ઉત્તેજન આપતા જવાબો તૈયાર કરીએ

સભાઓમાં આપણને પોતાના જવાબો દ્વારા ભાઈ-બહેનોને ઉત્તેજન આપવાની તક મળે છે. (હિબ્રૂ. ૧૦:૨૪, ૨૫) સારા જવાબો તૈયાર કરવા આપણે શું કરી શકીએ?

• યહોવા પાસે મદદ માંગીએ. પ્રાર્થનામાં માંગીએ કે યહોવા આપણને એવો જવાબ તૈયાર કરવા મદદ કરે, જેનાથી તેમનો મહિમા થાય અને બીજાઓને ઉત્તેજન મળે.—ગીત. ૩૫:૧૮.

• જવાબ ફક્ત વાંચી ન જઈએ. પોતાના શબ્દોમાં જવાબ આપીએ. એનાથી બીજાઓ જોઈ શકશે કે આપણને યહોવામાં કેટલી શ્રદ્ધા છે અને આપણા શબ્દોથી તેઓની પણ શ્રદ્ધા વધશે.

• નાનો જવાબ આપીએ. નાના અને સાદા જવાબથી મોટા ભાગે બીજાઓને ઉત્તેજન મળે છે અને વધારે લોકોને જવાબ આપવાની તક મળે છે.—નીતિ. ૧૦:૧૯.

• પોતાના જવાબથી સારી વાતો પર ધ્યાન દોરીએ. જવાબોમાં બીજાઓને સલાહ આપવાનું ટાળીએ અને કોઈને ધ્યાનમાં રાખીને જવાબ ન આપીએ.

જવાબ આપવાનો મોકો ન મળે તોપણ બીજાઓને ઉત્તેજન આપી શકીએ. બીજાઓના જવાબો ધ્યાનથી સાંભળીએ અને તેઓના વખાણ કરીએ.—નીતિ. ૧૦:૨૧.