¿Mbaʼéichapa ikatu ñaipytyvõ umi ñane hénte ndahaʼéivape Testígo?

1, 2. ¿Mbaʼérepa ikatu ñane hentekuéra norreaksionaporãi raʼe ñañepyrũrõ guare jastudia la Biblia?

JESÚS heʼi vaʼekue peteĩ kuimbaʼe omoirũsévape chupe: “Tereho nde rógape, ne hentekuéra rendápe, ha emombeʼu chupekuéra umi mbaʼe Jehová ojapo vaʼekue nderehehápe” (Mar. 5:19). Jesús heʼi vaʼekue upéva pe kuimbaʼépe oikuaa porãgui siémpre ñamombeʼusetereiha umi mbaʼe iporãva ñane hentekuérape.

² ¿Nemanduʼápa mbaʼéichapa reñeñandu raʼe reñepyrũrõ guare restudia la Biblia? Katuete revyʼaitereíne raʼe ha upévare remombeʼuseterei voi ne hentekuérape umi mbaʼe porã reaprendéva hína. Péro ikatu oime ne hentekuérape ndahaʼéi la ogustapáva la restudia la Biblia testígo de Jehovándi. Térã ikatu oime remombeʼúrõ guare chupekuéra la reaprendéva nderejapói raʼe upéva mborayhúpe, upéicha rupi ne hentekuéra ojagarra vai la eréva. Oimérõ upéva oiko raʼe nderehe, ko artíkulo nepytyvõta resegi hag̃ua ndefiél Jehovápe ha avei rejogueraha porã hag̃ua ne hentekuérandi.

3. ¿Mbaʼépa jahecháta ko artíkulope?

³ Ko artíkulope ñaanalisáta koʼã mbaʼe: 1) Ñapensáramo mbaʼe situasiónpepa oĩ ñane hentekuéra ha jaiporiahuverekóramo chupekuéra, ikatúta ñanepasiensiave hesekuéra ha jatratáta chupekuéra mborayhúpe. 2) Jahecháta mbaʼépa ikatu jajapo ñane hentekuéra heʼi térã ojapóramo álgo ñanemoñeñandu vaíva. 3) Ñañehaʼãramo ñanepasiénsia hesekuéra ha ndajaperdéiramo la esperánsa, ikatúta ñaipytyvõ ñane héntepe amo gotyove oservi hag̃ua Jehovápe, ha 4) ñaanalisáta mbaʼéichapa ikatu jahechauka jahayhuha ñane hentekuérape.

JAIPORIAHUVEREKÓKENA ÑANE HENTEKUÉRAPE

4. ¿Mbaʼépa Jesús ojapo vaʼekue oĩramo jepe umi hénte nohenduséiva chupe?

⁴ Oĩramo jepe umi persóna nohenduséiva Jesúspe, haʼe lomímonte oñehaʼãmbaite osegi oipytyvõ chupekuéra. Jesús heʼi vaʼekue haʼe ojoguaha peteĩ kuimbaʼe oguerekóvape peteĩ ígo máta. Haʼe heta hendáicha oñehaʼã pe yvyramáta okakuaa ha hiʼa porã hag̃ua (Luc. 13:​6-9). Jesús oipurúrõ guare ko ehémplo, ohasáma kuri mas de 3 áño haʼe oñehaʼã hague oipytyvõ umi judíope ojerovia hag̃ua ha oiko hag̃ua chuguikuéra idisípulo. ¿Mbaʼérepa haʼe osegi kuri oipytyvõ chupekuéra? Jesús ohayhu ha oiporiahuvereko vaʼekue la héntepe ha upéva oipytyvõ chupe ipasiénsia hag̃ua hesekuéra.

5. ¿Mbaʼépa la omomýi vaʼekue Jesúspe oipytyvõ hag̃ua umi judíope?

⁵ Jesús ningo ombyasyeterei vaʼekue umi judíope pórke umi líder rrelihióso noipytyvõi vaʼekue chupekuéra ojerovia hag̃ua Jehováre. Jesús ohecha vaʼekue umi hénte ojoguaha umi “ovecha ndorekóivape pastór” (Mar. 6:34). Jesús omano mboyvemi omaña pe siuda de Jerusalén rehe ha oñepyrũ hasẽ. Haʼe oikuaa porã kuri heta persóna oikóva upe siudápe upéi omanotaha ndojeroviáigui hese ni Itúare (Luc. 19:​41-44). Ñande avei koʼág̃a ñañandu vaʼerã upéva ñane hentekuérare ha upéva ñanemomýita ñaipytyvõ hag̃ua chupekuéra.

