Ñañehaʼãkena jahecha hendápe porã umi provléma

1, 2. ¿Mbaʼépa tekotevẽ jajapo ñaaguanta hag̃ua umi provléma? (Ehecha pe taʼanga).

JEHOVÁ ningo ohayhueterei isiervokuérape, upéicharõ jepe oĩ umi orekóva ‘heta provléma ha ohasa asýva’ (Sal. 90:10). Oĩ umi ohasáva inhustísia térã ojepersegíva ojerovia rupi Ñandejárare, ha ótro katu ihentekuéra oñemoĩ hese oservi rupi Jehovápe. Algúnondi avei ijetuʼu pórke hasy térã ijeda. Avei oĩ umi osufríva omanógui chugui peteĩ ohayhúva térã oikógui hese peteĩ mbaʼe ivaietereíva. ¿Ndépa rehasa hína avei koʼág̃a peteĩ mbaʼe ijetuʼu ha ndepyʼapyetereíva?

² Tekotevẽ ningo jahecha hendápe porã umi provléma ñaaguanta hag̃ua. Ñamoĩ chupe remanehaha rehóvo ha peichahágui rehecha oĩha álgo ne renonderãme. Upépe nde ikatu edesidi rejeítantepa chugui, rehótantepa mbegueve térãpa repytaitéta. Péro la nde vídrio ikyʼáramo ndereikuaamoʼãi mbaʼépa ikuentave rejapo. Tekotevẽ rehecha porã la oĩva ne renonderãme redesidi hag̃ua mbaʼépa rejapóta. Upéicha avei jaikuaa hag̃ua mbaʼépa la jajapótava jareko jave provléma, tekotevẽ jahecha umi mbaʼe ijetuʼúva Jehová ohechaháicha. Upévare ko artíkulope ñaanalisáta: 1) Mbaʼéichapa jahecha vaʼerã umi provléma, 2) mbaʼépa ikatu oiko nañapensáiramo Jehová opensaháicha umi provlémare, ha 3) mbaʼe mbaʼépa ikatu jajapo jahecha hag̃ua hendápe porãnte umi mbaʼe vai oikóva.

¿MBAʼÉICHAPA JAHECHA VAʼERÃ UMI PROVLÉMA?

3. ¿Mbaʼérepa jaʼekuaa jarekotanteha voi provléma?

³ Koʼág̃a ndaikatumoʼãi voínte jajei umi provlémagui. Satanás ogoverna aja ha ñaneimperfékto rupi jahasátante voi umi mbaʼe ijetuʼúva. Avei amáske hiʼag̃ui pe fin, jarekótante voi hetave provléma tahaʼe umi desástre naturál káusare térã umi hénte aña ojapóvare (Mat. 24:8; 2 Tim. 3:13). Jaikuaaháicha Jehová amo gotyove omyatyrõta entéro mbaʼe, péro haʼe ojapóramo upéva koʼág̃ama voi haʼetéta ku oipytyvõva hína Satanáspe ogoverna hag̃ua. Upévare jaiko aja ko múndo añáme, ikatúnte voi oiko ñanderehe peteĩ “desgrásia” (Ecl. 9:12).

4. ¿Mbaʼérepa avei ñande kristianokuéra jahasa asy?

⁴ Jahasa asy avei ñamoirũ haguére Jesúspe. Jesús pyʼỹinte heʼi vaʼekue isegidorkuérape ojepersegitaha chupekuéra ojerovia rupi hese (Mat. 24:9; Juan 16:2). Jaikuaa rupi upéva nañañesorprendéi ha ñandejerovia naikangýi (1 Tes. 3:​3, 4). Jasegívo ñandefiél ijetuʼu jave, ikatu ñaime segúro jajapoha hína la iporãva ha Jehová ha Jesús ñanepremiataha omeʼẽvo ñandéve pe jeikove opaveʼỹva. Avei péicha jahechauka jadesidiha jaadorataha Jehovápe, pórke ndaipóri haʼéicha ogoverna porãva ha avei jahechauka Satanás ijapuha. Por ehémplo haʼe heʼi vaʼekue ñande jaserviha Jehovápe sólamente jaipotágui haʼe omeʼẽ ñandéve heta mbaʼe iporãva. Satanás ohechauka hag̃ua siertoha upéva ojahéi voi Jehová siervokuérare (Job 1:​9-11). Péro ñande ñambovyʼa Jehovápe jasegívo ñaaguanta jahayhúgui chupe (Prov. 27:11).

5. ¿Mbaʼépa ñanemboʼe Eclesiastés 7:​13, 14? (Ehecha pe taʼanga).

