ÑEPYRŨMBY

¿Moõpa ikatu atopa umi konsého iporãvéva?

Mitãkuñanguérape g̃uarã

Pe mitãrusu ova ramóva nde koléhiope ningo ichurroiterei, ha nde tódo el tiémpo voi nemanduʼa hese. Upévare repensa: “Ndaivaíri ningo apensa hese. Haʼe ningo ni ndoikuaái che aexistiha, ¿mbaʼe la tánto?”. Ha ndahaʼéi voi ndéve añónte la ndegusta, pórke reikohárupi rehendúma voi entéro umi mitãkuña siémpre oñeʼẽha oikóvo hese.

Peichaháguinte haʼe omaña nderehe, ha nderykupaite voi opukavývo ndéve. Nde avei repukavy chupe, ha upémarõ oñemoag̃ui nderehe ha ndesaluda.

Haʼete hiʼotĩ léntova ha heʼi ndéve: “¡Óla!”.

Nde avei resaluda chupe: “¡Óla!”.

“Cheréra Sergio”.

Ndereikuaái mbaʼe rehepa reñeʼẽta, ha upémarõ erénte chupe: “¿Nde reva ramo koʼápe ajépa?”.

“Ojapo unos kuánto semána rova hague che hentekuérandi”.

¡Ni nderegueroviaséi haʼe oñemongetaha hína nendive!

Upépe haʼe heʼi ndéve: “Ko pyhare ningo ajapóta hína peteĩ fiésta che rógape, ¿nderehoséi?”.

Upépe oñemoag̃uive nderehe, oñembyesavi, ha heʼi ndéve mbeguekatumi:

“Che tuakuéra ndaiporimoʼãi hína..., ha oĩta vevída jaʼu hag̃ua. ¿Rehóta?”

Sergio ohaʼarõ hína rembohovái chupe. Oimeraẽ ótro mitãkuña upepete oaseptáta chupe.

¿Mbaʼépa nde rejapóne?

Mitãrusukuérape g̃uarã

Rehecha mokõi ne kompañéro ouha hína nde reimeha gotyo. Upéva nembochuchupaitéma voi, pórke ko semánape haʼekuéra dos vésema ndejopy kuri repita hag̃ua, ha koʼág̃a tres veseha ojapo jeýta hikuái upéva.

Peteĩva oñembyesavi ha heʼi ndéve: “¿Neaño jeýma piko reime? Kóva nepytyvõta rejedivertiʼimi hag̃ua”. Ha heʼívo upéva, ombohasa ndéve peteĩ mbaʼe oguenohẽva ivolsíllogui.

Ojogua lénto sigarríllope, péro nde reikuaa porãma mbaʼépa la oikuaveʼẽva hína ndéve. Upéva nembochuchuvéntema voi, péro ere chupe:

“Grásiante, haʼéma kuri ndéve...”.

Erepa mboyve la repensa vaʼekue, pe ótro ne kompañéro neñeʼẽjoko ha heʼi: “¿Ne rrelihión oproivi ndehegui ajépa? ¡Ndaikatúi voi ni rejedivertiʼimi!”.

Pe ótro ne kompañéro katu upépe heʼi ndéve: “¿Nereñanimái piko?”.

Eñembopyʼaguasuʼimi ha ere chupe: “Ndahaʼéingo nañanimáigui”.

Upépe haʼe oñemoag̃uive nderehe ha heʼi ndéve: “Ejagarra katuna, mbaʼeve ningo ndojehumoʼãi ndéve”.

Ha pe ótro ne kompañéro katu heʼi mbeguekatumi ndéve: “Noromombeʼumoʼãi ningo avavépe”.

¿Mbaʼépa nde rejapóne?

KO SITUASIÓNRE ohasa hetaiterei mitãrusu ha mitãkuña ko múndo tuichakuére. Péro koʼãva apytépe naentéroi oĩ preparádo ombohovái porã hag̃ua. Upévare, oĩrõ ojopýva peteĩ mitãrusúpe opita hag̃ua ikatu opensa: “Chéngo ndapitaséi, péro chejopyeterei hikuái ha naaguantavéima. Ha ndaipotái heʼi chediferenteha chuguikuéra”. Térã peteĩ mitãkuñáme ojejopýrõ oñemoĩ hag̃ua de nóvio ikatu opensa: “Haʼe ningo iporãiterei ha ivuenoiterei. ¿Ndaikatúi piko una vemi jepe aasepta chupe?”.

