“Umi mitã ningo peteĩ rregálo omeʼẽva Jehová”

¿OÑEMEʼẼMAPA ndéve algúna ves peteĩ rregálo remombaʼetereíva? Ikatu oime álgien nderehayhuetereíva la omeʼẽ vaʼekue ndéve upe rregálo. ¿Mbaʼépa nde rejapóta upe rregálogui? Katuete rekuida porãitereíta hese, pórke ovaleterei ndéve g̃uarã.

La Biblia heʼi voi: “Umi mitã ningo peteĩ rregálo omeʼẽva Jehová” (Sal. 127:3). Umi túa oservíva Jehovápe, ohechakuaa umi ifamília haʼeha peteĩ rregálo omeʼẽva chupekuéra ñande Ru yvagapegua. Upévare haʼekuéra ojapo ikatúva guive omoĩ hag̃ua ifamíliape hemikotevẽ, oñangareko isalúre, oipota oiko hikuái vyʼápe ha avei oipytyvõ chupekuéra oñemoag̃ui hag̃ua Ñandejárare.

Ñambyasýramo jepe, oĩ umi túa ha sy ndohechakuaáiva umi mitã haʼeha peteĩ rregálo oúva Ñandejáragui (Is. 49:15; 2 Tim. 3:​1-3). Péro oĩ avei umi tuakuéra ojepyʼapýva ifamíliare, péro heta mbaʼére ijetuʼu chupekuéra oñangareko porã hag̃ua hesekuéra. ¿Mbaʼépa la ijetuʼuvéva jepi tuakuérape? ¿Mbaʼépa Jehová oipota ojapo umi túa oipytyvõ hag̃ua ifamíliape? ¿Mbaʼépa ojapo vaʼerã tuakuéra umi ifamília osẽ porã ha ovyʼa hag̃ua?

¿MBAʼE MBAʼÉPA IJETUʼU JEPI UMI TUAKUÉRAPE?

• Umi ihénte térã ótra persóna ojopy chupekuéra ifamília heta hag̃ua. Heta hendápe ojerrespetave umi túa ifamília hetávape. Upévare oĩ umi matrimónio oñandúva ifamília hetave vaʼerãha, pórke ihénte térã ikonosidokuéra ojopy chupekuéra upearã. Algúno oñeñandu upéicha oikuaa porãramo jepe ijetuʼutaha chupekuéra oñangareko hag̃ua hetave mitãre.

• Oĩ túa ojepyʼapýva la oikótavare amo gotyove. Heta hendápe umi mitã pyʼỹinte omano pórke oiko asyeterei, saʼi rupi la tembiʼu, oĩgui heta mbaʼasy ha ndaipóri haguére doktór ni ospitál oho hag̃ua. Upévare oĩ umi túa opensáva ifamília heta vaʼerãha, pórke ikatu hína umíva apytépe oĩ la nomanóiva okakuaapa mboyve. Avei oĩ umi túa opensáva ifamília heta vaʼerãha ikatu hag̃uáicha haʼekuéra oñangareko hesekuéra ijeda rire. Koʼã mbaʼe koʼýte oiko umi país pe goviérno noipytyvõihápe umi ijedávape.

• Ijetuʼu oñekonsegi hag̃ua antikonseptívo. Heta lugárpe umi matrimóniope ijetuʼueterei okonsegi hag̃ua umi antikonseptívo. Ótro lugárpe katu oñekonsegi umi pastílla, péro umi márka naiporãiete. Upévare oĩ ndoipuruséiva umíva okyhyjégui ojapo vaírõ g̃uarã hesekuéra. Péro heta lugárpe hepyeterei voi umi pastílla, ha upévare ndaikatúi voi anga ojogua hikuái.a

¿MBAʼÉPA JEHOVÁ OIPOTA OJAPO UMI TUAKUÉRA?

