PORANDU 2
¿Mbaʼéichapa ikatu reikuaa Ñandejárape?
“Siémpre reñeʼẽ vaʼerã umi mbaʼe ojeskrivívare ko lívro de la léipe, elee ha ejepyʼamongeta vaʼerã hese ára ha pyhare, ikatu hag̃uáicha ejapopaite umi mbaʼe oĩva pype. Péicha resẽ porãta umi mbaʼe rejapóvape ha nearandúta”.
“Ha osegi olee hikuái pe lívro orekóva Ñandejára tee léi, hatã porã olee enterove ohendu hag̃uáicha. Haʼekuéra omyesakã porã pe léi ha oexplika chupekuéra mbaʼépa heʼise umi mbaʼe heʼíva. Péicha oipytyvõ umi héntepe ontende porã hag̃ua upe ojeleéva hína”.
“Katuete ovyʼa pe persóna ndosegíriva umi iñañáva konsého [...]. Haʼe ohayhueterei voi Jehová léi, ára ha pyhare olee ha ojepyʼamongeta hese. [...] Ha opa mbaʼe ojapóva osẽ porã chupe”.
“Felipe odipara pe kárro ykére ha ohendu chupe oleeha proféta Isaías oskrivi vaʼekue, ha heʼi chupe: ‘¿Nde piko rentendepa hína upe releéva?’. Haʼe heʼi chupe: ‘¿Ha mbaʼéicha piko antendéta ndaipóriramo avave omyesakã vaʼerã chéve?’”.
“Ñandejára ojapo guive ko múndo umi hénte ikatu oikuaa mbaʼeichaguápa haʼe, pórke ndajahecháiramo jepe chupe, ñamañávo hembiapokuére ikatu jahecha ipodér opaʼỹva ha haʼeha Ñandejára. Upévare haʼekuéra ndaikatúi onega haʼe oexistiha”.
“Ejepyʼamongeta koʼã mbaʼére, ha epensa meme umívare, péicha enterove ohechakuaáta reñakãrapuʼãha rehóvo”.
“Ñañeinteresákena ojuehe ñande pyʼaite guive, ha ñañomokyreʼỹ japorohayhu hag̃ua ha jajapo hag̃ua iporãva. Oĩramo jepe ojepokuaáva ofalta meme rreunionhápe, ani ñande jaiko jafalta”.
“Oĩramo pende apytépe oikotevẽva arandu, ojerure meme vaʼerã Ñandejárape ha haʼe omeʼẽta chupe. Pórke Ñandejára ipojera omeʼẽ hag̃ua upéva enterovépe, ha ndaipochymoʼãi upe ojerurévandi”.