6. ¿Mbaʼérepa ñanepasiénsia vaʼerã umi ñane hentekuéra ndahaʼéivare Testígo? (Gálatas 6:9).

⁶ (Elee Gálatas 6:9). Ikatu hína oime ne hentekuéra koʼag̃aite ndoikuaaséi mbaʼeve Jehovágui, péro nepasiénsiakena ha esegi etrata porã chupekuéra. Jaikuaa ningo ijetuʼuetereiha peteĩ persónape okambia hag̃ua umi mbaʼe ogueroviáva ymaite guive ha oñepyrũ hag̃ua ojerovia Jehováre. Ikatu voi oime nde un tiémpore rejogua raʼe umi persóna ‘oikóvape esperansaʼỹre ha ndoikuaáivape Ñandejárape’ (Efes. 2:12). Oimérõ upéva haʼe raʼe la nde káso, katuete oĩne raʼe peteĩ persóna ipasiénsia vaʼekue nderehe ha nepytyvõ vaʼekue rekambia hag̃ua, upévare nepasiénsiakena nde avei ne hentekuérare, péicha erekóta oportunida reipytyvõ hag̃ua chupekuéra oikuaa porãve hag̃ua Jehovápe.

ÑANE HÉNTE HEʼI TÉRÃ OJAPÓRAMO ÁLGO ÑANEMOÑEÑANDU VAÍVA

7. ¿Mbaʼérepa oiméne Jesús ermanokuéra ndojeroviái rakaʼe hese?

⁷ Provávlemente Jesús ermanokuéra oikuaa kuri Jesús ojapo hague unos kuánto milágro Galiléape (Luc. 4:​14, 22-24). Péro ñepyrũrã haʼekuéra ndoroviái vaʼekue Jesús haʼeha pe Mesías (Juan 7:5). ¿Mbaʼérepa? La Biblia nomombeʼúi ñandéve, péro si jaikuaa mbaʼérepa oĩ vaʼekue heta judío odesidíva nomoirũi Jesúspe, por ehémplo algúno okyhyje vaʼekue ojepersegírõ g̃uarã chupekuéra oñepyrũramo ojerovia Jesúsre (Juan 9:​18-22). Oĩ katu umi oikuaa vaʼekue Jesúspe michĩete guive ha upévare ndoroviaséi hikuái haʼe haʼeha Ñandejára Raʼy (Mar. 6:​1-4). Oiméne Jesús ermanokuéra opensa vaʼekue avei upéicha. Ha koʼág̃a, ¿mbaʼe mbaʼépa ikatu ojoko umi ñane hénte ndahaʼéivape Testígo ohendu hag̃ua pe mensáhe oúva la Bíbliagui?

8. ¿Mbaʼérepa sapyʼánte umi ñane hénte ndahaʼéiva Testígo ikatu heʼi térã ojapo álgo ñanemoñeñandu vaíva?

⁸ Ñapensa vaʼerã mbaʼérepa oiméne haʼekuéra heʼi térã ojapo peteĩ mbaʼe. Jesús hentekuéra heʼi vaʼekue hese ‘itavyraimaha’ ha umíva apytépe ikatu oime Jesús ermanokuéra heʼi avei upéva (Mar. 3:21). ¿Mbaʼérepa oiméne Jesús ermanokuéra heʼi raʼe upéva? La Biblia ohechauka Jesús hembiapoiterei hague predikasiónpe ha omonguera umi héntepe, upévare haʼe ni naitiémpoi okaru hag̃ua (Mar. 3:20). Ikatu oime Jesús ermanokuéra opensa raʼe Jesús ohasamaha la rrája pórke haʼe tódo el tiémpo opredika ha sapyʼánte ni ndaikatuvéima okaru. Koʼág̃a avei ñane hentekuéra ikatu opensa ñanefanatikoitereimaha ñane rrelihión rehe, oimérõ haʼekuéra opensa upéicha jahechauka vaʼerã chupekuéra jajapoha entéro mbaʼénte hendápe porã.

9. ¿Mbaʼéichapa ikatu ñaipytyvõ umi ñane hénte ndahaʼéivape Testígo okambia hag̃ua la opensáva umi testígo de Jehováre? (1 Pedro 3:​1, 2). (Ehecha pe taʼanga).

