BƆBERƐ 7
Hon Wan Pa’ala Ho Bia Se’em
“Nɔya se’a te mam bɔ’ɔra ya zina wa, bɔna ya sunya poan. Dekɛ ya a pa’alɛ ya kɔma. Tɔgɔre ya a yele yan zin ya yiya poan bii yan kene sore zuo. Yan ze bii ya gan mɛ.”—Tɛɛnhegɔ 6:6, 7
Yehowa n naam deodoma bɔŋa se’em dela, dɔɣereba bisa ba kɔma. (Kolose 3:20) La dela dɔɣera zugbere yele ti a bisa a bia soŋa ti a nɔŋɛ Yehowa ge me dɛna birekina. (2 Timoti 1:5; 3:15) La me nari ti ho mina sɛla n boi ho dayɔa bii ho poyɔa suuren. Homea itigɔ wan dɛna makesonɛ bo ba. Yehowa Yetɔɣum la san bɔna ho suuren, ho wan ta’an pa’ala ho kɔma soŋa.—Yooma 40:8.
1 KELESE SOŊA TA’AN BƆKƐ BA YETI SƐLA LA
BAABULE LA N YELE SE’EM: ‘Kɛlesa yetɔɣum kalam ge da zɛɛra yetɔɣum kalam.’ (Yames 1:19) Bala n wan basɛ ti ho kɔma baŋɛ ti ba ta’an tɔɣɛ sɛla woo n pakɛ ba bo ho. La nari ti ho basɛ ti ba baŋɛ ti ho boti ho kelese sɛla ti ba yeti ba yele ho la. Basɛ ti ho itigɔ niɛ pa’alɛ ti ho daɣɛ mina ti ho lɛŋa tɔna. (Yames 3:18) Ho san basɛ ti ba baŋɛ ti ho dela mina n ka nani sɛla woo, ba kan lɛna hɔ. Tara sugurum la ho kɔma ge basɛ ti ba mina ti ho nɔŋɛ ba yele.—Matu 3:17; 1 Korint 8:1.
HON WAN TA’AN EŊƐ SƐLA:
Tara nɛŋa bɔ’ɔra ho kɔma ba san bɔta ti ya sɔsɛ
Naɛ la ho kɔma sɔsa daarewoo ge da gura yele san ta bɔna
2 KELESE SOŊA TA’AN BƆKƐ BA YETI SƐLA LA
BAABULE LA N YELE SE’EM: ‘Se’em n tari yɛm nyɛti la yɔɔrɔ.’ (Magaha 16:20) Tɛm busebo, la ni dɛna la ho ti’isɛ soŋa ta’an bɔkɛ sɛla n daani ho kɔma la. Binya’am tuuma ta’an basɛ ti kɔma tɔɣɛ zɔɛ bamea bii ba yele sɛla n ka tari vuurɛ. “Ho han ka kelehe ge lerege, la dela geretooma.” (Magaha 18:13) Da basɛ ti ho sunsɔa nyiira a tɔtɔ.—Magaha 19:11.
HON WAN TA’AN EŊƐ SƐLA:
Ho kɔma san tɔɣera sɛla n ka nari bɔ’ɔra ho da kɔɣesa ba nɔɔrɛ bii ho basɛ ti ho sunsɔa nyie
Ti’isɛ bisɛ hon yuun de bia ti sɛla ni pakɛ hɔ ti la ana ho se’em
3 LAƔUM YA NAƐ NƆƆRƐ
BAABULE LA N YELE SE’EM: “N bia wa kɛleha ho sɔ nɔɔrɛ, da zagaha ho ma pa’alegɔ.” (Magaha 1:8) Yehowa dekɛ kpe’eŋo bo la sɔ la ma ti ba bisa ba kɔma. La nari ti ho pa’ala ho kɔma ti ba nana hɔ ge bɔ’ɔra ho gilema. (Epesus 6:1-3) Kɔma ta’an baŋɛ ti ba dɔɣereba ka “naa nɔɔrɛ tara potɛnyenɛ.” (1 Korint 1:10) Ho san ka nam, da eŋɛ sɛla ho kɔma nɛŋan bala wan basɛ ti kɔma la kan bɔ’ɔra yamam n de dɔɣereba la gilema.
HON WAN TA’AN EŊƐ SƐLA:
Tari ya nɔyinɛ ya san dɔlegera ya kɔma tɔberɛ
Ti’isɛ bisɛ bem zuo ti ho pɔɣa bii ho sira puti’irɛ bɔna de to’ore kɔma bisega poan
4 MAASUM SƐLA
BAABULE LA N YELE SE’EM: “Pa’alɛ kɔma sɔrɔɔ soŋɔ la.” (Magaha 22:6) Pa’alegɔ seko n ani soŋa ti ho wan dekɛ pa’alɛ ho kɔma daɣɛ naana. La nari ti ya maasum ya wan bisa ya kɔma se’em. (Yooma 127:4; Magaha 29:17) Tubedɔlegerɛ daɣɛ ho ŋmɛ’ɛra bia ma’a ge la dela ho basɛ ti a bɔkɛ sɛla n nari. (Magaha 28:7) Pa’ala ba ti ba bɔta Yehowa Yetɔɣum la kaalegɔ ge baŋɛ naresum yɛla la. (Yooma 1:2) Bala wan basɛ ti ba tara putɛsonɛ.—Hebru 5:14.
HON WAN TA’AN EŊƐ SƐLA:
Basɛ ti kɔma la baŋɛ ti Naayinɛ sirum dela Mina n boi, ti ba wan ta’an delum en
Soŋɛ ba ti ba da dekɛ bamea kɛ̃’ɛsɛ Intanɛt Tuuma sareŋɔ se’a n ka ani soŋa poan. Pa’alɛ ba wan eŋɛ se’em gu bamea yese nɛreyaalesi poan
“Pa’alɛ kɔma sɔrɔɔ soŋɔ la.”