Omeʼẽ vaʼerã ifamiliakuérape la oikotevẽva. Jehová oipota umi túa ombaʼapo jejopy umi mitã oreko hag̃ua tembiʼu, ao ha peteĩ óga oiko hag̃ua okakuaapa peve. Avei Jehová oipota tuakuéra ohekomboʼe porã ifamíliape. Upévare umi túa ndahaʼéi ku omondónte vaʼerã ifamíliape eskuéla térã koléhiope. Jehová oipota avei tuakuéra oreko hendivekuéra ifamíliape hógape okakuaa aja, ha oipytyvõ chupekuéra ivale hag̃ua heta mbaʼépe ikatu hag̃uáicha upéi oñemantene hikuái. Avei tuakuéra ohasa vaʼerã tiémpo káda uno ndive, péicha umi mitã oñandu ituakuéra oprotehe ha ohayhuha chupekuéra. Péro Jehová avei imbaʼerechakuaa, ha nohaʼarõi tuakuéra ipláta heta omongakuaa porã hag̃ua ifamíliape. Jehová voi oelehi vaʼekue peteĩ matrimónio imboriahumíva péro iguápovape omongakuaa hag̃ua pe Itaʼýra ohayhuetévape (Mat. 13:​55, 56; Luc. 2:24).

Konsého oĩva la Bíbliape: “Añetehápe oĩramo nomantenéiva ifamíliape, ha koʼýte umi oikóvape hógape, upéva omboykéma ijerovia ha oĩ vaive hína peteĩ ojeroviaʼỹvagui” (1 Tim. 5:8).

Jehová oikuaa voi umi tuakuéra ijeda vove, ikatuha hína oikotevẽ oñepytyvõ chupekuéra. Ha umi mitã ohechaukáta omombaʼeha ituakuérape oñangarekóvo hesekuéra og̃uahẽ vove upe tiémpo (Éx. 20:12; 1 Tim. 5:4). Péro Jehová oguerohoryeterei ohechávo umi túa oñehaʼãmbaitévape omongakuaa porã ifamiliakuérape, oiko rangue ojepyʼapyeterei mbaʼéichapa ifamília oñangarekóta hesekuéra ijeda rire (2 Cor. 12:14).

Oipytyvõ vaʼerã ifamíliape ohayhu hag̃ua Jehovápe. Umi túa oservíva Ñandejárape, omboʼe vaʼerã ifamíliape oadora vaʼerãha Jehovápe ha ohayhu vaʼerãha chupe. Péva haʼe vaʼerã pe mbaʼe iñimportantevéva tuakuéra tekotevẽva ojapo omongakuaávo ifamíliape (Deut. 6:​6, 7).

Konsého oĩva la Bíbliape: “Pesegi pemongakuaa, pekorrehi ha peñemoñeʼẽ chupekuéra Jehová heʼiháicha” (Efes. 6:4).

JEHOVÁ NEPYTYVÕSE EMONGAKUAA PORÃ HAG̃UA NE FAMÍLIAPE

Pekalkula porãkena mboy mitã perekose. Oimérõ perekose mitã, pepensa porãkena pene situasión rehe. Por ehémplo ikatu peñeporandu: “¿Jarekótapa la pláta ñaikotevẽva ñamoĩ hag̃ua chupekuéra tembiʼu ha ao? ¿Ikatútapa ñambostudia chupekuéra?”. Peñemongetákena oñondive pedesidi hag̃ua mboy mitãpa peguerekóta. Pedesidi vove upéva, penemanduʼákena peñangareko vaʼerãha káda uno umi mitãre Jehová oipotaháicha. Péro avei jaikuaa heta mbaʼe ndaikatuiha osẽ ñande ñaplanea hagueichaite (Ecl. 9:11). Péro jaikuaa porã ko mbaʼe: Jehová penevendesíta peñehaʼãramo pemongakuaa pene famíliape haʼe oipotaháicha.

