Jehová cherekomboʼe chemitã guive

Péro amombeʼupa mboyve ko káso, añepyrũta amombeʼumi peẽme la che rembiasakue. Che anase vaʼekue Canadápe peteĩ siuda héravape Calgary pe segunda gérra mundiál aja. Ojapo hína amo 75 áñorupi og̃uahẽ hague ore rógape Donald Fraser, peteĩ mitãrusu oservíva de prekursór rregulár. Upérõ mama oasepta peteĩ kúrso bíblico. Che sýpe ogustaiterei umi mbaʼe oaprendéva la bíbliagui, péro hasykatu rupi ijetuʼu vaʼekue chupe oho meme hag̃ua rreunionhápe ha ojapo hag̃ua hetave mbaʼe kongregasiónpe. Upéicharamo jepe, oprogresa ha ojevautisa 1950-pe. Ñambyasýramo jepe, haʼe omano ohasa mboyve 2 áño ojevautisa hague. Che túa upérõ ndahaʼéi testígo de Jehová, péro opermiti peteĩ ermáno ojapo la diskúrso de funerál.

Unos kuánto día upe rire, peteĩ ermána unhída ijedáva hérava Alice cheinvita aha hag̃ua rreunionhápe. Pe ermána chekuaa pórke mama ikatu jave oho rreunionhápe, cherahámi vaʼekue hendive pe rreunión de fin de semánape. Upémarõ ajerure permíso che túape aha hag̃ua. Haʼe omeʼẽ chéve la permíso ha odesidi ohotaha chendive “unavemínte” oagradese hag̃ua pe ermáno ojapo vaʼekuépe pe diskúrso de funerál mama omanórõ guare. Upe pyharépe ojejapo pe Eskuéla Jaipurukuaa Hag̃ua la Biblia ha avei pe Aty Ñanemboʼéva Japredika Hag̃ua. Haʼetépe la che túa oho raʼe primera ves upe rreuniónpe pórke papa osegi vaʼekue peteĩ kúrso ojapokuaa hag̃ua diskúrso. Upévare pe rreunión opokoiterei hese ha igustoiterei chupe umi diskúrso ojejapóva. Upémarõ che túa odesidi oho meme upe rreuniónpe ha upéi mbeguekatúpe oñepyrũ avei oho umi ótra rreuniónpe.

Upe tiémpope, pe ermáno odirihíva pe Eskuéla Jaipurukuaa Hag̃ua la Biblia, oleémi vaʼekue umi oñeanotáva réra, ha káda uno orresponde vaʼerã “presénte”. Peteĩ pyharépe, che avei ajerure ojeleemi hag̃ua che réra pe ótra rreuniónpe. Pe ermáno cheguerohoryeterei upévare, péro noporandúi chéve antendépa hína upe ajeruréva.

Che upérõ ndapillái kuri ajeofreseha hína ajapo hag̃ua diskúrso pe eskuélape. ¡Chéngo aipotamínte kuri ojelee che réra pe rreuniónpe! Pe sigiénte semánape ojelee la che réra, che avyʼaiterei ha hatã voi haʼe “presénte”. Opa rire pe rreunión umi ermáno chefelisita joa. Ohasa rire unas kuánta semána oñentrega chéve pe kuatiaʼi amensiona vaʼekue oñepyrũvo ko artíkulo, upéva kuri pe óha de asignasión ajapo hag̃ua peteĩ diskúrso.

¡Tuicha añemondýi! Upe tiémpope umi estudiánte ojapo vaʼerã umi diskúrso de 6 a 8 minúto, ha ndahaʼéi ku ojupínteva platafórmape ha oleéva la Biblia. Papa chepytyvõ aprepara hag̃ua la che diskúrso, ha chembopraktika 20 vése voi apresenta mboyve la che diskúrso. Pe ermáno odirihíva pe eskuéla omeʼẽ chéve umi konsého ideprovechoitereíva chéve. Umi áño ohasa vaʼekuépe, Jehová cherekomboʼe che túa rupive, umi ermáno ha ermána ikatupyrýva rupive ha iñorganisasión rupive.