⁵ Jehová opermiti oiko ivaíva. Jehová ningo ni michĩmi naiñañái ni nañandeprovamoʼãi mbaʼe vaípe (Sant. 1:13). Upéicharõ jepe rréi Salomón heʼi vaʼekue umi mbaʼe Ñandejára ojapo vaʼekue apytépe oĩha umi “día ivaíva”. ¿Mbaʼépa heʼise upéva? (elee Eclesiastés 7:​13, 14). Rréi Salomón ndeʼiséi vaʼekue Jehová káusare la oikoha ivaíva, síno haʼe opermitinteha oiko umíva. Upéicharõ, ¿mbaʼépa ikatu ñaaprende la heʼívagui Eclesiastés 7:13 ha 14-pe? Primero ñarrekonose vaʼerãha oĩtanteha voi día iporãva ha ivaíva jaiko aja Satanás múndope. Upévare jareko jave peteĩ “día iporãva” jaagradese vaʼerã Jehovápe, pórke upéva hína peteĩ rregálo oúva chugui. Segundo, la Salomón heʼi vaʼekue ñanemomanduʼa ‘ndajaikuaaiha mbaʼépa oikóta amo gotyove’. Legálmente káda ke koʼẽ ndajaikuaái ñaneraʼarõpa hína heta provléma térãpa heta mbaʼe iporãva. Upéicharõ umi ivuénova ha iñañáva orekótante voi provléma ohaʼarõʼỹve jave.

6. ¿Mbaʼérepa Jehová opermiti jasufri? (Hebreos 12:​7, 11).

⁶ Jareko jave peteĩ provléma, Jehová ikatu ñanepytyvõ jajerovia hag̃ua hese ha ani ñandejehénte. Jehová ningo siémpre ohecha jasufri jave ha ombyasyeterei jahasa asy jave. Jehová opermitíramo jepe jasufri umi provléma káusare, haʼe lomímonte osegíta ñandegia, ohechaukáta ñandéve mbaʼeichaitépa ñanderayhu ha omeʼẽta ñandéve pe fuérsa ñaikotevẽva ñaaguanta hag̃ua (Sal. 23:4). Avei jahasa jave peteĩ mbaʼe ijetuʼúva japilla jepi mbaʼe devilidápa jareko, ha upéicha jave Jehová ikatu ñanepytyvõ ñamehora hag̃ua (elee Hebreos 12:​7, 11). Por ehémplo Job tekotevẽ vaʼekue iñumildeve, upévare ohasa asýrõ guare Jehová oipytyvõ kuri chupe oaprende hag̃ua heta mbaʼe iñimportánteva. Jaikuaaháicha ndahaʼéi kuri Jehová la ombohasa asýva Jóbpe, péro haʼe opermiti upéva ha oaprovecha omboʼe hag̃ua chupe heta mbaʼe (Job 42:​1-6). Tahaʼe haʼéva la oikóva, Jehová nopermitimoʼãi oiko ñanderehe peteĩ mbaʼe núnka ndaikatumoʼãiva oñesolusiona. Jasegírõ ñaaguanta ha jajerovia Jehováre, katuete ñambohovái porãta opa mbaʼe oúva ñande ári (Rom. 8:​35-39).

7. ¿Mbaʼérepa ikatu javyʼa jajepersegíramo jepe?

⁷ Ikatu javyʼa jajepersegi aja. Aníkena ñapensa Jehová ndovyʼaveimaha ñandereheve oĩ jave ñandepersegíva, síno legálmente upéva ohechauka Jehová ñandeguerohoryetereiha (Mat. 5:​10-12). Jarekóramo enkuénta upéva ikatúta javyʼa jajepersegi jave, ovyʼa haguéicha yma umi apóstol (Hech. 5:​40-42). Avei jasegíramo ñandefiél jajepersegi jave, ikatu hína ñaipytyvõ ótrope oikuaa hag̃ua Jehovápe ha ‘ombotuicha’ hag̃ua chupe (1 Ped. 2:12). Ñapensamíntena Josére. Jehová ningo ovendesi vaʼekue chupe oĩ aja gueteri kárselpe, ha ndahaʼéi osẽ rirénte. Upéicha avei Jehová ikatu ñanevendesi jahasa aja gueteri peteĩ pruéva ha ndahaʼéi opa riréntema (Gén. 39:​3, 23).

8. ¿Mbaʼépa avei ñanemomýi jasegi hag̃ua ñaaguanta?

