wuu hon ni pebele puusegɔ ti la bɔregɛ se’em la, bala mea nɔɔ ti la kan kpe’em bo Yehowa ti a faaɛ a nɛreba Babilon tiŋa. Yele wa yuun soŋɛ Babilondoma la wani? La wan buɣelɛ ba suure. Isaiah yuun yeti, ‘Sɛba n dekɛ bamesi delum Yehowa la wan le tara paŋa.’ (Kaalɛ Isaiah 40:​29-31.) Ba beere sa’am puti’irɛ la wan bo ba paŋa ti ba ‘ɛ̃ɣera kuresa wuu tuguro la.’

9. Bem n yuun basɛ ti Yudadoma la tara sakerɛ ti Yehowa pu’ulumbiŋ’a la wan sirum tum tuuma?

⁹ Yehowa yuun basɛ ti Yudadoma la baŋɛ ti a pu’ulumbiŋ’a la wan tum tuuma. Wani wani? Ti’isɛ bisɛ yetɔɣebiŋ’a se’a n yuun tum tuuma. Ba yuun nyɛ Asiriadoma n yuun zabɛ nyaŋɛ Israel buuri pia la ge tari ba keŋɛ yamenɛ poan la. (Isa. 8:4) Ba yuun le nyɛ Babilondoma n sa’am Yerusalem ge tari ka nɛreba keŋɛ yamenɛ poan Babilon tiŋa la. (Isa. 39:​5-7) Ba yuun le nyɛ Babilon naba n kpeɣɛ Naba Zedekia nini ge tari en keŋɛ Babilon la. (Yer. 39:7; Eze. 12:​12, 13) Sɛla woo ti Yehowa yuun pu’ulum biŋe la yuun tum tuuma mɛ. (Isa. 42:9; 46:10) Yele ana za’a yuun basɛ ti ba tara sakerɛ ti Yehowa n pu’ulum biŋe ti a wan faaɛ ba basɛ la wan sirum tum tuuma!

10. Bem n wan soŋɛ tɔ ti to tara putɛsonɛ ba’asegɔ dabesa wa poan?

¹⁰ To zamesɛ la bem? To suure san sa’am, Yehowa pu’ulumbiŋ’a la wan kpemese to giila ti to tara paŋa. To boi la biɣi biɣi saŋa ge ti Yehowa dindoma me giisa tɔ. Ge la ka nari ti to giila kɔ’ɔsɛ. Yehowa pu’ulum biŋe ti to wan ta vɔna daarewoo paradiisi poan. Sankaŋa la, to wan ta bɔna fai ge me tara suma’asum. La nari ti to tɛ̃ra yele ana wa san daɣena bala, la wan ana wuu to vuge la nimbisi n dɛ̃ɣɛ ge bisera sɛla n ani soŋa. To kan ta’an nyɛ lɔkɔ la n som se’em la. To wan eŋɛ la wani “duuse nimbisi la” ta’an nyɛta beere sa’am n wan ta som se’em la? Saŋa woo, ni ti’isa vom n wan ta ana soŋa se’em tinpaalega la poan. To wan ta’an bisɛ vidiyo, kelese yuuma bii kaalɛ sɛla to gɔnɔ la poan n tɔɣeri tinpaalega la yele. To me ta’an yele Yehowa, pu’ulumbiŋ’a se’a ti to kɔ’ɔn gura ti la tum tuuma.

11. Bem n yuun soŋɛ mabipɔka ayima n yuun tari bãyaalega ti a kelum tara paŋa?

¹¹ Basɛ ya ti to geele beere sa’am puti’irɛ la n yuun soŋɛ mabipɔka ayima yu’urɛ n de Joy, n yuun tari bãyaalega ti la buɣelɛ a suure se’em. A yeti, “Mam suure san sa’am, mam ni yele Yehowa lan ani mam se’em mɛ se’ere n sɔi la, eŋa n mi lan ani mam se’em. Yehowa ni lebese mam zusega la mɛ ge bo mam ‘pansɛka n gaŋɛ asaala paŋa.’” (2 Ko. 4:7) Joy ni bisɛ nyɛ la amea tinpaalega la poan se’em ma’a ti ‘nɛra kan ta yeti, Mam bɛ̃’ɛri mɛ.’ (Isa. 33:24) To me san yele Yehowa lan ani to se’em ge ti’isa to beere sa’am puti’irɛ la yele, la wan bo to paŋa ti to ta’an ŋmibera yeledaaŋɔ poan.