JEHOVÁ OSEGI CHEREKOMBOʼE

Alice, pe ermána amensiona vaʼekue, tuicha chepytyvõ añepyrũrõ guare apredika. Upe tiémpope predikasiónpe roleémi vaʼerã 3 téxto bíblico, ha upéi roofrese peteĩ lívro. Otoka jave chéve añeʼẽ peteĩ ógape, Alice oñepyrũ la konversasión, oñepresenta ha upéi ojerure chéve alee hag̃ua pe primer téxto. Upe rire che asegi la konversasión, alee pe segundo ha pe tercer téxto ha aofrese la puvlikasión. Kon el tiémpo, chéntema ikatu kuri añepyrũ añemongeta umi óga járandi. Upéi 1954-pe papa ojevautisa, upe guive haʼe oñenkarga chepytyvõ hag̃ua predikasiónpe. Che túa chemongakuaa vaʼekue haʼeño, ha oñehaʼãmbaite ikatu hag̃uáicha che ahayhu Jehovápe. Che túape g̃uarã iñimportanteterei vaʼekue umi rreunión ha pe predikasión. Upéicha rupi che aikuaa katuetei rohotaha umi rreuniónpe ha fin de semána ropredikataha.

Che ningo peteĩ alúmno rregulár porãnte vaʼekue aikeha tiémpope eskuélape. Péro umi 12 áñope aaprende heta mbaʼe ideprovechoitereíva chéve koʼág̃a peve. Por ehémplo, aaprende porã matemátika ha pe gramátika inglesa. Pe kúrso de inglés ha umi kláse chemboʼéva askrivikuaa hag̃ua umi istória, ideprovécho chéve koʼag̃aite peve akumpli hag̃ua che asignasión pe Departaménto de Rredaksiónpe.

Oĩ jepi oporandúva chéve mbaʼérepa chegusta la músika. Legálmente mokõivéva che tuakuérape ogustaiterei vaʼekue voi la músika. Arekópe 7 áño añepyrũ astudia piáno, péro la che profesóra opensa ndahaʼeiha la chevaletereíva ambopu hag̃ua. Upévare heʼi che túape ahejánte hag̃ua upe kúrso. Ha che antende mbaʼérepa, pórke upe tiémpope ndahaʼéi la cheinteresapáva pe kúrso.

Unos mése haguépe papa otopa ótra profesóra. Añepyrũ astudia hendive piáno ha kánto, ha oho porãiterei chéve. Chemitãʼípe che vos porãiterei vaʼekue, upévare agana voi algúno konkúrso. Che astudia vaʼekue músika ikatu hag̃uáicha kon el tiémpo aporomboʼe, ha péicha ikatúta añemantene aservi aja de prekursór. Péro upéi añemeʼẽ enkuénta tekotevẽtaha aipuru heta tiémpo astudia hag̃ua músika ha ajeprepara porã hag̃ua umi examenrã. Upévare ipahápe ahejánte la kúrso de músika, ha áño 1963-pe añepyrũ aservi de prekursór rregulár.

AVYʼAITEREI ASERVÍVO DE PREKURSÓR

Aservi rire un áño de prekursór rregulár añenombra aservi hag̃ua de prekursór espesiál Kapuskasing, Ontáriope. La che kompañéro oservi vaʼekue chendive héra Daniel Skinner, haʼe el dóvle ijedave chehegui. Daniel heta chemboʼe aikuaa hag̃ua mbaʼéichapa oñeorganisa vaʼerã pe kongregasión. Arekópe 20 áño añenombra aservi hag̃ua pe Komite de Servísiope, upérõ areko kuri hetaiterei mbaʼe tekotevẽva aaprende. Upévare, koʼág̃a avyʼaiterei ahechávo mbaʼéichapa ñane organisasión heʼi ñandéve iñimportantetereiha ñahekomboʼe umi mitãrusúpe. Haʼekuéra oñehaʼã mbaretéramo, ideprovechoitereíta Jehovápe imitã reheve voi.