Umi konsého oĩva la Bíbliape: “Umi oplanea porãva la ojapótava, katuete osẽ porã chupekuéra la ojaposéva, péro pe ojapo rei reínteva oimeraẽ mbaʼe, katuete imboriahúta” (Prov. 21:5).

“Oĩramo pende apytépe omopuʼãséva peteĩ óga, ¿ndoguapyraẽipa okalkula mboýpa ogastáta ohecha hag̃ua ikatútapa ojapopa?” (Luc. 14:28).

Pemboʼe pene famíliape omotenonde hag̃ua Jehová servísio. Pejapókena ikatúva guive pemotenonde hag̃ua Jehová servísio pene famíliandi. Oimérõ perekóma família, peñemotiémpokena ha pemboʼe káda únope ohayhu vaʼerãha Jehovápe. Peipytyvõ chupekuéra oñatende ha oaprende hag̃ua rreuniónpe. Pejapókena avei pende estúdio de família káda semána, ha pemboʼe chupekuéra opredika hag̃ua. Aníkena pehejase ótrope pe rresponsavilida peẽ perekóva, ni umi pene família tuichavéva ndaikatúi ojapo upéva pende vése. Peñehaʼãmbaite vaʼerã pemboʼe pene famíliape ohayhu hag̃ua Jehovápe, ha upéva orahánte voi tiémpo. Péro upéi pevyʼaitereíta pehecha vove mbaʼeichaitépa haʼekuéra vyʼápe oservi Jehovápe.

Konsého oĩva la Bíbliape: “Chéngo avyʼaiterei ahendu jave che raʼykuéra osegiha oiko pe añetegua rapére” (3 Juan 4).b

Pejeroviákena Jehováre. Ikatu oime pepensa hína perekóvo família, térã ikatu oime perekóma voi. Oimérõ upéicha aníkena peduda umi mbaʼe Jehová ojeruréva peẽme iñimportanteveha hína umi kostúmbre térã kultúra oĩvagui upe lugár peikohápe.

Oimérõ pedesidi mbovymínte penefamiliataha, ikatu peime segúro Jehová oñangarekotaha penderehe ág̃a pendeeda vove. Aníkena peguerovia la hénte heʼi jave penefamília hetámante vaʼerãha ikatu hag̃uáicha haʼekuéra okuida penderehe pendeeda vove. Ani pekyhyje ni pepensa ndaiporimoʼãiha avave ikatúva okuida penderehe. Jehová oprometéma haʼe oñangarekotaha penderehe, ha haʼe siémpre okumpli umi mbaʼe oprometéva (Jos. 23:14).

Umi konsého oĩva la Bíbliape: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare. Ereko vaʼerã enkuénta Ñandejárape opa mbaʼe rejapóvape, ha haʼe ndegiáta reho hag̃ua tape porãre” (Prov. 3:​5, 6).

“Che chemitã vaʼekue, ha koʼág̃a katu chetujáma, péro núnka ndahecháiva Ñandejára oheja reíramo peteĩ hembiapo porãvape, ni ifamíliape oikórõ ojerure upérupi hoʼumi vaʼerã” (Sal. 37:25).

“Pemotenonde meméke Ñandejára Rréino ha umi mbaʼe haʼe heʼíva iporãha, ha entéro koʼã mbaʼe oñemeʼẽta avei peẽme” (Mat. 6:33).

Umi mitã ningo haʼe peteĩ rregálo iporãitereíva Jehová omeʼẽva tuakuérape. Jehová ningo ovyʼaiterei umi tuakuéra okuida porãramo ifamíliare haʼe oipotaháicha. Jehová oipota tuakuéra ojapo la haʼe heʼíva, oiko rangue hikuái osegi umi kostúmbre la hénte orekóva. Upévare tuakuéra okalkula porã mboy famíliapa orekóta ikatu hag̃uáicha okuida porã káda únore. Péicha umi mitã ikatúta okakuaa vyʼápe ha ohayhúta Jehovápe.