SOFONÍAS
1 Jehová omeʼẽ vaʼekue peteĩ mensáhe Sofoníaspe.* Haʼe hína Cusí raʼy, Cusí túa katu Guedalías, Guedalías túa héra Amarías, ha Amarías túa katu Ezequías. Ko mensáhe oñemeʼẽ Josías+ tiémpope, haʼéva rréi de Judá ha Amón+ raʼy:
2 Jehová+ heʼi: “Ahundipaitéta oĩva guive ko yvýpe”.
3 Jehová heʼive: “Ahundipaitéta umi hénte ha umi animálpe.
Ahundíta umi guyra oĩva yvágare ha umi pira marpegua,+
ahundíta umi iñañávape ha entéro mbaʼe omoñepysangáva umi héntepe,*+
aipeʼapáta umi héntepe ko yvýgui.
4 Aipysóta che jyva Judá kóntrape,
ha entéro umi oikóva Jerusalén kóntrape.
Ahundipaitéta upe lugárgui enterove oadoráva Baálpe,+
avave naimanduʼamoʼãvéima umi saserdóte oadorávare umi dios extranhérope ha opytáta tesaráipe umi ótro saserdóte avei.+
5 Ahundíta avei umi ojupívape iterrásape oñesũ hag̃ua pe kuarahy, jasy ha umi estrélla renondépe.+
Che, Jehová, ahundíta umi oñesũvape ha ohurávape ndofallamoʼãiha chéve,+
péro oprometéva avei Malcámpe+ ndofallamoʼãiha chupe.
6 Che, Jehová, ahundíta umi oñemomombyrývape che rapégui.+
Che, Jehová, ahundíta avei umi ndohejáivape che agia chupekuéra ha ndojeruréivape chéve adirihi hag̃ua chupekuéra”.+
7 Jehová ningo Ñandejára ogovernáva opa mbaʼe, enterove tokirirĩ henondépe, pórke Jehová ára hiʼag̃uimbaitéma.+
Jehová oprepara peteĩ sakrifísio, ha haʼe oelehi* umi oinvita vaʼekuépe.
8 “Che, Jehová, ajapóta sakrifísio ha upe día akastigáta umi governántepe,
pe rréi raʼykuérape+ ha enterove umi oñemondévape umi extranhéroicha.
9 Upe díape akastigáta enterove hénte oñemoag̃uíva pe rréi trónore,
akastigáta enterove umi personál oikóvape tódo el tiémpo ojapo mbaʼe vai ha oporombotavýva ipatrón rógape”.
10 Jehová heʼi: “Upe díape
oñehendúta mbaʼéichapa oñelamenta umi hénte oĩva pe Pira Rokẽme,+
oñehendúta avei umi hénte hasẽ soróva pe siudápe, pe lugár ipyahuvehápe,+
umi sérrore oñehendúta avei peteĩ tyapu guasu.
11 Peẽ hénte peikóva Mactéspe,* peñelamenta vaʼerã,
pórke oñehundipáma* umi komersiánte,
enterove umi hénte opesáva pláta oñehundíma.