Kapuskasing, pe siuda roservi haguépe ndahaʼéi vaʼekue la ifasilpáva jaiko hag̃ua. Inviérnope pe temperatúra oguejy voi ohupyty peve 44 grádo váho cero, ha upéi michĩmínte ojupi ha opyta 33 grádo váho cérope. Che kompañéro Dani ndive heta roguatámi vaʼekue roho hag̃ua diferénte lugárpe. Péro, ¿reikuaápa mbaʼépa la chembovyʼave vaʼekue upe asignasiónpe? Aikuaami peteĩ ermána héravape Linda Cole, upéi kon el tiémpo oiko chugui Linda Splane.

Linda ikyreʼỹ vaʼekue predikasiónpe ha oreko heta rrevisíta. Haʼe imbaʼeporãiterei, iñamávle ha ovyʼakuaa umi ermanokuérandi. Isy héra vaʼekue Goldie, peteĩ ermána ifiélva Jehovápe. Itúa katu Allen, ñepyrũrã haʼe ndohayhúi Testigokuérape. Goldie siémpre oguerahámi rreunionhápe imemby Líndape, John ha Górdonpe ha omboʼe chupekuéra opredika hag̃ua. Haʼe ojapo upéva jepe iména oñemoĩ mbarete hesekuéra. Peteĩ tiémpore enterovete: Goldie, Linda, John ha Gordon oservi vaʼekue de prekursór. Ohasa rire heta áño, Állengui oiko testígo de Jehová ha iguapoiterei vaʼekue avei kongregasiónpe.

Año 1965-pe añeinvita aha hag̃ua añembokatupyryve peteĩ kúrso de un méspe. Upéva hína pe Escuela del Ministerio del Reino ojejapóva Betel de Canadápe. Upe eskuélape heʼi chéve hikuái amyenyhẽ hag̃ua pe solisitu Eskuéla de Galaádpe g̃uarã. Che núnka napensáiva ikatuha oiko chehegui misionéro. Péro amyenyhẽ pe solisitu, ha añeinvitami aha hag̃ua pe kláse 42-pe. Galaádpe umi instruktór ontregámi oréve umi infórme ohechauka hag̃ua mbaʼetekópa roho hína hese pe eskuélape. Pe primer infórme oñemeʼẽvape chéve, chemokyreʼỹ hikuái aaprende hag̃ua ikatumíva guive ñane organisasióngui aĩ aja eskuélape. Chéngo upérõ areko 21 áñonte, upévare ou porãiterei chéve upe konsého.

Galaádpe ojeexplika vaʼekue oréve mbaʼéichapa jatrata vaʼerã umi periodísta ndive ombaʼapóva rrádio, televisión ha diáriope. Igustoiterei vaʼekue chéve aaprende umi téma. Ha ni nañeimahinái mbaʼeichaitépa ideprovéchota chéve upéi umi informasión. Péva aexplikáta peẽme ág̃a amo gotyomie.

AÑEASIGNA AHA HAG̃UA SENEGÁLPE

Unos día rojegradua rire, che kompañéro Michael Höhle ndive rohóma de misionéro ótro paíspe, Senegal Áfricape. Upérõ Senegálpe oĩ vaʼekue 100 puvlikadór rupi.