⁸ Umi provléma jarekóva katuete opáta. La Job ohasa vaʼekue ñanemomanduʼa umi situasión ijetuʼúva ndahaʼemoʼãiha pára siémpre. La Biblia voi heʼi: “Jehová tuichave ovendesi Jóbpe yma guarégui” (Job 42:12). Upéicha avei Jehová tuichaitereivéntema ñanevendesíta amo gotyove múndo pyahúpe. Koʼág̃a ojejapetepáramo jepe ñanderehe umi provléma, ikatu jaʼe sapyʼaitemínte jasufriha ñakomparátarõ pe jeikove opaveʼỹvare ñaneraʼarõvare amo gotyove. Jahechasetereíma ningo mbaʼéichapa Jehová ñanevendesíta múndo pyahúpe ha upéva ñanemomýi ñaaguanta hag̃ua pe fin peve (Mat. 24:13).

IKATÚVA OIKO NAÑAPENSÁIRÕ JEHOVÁ OPENSAHÁICHA UMI PROVLÉMARE

9. ¿Mbaʼépa ikatu oiko nañapensáiramo Jehová opensaháicha umi provlémare?

⁹ Tahaʼe haʼéva pe provléma jarekóva, tekotevẽ ñapensa hendápe porã ani hag̃ua oempeora la ñane situasión. Por ehémplo ikatu hína jaju ñapensa Jehová káusare jasufriha. Upéva oiko vaʼekue peteĩ tiémpore Job rehe. Haʼe ningo oimoʼã vaʼekue Jehová kúlpare ohasa asyha ha opensa rupi upéicha “ohechaukase ihustoveha Ñandejáragui” (Job 32:2). Ñanemanduʼamína avei Noemí rehe. Primerorã haʼe okulpa vaʼekue Jehovápe la oikóvare hese (Rut 1:​13, 20, 21). Job ha Noemí osegírire opensa upéicha, ombyaíta kuri hikuái iñamista Jehová ndive (Prov. 19:3). Péro Jehová oipytyvõ kuri chupekuéra ohecha hag̃ua umi provléma haʼe ohechaháicha, ha upe rire ovendesi Job ha Noemípe ifiél haguére.

10. ¿Mbaʼépa ikatu ñañeporandu jahasa jave umi provlémare?

¹⁰ Jaikuaáramo jepe ndajahasaʼasyiha Jehová káusare, lomímonte ikatu ñañeporandu: “¿Sera piko Jehová ojepyʼapy gueteri cherehe, térã noiméi piko hesaráima haʼe chehegui?”. Ñapensáramo péicha ikatu hína jaju ñañedesanima ha ijetuʼuvétantema ñandéve jaservi hag̃ua Jehovápe (Prov. 24:10). Ñapensamína Rréi David ha Habacuc ehémplore. Haʼekuéra ningo ohasa vaʼekue avei heta mbaʼe ijetuʼúva. Sapyʼánte haʼekuéra oñeporandu vaʼekue ohendupa Jehová chupekuéra ojerure asýrõ guare ajúda (Sal. 10:1; Hab. 1:2). Péro rréi David ha Habacuc lomímonte osegi oñemboʼe ha Jehová opromete koʼã kuimbaʼépe oĩtaha ijykerekuéra. Aníkena reduda Jehová ojapotaha avei upéva nderehehápe (Sal. 10:17).

11. ¿Mbaʼépa ikatu oiko ñanderehe ndajahecháiramo hendápe porã umi pruéva?

¹¹ Ndajahecháiramo umi pruéva hendápe porã ikatu ñanesorprende oñepresenta jave ñandéve umíva ha ñapensa voi Jehová ndohejái vaʼerãha oiko ñanderehe umícha mbaʼe (1 Ped. 4:12). Ñanemanduʼamína la oiko vaʼekue Jesús disipulokuérare. Haʼekuéra ningo nontendéi mbaʼérepa ojepersegi mbaretéta kuri Jesúspe (Luc. 18:​33, 34). Jesús heʼi porãramo jepe idisipulokuérape mbaʼépa la oikótava hese, lomímonte Pedro opensa vaʼekue Jehová ndohejamoʼãiha Jesús osufri. Jesús ningo oikuaa porã vaʼekue la Itúa volunta ha avei oikuaa kuri la Pedro heʼíva noipytyvõiha chupe ojapo hag̃ua la Itúa heʼíva, upévare okorrehi Pédrope (Mar. 8:​31-33). Jesús omano rire jepe idisipulokuéra nontendéi vaʼekue ensegída umi mbaʼe oiko vaʼekue, péro lomímonte Jesús osegi vaʼekue ipasiénsia hesekuéra. Oikove jey rire Jesús oñeʼẽ vaʼekue idisipulokuérandi ha oipytyvõ chupekuéra ontende hag̃ua mbaʼérepa haʼe osufri vaʼekue, upearã ‘oexplika chupekuéra entéro mbaʼe oĩva Ñandejára Ñeʼẽme’ (Luc. 24:​25-27, 32, 44-48). Umi disípulo ojepyʼamongeta vaʼerã kuri la Jesús omboʼe vaʼekuére chupekuéra. Péicha haʼekuéra oĩtama avei preparádo pórke saʼieterei kuri ofalta ojepersegi hag̃ua avei chupekuéra. ¿Mbaʼépa ñaaprende? Ñande avei ikatu jajepyʼamongeta la Biblia heʼíva pe persekusiónre ha umi pruévare, péicha ñaimétama avei preparádo umíva oñepresenta vove.