12 Upe tiémpope che aipurúta umi lámpara amaʼẽ porã hag̃ua Jerusalén rehe,
che akastigáta umi hénte omeʼẽvape ijupe gústo,* haʼekuéra ningo heʼi ipyʼapýpe:
‘Jehová ndojapomoʼãi iporãva, ni ndojapomoʼãi ivaíva’.+
13 Oñemondapáta umi rrikésa oĩva upe siudápe, ha umi óga oñehundipáta.+
Umi hénte ojogapóta, péro ndoikomoʼãi pype,
haʼekuéra oñotỹta parrál, péro ndaikatumoʼãi hoʼu víno.+
14 ¡Hiʼag̃uimbaitéma Jehová ára guasu!+
Hiʼag̃uimbaite ha pyaʼeterei og̃uahẽ.+
Hatã hyapu Jehová ára, ha oporomongyhyje.+
Upe tiémpope umi gerréro ojedesesperáta ha hatã osapukáita.+
15 Upe díape Ñandejára ohechaukáta ipochyha,+
upe díape umi hénte ohasa asy ha oñelamentáta,+
upe díape oúta peteĩ torménta ha sarambi opytáta,
upe díape iñypytũta ha hũmbáta,+
upe díape ijaraipáta ha umi arai hũmbaitéta.+
16 Upe díape umi hénte ombopúta umi turu ha osapukáita oho hag̃ua gerrahápe,+
umi hénte oatakáta umi siuda isegúro porãvape, ha umi tórre oĩvape umi murálla eskínape.+
17 Che, Jehová, ambohasa asýta umi héntepe,
oikóta oguata hikuái umi siégo ojapoháicha,+
ajapóta upéva pórke haʼekuéra opeka che kóntrape.+
18 Che, Jehová, ahechaukáta chepochyha, upe díape umi óro ha pláta orekóva hikuái ndaikatumoʼãi osalva chupekuéra.+
Che chepochyetereíta, ha upéva haʼetéta peteĩ tata ohapýva opa mbaʼe oĩva ko yvy ape ári.+
Che aguerúta peteĩ ñehundi guasu, ahundíta enterove oikóvape ko yvýpe”.+
2 Oñekumpli mboyve Ñandejára odesidi vaʼekue,
ha upe día ohasa mboyve ohasaháicha pe kapiʼi ogueraháva pe yvytu,
Jehová pochykue ou mboyve pende ári,+
og̃uahẽ mboyve pe día Jehová ohechaukatahápe ipochyetereiha,
3 peju jey Jehová rendápe,+ entéro peẽ peneumíldeva* peĩva ko yvy ape ári,
ha pejapóva iléi heʼíva.
Peñehaʼãkena pendehústo, peñehaʼãkena peneumílde.*
Péicha ikatu hína Jehová pendeprotehe pe día haʼe ohechaukatahápe ipochyha.+
4 Pe siuda de Gaza opytáta nandi vera,
Asquelónpe ndopytamoʼãi mbaʼevete,+
umi hénte oikóva Asdódpe oñemosẽmbáta upégui de diaitépe,*
ha Ecrón katu oñehundietéta.+
5 “Peẽ keretita, peẽ peikóva pe mar kóstape, heta pehasa asýta,+
Jehová oñeʼẽma pene kóntrape.
Canaán, pe oikohápe umi filisteo, che pohundíta,
ha ndopytamoʼãi ni peteĩ persóna oikóva upépe.
6 Umi território oĩvagui mar kóstape ajapóta peteĩ lugár oĩtahápe pásto umi ovechápe g̃uarã,
oĩta umi ykua ikatuhápe hoyʼu ha umi kora ojejapóva itágui umi ovechápe g̃uarã.
7 Upe lugárpe ikatúta oho umi hembýva Judágui,+
haʼekuéra ojogua ovechápe ha upe lugárpe ohóta okaru.
Asquelón territóriope ohóta oñeno pyharekue.
Ijára Jehová oñatendéta hesekuéra,
ha haʼe ombyaty jeýta umi oho vaʼekuépe prisionéro”.+
8 “Ahendu mbaʼéichapa Moab oapoʼi che puévlope,+ umi ammonita oñembohory hesekuéra,+
oñemombaʼeguasu ha oamenasa che puévlope oipeʼataha chugui iterritório”.+
9 Jehová hína umi ehérsito yvagapegua ruvicha ha Israel Jára.
Haʼe heʼi: “Che ningo pe Dios oikovéva, ha chejehe ahura Moab opytataha Sodoma opyta haguéicha,+
ha ahura avei Ammón opytataha Gomorra opyta haguéicha,+
peteĩ lugár pynómante osẽhápe ha pe yvy juky memetéva,
peteĩ yvy opytáva perõ opa árare.+
Umi hénte hembýva che puévlogui osakeáta chupekuéra, oipeʼáta umi tetãgui opa mbaʼe orekóva.
