Evyʼákena oĩ jave ndochaʼéiva nderehe

1. ¿Mbaʼérepa osorprende umi héntepe la Jesús heʼi vaʼekue?

PE SERMÓN del Móntepe, Jesús heʼi vaʼekue: ‘Umi hénte ndaijaʼéiramo penderehe, pevyʼa vaʼerã’ (Luc. 6:22). Oiméne umi ohendu vaʼekue Jesúspe oñesorprende raʼe ohendúvo upéva, pórke legálmente ndaigústoi oĩ jave ndochaʼéiva ñanderehe. ¿Péro mbaʼérepa Jesús heʼi raʼe upéva? Koʼág̃arupi ningo heta oĩ ndaijaʼéiva ñanderehe, upévare iñimportánte ñambohovái upe porandu. Ko artíkulope jahecháta mbaʼérepa oĩ ndaijaʼéiva ñanderehe, ha mbaʼépa ikatu jajapo javyʼa hag̃ua upéicha jave.

¿MBAʼÉREPA OĨ NDAIJAʼÉIVA ÑANDEREHE?

2, 3. a) ¿Mbaʼérepa oĩ ndaijaʼéiva ñanderehe? b) ¿Mbaʼérepa iñimportánte jaikuaa porã mávapa la añetehápe ndochaʼéiva ñanderehe? (Juan 16:​2, 3).

² Umi hénte ndochaʼéi ñanderehe jaadora rupi Jehovápe. Jesús oñeʼẽrõ guare umi opersegíta ha ojukátavare isegidorkuérape, heʼi vaʼekue: “Haʼekuéra ojapóta koʼã mbaʼe pórke ndachekuaái chéve ni pe Túape” (elee Juan 16:​2, 3). ¿Péro mávapa legálmente la ndochaʼéiva Jehová siervokuérare? Upéva hína Satanás. La Biblia heʼi voi haʼe haʼeha “ko múndo jára” (2 Cor. 4:​3, 4). Upéicharõ Satanás ojapo ikatúva entéro ani hag̃ua umi hénte oikuaa Jehovápe, ha omomýi chupekuéra oñemoĩ hag̃ua Jehová siervokuérare (Juan 8:​42-44). ¿Mbaʼérepa iñimportánte jareko upéva enkuénta? Pórke upéva ñanepytyvõta ani hag̃ua ñandeháma jaju ndajachaʼéi umi ñandepersegívare.

³ Jahechamína peteĩ ermáno hérava Pedro ehémplo, haʼe oiko peteĩ país ojeproivihápe jaadora Jehovápe.a Haʼe osegi rupi ifiél Jehovápe oho kárselpe, oñembyepoti vaipaite chupe, ha heta mésere oñemoinge chupe kalavósope opyta hag̃ua haʼeñoite. Haʼe heʼi: “Apilla porãiterei Satanás ha idemoniokuéra ndoipotaiha asegi chefiél Jehovápe. Apilla avei la majoría umi guardiakuéra ha autoridakuéra, ndahaʼeiha ndochaʼéiva ñanderehe. Haʼekuéra ojapónte itraváho”. Peteĩ ermáno Croaciapegua ituakuéra ndahaʼéiva Testígo otrata vaieterei chupe. Haʼe heʼi: “Ahechakuaa legálmente Satanás haʼeha la che kontrário, ha ndahaʼéi che tuakuéra” (Efes. 6:12).

4. ¿Mbaʼépa ikatu ñaaprende Jesús ha Esteban ehémplogui? (Ehecha pe taʼanga).

⁴ ¿Péro iporãpa ñande ndajachaʼéi avei umi ñane kontrariokuérare? ¡Ni mbaʼevéicharõ! La Biblia heʼi voi ñañemboʼe vaʼerãha ñane enemigokuérare (Mat. 5:44). Jesús ha Esteban omoĩ ñandéve ehémplo porã. Umi soldádo rrománo oklavárõ guare Jesúspe pe yvyráre, haʼe oñemboʼe hesekuéra péicha: “Che Ru, eperdonána chupekuéra” (Luc. 23:34). Jesús ojerure Jehovápe operdona hag̃ua umi soldádo ojuka vaʼekuépe chupe. Ha oiméne avei Jesús opensa umi hénte ojerure vaʼekuére ojejuka hag̃ua avei chupe. Umi héntepe ningo omboliga umi rrelihionkuéra omoakãva, ha Jesús ohechakuaa haʼekuéra legálmente ndoikuaáinte hague la ojapóva. Upéicha avei, pe disípulo Esteban ojerure vaʼekue Ñandejárape operdona hag̃ua umi ojuka vaʼekuépe chupe (Hech. 7:​58-60). ¿Ohendúpa raʼe Jehová oñemboʼérõ guare chupe Jesús ha Esteban? Si ohendu. Heta umi ojerure vaʼekue ojejuka hag̃ua Jesúspe, upe rire ojerovia hese ha ojevautisa (Hech. 2:​36-41). Ha avei Saulo de Tarso, haʼéva peteĩva umi oĩ vaʼekue ojejukárõ guare Estébanpe, upe rire avei ojerovia Jesúsre. Pablo ipyʼaite guive ombyasy umi mbaʼe vai ojapo vaʼekue oikuaa mboyve Jehovápe (1 Tim. 1:13).

