Heʼípa la Biblia umi omendáva ikatuha ojedivorsia térã ojopoi?

Jehová oipota umi omendáva opyta oñondive opa árare opromete haguéicha hikuái omendárõ guare. Ombojoajúrõ guare Adán ha Évape, Jehová heʼi chupekuéra: ‘Kuimbaʼe ojoajuvaʼerã hembireko ndive, ha oiko mokõivégui peteĩ tekovénte’. Upéi Jesús imanduʼávo ko mbaʼére heʼi: ‘Upévare yvypóra ndoipeʼaivaʼerã ojuehegui umi Ñandejára ombojoajuvaʼekue’ (Génesis 2:24; Mateo 19:3-6). Upéicharõ Jehová ha Jesús oipota ména ha tembireko oiko oñondive opa ára g̃uarã, ha peteĩva omanórõnte pe opytáva ikatu omenda jey (1 Corintios 7:39). Ñandejára omoñepyrũ ñemenda, upévare naiporãi ñapensa umi omendáva ikatuha ojedivorsia oimeraẽ mbaʼére. Jehová ndaijaʼéi umi ojedivorsia reívare (Malaquías 2:15, 16).

Mbaʼe oikóramopa heʼi la Biblia umi omendáva ikatuha ojedivorsia? Jehová ningo heʼi ivaiha tekovai (Génesis 39:9; 2 Samuel 11:26, 27; Salmo 51:4). Haʼe ndaijaʼéi umi hekovaívare ha heʼi umi omendáva ikatuha ojedivorsia iména térã hembireko hekovaíramo. (Kapítulo 9, párr. 7 heʼi mbaʼépa tekovai térã fornicación.) Jehová heʼi pe ména térã tembireko ndahekovaíriva añoite ikatuha odesidi ojedivorsiátapa térã nahániri (Mateo 19:9). Haʼe odesidíramo ojedivorsia upéva ndaivaimoʼãi Jehová renondépe. Péro kongregasiónpe avave nomokyreʼỹivaʼerã chupe ojedivorsia hag̃ua. Oĩ avei umi odesidíva opyta iména térã hembirekóndi, ohechágui oñembyasy añeteha. Upéicharõ pe ména térã tembireko ndahekovaíriva odesidivaʼerã mbaʼépa ojapóta (Gálatas 6:5).

Péro oĩ jave umi provléma ijetuʼuetereíva oĩ kristiáno odesidíva ojopoi térã ojedivorsia jepe iména térã hembireko ndahekovaíri. Umívare la Biblia heʼi ‘opytavaʼerãha omendaʼỹre térã oiko porã jey’ (1 Corintios 7:11). Péicha jave pe ermána térã ermáno ndaikatúi oheka jey iména térã hembireko pyahurã (Mateo 5:32). Koʼág̃a jahecháta mbaʼeichagua provlémarepa sapyʼánte oĩ odesidíva ojopoi.

Nomoĩséi ifamíliape oikotevẽva. Oĩ ména nomoĩséiva ifamíliape oikotevẽva ha oreko asýva chupekuéra. La Biblia heʼi: ‘Pe oñangarekoʼỹva umi hogaygua rehe, omboyke ijerovia ha ivaive umi ojeroviaʼỹvagui’ (1 Timoteo 5:8, JMP). Pe kuimbaʼe nokambiaséiramo, hembireko hakateʼỹgui ijehe ha imembykuérare ikatu odesidi oheja chupe. Ojeʼéramo peteĩ ermánore upéva umi ansiáno ohecha porã vaʼerã upe oikóva. Umi noñangarekoséiva ifamíliare ikatu oñemosẽ kongregasióngui.

Oinupã vaipa hembirekópe. Oĩ umi ipochy jave oinupã vaipáva hembirekópe ha ikatu voi olastima vai térã ojuka. Pe oporonupãva oservíramo Jehovápe, ansianokuéra ohechavaʼerã mbaʼépa oiko. Umi ipochyetereíva ha oporonupãva oñemosẽ kongregasióngui (Gálatas 5:19-21).

Ndohejái oservi Jehovápe. Oĩ umi ndohejáiva hembireko térã iména oservi Jehovápe, ha ojopýva voi katu chupe ojapo hag̃ua la Biblia heʼíva ivaiha. Péicha jave pe ermána térã ermáno odesidivaʼerã ojopoítapa ‘iñeʼẽrendu hag̃ua Ñandejárape yvypórape rangue’ (Hechos 5:29).

Oikóramo koʼã mbaʼe naiporãmoʼãi jajopy ñande rapichápe ojopoi térã opyta hag̃ua iména térã hembirekóndi. Ikatu ningo umi ansiáno ha umi ermáno ikatupyrýva oñemoñeʼẽ ha ohechauka chupekuéra la Biblia heʼíva, péro Jehová añoite oikuaa porã opa mbaʼe oikóva. Peteĩ ermána (térã ermáno) ombotuichaitereíramo iprovléma ojopoiséguinte ohechauka nomombaʼeiha Ñandejárape. Haʼe ningo ñemenda apohare. Ndaipóri ombotavýtava Jehovápe, oñehaʼãramo jepe omokañy ojapóva. Upéicha ‘ndaipóri mbaʼeve ikatúva okañy Ñandejáragui, opa mbaʼe haʼe ohecha ha oikuaa ha chupe ñamombeʼuvaʼerã ñane rembiapokue’ (Hebreos 4:13, BNP). Péro umi provléma osegíramo ha upévare pe ermáno térã ermána odesidi ojesepara avave noñeʼẽvairivaʼerã hese. Jaikuaa ningo enterove ñambohovakevaʼerãha Ñandejára renondépe ñane rembiapokue (Romanos 14:10-12).