⁹ Jahechauka vaʼerã ñanekondúkta porãha. Siémpre ñañehaʼã vaʼerã ñañeʼẽ mborayhúpe ha jatrata porã pe ñane hénte ndahaʼéivape Testígo, péicha haʼekuéra ikatu hína okambia la opensáva umi testígo de Jehováre (elee 1 Pedro 3:​1, 2). Ñapensamína peteĩ ermána orekóvare iména ndoadoráiva Jehovápe, pe ména ikatu hína oñandu oñemboykeha chupe térã ipochy hembireko osẽramo hógagui oho hag̃ua opredika térã oho hag̃ua rreuniónpe. Pe ermána ndoipotáigui iména oñeñandu upéicha ikatu ojapo unos kuánto kámbio ohasave hag̃ua tiémpo iménandi, por ehémplo pe ermána ikatu opredika iména ombaʼapo aja térã noiméi aja hógape. Umi tembireko ojapóramo koʼãichagua kámbio ombovyʼa hag̃ua iménape ikatu hína avei oipytyvõ chupe okambia hag̃ua la opensáva umi testígo de Jehováre.

10. Oĩ jave okritikáva ñanderehe, ¿mbaʼéichapa ikatu jasegi Jesús ehémplo?

¹⁰ Ñane hentekuéra ñandekritikáramo sapyʼánte iporãvétante ñakirirĩ. Yma la hénte heʼi vaʼekue Jesús okarueterei ha hoʼueterei hague víno, péro upérõ Jesús ndaipochýi ni noñehaʼãi ohechauka japuha la hénte heʼíva hese, upéva rangue Jesús oipota la hénte ojesareko hese haʼekueraite voi ohecha hag̃ua ndasiertoiha la ojeʼéva hese (Mat. 11:19). Avei Jesús ohechauka vaʼekue oiko lájare ojapoha entéro mbaʼénte hendápe porã ha ovyʼakuaaha (ekompara Juan 2:​2, 6-10 heʼívare). Koʼág̃a avei oĩ jave okritikáva ñanderehe natekotevẽi katuete ñañedefende jahechauka hag̃ua ndasiertoiha la ojeʼéva ñanderehe, upéva rangue ikatu jahechauka jajapoha entéro mbaʼe hendápe porã ha javyʼakuaaha, péicha ikatu ñaipytyvõ ñane hentekuérape ohechakuaa hag̃ua umi mbaʼe vai ojeʼéva ñanderehe japuha.

ÑANEPASIÉNSIAKENA HA ANI JAPERDE LA ESPERÁNSA

11. ¿Mbaʼéichapa Jesús osegi vaʼekue otrata iñermanokuérape?

¹¹ La Biblia ohechauka Jesús osegi hague ipasiénsia iñermanokuéra rehe, por ehémplo haʼekuéra oĩ vaʼekue Canápe Jesús ojapórõ guare primera ves peteĩ milágro (Juan 2:​11, 12). Jaʼéma haguéicha iñermanokuéra ndojeroviái vaʼekue hese, péro ndahaʼéi upe haguére ku Jesús oñemomombyrýva mbaʼe chuguikuéra. ¿Mbaʼérepa jaʼekuaa upéva? La Biblia ohechauka Jesús ojapórõ guare pe primer milágro, 3 áñorupi upe rire haʼe osegi hague oñeʼẽ mborayhúpe iñermanokuérape (Juan 7:​5-8).

12. ¿Mbaʼépa ikatu ñanepytyvõ ani hag̃ua japerde la esperánsa?

¹² Koʼág̃a ningo ñantende porãvéntema mbaʼeichaite pevépa Jehová oporoporiahuvereko ha upéva ñanepytyvõ ani hag̃ua japerde la esperánsa ñane hentekuérare. ¿Mbaʼérepa? Pórke oñepyrũ vove pe jehasa asy guasu haʼekuéra orekóta gueteri oportunida odesidi hag̃ua oñemoĩtapa Jehová ykére. Pe rrelihión japu oñehundi vove ikatu hína ñane hentekuéra imanduʼa jaʼéma hague kuri chupekuéra upéva oikotaha, ha upépe ae odesidi hikuái oservi Jehovápe (Apoc. 17:16).a Péro koʼág̃ama voi ñane hentekuéra ohasáramo umi situasión ijetuʼúva, katuete jajapóta la ikatúva guive ñaipytyvõ hag̃ua chupekuéra. Haʼekuéra ohechakuaáramo mbaʼeichaitépa jahayhu chupekuéra ikatu hína upéi okambia ha oaprendeseve la Biblia omboʼéva.

JAHECHAUKÁKENA JAHAYHUHA CHUPEKUÉRA

13. Ñanerembiapo hetáramo jepe Jehová servísiope, ¿mbaʼe rehepa ñañatende vaʼerã?

