હું કઈ બાબતો માટે પ્રાર્થના કરી શકું?
શાસ્ત્રમાંથી જવાબ
ઈશ્વરની ઇચ્છા પ્રમાણે હોય એવી દરેક બાબત માટે તમે પ્રાર્થના કરી શકો. બાઇબલમાં લખ્યું છે: “ઈશ્વરની ઇચ્છા પ્રમાણે આપણે કંઈ પણ માંગીએ તો તે આપણું સાંભળે છે.” (૧ યોહાન ૫:૧૪) શું તમે પોતાની ચિંતાઓ માટે પણ પ્રાર્થના કરી શકો? હા. બાઇબલમાં લખ્યું છે: “[ઈશ્વરની] આગળ તમારું હૈયું ઠાલવો.”—ગીતશાસ્ત્ર ૬૨:૮.
તમે આવી બાબતો માટે પ્રાર્થના કરી શકો
ઈશ્વર પર શ્રદ્ધા મજબૂત કરવા.—લૂક ૧૭:૫.
ઈશ્વરની પવિત્ર શક્તિ મેળવવા, જેથી તમે સારાં કામ કરી શકો.—લૂક ૧૧:૧૩.
મુશ્કેલીઓ અને લાલચોનો હિંમતથી સામનો કરવા.—ફિલિપીઓ ૪:૧૩.
મનની શાંતિ મેળવવા.—ફિલિપીઓ ૪:૬, ૭.
ડહાપણ મેળવવા, જેથી સારા નિર્ણય લઈ શકો.—યાકૂબ ૧:૫.
દરરોજની જરૂરિયાતો માટે.—માથ્થી ૬:૧૧.
ભૂલોની માફી માટે.—માથ્થી ૬:૧૨.