Jehová okumplíta ivolunta toiko la oikóva

1. Ohechaukaháicha Salmo 31:​2-5, ¿mbaʼérepa ikatu jajerovia Jehováre?

KO MÚNDO oĩvape Satanás poguýpe ñamañahápente oĩ ijapúva, oporombotavýva ha oporotraisionáva. Legálmente hasýma voi jaikuaa hag̃ua mávarepa jajeroviáta. Por ehémplo heta empresariokuéra naiñonrrádoi, umi negosiánte ovendeségui iproduktokuéra, ni ndahesapirĩri oporombotavy hag̃ua. Heta hénte katu ndaikatuvéima oasegura ni iñamigokuéra okumplitaha la heʼíva. Péro ñande katu siémpre ikatu ñakonfia Jehováre, pórke chugui “ou pe añetegua” (elee Salmo 31:​2-5). Jehová ni mbaʼevéicharõ ndaikatúi ijapu. La heʼíva guive siertoite ha ni michĩmi ndaikatúi jaduda haʼe okumplitaha la heʼíva guive.

2. ¿Mbaʼe mbaʼépa jahecháta ko artíkulope?

² Ko artíkulope jahecháta primeroite mbaʼérepa ikatu jajerovia Jehováre ñande pyʼaite guive. Upéi jahecháta mbaʼéichapa koʼẽrõitéma Ñandejára ohundíta Satanáspe ha imúndo añáme. Avei jahecháta mbaʼépa ojapóma hína Ñandejára okumpli hag̃ua ivolunta. Ko artíkulo ñanepytyvõta ñamombeʼu hag̃ua kyhyjeʼỹme ha pyʼaguasúpe la verda oĩva la Bíbliape.

¿MBAʼÉREPA IKATU JAJEROVIA JEHOVÁRE?

3. ¿Mbaʼérepa ikatu jajerovia Jehováre ñande pyʼaite guive?

³ Jehová ningo opa mbaʼe Apohare, upévare ikatu jajerovia hese. Haʼe ojapo vaʼekue pe yvága ha ko yvy, ha omeʼẽ la vída enterovépe (Gén. 1:1; Sal. 36:9; Apoc. 4:11). Jehová ojapórõ guare ñane planéta, omoĩ pype entéro mbaʼe oikotevẽva ofunsiona porã hag̃ua ha ñaikotevẽva guive jaikove hag̃ua. Por ehémplo jareko áire jarrespira hag̃ua ha y jayʼu hag̃ua. Jehová haʼe rupi ñande Kreadór ñandekuaa porãiterei, haʼe oikuaa mbaʼéichapa ombaʼapo entéro mbaʼe ko univérsope, haʼe ningo Todopoderóso. Upévare ikatu ñakonfia ñande pyʼaite guive ñandegia porãtaha ha omeʼẽtaha ñandéve peteĩ futúro iporãitereíva.

4. ¿Mbaʼérepa ñaime segúro Jehová ñanderayhuha?

⁴ Jehová ningo ñanderayhueterei, upévare ikatu jajerovia hese. ¿Mbaʼérepa Jehová okrea umanokuérape? Jehová ñandekrea omeʼẽségui ñandéve peteĩ rregálo iporãitereíva: Ñande rekove. Upévare heʼi vaʼekue: “Jajapo yvypórape ñande joguaháramo ha haʼekuéra ñandeichaguáta avei” (Gén. 1:26). Haʼe omeʼẽ ñandéve pe liverta jadesidi hag̃ua, ha oprepara ko yvy iporãitéva ñandéve g̃uarãite (Sal. 115:16). Ñandejára oipota kuri Adán ha Eva ombotuicha pe hardín ojagarrapa peve ko yvy kompletoite (Gén. 1:28; 2:15). Jehová oipota kuri Adán ha Eva ovyʼa ha odisfruta pe hardínpe, upévare omeʼẽ chupekuéra aliménto iporãva ha hetereíva, diferénte plánta ha animalkuéra ha hetaitereive mbaʼe. Koʼã mbaʼe ohechauka porã Jehová ñanderayhuetereiha ha ñanderayhutaha “opa ára g̃uarã” (Sal. 103:17).

5. a) Adán ha Eva opekáramo jepe, ¿mbaʼépa ojapo Jehová okumpli hag̃ua ivolunta? b) ¿Mbaʼe mbaʼépa Jehová okumplíma? (Ehecha pe rrekuádro “Ñandejára siémpre heʼi la verda”).