5. ¿Mbaʼépa nde reaprende César experiénsiagui?

⁵ Koʼág̃a peve, Jehová osegi orresponde umi ñemboʼe jajapóva umi ñandepersegíva rehehápe. Jahechamína César káso. Haʼe ningo oiko Venezuélape, ha itúa oñemoĩ mbarete vaʼekue hese haʼe haguére Testígo. César heʼi: “Mama ningo ikalidaiterei vaʼekue. Omotenondéramo jepe Ñandejára Rréino, haʼe siémpre okuida porã orerehe ha orrespetaiterei che túape. Haʼe oremboʼe chéve ha che ermanokuérape oreñeʼẽrendu hag̃ua papápe, ndojeruréima guive oréve álgo Jehová ndoipotáiva rojapo”. Tiémpo rire César túa ou okambia. César heʼi: “Una vuélta añemboʼe che pyʼaite guive Jehovápe, ha upéi aporandu papápe ndostudiaséipa chendive la Biblia. Ni ndagueroviaséi ningo heʼírõ guare chéve ostudiaseha”. Tiémpo rire César túa ojevautisa. Siérto, naentéroi umi ñandepersegíva ningo ojapóta peichagua kámbio, péro ohechávo la ñane kondúkta ikatu hína okambiamie. ¡Ajépa javyʼaite jahechávo upéva! Jehová ningo haʼe pe “Hués ohusgáva ko yvy kompletoite”, ha haʼe ñandeporiahuverekoiterei. Hiʼãite ningo ñandéve Jehová ogueru avei iñorganisasiónpe umi oñemoĩvape ñanderehe (Gén. 18:25).

6. Heʼiháicha Marcos 13:​13, ¿mbaʼérepa avei umi hénte ndaijaʼéi ñanderehe?

⁶ Umi hénte ndochaʼéi ñanderehe jarrespeta rupi Jesúspe. Jesús heʼi vaʼekue isegidorkuéra teetépe ojepersegitaha, haʼe heʼi: “Avave ndaijaʼemoʼãi penderehe peẽ haʼe haguére che disípulo” (elee Marcos 13:13). ¿Mbaʼérepa ñande jarrespeta Jesúspe? Haʼe rupi pe Rréi Ñandejára Rreinopegua, ha oreko rupi tuichaiterei autorida. ¿Ha mbaʼeichagua héntepa la ndaijaʼéiva ñanderehe? Umi odesidíva oapojataha umi goviérno umánope, oapoja rangue pe Rréi Jehová voi oiporavo vaʼekuépe, Jesucristo. Jesús oñepyrũma ogoverna yvágape Ñandejára Rréinope áño 1914 guive, ha koʼẽrõitéma haʼe ohundíta enterove umi ótro goviérnope.

7, 8. ¿Mbaʼérepa avei algúno oñembohory Jehová siervokuérare? (Juan 15:​18-20). (Ehecha pe taʼanga).

⁷ Oĩ ndaijaʼéiva ñanderehe ndajaikói rupi umi hénte Satanás mundopegua oikoháicha. Jesús heʼi vaʼekue isegidorkuérape haʼekuéra ndoikomoʼãiha “umi hénte ko mundopegua oikoháicha”, ha upévare oĩtaha ndaijaʼéiva hesekuéra (elee Juan 15:​18-20). Ñande ningo jasegi umi kristiáno ypykue ehémplo, upévare jarrechasaite umi hénte oñekomporta lája ha oñeʼẽ lája. Upévare heta ñane ermáno ha ermanakuérape ojetrata vai itravahohápe, eskuéla térã koléhiope (1 Ped. 4:​3, 4). Upéicharamo jepe ñande javyʼaiterei algúno umi ñandepersegíva oñepyrũ haguére okambia ha ñanderrespeta.

