Hetápe okevranta mbaʼéichapa umi rred sosiál oafekta umi imitãvape

Áño 2025 aja, heta país heʼi ipreokupantemaha mbaʼéichapa umi rred sosiál oafekta hína umi imitãvape. Peteĩva koʼã paíspe pe goviérno heʼi voi umi ndorekóitiva 16 áño ndaikatuiha oipuru umi rred sosiál. Ha oĩ hetave país oñehaʼãva hína avei ojapo koʼãichagua mbaʼe.

Iñinteresánte mbaʼéichapa umi imitãva jepe oñemeʼẽ enkuénta umi rred sosiál ikatuha ipeligróso. ¿Mbaʼérepa jaʼe upéva? Pórke abril de 2025-pe Estados Unídospe ojepuvlika kuri peteĩ enkuésta, ha upe enkuésta ohechauka “haimete la mita umi orekóva éntre 13 ha 17 áño opillaha umi rred sosiál oafekta vaimaha umi ijaveguávape” (Pew Research Center).

Umi doktór oavisáma avei mbaʼéichapa umi rred sosiál káusare, umi imitãva ikatuha oreko provléma emosionál térã mentál. El áño pasádo, peteĩ doktór hérava Vivek Murthy, oĩva upérõ de direktór henerál de salúd púvlika Estados Unídospe, heʼi: “Sinséramente ipreokupantetereíma mbaʼeichaitépa koʼág̃a umi imitãva oreko umi provléma mentál. Ha peteĩva umi rrasón prinsipál haʼe hína umi rred sosiál”.

Tuakuéra, ¿mbaʼéichapa ikatu peprotehe pene famíliape oipuru jave hikuái umi rred sosiál? La Biblia oreko heta konsého ikatútava penepytyvõ.

Tuakuéra, mbaʼépa ikatu pejapo

Peanalisamína koʼã konsého oĩva la Bíbliape.

“Pe iñarandúva [...] opensa porã ojapo mboyve álgo” (Proverbios 14:15).

Ani pepensa pene família si o si oreko vaʼerãha umi rred sosiál, koʼýte perekóvo enkuénta mbaʼeichaitépa ipeligróso umíva. Pemeʼẽ mboyve chupekuéra permíso, pehecha vaʼerã oĩmapa preparádo oipuru hag̃ua umíva. Por ehémplo, ¿orrespetánepa pejéramo chupekuéra mboy tiémpopa oipuru vaʼerã?, ¿osegítapa oreko amígo ovaléva la péna?, ¿orrechasánepa umi mbaʼe naiporãiva ohecha?

• Peikuaasevéramo, ikatu pelee umi artíkulo “¿Deberían mis hijos usar redes sociales?” ha “Enséñele a su hijo adolescente a usar con seguridad las redes sociales”.

“Peipuru porãke pene tiémpo” (Efesios 5:16).

Pepermitíramo pene famíliape oipuru umi rred sosiál, pejékena chupekuéra mbaʼéichapa ha mboy tiémpopa ikatu oipuru. Avei peexplika chupekuéra mbaʼéichapa umi rrégla pemoĩva ikatu oprotehe chupekuéra. Peñatende porãkena pehechakuaa hag̃ua oimépa pene família okambia la ijaktitu oipuru rire umi rred sosiál, ha tekotevẽramo, pesuspendeʼimi chuguikuéra.

• Pehecha oñondive pe vidéo Aníkena eipuru vai umi rred sosiál. Péicha pene família ohechakuaáta mbaʼérepa iñimportánte omoĩ límite oipuru jave umi rred sosiál.

¿Mbaʼépa ikatu pejapove? Pehecha hetave konsého bíblico oĩva pe artíkulo héravape “¿Mbaʼeichaite pevépa umi rred sosiál ikatu operhudika umi mitãrusúpe? ¿Mbaʼépa heʼi la Biblia?”.

Eaprendeve hag̃ua

La Biblia heʼi ñane tiémpope ‘pe situasión ijetuʼúta ha ipeligrosotaha’ (2 Timoteo 3:1-5). Péro avei omeʼẽ ñandéve umi konsého ñanepytyvõtava ñaaguanta hag̃ua. Pe artíkulo héravape “Hetaiterei imitãva oreko provléma mentál: ¿Mbaʼépa heʼi la Biblia?”, retopáta mas de 20 artíkulo ha vidéo orekóva heta konsého bíblico ideprovéchotava tuakuéra ha ifamíliape.