⁵ Jehová siémpre okumpli la oprometéva, upévare ikatu jajerovia hese. Jehová “ojapo ko yvy ojeiko hag̃ua pype, ndahaʼéi ojapo rei reínte vaʼekue” (Is. 45:​18, 19). Péro Adán ha Eva naiñeʼẽrendúirõ guare Jehovápe oñemosẽ pe hardíngui ha omano. Upéicharõ, ¿ndaikatumoʼãvéima piko oñekumpli Ñandejára volunta ko yvýpe g̃uarã? Si oñekumplíta, pórke Jehová siémpre okumpli la oprometéva guive. Ndaipóri mbaʼeve ni avave ikatúva ojoko chupe (Is. 46:​10, 11). La Jehová oipotáva ñande umánope g̃uarã nokambiái, haʼe oipota oiko ko yvýpe kuimbaʼe ha kuña ihústova, upévare Jehová opermiti kuri Adán ha Eva ifamília. Ha ndahaʼéi upévante, omeʼẽ avei itaʼýra peteĩete ha ohayhuetévape ñandepeʼa hag̃ua pe pekádo poguýgui, ha upéicha jareko peteĩ esperánsa iporãitereíva jaikovetaha para siémpre (Juan 3:16).

¿MBAʼÉPA JEHOVÁ OJAPÓMA HÍNA OKUMPLI HAG̃UA IVOLUNTA?

6. ¿Mbaʼépa heʼi vaʼekue Jehová pe hardín de Edénpe?

⁶ Pe “mbói ypykue oñehenóiva Diablo ha Satanás” omboliga kuri Adán ha Évape opuʼã hag̃ua Ñandejára kóntrape (Apoc. 12:9; Gén. 3:​4, 5; Juan 8:44).a Ivaieterei ningo la Satanás ojapo vaʼekue, upévare Jehová heʼi Satanáspe oñehunditaha amo gotyove (Gén. 3:15). Pe profesía ohechauka avei oĩtaha heta osegíva Satanáspe ha ojapóva mbaʼe vai haʼe ojapoháicha. Upéicharamo jepe oĩta avei ifiélva ha iñeʼẽrendúva Jehovápe.

7. ¿Máva mávapa umi osegíva Satanáspe, ha mbaʼépa ohaʼarõ chupekuéra?

⁷ Oĩ ningo umi osegíva Satanáspe, por ehémplo umi ánhel aña opuʼãva Jehováre ha avei heta persóna ndojaposéiva la Jehová heʼíva. Péicha haʼekuéra voi odesidi opuʼã Jehováre ha oñemoĩ Satanás ládo. Péro Jehová odesidíma arakaʼépa ohundíta Satanáspe ha avei entéro umi omoirũvape chupe (Dan. 2:44; Rom. 16:20).

8. ¿Mbaʼépa ojapo Jesús áño 1914-pe? (Ehecha pe taʼanga).

⁸ ¿Mbaʼérepa ikatu ñaime segúro Jehová ohunditaha Satanáspe ha umi osegívape chupe opromete haguéicha? Ñapensamína ko mbaʼére: Áño 1914-pe Jehová onombra Jesúspe rréi yvágape, ha Jesús oñorairõ Satanás ha idemoniokuéra kóntrape. Haʼekuéra operde ha upéicha rupi oñemombo chupekuéra ko yvýpe (Apoc. 12:​7-9). Upe gérra ningo oiko kuri yvágape, upéicharamo jepe ko yvýpe tuichaiterei oafekta avei pe gérra. ¿Mbaʼérepa? La Biblia heʼi: “Peñelamenta peẽ yvy ha mar, pórke pe Diablo oguejýma peẽme, ha haʼe ipochyeterei hína pórke oikuaa mbykypaitemaha pe tiémpo hembýva chupe” (Apoc. 12:12). Ha upeichaite oiko, áño 1914 guive Satanás oñehaʼãmbaite omboliga ikatúvape guive osegi hag̃ua chupe, upe haguére umi provléma oĩva ko múndope ivaive rei ohóvo. Péro koʼẽrõitéma Jesús ohundíta Satanáspe haʼéva ko múndo ruvicha ha avei entéro osegívape chupe (Apoc. 6:2). Koʼẽrõitéma Jesús oikuaaukáta enterovépe Satanás ijapuha ha omopotĩta Itúa réra (Sal. 45:​4-6; Ezeq. 38:23).

