Vandéra, votasión ha tembiapo ojejapóva servísio militár rangue

Salúdo ojejapóva vandérape. Ñande testigos de Jehová jaguerovia ojeadoraha pe vandéra ojesaludávo ha ojepurahéivo chupe himno. Umi ojapóva upéva ohechauka ojeroviaha hetã ha imburuvichakuérare, ojerovia rangue Ñandejárare (Isaías 43:11; 1 Corintios 10:14; 1 Juan 5:21). Péicha vaʼekue yma Babilóniape. Upérõ oñemombaʼeguasu rréi Nabucodonosórpe. Ha haʼe ojehechauka hag̃ua hetãyguakuéra renondépe ojapouka peteĩ taʼanga tuichaitereíva, ha heʼi enterove oñakãityvaʼerãha ohendúvo peteĩ purahéi, himno joguaha. Péro mbohapy mitãrusu Israelgua, Sadrac, Mesac ha Abednego heʼi ndojapomoʼãiha upéva oikuaáramo jepe ojejukataha umi ndojaposéivape (Daniel, kapítulo 3).

Ha mbaʼépa oiko koʼág̃a rupi? Peteĩ lívro hérava El nacionalismo: una religión, ohaivaʼekue Carlton Hayes heʼi: “Umi omombaʼetereíva hetã oadora pe vandéra. [...] Kuimbaʼekuéra oipeʼa isombréro ohasávo henonde rupi, heta poéta ohai ñeʼẽpoty poyvípe g̃uarã, mitãnguéra katu opurahéi chupe himno”. Avei oreko isánto ára, pór ehémplo 4 de julio ojefesteha Estados Unídospe pe tetã oñemosãso hague térã Día de la Independencia. Avei oreko “umi sánto, umi héroe” ha “tupaokuéra”. Pe Diario Oficial de la Federación, Mexicoygua heʼi “pe Eskúdo, Vandéra ha pe Himno orrepresentaha ñane retã” ha “oñemombaʼevaʼerãha umi símbolo nacional”. Ha aréma peteĩ lívro heʼi hague “oñemombaʼeguasuvaʼerãha vandéra oñemombaʼeháicha kurusu” (The Encyclopedia Americana).

Ndaʼaréi ko lívro heʼi umi himno “ohechaukaha mbaʼéichapa ojehayhu peteĩ tetã. Ojejerure jepi Ñandejárape ohechauka hag̃ua umi mburuvichakuérape haperã ha oñangareko hag̃ua hesekuéra”. Upévare ñande testigos de Jehová hendápe porã jaʼe ojesaludávo vandéra ha ojepurahéivo himno ojeadoraha vandéra ha pe tetã. Pe lívro Genio y figura del norteamericano, ohaivaʼekue profesór D. W. Brogan, oñeʼẽ heta testigos de Jehová familiakuérare ohovaʼekue trivunálpe. Haʼekuéra iprovléma eskuélape ndosaludái rupi Estados Unidos vandéra ha ndojapóigui pe huraménto. Ko lívro heʼi: “Pe Corte Suprema heʼíma ojejapóvo koʼã mbaʼe ojeadoraha pe vandéra”.

Ñande ndajajapói koʼã mbaʼe oñemoĩ rupi la Biblia heʼívare, péro ndajajopýi avavépe ani hag̃ua ojapo. Avei jarrespeta pe vandéra, himno ha jajapo ‘mburuvichakuéra’ heʼíva, jaikuaágui haʼekuéra ‘ombaʼapoha Ñandejárape g̃uarã’ (Romanos 13:1-4). La Biblia heʼi avei ‘ñañemboʼevaʼerãha mburuvichakuérare’. Upéva jajapo ‘jaikoségui pyʼaguapy ha ñorairõʼỹre, jeporiahuvereko ha ñemombaʼépe’ (1 Timoteo 2:2).

Votasión politikokuérare. Kristianokuéra orrespeta umi ovotasévape. Ndajaʼéi avavépe ani hag̃ua ovota ha jajapo heʼíva umi mburuvicha ojupíva. Péro ñande mbaʼeveichavérõ ndajaikéi polítikape (Mateo 22:21; 1 Pedro 3:16). Mbaʼépa jajapóta oĩramo peteĩ léi heʼíva enterove ovotavaʼerãha térã oĩramo heta ndaijaʼéiva umi ndovotáivare? Upéicha jave ikatu jadesidi jahátapa javota. Jaikuaa Sadrac, Mesac ha Abednego oho hague Dura ñúme pe rréi heʼírõ guare. Péro ndajajaposéi mbaʼeve ñanemoĩ vaítava Ñandejárandi. Upévare tekotevẽ ñanemanduʼa koʼã mbaʼére:

1. Jesús remimboʼekuéra ndojeheʼái ko múndore (Juan 15:19).

2. Ñande kristiáno ñarrepresenta Cristo ha igoviérnope (Juan 18:36; 2 Corintios 5:20).

3. Opárupi testigos de Jehová oguerovia peteĩchaite la Biblia heʼíva ha ojoayhu (1 Corintios 1:10; Colosenses 3:14).

4. Umi ovotáva peteĩ mburuvicháre omoirũ chupe hembiapópe (ehecha mbaʼépa ñanemboʼe 1 Samuel 8:5, 10-18 ha 1 Timoteo 5:22).

5. Umi Israelgua oipotárõ guare peteĩ hapicha ogoverna chupekuéra, Jehová heʼi haʼekuéra omboykeha chupe (1 Samuel 8:7).

6. Ñañeʼẽse enterovéndi Ñandejára Rréinore, tahaʼe haʼéva ipartído polítiko (Mateo 24:14; 28:19, 20; Hebreos 10:35).

Tembiapo ojejapóva servísio militár rangue. Heta tetãme umi ndojaposéiva servísio militár ojapovaʼerã ambue tembiapo. Oikóramo upéva ñande jaikohápe jadesidi mboyve ñañemboʼevaʼerã Jehovápe ha ikatu ñaporandu peteĩ ermáno ikatupyrývape. Upe rire ikatúta jadesidi iporãvétava ñandéve g̃uarã (Proverbios 2:1-5; Filipenses 4:5).

Ñandejára Ñeʼẽ heʼi ‘ñaneñeʼẽrendu hag̃ua mburuvichakuérape ha ñanekyreʼỹ hag̃ua opaichagua tembiapo porãme’ (Tito 3:1, 2, ÑÑB). Ñanemanduʼáke ko mbaʼére jadesidíramo jajapo umi tembiapo. Avei ñañeporanduvaʼerã: “Ikatútapa pyʼaguapýpe haʼe ndajeheʼaiha ko múndore térãpa ajapóta peteĩ mbaʼe rrelihión japu oipotáva?” (Miqueas 4:3, 5; 2 Corintios 6:16, 17). “Ikatútapa ajapo gueteri che rembiapo kongregasiónpe?” (Mateo 28:19, 20; Efesios 6:4; Hebreos 10:24, 25.) “Hembýtapa chéve tiémpo ambaʼapove hag̃ua Jehovápe g̃uarã?” (Hebreos 6:11, 12.)

Peteĩ ermáno odesidíramo ojapo ko tembiapo oho rangue kárselpe, jarrespetavaʼerã haʼe odesidíva (Romanos 14:10). Ha oĩramo ndojaposéiva upe tembiapo jarrespetavaʼerã avei (1 Corintios 10:29; 2 Corintios 1:24).