¹³ Legálmente siémpre ñanerembiapoiterei Jehová servísiope. Péro ndajaipotái upe haguére ñane hentekuéra opensa ndajarekoiha tiémpo ñaime hag̃ua hendivekuéra térã ndajahayhuiha chupekuéra (Mat. 7:12). Upévare, ¿mbaʼéichapa ikatu jahechauka jajepyʼapyha hesekuéra? Upéva ñaanalisáta koʼág̃a.

14, 15. ¿Mbaʼépa hína peteĩva umi mbaʼe ikatúva jajapo jahechauka hag̃ua jahayhuha ñane hentekuérape? Emombeʼu peteĩ ehémplo.

¹⁴ Ñañeʼẽ memékena ñane hentekuérandi jahechauka hag̃ua jahayhuha chupekuéra. Ñamombeʼúramo ñane hentekuérape mbaʼépa jajapo hína jaikóvo, haʼekuéra oñandúta jahayhuha chupekuéra. Por ehémplo ikatu ñamondo chupekuéra peteĩ mensáhe ha unas kuánta fóto ñanohẽ vaʼekue jahárõ guare de vakasión, de viáhe térã ñaĩrõ guare ñane amigokuérandi. Avei ikatu ñameʼẽ chupekuéra peteĩ rregálo isensillomíva térã peteĩ kárta, péicha haʼekuéra oñandúta iñimportanteha hikuái ñandéve g̃uarã ha jajogueraha porãvétantema hendivekuéra. Ñande raẽve jajapóramo koʼã mbaʼe, jahechaukáta ñande pyʼaite guive jahayhuha chupekuéra.

¹⁵ Peteĩ ermána hérava Anna oikóva Arméniape omombeʼu la iñexperiénsia. Ihentekuéra ningo ohasa oñondive heta tiémpo, koʼýte umi kumpleañohápe ha umi ótro festého aja. Ánnagui oikórõ guare testígo de Jehová, ihentekuéra ojepyʼapy openságui haʼe ndaikatumoʼãveimaha ohasa tiémpo hendivekuéra. Avei ojepyʼapy hikuái openságui amo gotyove Anna orekotaha heta provléma. ¿Mbaʼépa ojapo raʼe Anna? Haʼe heʼi: “Siémpre amombeʼu che hentekuérape mbaʼépa ajapo aikóvo ha mbaʼérepa la cherembiapo heta. Avei ainvita che hentekuérape ou hag̃ua che rógape oikuaa hag̃ua che amigokuérape. Upéicha rupi che hentekuéra ikatu oikuaa che amigokuérape ha oñeñandu porã hikuái okompartívo oñondive. Unos kuánto che hénte heʼi ohechakuaaha mbaʼeichaitépa avyʼa ha upévare ndojepyʼapyvéima hikuái cherehe”.

16. ¿Mbaʼéichapa Jesús ohechauka vaʼekue oñeinteresaha iñermáno Santiágore? (Ehecha pe nóta).

¹⁶ Jahechaukákena ñane hentekuérape iñimportanteha hikuái ñandéve g̃uarã. Jesús ohechauka vaʼekue oñeinteresaha iñermáno Santiágore. Upévare orresusita rire, Jesús oho ojechauka chupe ha oñeʼẽ hendive (1 Cor. 15:7). Epensamíntena mbaʼéichapa oiméne Santiago oñeñandu raʼe upérõ. Oiméne haʼe ohechakuaa raʼe Jesús osegiha gueteri ohayhu chupe. Upérõ oiméne Santiago ndodudavéima avei raʼe Jesús haʼeha pe Mesías. Haʼe oñeʼẽmba rire Jesús ndive, oho oipytyvõ umi ótro ihentekuérape ontende hag̃ua avei Jesús haʼeha pe Mesías (Hech. 1:14).b

17. ¿Mbaʼéichapa ikatu jajapo la heʼíva Romanos 12:15? (Ehecha pe taʼanga).

¹⁷ (Elee Romanos 12:15). Jaikuaa ningo ñane hentekuéra ohasaha umi mbaʼe iporãva, péro avei sapyʼánte ijetuʼu hendivekuéra la isituasión. Upévare jahechauka vaʼerã ñañeinteresaha hesekuéra koʼýte ijetuʼu jave hendivekuéra, upéicha haʼekuéra ikatu avei okambia la opensáva ñanderehe.c Por ehémplo ikatu peteĩ ñane hénte oreko ifamília onaseramóva, péicha jave ikatu ñameʼẽ chupekuéra peteĩ rregálo ohechakuaa hag̃ua javyʼaitereiha hendivekuéra. Ikatu oime avei ñane héntegui omano peteĩ ohayhúva, péicha jave ñande ikatu ñakonsola chupe, jahecha mbaʼépa ikatu jajapo hesehápe térã ñamondo peteĩ mensáhe. Aníkena ñanderesarái iñimportantetereiha javisita térã ñahenói meme chupekuéra, koʼýte oimérõ ohasa hína hikuái peteĩ situasión ijetuʼúvare.