Aĩ rire che asignasiónpe unos mése, añeinvita aha hag̃ua ambaʼapo una ves a la semána pe sukursálpe. Pe sukursál ningo haʼe vaʼekue peteĩ kotýnte oĩva pe kása misionálpe. La rombaʼapohápe ningo isensillomínte vaʼekue. Péro pe siérvo de sukursál, ermáno Emmanuel Paterakis, heʼími chéve ani hag̃ua cheresarái pe sukursál orrepresentaha Jehová organisasiónpe upe paíspe. Peteĩ jey ermáno Paterakis heʼi roskrivi hag̃ua umi misionérope peteĩ kárta omokyreʼỹtava chupekuéra. Upe tiémpope ijetuʼu vaʼekue ojeprepara hag̃ua heta kárta ha hepy vaʼekue avei. Upévare roskrivi kuri umi kárta uno por uno mákina de eskrivírpe. Upearã heta rembaʼapo ha reñatende porã vaʼerã, pórke ni mbaʼevéicharõ nderejavýi vaʼerã ni peteĩ létra.

Upéi pe pyhare aha mboyvemi pe kása misionál che aikohápe, ermáno Paterakis omeʼẽ chéve peteĩ sóvre. Haʼe heʼi chéve: “David, ñane organisasión oskrivi ndéve ko kárta”. Upéi aha aavri la che kárta, ha atopami pe kárta che voi askrivi vaʼekue mákina de eskrivírpe. Péicha aaprende siémpre arrespeta vaʼerãha ñane organisasiónpe, ha upéva nodependéi tuichápa térã michĩpa upe sukursál.

Aju vaʼekue añeamigaite umi ermanokuéra oĩvare kongregasiónpe, ha sábado kaʼarupytũ añembyaty meme hendivekuéra. Hetaite avyʼa vaʼekue umi ermánondi upe tiémpope, ha koʼág̃a peve asegi aime en kontákto hendivekuéra. Senegálpe heta añeʼẽ vaʼekue francés ha upéva chepytyvõ koʼag̃aite peve avisita jave umi sukursál oĩva ko múndo tuichakuére oñeñeʼẽhápe francés.

Año 1968-pe Linda ha che roñekompromete romenda hag̃ua. Unos kuánto mésere añehaʼã aheka traváho de médio tiémpo ikatu hag̃uáicha Linda ndive rosegi roservi de prekursór Senegálpe. Péro nakonsegíri, pórke upe tiémpope ojeʼe vaʼekue umi patrónpe nokontratái vaʼerãha umi extranhérope ombaʼapo hag̃ua. Upéi aha jey Canadápe, romenda ha roñeasigna de prekursór espesiál pe siuda héravape Edmundston, oĩva pe departaménto héravape Nueva Brunswick. Ko siuda ndatuichaiete, ha opyta pe departaménto de Quebec frontérape.

ROSERVI DE PREKURSÓR NUEVA BRUNSWICK HA QUEBÉCPE

Upe tiémpope ndaipóri vaʼekue ni peteĩ puvlikadór pe puevlopegua ha saʼieterei avei umi kúrso bíblico. Pe rrelihión katólika oreko vaʼekue tuichaiterei podér, odomina voi opa mbaʼe umi hénte ojapóva. Haimete voi káda ógape oĩ peteĩ letréro heʼíva: “Koʼápe ndororresivíri umi testígo de Jehovápe”. Péro upe tiémpope ndahaʼéi vaʼekue la rorrespetaitereíva umi letréro la koʼag̃aguáicha. Upévare ore noropenái voi umi letrérore ha rosegi rog̃uahẽ umi ógape orekóramo jepe umi letréro. Káda semána, peteĩ organisasión katólika onohẽ pe diáriope peteĩ avíso heʼíva: “Jaha jaheka ha ñamosẽ umi testígo de Jehovápe”. Upérõ oĩ vaʼekue 4 Testígonte upe puévlope, Victor ha Velda Norberg, Linda ha che, upévare roikuaa porã oñeñeʼẽha hína orerehe.