12. Bem n basɛ ti to tara sakerɛ ti Yehowa pu’ulumbiŋ’a la wan tum tuuma? (Bisɛ foote la.)

¹² Wuu Yudadoma la, Yehowa me eŋɛ la yɛla zo’e zo’e bo to n basɛ ti to baŋɛ ti a pu’ulmubiŋ’a la wan sirum tum. Basɛ ya ti to geele pu’ulumbiŋ’a se’a n tum tuuma zina beere wa. Makerɛ, to nyɛ ti Anglo-America Tingɔŋɔ Kpe’eŋo la ‘bɔba ase’a kpe’em mɛ wuu kurugo la, ti basɛba me ka kpe’em.’ (Da. 2:​42, 43) To me wuni ‘tinmiiŋo zɛ’ɛsi to’ore to’ore poan’ ge le mɔɔla bɔ’ɔra nɛreba ‘tisi za’a’ poan. (Mt. 24:​7, 14) Yele ana wa basɛ ti to tara sakerɛ ti Yehowa pu’ulumbiŋ’a la wan sirum tum tuuma.

YEHOWA WAN SOŊƐ TƆ TI TO TA’AN NYAŊƐ TO DABEEM LA

13. (a) Bem yɛla n yuun paari Yudadoma la ba fãarɛ saŋa la? (b) Wuu Isaiah 41:​10-13 n pa’alɛ se’em la, Yehowa yuun buɣelɛ Yudadoma la suure la wani?

¹³ Yehowa yuun yele Yudadoma la n boi Babilon la ti ba wan ta bɔna fai ge a yuun mi ti ba fãarɛ saŋa la san ta pɔ̃ra, la wan kpe’em bo ba. Yehowa yuun yeti a wan basɛ ti naba n tari kpe’eŋo wa’ana sa’am tinse’esi woo n kaɛ Babilon la ka mea. (Isa. 41:​2-5) Yudadoma la yuun ka nari ti ba tara dabeem. Yehowa yuun puɣum buɣelɛ a nɛreba la suure mɛ ge ti yele ana nyaa eŋɛ. A yuun yeti, ‘Da zɔta dabeem ge mam boi mɛ la hɔ. Da fabela ge mam n de ho Naayinɛ.’ (Kaalɛ Isaiah 41:​10-13.) Yehowa n yuun yeti ‘Mam n de ho Naayinɛ la’ vuurɛ? Daɣɛ ti Yehowa yuun tiiseri Yudadoma la mɛ ti ba pu’usa eŋa, se’ere n sɔi la ba yuun mi ti ba nari ti ba pu’usa en. A yuun boti ba baŋɛ ti a boi mɛ la ba ge me wan soŋɛ ba.—Ym. 118:6.

14. Yehowa yuun le eŋɛ la bem soŋɛ Yudadoma la ti ba ta’an nyaŋɛ ba dabeem la?

¹⁴ Yehowa yuun soŋɛ Yudadoma la mɛ ti ba ta’an nyaŋɛ ba dabeem la ge basɛ ti ba baŋɛ ti a paŋa la a mi’ilum la zo’e mɛ. Yehowa yuun yele Yudadoma la ti ba gorege bisɛ ŋmarebɛa la. A yuun yele ba ti eŋa ka yeen maalɛ ŋmarebɛa la mɛ ge a mi ba za’a waabi yu’ura mɛ. (Isa. 40:​25-28) Yehowa san mina ŋmarebibesi la za’a yu’ura, a wan eŋɛ la wani kan mina a yamesi la yu’ura. Yehowa san maalɛ ŋmarebɛa, la pa’alɛ ti a tari paŋa mɛ n wan ta’an soŋɛ a nɛreba.