12. ¿Mbaʼéichapa ikatu jaju ñapensa ndajahecháiramo umi mbaʼe Jehová ohechaháicha?

¹² Ndajahecháiramo entéro mbaʼe Jehová ohechaháicha ikatu hína ñapensa ojejapoha ñanderehe peteĩ inhustísia térã ñane akãme ñambotuichave hína la provléma. Por ehémplo, ikatu oĩ ermáno opensáva ojejapoha hese inhustísia, pórke noñemeʼẽi chupe peteĩ priviléhio haʼe oipotáva, térã tekotevẽ haguére oheja peteĩ asignasión orekóva. Jahechamína mbaʼépa ñaaprende peteĩ ehémplo Jesús omombeʼu vaʼekuégui. Haʼe heʼi kuri oĩ hague unos kuánto personál ohóva ombaʼapo peteĩ parraltýpe. Algúno umíva apytégui ipochy kuri pórke opensa iñinhustoha la ojepagáva chupekuéra, péro pe parralty jára heʼi peteĩvape: “Chamígo, che ndajapói nderehe mbaʼeve ivaíva” (Mat. 20:​10-13). Legálmente ningo ndojejapói kuri ni peteĩ inhustísia hesekuéra péro umi personál ojeplagea pórke iñakãme oreko hikuái oñemeʼẽve vaʼerãha chupekuéra. ¡Ajépa ningo ndajaipotaiete upéva oiko ñanderehe! Jahechamína koʼág̃a mbaʼépa ikatu jajapo jasegi hag̃ua ñapensa hendápe porã oñepresenta jave peteĩ situasión ijetuʼúva.

¿MBAʼÉPA IKATU JAJAPO OÑEPRESENTA JAVE UMI PROVLÉMA?

13. ¿Mbaʼépa ikatu oiko otoka jave ñandéve ñambohovái peteĩ situasión ijetuʼúva?

¹³ Ñande jaikuaa porã la Biblia heʼíva pe sufrimiéntore, oiméne heta vésema jaipuru umi téxto bíblico ñamokyreʼỹ hag̃ua ótrope ohasa asy jave. Péro otoka jave ñandéve ñambohovái peteĩ situasión ijetuʼúva ikatu ndahaʼéi la ifasilpáva ñandéve ñapensa hag̃ua Jehová opensaháicha. Por ehémplo ikatu ohasa ñane akãrupi Jehová ñande kastigaha térã nohenduiha ñañemboʼe jave chupe. Oimérõ ñañepyrũ hína ñapensa upéicha, ¿mbaʼépa ikatu jajapo?

14. ¿Mbaʼe rehepa ikatu ñañemboʼe jahasa asy jave? (Filipenses 4:13).

¹⁴ Jajerurékena Jehovápe tañanepytyvõ. Ikatu ñamombeʼu Jehovápe la jahasáva ha avei mbaʼéichapa ñañeñandu hína, ikatu voi jaʼe Jehovápe mbaʼéichapa jaipota haʼe ñanepytyvõ upe situasiónpe. Jajerurékena Jehovápe ijespíritu sánto jareko hag̃ua pe fuérsa ha pe arandu tekotevẽva ñaaguanta hag̃ua upe provléma. Péro ñanemanduʼákena avei ko mbaʼére: Ikatu hína Jehová nokontestái ñane ñemboʼe ñande jaipotahaichaite (Efes. 3:20). Jehová ojevalekuaa avei umi ánhel ha ermanokuérare ñanepytyvõ hag̃ua (Sal. 34:7). Ñañehaʼã vaʼerã ñañatende jahecha hag̃ua mbaʼéichapa Jehová ñanepytyvõ hína ha jaaseptákena pe ajúda haʼe omeʼẽva ñandéve. Aníkena jaduda Jehová omeʼẽsetereiha voi ñandéve ijespíritu sánto jagueropuʼaka hag̃ua oimehaichagua situasión (elee Filipenses 4:13).