Siémpre chemanduʼa rorekórõ guare pe primera visíta de superintendénte de sirkuíto. Haʼe ohasa rire orendive una semána heʼi: “La iporãvéva ikatúva pejapo koʼápe hína peñehaʼãmbaite umi hénte okambia hag̃ua la opensáva ñande testígo de Jehováre”. Upe guive romoĩ upe méta, ¡ha legálmente oikoite! Mbeguekatúpe umi hénte ohechakuaa la diferénsia, pórke ohecha hikuái ñande Testígo ñaneumildeha, péro umi líder katóliko katu oñemombaʼeguasu. Ha koʼág̃a ja oĩma peteĩ kongregasión michĩva upe siudápe.

Un áñorupi ropredika upe território oĩvape mombyryete. Upéi katu roñeasigna peteĩ kongregasión tuichávape oĩva siuda de Quebécpe. Hetaiterei rovyʼa upe kongregasiónpe, pórke umi ermáno ha ermanakuéra hory ha imbaʼeporãiterei orendive. Péro 6 mése haguépe añeasigna de superintendénte de sirkuíto.

Roservi 14 áño pukukue umi sirkuíto oĩvape provínsia de Quebécpe. Ndaikatumoʼãi voi oreresarái upe tiémpo rohasa vaʼekuégui upépe, pórke hetaiterei rovyʼa. Pe departaménto de Quebécpe oho porãiterei kuri hese la predikasión. Rovisita jave peteĩ kongregasión, katuete oĩ mas de una família oprogresáva hína ojevautisa hag̃ua.

UMI ERMÁNO IGUAPOITÉVA

Ifásil ningo jahayhu umi ermáno ha ermána oĩvape Canadápe, pe sóna oñeñeʼẽhápe idióma francés. Haʼekuéra isinséro, ovyʼakuaa ha ikyreʼỹeterei. Péro ndahaʼéi vaʼekue la ifasilpáva chupekuéra odesidi hag̃ua oservi Jehovápe, pórke heta vése la ihentekuéra oñemoĩ mbarete hesekuéra. Algúno umi mitãrusu ha mitãkuña oreko ituakuéra oamenasáva voi chupekuéra ha heʼíva: “Ehejaitéke la nde estúdio umi testígo de Jehovándi, osino tereho koʼágui”. Péro umi mitãrusu ha mitãkuñanguéra oaguanta koʼã situasión ha ifiél Jehovápe. ¡Katuete oiméne Jehová ijaguara hesekuéra!

Ndaikatúi avei cheresarái umi prekursór rregulár ha espesiál iguapoitévagui oservi vaʼekue upe tiémpope Quebécpe. La majoría iválle opyta ótro ládo Canadápe, péro ova hikuái oservi hag̃ua upépe. Haʼekuéra ndahaʼéi ku oaprendénte vaʼerã francés, síno avei oñehaʼã vaʼerã ontende umi hénte kostúmbre ha la opensa lája hikuái, pórke pe iglésia katólika oreko voi ipoguýpe umi héntepe.

Heta vése oñeasigna umi prekursórpe umi território oĩvape mombyry, ndaiporihápe ni peteĩ puvlikadór. Umi hénte ndaijaʼéi rupi Testigokuérare, umi ermánope ijetuʼu okonsegi hag̃ua peteĩ lugár oiko hag̃ua ha avei peteĩ traváho de médio tiémpo. Heta vése umi paréha omenda ramóva jepe oho oiko oñondivepa peteĩ ógape en grúpo de 4, 6 térã 8 Testígo. Oikómante hikuái péicha, pórke osino ndaikatumoʼãi opagapa umi gásto orekóva. Legálmente koʼã prekursór iguapoiterei vaʼekue. Oñepyrũ jave ostudia la Biblia peteĩ persónandi, ojapo hikuái la ikatumíva oipytyvõ hag̃ua upe iñestudiántepe. Koʼág̃a Quebécpe natekotevẽvéima ou prekursór ótro hendágui, upéva rangue heta prekursór ova upe lugárgui ha oho ótro lugár oñekotevẽhápe puvlikadór.