⁸ Jahechamína Ignacio ehémplo, oikóva América Centrálpe. Heta áñore koléhiope iprofesór oñembohory hese odesidi haguére hekopotĩ Ñandejára oipotaháicha. Upe rire, omohuʼã mboyvemi ikoléhio, iprofesór oporandu Ignáciope mbaʼéichapa ikatu osegi ojapo la Biblia heʼíva oĩramo jepe hetaite oñembohorýva hese. Ignacio heʼi ohechakuaaha Ñandejára léi heʼíva oproteheha chupe heta mbaʼe vaígui. Upe rire Ignacio oinvita iprofesórpe oho hag̃ua rreunionhápe, ha oñesorprendeterei oasepta haguére la iñinvitasión. Upéi pe profesór katu la oñesorprendéva ohechávo mbaʼeichaitépa ikalida umi ermanokuéra. Pe profesór osegi oho meme rreunionhápe, ha ostudia rupi la Biblia oĩma kuri avei la oñemoĩ mbaretéva hese. Péro haʼe osegi oñemoag̃uive Jehováre, ha upe rire ojevautisa.

9, 10. a) ¿Mbaʼe ótra kósapepa ñanediferénte umi héntegui? b) ¿Mbaʼépa ikatu ñaaprende apóstol Pablo ehémplogui?

⁹ Ñande jaservíva Jehovápe ñanediferénte avei umi ótro héntegui, pórke nañañentremetéi polítikare ni umi gérrare (Juan 18:36). Ñande ningo jarrespeta umi léi omoĩva umi goviernokuéra, pórke jasegi pe konsého oĩva Romanos 13:​1-pe. Upéicharamo jepe ñande ndajaapojái ni peteĩ kandidátope, ni ndajaipotái peteĩ puésto polítiko. ¿Mbaʼérepa? Pórke ñandefiél Jehovápe ha jaapoja Irréino añoite, oĩva Cristo poguýpe. Heta ñane ermánope oñemoinge kárselpe ojerovia rupi Jehováre, upéicharamo jepe haʼekuéra osegi opredika. Péicha osegi hikuái apóstol Pablo ehémplo, haʼe ningo hetaiterei tiémpore oĩ vaʼekue kárselpe ha préso hógape (Hech. 24:27; 28:​16, 30). Upéicharamo jepe apóstol Pablo osegi opredika umi notísia porã enterove ohendusévape chupe, umíva apytépe umi guárdia kársel, umi ombaʼapóva trivunálpe, governadór, umi rréi, ha amalisia umi ofisiál ombaʼapóvape pe emperadór rrománo Nerónpe g̃uarã (Hech. 9:15).

¹⁰ Ñane tiémpope oĩ avei heta ermáno ojegueraháva kárselpe ha oaprovecháva upéva opredika hag̃ua entéro ohendusévape chupekuéra, umíva apytépe umi hués, umi ombaʼapóva pe goviérnope, ha umi guárdiape. Peteĩ ñane ermáno ojegueraha vaʼekue kárselpe mas de 6 áñore noñentremetéi rupi polítikare, heʼi oaprovecha porãiterei hague upe tiémpo. Chupe g̃uarã upéva ndahaʼéi vaʼekue peteĩ kastígo, síno peteĩ oportunida omeʼẽva chupe Jehová oheka hag̃ua umi hénte isinsérovape. Ñande avei javyʼáta peichahágui Ñandejára omeʼẽramo ñandéve upeichagua oportunida (Col. 4:3). Péro oĩ hetave ótra kósa ñanembovyʼáva oĩramo jepe ndaijaʼéiva ñanderehe jaservi rupi Jehovápe, jahechamína umíva.

¿MBAʼÉREPA IKATU JAVYʼA OĨRAMO JEPE NDAIJAʼÉIVA ÑANDEREHE?

11. ¿Mbaʼéichapa oĩ jave oñemoĩva ñanderehe ñanepytyvõ jajeroviave hag̃ua? Emombeʼu peteĩ ehémplo.

