કલમો કઈ રીતે યાદ રાખવી?

શું કદી એવું બન્યું છે કે તમને મનગમતી કલમ યાદ આવી ન હોય? કદાચ એવી કલમ જેનાથી તમને દિલાસો મળતો હોય, ખોટા વિચારો સામે લડવા મદદ મળતી હોય અથવા એ તમારે બીજા કોઈને બતાવવી હોય. (ગીત. ૧૧૯:૧૧, ૧૧૧) તમને કલમો યાદ રાખવા મદદ મળે એ માટે ચાલો અમુક સૂચનો જોઈએ.

• JW લાઇબ્રેરી એપનો ઉપયોગ કરો. “મનગમતી કલમો” નામનું એક ટેગ બનાવો. તમે જે કલમો યાદ રાખવા માંગો છો, એને એમાં મૂકી દો.a

• તરત નજરે પડે એવી જગ્યાએ કલમ મૂકો. તમે જે કલમ યાદ રાખવા માંગો છો, એને એક કાગળ પર લખી લો. પછી એને એવી જગ્યાએ મૂકો, જ્યાં વારેઘડીએ તમારી નજર પડતી હોય. અમુક લોકો એને અરીસા પર, તો બીજા અમુક લોકો એને ફ્રિજ પર ચોંટાડે છે. બીજા કેટલાક લોકો કલમનો ફોટો પાડી લે છે અને એને પોતાના કોમ્પ્યુટરની કે ફોનની સ્ક્રીન પર મૂકે છે.

• કાર્ડ બનાવો અને ઉપયોગ કરો. કાર્ડની એક બાજુએ બાઇબલ પુસ્તકનું નામ, અધ્યાય અને કલમ લખો. બીજી બાજુએ કલમના શબ્દો લખો. પછી કલમ પર નજર કરીને કલમના શબ્દો યાદ કરવાની કોશિશ કરો અથવા શબ્દો જોઈને એ કલમ ક્યાંથી લેવામાં આવી છે એ યાદ કરવાની કોશિશ કરો.