શું યહોવાના સાક્ષીઓ જૂના કરારમાં માને છે?

હા. યહોવાના સાક્ષીઓ માને છે કે આખું બાઇબલ ‘ઈશ્વરની પ્રેરણાથી લખાયું છે અને ઉપયોગી છે.’ (૨ તિમોથી ૩:૧૬) લોકો જેને જૂનો કરાર અને નવો કરાર કહે છે, એ બંનેનો બાઇબલમાં સમાવેશ થાય છે. યહોવાના સાક્ષીઓ બાઇબલના એ ભાગોને હિબ્રૂ શાસ્ત્રવચનો અને ગ્રીક શાસ્ત્રવચનો તરીકે ઓળખે છે. જેથી, લોકોને એમ ન લાગે કે બાઇબલના કેટલાક ભાગો જૂના-પુરાણા થઈ ગયા છે અથવા કંઈ મહત્ત્વના નથી.

ઈશ્વરભક્તો માટે જૂનો અને નવો કરાર બંને કેમ મહત્ત્વના છે?

ઈશ્વરની પ્રેરણાથી પ્રેરિત પાઊલે લખ્યું હતું: “જે કંઈ અગાઉ લખવામાં આવ્યું હતું, એ આપણા શિક્ષણને માટે લખવામાં આવ્યું હતું.” (રોમનો ૧૫:૪) આમ, હિબ્રૂ શાસ્ત્રવચનોમાં પણ આપણા માટે મહત્ત્વની માહિતી છે. એમાં મહત્ત્વનો ઇતિહાસ અને આપણને મદદ કરે એવી ઘણી સલાહ છે.

• મહત્ત્વનો ઇતિહાસ. હિબ્રૂ શાસ્ત્રવચનોમાં માણસના સર્જન અને માણસોમાં આવેલી પાપની અસર વિશે વિગતવાર માહિતી છે. એ માહિતી વગર આ સવાલોના સંતોષકારક જવાબ મેળવવા અઘરા છે: આપણે ક્યાંથી આવ્યા છીએ? આપણે કેમ મરણ પામીએ છીએ? (ઉત્પત્તિ ૨:૭, ૧૭) ઉપરાંત, હિબ્રૂ શાસ્ત્રવચનોમાં એ પણ જણાવેલું છે કે આપણી જેમ સુખ-દુઃખનો સામનો કરી રહેલા લોકો સાથે ઈશ્વર યહોવા કઈ રીતે વર્ત્યા હતા.—યાકૂબ ૫:૧૭.

• આપણને મદદ કરતી સલાહ. બાઇબલમાં આપેલા નીતિવચનો અને સભાશિક્ષકના પુસ્તકમાં જીવન માટે મહત્ત્વની સલાહ આપેલી છે, જે ક્યારેય જૂની થતી નથી. એ બે પુસ્તકો હિબ્રૂ શાસ્ત્રવચનોનો ભાગ છે. એમાં સુખી કુટુંબ વિશે (નીતિવચનો ૧૫:૧૭), નોકરી-ધંધા માટે યોગ્ય દૃષ્ટિ રાખવા વિશે (નીતિવચનો ૧૦:૪; સભાશિક્ષક ૪:૬), યુવાનીમાં ખુશી મળે એવાં કામ કરવા વિશે (સભાશિક્ષક ૧૧:૯-૧૨:૧) સલાહ આપેલી છે.

ઉપરાંત, બાઇબલના પહેલા પાંચ પુસ્તકોમાં (તોરાહ) મુસાનું નિયમશાસ્ત્ર છે, જેનો અભ્યાસ કરવાથી આપણને ફાયદો થાય છે. જોકે, એ નિયમો આજે ખ્રિસ્તીઓને લાગુ પડતા નથી, પણ એમાં આપેલા મહત્ત્વના સિદ્ધાંતો અમલમાં મૂકવાથી જીવનમાં સુખ-શાંતિ આવે છે.—લેવીય ૧૯:૧૮; પુનર્નિયમ ૬:૫-૭.