18. ¿Mbaʼéichapa ikatu jasegi disípulo Andrés ehémplo?

¹⁸ Eipytyvõkena ne hentekuérape oikuaa hag̃ua umi ermáno ha ermána kongregasionpegua. Pe disípulo Andrés oikuaárõ guare Jesús haʼeha pe Mesías, kyreʼỹme voi oho omombeʼu upéva iñermáno Pédrope ha ogueraha chupe Jesús rendápe (Juan 1:​40-42). ¿Ikatúpa avei ñande jajapo upéva koʼág̃a? Kláro ke si. Por ehémplo ikatu ñainvita mimi ñane héntepe oho hag̃ua ñanendive rreunionhápe térã okaru hag̃ua ñanendive ha umi ermanokuérandi. Ñane hentekuéra oikuaáramo umi ótro ermánope ohechakuaáta hikuái umi testígo de Jehová ikalida ha imbaʼeporãha.

19. Oĩramo jepe umi mbaʼe ndajajapóiva, ¿mbaʼéichapa lomímonte jasegi vaʼerã jatrata ñane hentekuérape? (1 Pedro 3:15).

¹⁹ (Elee 1 Pedro 3:15). Provávlemente ñane hentekuéra sapyʼánte nontendepái mbaʼérepa oĩ umi mbaʼe ñande ndajajapóiva, péro siémpre imanduʼáta hikuái mbaʼéichapa ñandekalida hendivekuéra ha jahechaukaha jarrespetaha chupekuéra. Oĩ ningo umi mbaʼe ñande ndajafesteháiva hendivekuéra térã ndajapartisipái algúno umi kostúmbre haʼekuéra orekóvape. Péro lomímonte ñane hentekuéra ovyʼáta ohechakuaáramo ñañehaʼãha jahasa hag̃ua tiémpo hendivekuéra ótro moméntope, por ehémplo ikatu javisita chupekuéra, jakaru hendivekuéra térã ñameʼẽ chupekuéra algún rregálo.

IKATU HÍNA ALGÚN DÍA HAʼEKUÉRA OSERVI JEHOVÁPE

20. ¿Mbaʼérepa Santiago ehémplo ñanemokyreʼỹ?

²⁰ Jesús opredikárõ guare ko yvy ape ári, Santiago nomoirũi vaʼekue chupe, péro tiémpo rire oiko vaʼekue chugui Jesús disípulo. Santiago oaprendéne raʼe heta mbaʼe entéro umi mbaʼe Jesús heʼi vaʼekuégui oĩrõ guare ko yvy ape ári (Gál. 1:​18, 19; 2:9). Por ehémplo espíritu sánto rupive, Santiago oskrivi vaʼekue peteĩ kárta umi kristiánope ha la heʼíva upe kárta ojoguaiterei la Jesús heʼi vaʼekuépe Sermón del Móntepe.d

21. ¿Mbaʼérepa ndovaléi japerde la esperánsa ñane hentekuérare?

²¹ Ikatu oime ñañehaʼãmbaitéma raʼe ha lomímonte umi ñane hénte ndoadoráiva Jehovápe noñeinteresái la Biblia heʼívare. Ikatu oime avei osegi heʼi térã ojapo umi mbaʼe ñanemoñeñandu vaíva, ¿péro mbaʼérepa ndajaperdéi vaʼerã la esperánsa? Pórke Jehová ha Jesús ningo oporoporiahuverekoiterei ha ñande jasegi hína iñehemplokuéra káda ves ke jahechauka ñanembaʼeporãha (Luc. 6:​33, 36). Kon el tiémpo ikatu avei ñanekondúkta porã omomýi chupekuéra okambia hag̃ua la opensáva ñanderehe. Avei sapyʼánte ndajapilláiramo jepe, haʼekuéra ikatu hína imanduʼa umi mbaʼe jaʼe vaʼekuére chupekuéra Jehováre ha umi promésa oĩvare la Bíbliape. Upévare jasegíkena ñaipytyvõ chupekuéra ha ani japerde la esperánsa. ¡Javyʼaitéta ningo algún día haʼekuéra odesidíramo ñanemoirũ jaservi hag̃ua Jehovápe!