10 Péva oikóta hesekuéra oñemombaʼeguasu haguére.+
Haʼekuéra oapoʼi ha oñemoĩ Jehová puévlore, haʼe hína umi ehérsito yvagapegua ruvicha.
11 Jehová ojapóva ikontrapekuéra omongyhyjepáta koʼã puévlope.
Ñandejára ohundíta entéro umi dios oĩva ko yvy ape ári.
12 Peẽ hénte peikóva Etiopíape, peẽme avei pohundíta che espádape.+
13 Ñandejára oipysóta ijyva nórte gotyo ha ohundíta Asíriape.
Omoperõta Nínivepe, opytáta séko vera+ peteĩ desiértoicha.
14 Umi animál aty oñenombáta upépe, opaichagua animál salváhe.
Umi pelíkano ha puérko espín okéta pyharekue umi pilár hoʼapa vaʼekue paʼũme.
Guyrámante* oñehendúta umi ventanakuépe.
Oĩ haguépe umi óga entráda, itámante oĩta ojoʼaripa,
umi madéra de sédro iporãitéva opytáta okapepa.
15 Asiria haʼe vaʼekue pe siuda oñemombaʼeguasuetéva ha oiko vaʼekue trankiloite.
Haʼe heʼi vaʼekue ijehe: ‘Che la cheimportantevéva. Ndaipóri ningo ni peteĩ siuda ikatúva oñekompara cherehe’.
Péro upéi umi hénte omañáva hese oñemondyipáta.
Oikóta chugui peteĩ lugár oikohápe umi animál salváhe.
Enterovéva ohasáva upérupi oñembohorýta ha oñakãmbovaváta”.*+
3 Heta ohasa asýta Jerusalén, pe siuda ningo ikyʼa Ñandejára renondépe, irrevélde ha ojahéi umi hénte upepeguáre.+
3 Umi governadór upepegua ojogua umi león okororõvape.+
Umi hués katu ojogua umi lóvo osẽvape pyharekue,
haʼekuéra nomohembýi ni peteĩ kanguekue pyhareve g̃uarã.
4 Umi profetakuéra ojekreeterei ha itraisionéro.+
5 Jehová ihústo ha oĩ vaʼekue upe siudápe,+ haʼe ndojapói mbaʼeve ivaíva.
Káda pyhareve koʼẽ jey ha hesakãmba,
péicha avei káda pyhareve haʼe ohechauka ihustoha.+
Umi inhústo katu notĩri voi hembiapokuére.+
6 “Che ahundi vaʼekue heta tetãme, umi tórre oĩva umi murálla eskínape opyta nandi vera.
Ahundipa umi kálle pono avave ohasave upérupi.
Umi siuda opyta desástre, ni peteĩ persóna nahembýi upérupi.+
7 Che haʼe kuri pe siudápe: ‘Pecherrespetána ha peasepta pokorrehi jave’.+
Che haʼe kuri upéicha pono pe siuda oñehundi,+
che akastiga vaʼerã chupe entéro umi ipekádore,
péro upépe ae katu haʼe ojapo heta mbaʼe vai.+
8 Jehová heʼi: ‘Pesegi pehaʼarõ cherehe ha pehechauka penepasiensiaha,+
pesegi péicha pe día che aju peve asakea chupekuéra.