Yma roservi tiémpope sirkuítope, roñehaʼãmi ropredika umi mitãrusúndi sábado pyharevekue. Péicha rojapo rupi, ikatu kuri rontende porã umi provléma haʼekuéra ohasáva. Ijapyteguikuéra oĩ oservíva hína koʼág̃a de misionéro térã orekóva ótra asignasión.

Upe tiémpope oĩ algúno umi kongregasión ndorekóiva opaga hag̃ua la ore gastokuérare, upéicha rupi heta vése fin de méspe ja rosoitéma. Péicha javéngo ore ropyta Jehová pópe, pórke haʼémante oikuaa vaʼekue umi mbaʼe roikotevẽva. Péro haʼe núnka ndaorerejái, upéva rangue siémpre orepytyvõ ikatu hag̃uáicha rosegi la ore visíta ha rog̃uahẽ pe ótra kongregasiónpe.

HETA MBAʼE AAPRENDE UMI ERMÁNO IFIÉLVAGUI

Amombeʼúma kuri Galaádpe rorresivi hague peteĩ entrenamiénto ohechaukáva mbaʼéichapa rotrata vaʼerã umi periodístandi. Upéva ideprovechoiterei vaʼekue chéve aservi aja Quebécpe, pórke upépe areko kuri heta oportunida apredika hag̃ua umi rrádio, televisión ha umi diário rupive. Pyʼỹinte añeasignámi ambaʼapo hag̃ua ermáno Léonce Crépeault ndive, haʼe ningo peteĩ superintendénte viahánte ha ikatupyryeterei vaʼekue otrata hag̃ua umi periodístandi. Oñeʼẽta jave peteĩ persóna ikárgo yvatéva ndive, ermáno Léonce siémpre oñemomichĩ ha ndoikói ohechauka oikuaaha heta mbaʼe upe témare. Upéva rangue siémpre heʼi upe persónape: “Karai, ko che kompañérondi ore predikadormínte, saʼieterei roikuaa mbaʼéichapa roñeʼẽ vaʼerã televisión térã rrádiope. Péro ojejerure oréve romombeʼu hag̃ua umi héntepe ore testígo de Jehová rojapotaha hína peteĩ asambléa tuichaitereíva. Ha peẽ orepytyvõramo ikatumiháicha, roagradesetereíta peẽme”. Péicha haʼe iñumílde rupi, heta vése oĩ vaʼekue la orepytyvõva.

Upéi pe sukursál cheasigna ambaʼapo hag̃ua ermáno Glen How ndive. Haʼe ningo avogádo ha oñondive roñatende umi káso ijetuʼúvare provávlemente oñeñeʼẽtavare rrádiope, télepe ha umícha. Tuichaitereíngo chepytyvõ pe entrenamiénto arresivi vaʼekue Galaádpe, ha avei umi mbaʼe aaprende vaʼekue ambaʼapóvo ermáno Léonce ndive. Avei chéve g̃uarã peteĩ priviléhio tuichaitereíva ambaʼapo ermáno How ndive. Haʼe ipyʼaguasu ha ndokyhyjéi odefende hag̃ua pe derécho orekóva ñane organisasión, ha la iñimportantevéva haʼe ohayhu ipyʼaite guive Jehovápe.

Áño 1985-pe roñeasigna roservi hag̃ua peteĩ sirkuíto oĩvape che túa róga ypýpe, péva opyta pe sóna oéste de Canadápe. Roho rupi upépe, ikatu kuri rokuida porãve che túare. Péro haʼe omanomi 3 mése rova haguépe upe sirkuítope. Ore rosegi roservi umi sirkuíto oĩva sóna oéste de Canadápe, 1989 peve. Upe áñope rorresivi peteĩ asignasión tuicha oresorprendéva, roñeinvita roho hag̃ua roservi Betel de Estados Unídospe. Upérõ rohejámante pe servísio de sirkuíto haimete 19 áño haguépe. Umi áño ohasa vaʼekuépe hetaite ermáno ha ermána orerresivi hógape torypápe ha rokaru hendivekuéra. Roagradeseterei ningo koʼã ermánope pórke imbaʼeporãiterei orendive.