Primera gérra mundiál: U.S. National Archives photo; vómba: USAF photo; pandémia: blvdone/stock.adobe.com; sarambi: inhauscreative/E+ via Getty Images

JEHOVÁ OHEKA HA OMBYATY UMI OHAYHÚVAPE LA VERDA

9. ¿Mávapepa Jehová ombyaty koʼág̃arupi?

⁹ Ko tiémpope Jehová ombyaty hína “entéro mbaʼe oĩva yvágape ha entéro mbaʼe oĩva ko yvy ape ári oĩ hag̃ua Cristo poguýpe” (Efes. 1:10). Ko téxtope oipurúvo pe fráse “entéro mbaʼe oĩva yvágape” oñeʼẽ hína umi unhídore oiporavo vaʼekue Jehová ogoverna hag̃ua hikuái Cristo ndive yvágape. Ha oipurúvo avei pe fráse “entéro mbaʼe oĩva ko yvy ape ári” oñeʼẽ hína umi oikótavare yvy ape ári pára siémpre peteĩ paraísope. Entéro koʼã Jehová siervokuéra hembiapo heta hikuái oipytyvõvo umi ótra persónape oikuaa hag̃ua pe añetegua ha avei ohechauka hikuái Satanás ijapuha.

10. ¿Mbaʼéichapa Jehová oipytyvõ umi héntepe oikuaa hag̃ua la verda? (Apocalipsis 14:​6, 7).

¹⁰ ¿Mbaʼéichapa Jehová ombyaty hína umi persóna ohayhúvape la verda? Haʼe ojevale isiervokuérare ojepredika hag̃ua ko múndo tuichakuére. Núnka ndojepredikáiva peichaite peve ko yvy ape ári (elee Apocalipsis 14:​6, 7). Jehová oipurúramo jepe umi umanokuérape ogueraha hag̃ua umi notísia porã, umi anhelkuéra oipytyvõ avei oñembyaty hag̃ua umi persóna isinsérovape Jehová kongregasiónpe. Pe predikasión rupive umi hénte ohechakuaa Satanás ojevaleha umi rrelihión japúre omosarambi hag̃ua opárupi japu Jehová kóntrape (Apoc. 18:​2, 4). Koʼẽrõitéma entéro rrelihión japu oñehundietéta ha sólamente opytáta hína umi omombaʼeguasúva Jehovápe (Apoc. 17:16).

11. ¿Mbaʼéichapa ikatu japilla mávapa umi kristiáno verdadéro?

¹¹ Jehová ogueru iñorganisasiónpe opaichagua persónape, tahaʼe haʼéva ikultúra, ipaís, tahaʼe iplátava térã imboriahúvape (Apoc. 7:​9, 10). Koʼã persóna ohendu jave “umi notísia porã” ohechakuaa otopa hague hikuái la verda ha vyʼápe omoirũ hikuái Ñandejára puévlope (Mar. 13:10). Amáske ohasa la tiémpo ojekuaa porãvéntema mávapa oservi Ñandejárape haʼe oipotaháicha ha mávapa nahániri. Proféta Malaquías heʼi vaʼekue voi: “Ha peẽ pehechakuaa jeýta idiferenteha peteĩ persóna ihústova ha peteĩ iñañáva, peteĩ oadoráva Ñandejárape ha peteĩ ndoadoráiva chupe” (Mal. 3:18). Pe predikasión ha ikondúkta rupive umi testígo de Jehová ohechauka haʼeha kristiáno verdadéro omombaʼeguasúva Ñandejárape.

12. ¿Mbaʼéichapa pe predikasión rupive oñekumpli hína Jehová volunta?

¹² Ñande japredikávo “umi notísia porã oñeʼẽva Ñandejára Rréinore” jajapo hína la Jesús omanda vaʼekue ñandéve, ha avei ñaipytyvõ oñekumpli hag̃ua peteĩ profesía (Mat. 24:14; 28:​18-20). Ko tembiapo rupive oñepytyvõ hetaiterei héntepe ko múndo tuichakuére oiko hag̃ua chuguikuéra Jesús disípulo, ha oreko hikuái la esperánsa oadorávo Jehovápe pára siémpre. Péicha enterove jajapo ikatumíva oñekumpli hag̃ua Jehová volunta. ¡Ajépa tuichaite mbaʼe upéva!

