Namesegɔ Woo Kanle Bɔna!

Daanse’ere ho vom poan ho tabelɛ soke yeti, ‘Beni n sɔi ti to namesa wana?’ Yuun tusa n tole la, asaala nyɛ la namesegɔ yese zaba, nɔŋɔ, yeledi’ima, be’em yɛla, ŋmɛlema tuuma, bã’ãsi la kum poan. Yuun kɔbega n tole la, nɛresaaleba nyɛ la namesegɔ zo’e zo’e n gaŋɛ nu’usi. Namesegɔ wa za’a waabi wan ki’ilum?

Lebesegɔ n buɣele suure la dela ɛɛ, la me kan yue! Naayinɛ Yetɔɣum n de Baabule la yeti: “La gee fiin wa, te potɔpa la kan bɔna . . . Ge sunbogohomdoma la n wan sɔna teŋa la, tara popeelom la tarega kantɛ sɛka n boe ka poan la.” Ba wan sɔna teŋa la ti la yue la wani? “Tontɔɔdoma la n wan to’e teŋa la bɔna ka poan yɛ’ɛha.”—Yooma 37:10, 11, 29.

Naayinɛ san yese putotuuma la namesegɔ basɛ, teŋgɔŋɔ wa nyaa wan tee dɛna paradiisi. Bala ma’a la ti nɛreba wan ta vɔna wuusa ge tara imma’asum la pupeelum. Naayinɛ Yetɔɣum la yeti: “[Naayinɛ] wan duuhe ba nintam ba nini poan bahɛ. Kum, la sunsagaŋɔ la kɛlega bii iŋduŋa ka maan bɔna.”—Liligere 21:4.

Teŋpaalega la poan, hali sɛba n ki la wan le isige vɔna laɣum nyɛ kã’ã wa: “Nɛra woo, sɛba n tone som la sɛba n tone be’em [wan] ihege ba kum poan.” (Tooma 24:15) Bala n sɔi ti Yezu yun yele nɛrebe’a n tee yese a be’em poan ge tara sakerɛ a poan la yeti “Ho wan bɔna la mam zen’sɛka n de popeelom zen’an la.”—Luke 23:43.

Beni N Sɔi Ti Namesegɔ Pɔsɛ?

Naayinɛ n yun boti ti asaala bɔŋa poan beere ana soŋa la, beni n sɔi ti a basɛ ti namesegɔ pɔsɛ? Beni n sɔi ti a basɛ ti la yue bala?

Naayinɛ n yun naam Adam la Hawa la, ba yun ani la kasi ba iŋa la ba puti’irɛ poan. A yun dekɛ ba zi’ire la paradiisi gaadin la poan ge bo ba tuunɛ n tari pupeelum. Baabule la yeti: “Te [Naayinɛ] behɛ sɛla woo te a maalɛ la te la ane soŋa.” (Pin’ileŋɔ 1:31) Ba yun san kelese ni Naayinɛ nɔɔrɛ, ba yun wan dɔɣɛ ni kɔma n ani kasi ge ti teŋgɔŋɔ wa za’a deni paradiisi ti nɛreba bɔna bim tari ni pupeelum la suma’asum daarewoo.

Naayinɛ yun naam Adam la Hawa ge bo ba la fai puti’irɛ wuu eŋa n yun boti ba ana se’em la. La yun daɣɛ ti ba ana wuu maɣezin nɛreba n ka ta’an tɛ’ɛsa la. Ba yun wan kelum tari ni pupeelum dela ba dekɛ ba fai puti’irɛ la tuna tuuma sarɔsoŋɔ poan—nana Naayinɛ kisa la. Naayinɛ yeti: “Mam de [Yehowa] ya [Naayinɛ] la. Mam pa’ale ya la tontɔɔ sore, la sɛla n ane soŋa.” (Isaiah 48:17) Ba san dekɛ ba fai puti’irɛ la ita bamam n boti sɛla, la wan basɛ ti wuŋerɛ bɔna, sɛla n sɔi la Naayinɛ yun ka naam nɛresaala ti a sɔna a mea bisa. Baabule la yeti: “Tomam mi te nɛresaala vom dagɛ a mɛŋa denɛ. Nɛresaala kan ta’an [mina] n wan kena se’em.”—Yeremia 10:23.

Sɛla n de ninbaalega la dela, to yia dɔɣereba la yun ti’isɛ ti ba wan ta’an sɔna bamea bisa soŋa soŋa ti Naayinɛ nu’o kan bɔna bim. Ge ba yun zaɣesɛ Naayinɛ bisega la, a yun ka le bisa ba, bala n sɔi ti ba yun ka le dɛna zilam nɛreba. Bilam poan ti ba pɔsɛ kɛɣelena ta kuregɛ ge nyaa ki. Wuu ziim n tunɛ dɔla se’em naaŋɔ poan la, bii ŋmaayiŋa n sa’am ŋmaakuuŋɔ se’em la, bala n sɔi ti Adam be’em la kum taɛ to za’a waabi la.—Arom 5:12.

Yele La Zuo Dela—Sɔ’ɔlum La

Beni n sɔi ti Naayinɛ yun ka sa’am Adam la Hawa ge malum tee naam basɛba? Sɛla n sɔi la, nɔkpe’ene n yun isige la Naayinɛ sɔ’ɔlum la, n de Naayinɛ n tari sore ti a bisa sɛla woo la. Sokere la yun dela, Ani n nari ti a sɔna bisa? Ani bisega n ani soŋa? To san geele yele wa bisɛ, asaaleba wan nyaŋɛ sɔna bamea bisa soŋa soŋa gana Naayinɛ? Naayinɛ n bo ba yɔ’ɔ zo’e zo’e ti ba bɔna fai ita ba boti se’em la, ba boti Naayinɛ bisega bii bamea woo, Naayinɛ wan dekɛ a bisega la sɛ ze’ele kankaŋi ti la bɔna daarewoo. Naayinɛ bo asaaleba saŋa zo’e zo’e mɛ ti ba ta’an teesum ba bɔŋa poan, koosegɔ la da’a, nadire la pu’usegɔ yɛla ge ti a nu’o kan bɔna bim.