ROVA ESTADOS UNÍDOSPE

Rog̃uahẽ rire Broóklynpe, añeasigna ambaʼapo hag̃ua Departaménto de Servísiope. Aagradeseterei ningo cherekomboʼe porãiterei haguére hikuái upépe. Pe departaméntope aaprende peteĩ leksión iñimportantetereíva: Ndovaleiha apensa antende porãmaha peteĩ mbaʼe aikuaapa mboyve umi detálle oĩva. Upéi 1998-pe añeasigna ambaʼapo hag̃ua Departaménto de Rredaksiónpe, ha upépe asegi gueteri aaprende heta mbaʼe. Heta áñore areko pe priviléhio aipytyvõvo ermáno John Bárrpe, upérõ haʼe oservi de koordinadór pe Komite de Rredaksiónpe. Amombaʼetereíngo umi mbaʼe aaprende vaʼekue ha ikatu haguére ahasa heta tiémpo hendive. Ermáno Barr ningo osegi porãiterei vaʼekue la Jesucristo ehémplo.

Avyʼaiterei ikatu haguére ambaʼapo umi ermáno ha ermána iñumíldeva ykére pe Komite de Rredaksiónpe. Haʼekuéra siémpre oñemboʼe ha ojerure Jehovápe toipytyvõmi chupekuéra ojapo porã hag̃ua itraváho. Koʼã ermáno ha ermána oikuaa Ñandejára espíritu rupivénte osẽ porãha umi traváho, ha ndahaʼéi haʼekuéra ivaleterei rupi.

Che rembireko Linda ndive roho rovisita umi ermáno ha ermanakuérape 110 paíspe, ha upéva peteĩ vendisión orembovyʼaitereíva. Umírupi rohecha mbaʼeichaitépa ohayhu Jehovápe umi misionéro, umi ermáno oĩva Komite de Sukursálpe ha umi ótro oservíva de tiémpo kompléto. Tuichaiterei vendisión oréve g̃uarã rohecha mbaʼeichaitépa ombaʼapo jejopy ha ifiél umi ermáno oĩva koʼã diferénte paíspe. Haʼekuéra osegi oservi Jehovápe oikóramo jepe gérra, ipoʼíramo jepe la pióla, ha ojepersegíramo jepe chupekuéra.

Koʼã áño ohasa vaʼekuépe, ahechakuaa mbaʼeichaitépa Linda chepytyvõ akumpli hag̃ua umi che asignasión. Haʼe ningo ohayhueterei la héntepe, ha ojapo voi ikatumíva oipytyvõ hag̃ua chupekuéra. Linda ivale avei oñepyrũ hag̃ua oñemongeta la héntendi oimehápe. Haʼe oipytyvõma hetápe oservi hag̃ua Jehovápe, ha avei oipytyvõ umi oñemomombyry vaʼekuépe ou jey hag̃ua kongregasiónpe. ¡Linda ningo peteĩ rregálo ijojahaʼỹva Jehová omeʼẽva chéve! Koʼág̃a ja oreedáma rohóvo, ha roagradeseterei umi ermáno ha ermána imitãvape orepytyvõ haguére roviaháta jave ha hetave mbaʼépe (Mar. 10:​29, 30).

Apensávo umi 80 áño ohasa vaʼekuére avyʼa ha aagradeseterei. Añeñandu voi pe salmísta oñeñandu haguéicha, haʼe heʼi: “Ñandejára, nde ningo cherekomboʼe chemitã guive, ha koʼág̃a peve che asegi amombeʼu umi mbaʼe porã nde rejapóva” (Sal. 71:17). Che asegise avei ajapo upéva aikove aja pukukue.