15. Sodeni poan ti Yehowa yuun te’ele maasum Yudadoma la n boi yamenɛ poan la?

¹⁵ Yehowa yuun yele a nɛreba wa ban wan eŋɛ se’em ba fãarɛ saŋa la san paɛ. Isaiah gɔŋɔ la pɔsega bɔba la, Yehowa yuun yele a nɛreba la ti, ‘Kɛ̃ ya bɔ’ɔrɔ poan. Yu yamesi basɛ sa. Suɣɛ yamesi fii wa. Gura ti Naayinɛ sunsɔa nyiisum la ta ba’asɛ.’ (Isa. 26:20) Yia la, gulesegɔ wa yuun tum tuuma mɛ se’em ma’a ti Naba Kirus yuun zabɛ nyaŋɛ Babilon la. Greek nɛra ayima n mi diimi yɛla yeti, “se’em ma’a ti Kirus yuun kɛ̃ Babilon tiŋa la, a yuun yele a sogɛpa la ti ba ku se’em woo ti ba wan nyɛ en yiŋa la.” Ge daaŋɔ yuun ka paɛ Yudadoma sɛba n boi yamenɛ poan la se’ere n sɔi la, ba yuun nam la Yehowa pa’alegɔ la. Ti’isɛ bisɛ la wan ana sɛba n yuun kɛ̃’ɛri Babilon tiŋa la se’em!

16. Beni n sɔi ti la ka nara ti dabeem tara tɔ la sɛla n wan ta eŋɛ mɛlesekãtɛ la poan la? (Bisɛ foote la.)

¹⁶ To zamesɛ la bem? La kan yue mɛlesekãtɛ la wan pɔsɛ. Mɛlesekãtɛ la san ta pɔsɛ, dabeem wan sãɛ nɛreba ti ba ana bura. Ge la kan ana Yehowa nɛreba bala. To mi ti Yehowa n de tomam Naayinɛ. To wan tara suure lua ti ‘to fãarɛ pɔ̃ri mɛ.’ (Lu. 21:28) Hali tisi n naɛ taaba la san ta zabera la tɔ, to wan ze’a kankaŋi. Yehowa wan basɛ ti malesi la gu’ura tɔ ge me bɔ’ɔra tɔ pa’alegɔ n wan ta’an faɛ to basɛ. A wan doose la sodeni poan bo to pa’alegɔ? To nan ka mi ge daanse’ere a ta’an doose to tansuga la poan bo to pa’alegɔ. Bala la, to wan ta’an yeti ‘bɔ’ɔrɔ’ la dela to tansuga la poan. Bilam ti to wan ta’an nyɛ gu’a. To wan eŋɛ la wani ta’an maasum gura mɛlesekãtɛ la? La nari ti to ana du’a du’a la to mabiisi la, nana Yehowa pa’alegɔ ge me sakɛ ti Yehowa doli la a tigere la poan pa’ala tɔ.—Heb. 10:​24, 25; 13:17.

17. Ho wan eŋɛ la wani ti Yehowa buɣelɛ ho suure?

¹⁷ La boi bim ti vom yuun daɣɛ naana bɔ’ɔra Yudadoma la n yuun boi yamenɛ poan la ge Yehowa yuun bo ba yelese’a woo n pakɛ ba la mɛ. A me wan eŋɛ la bala bo to. Bala la, la ka pakɛ la yelese’a woo n paari hɔ, kelum dekɛ homea delum Yehowa ti a wan buɣelɛ ho suure. Tara sakerɛ ti a diti sugeri bɔ’ɔra a yamesi mɛ ge me fabela ho yele. Kelum basɛ ti ho beere sa’am puti’irɛ la kpe’em. Tɛ̃ra ti Yehowa n de ho Naayinɛ bala la, da zɔta dabeem.