Bala basɛ ti to nyɛ la bem? Yuun tusa n tole asaala zi’iregɔ poan la, namesegɔ kɔ’ɔn paara nɛra woo mɛ hali malum gana bala. To san bisɛ yuun kɔbega sɛka n tole wa, nɛresaaleba nyɛ la namesegɔ n gaŋɛ nu’usi. Nɛreba tustusa ti ba yun ku ba Teŋgɔŋɔ Wa Za’a Zaberɛ N Pa’asɛ Buyi la. Nɛreba n gaŋɛ tustusa 100 ti ba vɛ’ɛlum ba teŋgɔŋɔ wa zaba poan. Be’em tuuma la gbiregere boi ze’a woo mɛ. Tiyooro nyua kɔ’ɔn taɛ ze’a woo mɛ. Ga’aregɔ poan bã’ãsi kelum yiregera la ze’a woo. Kom la bã’ãsi kuure la nɛreba tustusa pia zo’e zo’e yuunɛ woo. Deo poan vom yɛla la sarɔŋɔ kɔ’ɔn sa’am mɛ ze’a woo. Asaala gɔmɛt kan ta’an maalɛ yele ana wa za’a ti la ze’ele. Gɔmɛt ka boi n wan nyaŋɛ gu kuregerɛ, bã’ãsi la kum.

Asaala bɔŋa n ani se’em la dela sɛla ti Baabule la yun puɣum tɔɣɛ pa’alɛ la wan ana se’em tomam saŋa wa poan. Naayinɛ Yetɔɣum la yeti tomam bɔŋa wa poan n ani se’em la, pa’alɛ ti “teŋa ba’ahegɔ dabeha” la san ta pɔra “la wan kpe’em bo nɛreba.” Wuu Baabule la n yele se’em la, “toonbe’erodoma la nɛresɛba n dole pan’aha nɛreba wan malom gaŋɛ bala.”—2 Timoti 3:1-5, 13.

La Gee Fii Ti Namesegɔ Kanle Bɔna

Yelese’a ti to nyɛta wa za’a pa’alɛ ti asaala n basɛ Naayinɛ pooren ge nyɛ wuŋerɛ se’em la nyaa pɔri la ba’asegɔ. La niɛ peelumi ti san daɣena la Naayinɛ, asaala gɔmɛt kan nyaŋɛ loe yele. Naayinɛ na’am ma’a n wan tari suma’asum, pupeelum, imma’asum n di mi’a la vom n ka tari ba’asegɔ wa’ana. Dene zuo, Yehowa n bo yɔ’ɔ ti putotuuma la namesegɔ bɔna la pɔri la ba’asegɔ. La kan yue Naayinɛ wan isige bisɛ asaala yɛla ge sa’am bɔŋa wa poan n ka ani soŋa la.

Baabule la tɔɣɛ biŋɛ ti: “Nadoma bana wa saŋa la, [asaala gɔmɛt n boi nananawa] saazuo [Naayinɛ] wa wan sɛ sɔ’ɔlom [saazuo sa]. . . . Bo kan malom sagom. . . . Sɔ’ɔlom bona wa wan sagom sɔ’ɔlom woo n boe [zina beere wa bisegadoma], ge zɛ’a ka tara ba’ahegɔ.” (Daniel 2:44) Baabule pa’alegɔ la za’a zuo dela Yehowa wan doose a saazuo Na’am la basɛ ti la niɛ peelum ti eŋa n nari a dɛna sɔ’ɔlom za’a daana bii a bisa sɛla woo. Yezu n yun tɔɣere “ba’asegɔ dabesa” daalegɔ yɛla la, a yun yeti: “Ba wan ta mɔɔlɛ sɔ’ɔlom yelesoma bo teŋa wa woo nɛreba te la dɛna aseradaana bo teŋhe zan’an. Ge teŋa wa ba’ahegɔ wan nya paɛ.”—Matu 24:14.

Ba’asegɔ daarɛ la san paɛ, bani n wan vo’e? Baabule la lebese yeti: “Nɛre tontɔɔdoma la wan vɔna teŋa la poan, sɛba n ka tare tuure wan yee teŋa la poan, ge ba wan ŋma potɔpa la bahɛ, ge vɔn nɛre wuruba la ka poan.” (Magaha 2:21, 22) Sɛba n ka tari tuure la dela sɛba n zamesɛ baŋɛ Yehowa n boti sɛla ge tuna a puti’irɛ n boti se’em. Yezu Krista yun yeti: “Vom la n wana: te nɛreba mina te ho dela yelemɛŋɛrɛ Na’ayenɛ ma’an la, ge me mina mam Yesu Krista se’em te ho tom na la.” (Yon 17:3) Yelemɛŋɛrɛ, “teŋa wa,  . . . wan tole. Ge se’em n ete sɛla te [Naayinɛ] bɔta kɔ’ɔn bɔna mɛ wuuha.”—1 Yon 2:17.

Baabule gulesegɔ la za’a ze’ele la Yenɛ Gɔŋɔ—Farefare. Ho san nyɛ NW, mina ti la yese la New World Translation of the Holy Scriptures—With References la poan.