15. ¿Mbaʼépa jasegi vaʼerã jajapo jahasa aja peteĩ provléma? (Ehecha pe taʼanga).

¹⁵ Jasegíkena ñamombarete ñane amista Jehovándi. Jajapókena entéro mbaʼe oĩva ñande posivilidápe Jehovápe g̃uarã ndaikatúiramo jepe jajapo anteve guaréicha. Sapyʼánte ningo ‘umi provléma oupa ñande ári ha heta jahasa asy’ péro koʼýte péicha jave ñañehaʼã vaʼerã ñapensa Jehová opensaháicha (Sal. 119:143). Upearã jalee meme vaʼerã la Biblia, jastudia ha jajepyʼamongeta hese. Japredikákena ikatumiháicha, jaha rreunionhápe ha ñakomenta. Avei jahasa memékena tiémpo ermanokuérandi ha ani ñañemohaʼeño ñandestiráramo jepe upéva (Prov. 18:1).

16. ¿Mbaʼépa ikatu ñapensa oiko jave ñanderehe peteĩ desgrásia ha mbaʼépa ikatu jajapo? (2 Corintios 10:​4, 5).

¹⁶ Jaipurúkena la Biblia ñakambia hag̃ua umi mbaʼe ñapensáva. Oiko jave ñanderehe peteĩ desgrásia ikatu ñañepyrũ ñapensa vai ñandejehe térã Jehováre. Oimérõ ñañepyrũ ñapensa upéicha, ¿mbaʼépa ikatu jajapo? (elee 2 Corintios 10:​4, 5). Iñimportánte jaipuru la Biblia ha umi puvlikasión jaikuaa hag̃ua mbaʼépa Jehová legálmente opensa. Por ehémplo, ¿ndépa repensa hína Jehová nandeguerohoryveimaha? Oimérõ upéicha ikatu restudia la apóstol Pablo ohasa vaʼekue. Haʼe opredikárõ guare hetaiterei kuri ohasa asy, péro osegi vaʼekue ifiél ha upéva ohechauka chupe Jehová ha Jesús ovyʼaha heseve (2 Cor. 11:​23-27). ¿Repensápa hína Jehová naneperdonaiha umi mbaʼe vai rejapo vaʼekuére? Oimérõ upéicha ikatu eanota unos kuánto téxto bíblico ohechaukáva Jehová ñaneperdonaha umi mbaʼe vai jajapo vaʼekuére (Is. 43:25). Relee rire umi téxto ejepyʼamongetákena umívare (Sal. 119:97). Oimérõ oiko raʼe nderehe peteĩ mbaʼe ivaietereíva, ¿epytápa eduda Jehová okuidataha isiervokuérare? Oimérõ upéicha ehekákena informasión oexplikáva mbaʼérepa Ñandejára opermiti jasufri ha avei mbaʼéichapa haʼe ñanepytyvõta toiko la oikóva ñanderehe (Sal. 91:​9-12). Ikatu avei reheka umi ermanokuéra experiénsia ohasa vaʼekue heta mbaʼe ijetuʼúva péro osegíva oservi Jehovápe vyʼápe.a

17. ¿Mbaʼépa jajapo vaʼerã oñepresentáramo ñandéve peteĩ situasión ivaíva?

¹⁷ ¿Iporãpa hína koʼág̃a la ne situasión ha nderehasái hína peteĩ provléma ijetuʼuetereíva? Oimérõ upéicha eagradesékena Jehovápe ha ejepyʼamongeta entéro umi mbaʼe porã haʼe omeʼẽvare ndéve (Ecl. 7:14). Péro oñepresentáramo ndéve peteĩ pruéva, eñehaʼãkena ehecha upe provléma hendápe porã ha ejerovia Jehováre nde pyʼaite guive. Rejapóramo upéva, haʼe nepytyvõta ‘resẽ hag̃ua upe situasióngui ha reaguanta hag̃ua’ (1 Cor. 10:13). Péro ñamoĩ chupe ñane ermanokuéra ohasaha hína peteĩ situasión ijetuʼúva, ¿mbaʼépa ikatu jajapo ñaipytyvõ hag̃ua chupekuéra? Upéva jahecháta pe artíkulo oúvape.