¹¹ Ñande jaikuaa oĩ jave ndaijaʼéiva ñanderehe oñekumpliha hína umi profesía bíblica. Pe primera profesía oĩvape la Bíbliape, Jehová heʼíma vaʼekue voi Satanás ha umi oĩva ipoguýpe ndaijaʼemoʼãiha isiervokuérare (Gén. 3:15). Jesús heta vése ohechauka vaʼekue siertoha ko profesía (Mat. 10:22; Mar. 13:​9-12; Luc. 6:​22, 23; Juan 15:20). Ha heta ótro eskritór bíblico oprofetisa vaʼekue avei oĩtaha ñandepersegíva (2 Tim. 3:12; Sant. 1:2; 1 Ped. 4:​12-14; Jud. 3, 17-19). Upéicha rupi, oĩ jave ndaijaʼéiva ñanderehe ha ñandepersegíva, ñande nañañesorprendéi. Upéva rangue javyʼa, pórke upéva okumpli hína umi profesía oĩva la Bíbliape, ha ohechauka porã ñandéve jaserviha hína Ñandejára teépe. Peteĩ ermána oikóva peteĩ país ojeproivihápe jaservi Jehovápe heʼi: “Añemeʼẽrõ guare Jehovápe aikuaáma vaʼekue voi oĩtaha oñemoĩva cherehe. Upéicha rupi oĩ jave ndaijaʼéiva cherehe, che nañemondýiri ni nañesorprendéi”. Oĩ vaʼekue hetaiterei oñemoĩva ko ermánare, ha peteĩva umíva apytépe haʼe vaʼekue voi iména. Haʼe heta omaltrata vaʼekue ñane ermánape, por ehémplo ohapy voi chugui ibíblia ha umi puvlikasión. Péro ñane ermána ndokyhyjéi, upéva rangue ojeroviave rei Jehováre (Heb. 10:39). Haʼe heʼi: “La Bíbliape ojeprofetisáma voi kuri oĩtaha oñemoĩva ñanderehe, upéicha rupi aikuaa porã oikotaha katuete upéva. Ha ko profesía oñekumpli rupi cherehe voi, aime segúra kóva haʼeha pe rrelihión verdadéra”.

12. ¿Mbaʼe mbaʼépa oipytyvõ kuri peteĩ ermánope oaguanta hag̃ua pe persekusión?

¹² Jaikuaáramo jepe oĩtaha ñandepersegíva, sapyʼánte ikatu ijetuʼu ñandéve ñaaguanta hag̃ua. Pe ermáno ojegueraha vaʼekue kárselpe heʼi voi: “Sapyʼánte añeñandu vaieterei ha añedeprimi pe kárselpe. Upéicha rupi cherasẽ voi”. ¿Mbaʼépa oipytyvõ ko ermánope oaguanta hag̃ua upe situasión? Haʼe heʼi: “Siémpre añemboʼe vaʼekue. Káda pyhareve apuʼãre añemboʼéma voi. Upéi duránte el día oñepresentáramo peteĩ situasión ijetuʼúva, añemboʼe jey Jehovápe. Ha ahechávo umi inhustísia chemorrenegaitereíva, aha añemboty pe váñope ha añemboʼe upépe”. Ñane ermáno heta avei ojepyʼamongeta umi ehémplo yma guare ha koʼag̃aguáre ohechaukáva ikatuha ñandefiél Jehovápe. Koʼã mokõi mbaʼe tuichaiterei oipytyvõ pe ermánope oaguanta hag̃ua pe persekusión, ha avei oĩ hag̃ua trankílo Jesús opromete haguéicha (Juan 14:27; 16:33).

13. ¿Mbaʼépa ñanepytyvõta pono ipuʼaka ñanderehe umi ñandepersegíva?

¹³ Jahayhúramo Jehovápe ha ñane ermanokuérape, ndaipuʼakamoʼãi ñanderehe umi ñandepersegíva. Jesús ningo ohayhueterei vaʼekue Itúa Jehovápe ha iñamigokuérape omanoite peve (Juan 13:1; 15:13). Ñande jasegíramo iñehémplo ha jahayhueterei avei Jehovápe ha ñane ermanokuérape, ni núnka ndaipuʼakamoʼãi ñanderehe umi ñandepersegíva. Jahechamína mbaʼéichapa apóstol Pablo ehémplo ohechauka porã siertoha upéva.

14. ¿Mbaʼépa oipytyvõ vaʼekue Páblope ipyʼaguasu hag̃ua ikatúramo jepe ojejuka chupe?