Péro oĩ avei umi ojeprepara porãva, upéicha rupi ikatu ipuʼaka oĩ jave ojopýva chupekuéra ojapo hag̃ua ivaíva. Heta vése katu umi ojeprepara porãvape saʼive voi ojejopy. ¿Ndépa reimese avei preparádo? Jahechamína mbaʼéichapa ikatu rejapo upéva.

La Biblia nepytyvõta rembohovái hag̃ua pyʼaguasúpe umi mbaʼe oñepresentáva ndéve nemitã aja. Umi mbaʼe oĩva la Bíbliape ou Ñandejáragui, upévare pype oĩ umi konsého iporãvéva ikatúva jatopa (2 Timoteo 3:16, 17). ¿Mbaʼeichagua situasiónpe nepytyvõkuaa la Biblia? Emañamína ko lístare ha emarka umi téma ndéve neinteresáva.

□ Mbaʼéichapa ojotrata vaʼerã kuña ha kuimbaʼe

□ Mbaʼéichapa ikatu rembohovái umi kámbio orekóva ohóvo nde rete

□ Ekonsegi ne amigorã

□ Rembohovái porã umi mbaʼe ijetuʼúva eskuéla térã koléhiope

□ Eipuru porã nde pláta

□ Ejogueraha porã nde tuakuérandi

□ Ekontrola umi mbaʼe reñandúva

□ Eiporavo porã umi diversión

□ Eñemoag̃uive Ñandejárare

Emañami jeýna koʼág̃a umi páhina 4 ha 5-re. Upépe rehecháta koʼã téma haʼeha umi oñehesaʼỹijóva káda uno umi 9 seksión orekóvape ko lívro. ¿Mbaʼépa remarka raʼe pe lístape? Iporãta ikatúrõ restudia raẽ umíva. Umi konsého oĩva la Bíbliape ideprovéchota ndéve entéro koʼã situasiónpe, ha ko lívro nepytyvõta rehecha hag̃ua upeichaha.a

Ko lívro omeʼẽ avei ndéve oportunida remombeʼu hag̃ua mbaʼépa repensa ha mbaʼéichapa reñeñandu. Por ehémplo, opakuévo káda kapítulo retopáta peteĩ rrekuádro hérava “Umi mbaʼe ajapótava”. Umívape oĩ umi porandu nepytyvõtava rehecha hag̃ua mbaʼéichapa ikatu rejapo umi mbaʼe restudia vaʼekue, ha ikatu voi reskrivi pype la rrespuésta. Avei oĩ umi párte nepytyvõtava ikatu hag̃uáicha repensa mbaʼéichapa rerreaksionáta oĩ jave ndejopýva rejapo hag̃ua ivaíva, por ehémplo pe rrekuádro hérava “Ne kompañerokuéra ndejopýramo”, oĩva páhina 132 ha 133-pe. Opakuévo káda seksión, oĩ peteĩ párte hérava “Rejepyʼamongeta hag̃ua”, ikatuhápe reskrivi umi mbaʼe ojehúva ndéve, ha mbaʼéichapa ikatu reipuru umi mbaʼe reaprendéva rehóvo. Ha avei oĩ 9 párte ko lívrope hérava “Ehémplo porã”. Umívape oñemombeʼu umi ehémplo oĩva la Bíbliape tekotevẽva ñañehaʼãmbaite jasegi hag̃ua.

La Biblia heʼi: “Eñehaʼãkena nearandu ha neentendído” (Proverbios 4:5). Umi palávra “nearandu” ha “neentendído” ndeʼiséi ovalemaha reikuaánterõ mbaʼépa iporã ha mbaʼépa ivai. Tekotevẽ rentende hetave mbaʼe iñimportánteva, por ehémplo mbaʼépa oikóta nderehe redesidi vaírõ, ha mbaʼépa rehupytýta redesidi porãramo. Upéva nepytyvõta ejeroviave hag̃ua ndejehe ha ndepyʼaguasu hag̃ua rembohováivo peteĩ situasión ne kompañerokuéra ndejopyhápe rejapo hag̃ua ivaíva.

Aníkena nderesarái ko mbaʼégui: rembohováiramo jepe heta provléma ijetuʼuetereíva, nereiméi neaño. Oĩ heta mitãrusu ha mitãkuña ombohováiva avei peichagua provléma, ha ipuʼaka hese. ¡Nde avei ikatu rehupyty upéva! Eaprovecha porãkena ko lívro, upéicha rehechakuaáta la Bíbliape oĩha umi konsého iporãvéva ikatúva retopa.

[Nóta]