IKATU JAJEROVIA JEHOVÁ OKUMPLITAHA LA OPROMETÉVA

13. ¿Mávapepa Satanás prinsipálmente oataka ha mbaʼérepa?

¹³ Satanás “ipochyeterei hína pórke oikuaa mbykypaitemaha pe tiémpo hembýva chupe” ha pe múndo oĩvape ipoguýpe (Apoc. 12:​12, 13). ¿Mávapepa Satanás oataka prinsipálmente koʼág̃arupi? Umi Jehová oiporavo vaʼekuépe ogoverna hag̃ua Ñandejára Rréinope, pórke haʼekuéra “okumpli Ñandejára mandamientokuéra ha oñenkarga chupekuéra pe traváho oñeʼẽ hag̃ua Jesús rehe” (Apoc. 12:17; 14:12). Avei Satanás opersegi enterove oapojávape umi unhidokuérape.

14. ¿Mbaʼépa oikóta Satanás oataka rire Jehová puévlope? (Ehecha pe taʼanga).

¹⁴ Oñehundi rire Babilonia Guasúpe, umi oapojáva Satanáspe ojapóta ikatúva entéro ohundi hag̃ua Jehová puévlope, ha upe rire oñepyrũta pe gérra de Armagedón (Apoc. 16:​13, 14, 16). Jesús ha pe ehérsito yvagapegua osalváta Jehová siervokuérape ha ohundíta hikuái opa mbaʼe hembýva Satanás múndogui (Apoc. 19:​19-21). Oiko vove upéva opaitétama umi hénte iñañáva ha ijapúva (Apoc. 21:8). Upépe enterovéva oikuaáta Ñandejára ihustoha ha siémpre heʼiha la verda.

15. ¿Mbaʼérepa ikatu ñaĩ segúro Jehová okumplitaha la oprometéva Isaías 65:​16, 17-pe? (Ehecha pe taʼanga).

¹⁵ Koʼág̃arupi mas ke núnka umi hénte oiko vaipa oñondive ha ijapu. Péro ñande Jehová siervokuéra ñaime unído, ha jasegi ñaipytyvõ umi hénte oikuaasévape la verda oike hag̃ua Jehová famíliape. Ndaipóri mbaʼeve ikatúva ojoko Jehovápe ovendesi hag̃ua isiervokuérape ha pe tembiapo ojapóva hikuái (elee Isaías 65:​16, 17). Ikatu jajerovia Jehová okumplitaha ipromesakuéra, ha la apóstol Pablo heʼi vaʼekue Romanos 8:​38, 39-pe oasegura ñandéve upéva. Upépe heʼi: “Ni ñamanóramo, ni jaikovéramo, ni umi ánhel, ni umi goviérno ikatúva ojapo, ni umi mbaʼe koʼág̃a oĩva koʼápe, ni umi mbaʼe oútava, ni umi podér, ni umi mbaʼe oĩva yvate ni umi mbaʼe oĩva ipypukuhápe, ni mbaʼeveichagua kreasión ndaikatumoʼãi ñandepeʼa Ñandejára mborayhúgui, ojechaukáva ñande Ruvicha Cristo Jesús rupive”.

16. ¿Mbaʼérepa nde ejerovia Jehováre nde pyʼaite guive?

¹⁶ Oĩ heta mbaʼe ohechauka porãva ikatuha jajerovia Jehováre, haʼe ningo siémpre heʼi la verda. Jahecháma haguéicha haʼe hína ñande Kreadór ha ñanderayhueterei, avei ogueru iñorganisasiónpe opaichagua persónape oadora hag̃ua chupe (Is. 60:22; Zac. 8:23). Jaikuaaháicha Jehová siémpre okumpli la oprometéva ha koʼẽrõitéma ohundíta Satanáspe ha ndaikatumoʼãvéima ijapu ni ombotavy avavépe. Ñande avei jaʼese David heʼi haguéicha: ‘Toñemombaʼeguasu Jehovápe, haʼe añoite ojapo umi mbaʼe iporãitereíva ipuévlo rehehápe. Toñemombaʼeguasu héra porãite opa ára g̃uarã ha toñembotuicha chupe ko yvy tuichakuére’ (Sal. 72:​18, 19).