Pórke che adesidi ambyaty umi tetã ha umi rréino
akastiga hag̃ua chupekuéra, che ahechaukáta chepochyetereiha,+
che chepochyeterei, ha upéva haʼetéta peteĩ tata ohapýtava opa mbaʼe oĩva ko yvy ape ári.+
9 Upe tiémpope, che ameʼẽta umi puévlope peteĩ idióma pyahu, peteĩ ipotĩva,
ikatu hag̃uáicha enterovéva omombaʼeguasu che réra Jehová,
péicha haʼekuéra cheadoráta peteĩ ñeʼẽme’.+
10 Che puévlo isarambipa vaʼekue ojerure asy chéve ajúda,
haʼekuéra oúta Etiopía guive, umi rrío oĩhágui, ha oguerúta chéve peteĩ rregálo.+
11 Nde ningo rejapo vaʼekue heta mbaʼe reñemoĩ hag̃ua cherehe,+
péro upe tiémpope natekotevẽmoʼãvéima retĩ.
Pórke che aipeʼáta pende apytégui umi oñemombaʼeguasúvape,
ha ndereikomoʼãvéima reñembotuicha che montáña sagrádape.+
12 Che, Jehová, ahejáta umi hénte iñumíldeva ha ndaijejapóiva opyta nde siudápe,+
ha haʼekuéra oñemoag̃uíta cherehe aprotehe hag̃ua chupekuéra.
13 Umi hénte hembýva Israélgui+ ndojapomoʼãi mbaʼeve ivaíva,+
ndaijapumoʼãi ha nombotavymoʼãi avavépe.
Umi ovecháicha haʼekuéra oñenóta ha okarúta ha avave nomongyhyjemoʼãi chupekuéra”.+
14 Siuda de Sion, ¡esapukái vyʼágui!
Israel, ¡hatã esapukái!+
Siuda de Jerusalén,+ ¡evyʼa nde pyʼaite guive!
15 Jehová oipeʼáma ndehegui umi kastígo ou vaʼekue nde ári.+
Natekotevẽvéima rekyhyje mbaʼeve ivaívagui.+
16 Upe díape ojeʼéta Jerusalénpe:
“Ani rekyhyje siuda de Sion.+
Aníkena nekangy.
17 Jehová nde Jára oĩ nendive.+
Haʼe ningo ipoderóso ha haʼe ndesalváta.
Haʼe ovyʼaitereíta ndereheve.+
Haʼe ningo ohechaukáta nderayhuha, ha upéva ombovyʼáta chupe.
Haʼe ovyʼáta ndereheve.
18 Siuda de Sion, che ambyaty jeýta umi oñembyasýva ndaikatúi haguére oĩve umi fiésta ojejapóvape nde siudápe,+
ojegueraha chupekuéra ótro paíspe ha upépe oñemotĩ chupekuéra.+
19 Upe tiémpope che akastigáta enterove umi penembohasa asývape.+
Koʼág̃a ojerrespetáta ha oñemombaʼéta che puévlope umi tetã yma oñemotĩ haguépe chupekuéra.
Che ajapóta koʼã mbaʼe.
20 Upe tiémpope che pogueru jeýta,
upe tiémpope che pombyaty jeýta.
Enterove umi hénte oĩva ko yvy ape ári penderrespetáta ha penemombaʼéta.+
Peẽ pehecháta che agueru jey vove umi ojegueraha vaʼekuépe prisionéro”, péicha heʼi Jehová.+
Heʼiséva: “Jehová oporomoʼã”.
Oiméne péva heʼise hína umi mbaʼe ojepurúva térã ojejapóva ojeadora hag̃ua umi dios fálsope.
Térã: “omopotĩ”.
Amalisia péva haʼe peteĩ lugár oĩva Jerusalénpe, pe Pira Rokẽ ypýpe.
Hebréope: “oñemokirirĩma”.
Térã: “ndokuʼéivape, ojoguáva pe víno kyʼakue opytávape pe mbaʼyrúpe”.
Térã: “hoʼokue”.
Hebréope: “penemánsova”.
Hebréope: “penemánso”.
Térã: “asajepytépe”.
Térã: “oadoráta”.
Térã: “Pe yvytu ryapu térã peteĩ animál salváhe ñeʼẽ”.
Hebréope: “oturuñeʼẽta ha ombokacháta ipo”.