¹⁴ Apóstol Pablo ojejuka mboyvemi heʼi vaʼekue iñamígo Timotéope: ‘Pe espíritu sánto Ñandejára omeʼẽva ñandéve nañanembopyʼajúi. Upéva rangue omeʼẽ ñandéve podér ha mborayhu’ (2 Tim. 1:7). ¿Mbaʼépa heʼise kuri apóstol Pablo? Haʼe ohechauka porã kuri jahayhúramo Jehovápe, ikatuha ñaaguanta oimehaichagua situasión ijetuʼúva (2 Tim. 1:8). Apóstol Pablo oikuaa vaʼekue ikatuha ojejuka chupe ifiél rupi. Péro ohayhuetereígui Jehovápe, ipyʼaguasu vaʼekue ombohovái hag̃ua upéva (Hech. 20:​22-24).

15. ¿Mbaʼéichapa umi ermáno ha ermanakuéra ohechauka ojoayhuha ko ñane tiémpope? (Ehecha pe taʼanga).

¹⁵ ¡Ajépa jahayhuete umi ifiélvape Jehovápe oĩramo jepe oñemoĩva hesekuéra! Ha heta ñane ermáno ha ermanakuéra oapoja chupekuéra ipyʼaite guive, ikatúramo jepe ojepersegi chupekuéra voi upe haguére. Upéicha ojapo vaʼekue yma Áquila ha Priscila. Haʼekuéra oipytyvõ vaʼekue Páblope ha ndokyhyjéi ojejukárõ g̃uarã chupekuéra upévare (Rom. 16:​3, 4). Por ehémplo Rúsiape unos kuánto ermánope ojeguerahárõ guare préso, heta ótro ermáno ha ermána oho avei pe trivunálpe omokyreʼỹ hag̃ua chupekuéra. Peteĩ ermána ohechárõ guare upéva, ovyʼa ha oñeemosionaiterei, ha upévare ndaikatúi voi ni oñeʼẽ un rráto porã. Haʼe oñandu porãiterei mbaʼeichaitépa umi ermáno ohayhu chupe, ha upéva omeʼẽ chupe la fuérsa oaguanta hag̃ua. Ajépa javyʼaite jahechávo jahayhúramo Jehovápe ha ñane ermanokuérape, ndaipuʼakamoʼãiha ñanderehe umi ñandepersegíva.

16. ¿Mbaʼérepa apóstol Pedro heʼi vaʼekue ikatuha ovyʼa umi ojepersegíva oservi rupi Jehovápe? (1 Pedro 4:14).

¹⁶ Jaikuaa Jehová ovyʼaitereitaha ñandereheve ñaaguantáramo pe persekusión (elee 1 Pedro 4:14). Apóstol Pedro heʼi vaʼekue entéro umi ojepersegíva oservi rupi Ñandejárape ikatuha ovyʼa. ¿Mbaʼérepa? Pórke pe persekusión ohechauka jarekoha Ñandejára espíritu. Pedro oikuaa porã vaʼekue mbaʼépa heʼise jajepersegi, péro oikuaa porã vaʼekue avei Ñandejára ovyʼa hague heseve. Ohasa riremi pe Pentekostés del áño 33, umi judío omondo unos kuánto kuimbaʼépe ogueraha hag̃ua kárselpe Pedro ha umi ótro apóstolpe. Péro Pedro pyʼaguasúpe odefende kuri chupekuéra (Hech. 5:​24-29). Upérõ guare hetaiterei oñembyepoti vaʼekue chupe ha umi ótro apóstolpe, péro upéva ndojokói chupekuéra. Upéva rangue haʼekuéra osegi opredika ha ovyʼaiterei pórke “Ñandejára opermiti oñembohasa asy chupekuéra Jesús réra rehehápe”. Ha ñande avei peichaite ikatu javyʼa oĩramo jepe ñandepersegíva (Hech. 5:​40-42).

17. ¿Mbaʼépa heʼi vaʼekue Jesús idisipulokuérape pe pyhare omano mboyve?

¹⁷ Pe pyhare omano mboyve, Jesús heʼi vaʼekue idisipulokuérape: “Che Túa ohayhúta upe cherayhúvape, ha che avei ahayhúta chupe” (Juan 14:21). Ajépa javyʼaitéta ndaiporivéi vove ko múndope ni peteĩ ndaijaʼéiva ñanderehe jaservi rupi Jehovápe (2 Tes. 1:​6-8). Péro og̃uahẽ aja upe tiémpo, jasegíkena ñanemanduʼa umi mbaʼe ñanepytyvõtavare javyʼa hag̃ua oĩramo jepe ndaijaʼéiva ñanderehe.