શું ઈશ્વરની મરજી આ છે?

તમે કોઈ પણ છાપું વાંચો, ટી.વી. જુઓ કે રેડિયો સાંભળો. જ્યાં જુઓ ત્યાં ગુના, લડાઈ ને આતંકવાદના સમાચાર હશે! તમારી પોતાની તકલીફોનો વિચાર કરો. નોકરી-ધંધો, બીમારી કે સગાં-વહાલાંમાં કોઈ ગુજરી જાય. આ બધાને લીધે દુઃખી દુઃખી થઈ જવાય. તમને ઈશ્વરભક્ત અયૂબ જેવું લાગી શકે. તેમણે કહ્યું: અરેરે, હું તો ‘દુઃખમાં ડૂબી ગયો છું.’—યોબ [અયૂબ] ૧૦:૧૫, સંપૂર્ણ.

તમને આવા સવાલ થયા હશે:

• શું ઈશ્વરે દુનિયાની આ હાલત કરી છે?

• હું શું કરું? મને કોણ મદદ કરશે?

• શું દુનિયામાં કદી સુખ-શાંતિ આવશે?

ઈશ્વર પોતે બાઇબલમાં એના જવાબ આપે છે. એ સાચે જ મનની શાંતિ આપે છે.

બાઇબલ શીખવે છે કે ઈશ્વર ધરતી પર આ રીતે સુખ-શાંતિ લાવશે:

‘ઈશ્વર આપણી આંખોમાંનું દરેક આંસુ લૂછી નાખશે. કોઈ મરશે નહિ. કોઈ શોક નહિ પાળે. સર્વ દુઃખો મટી જશે.’—પ્રકટીકરણ ૨૧:૪

‘લંગડા લોકો હરણની જેમ કૂદશે.’—યશાયા ૩૫:૬

‘આંધળાઓ દેખતા થશે.’—યશાયા ૩૫:૫

ગુજરી ગયેલાને ઈશ્વર જીવતા કરશે.—યોહાન ૫:૨૮, ૨૯

કોઈ એમ નહિ કહે કે ‘હું બીમાર છું.’—યશાયા ૩૩:૨૪

ખોરાકની કોઈ અછત નહિ હોય. બધે જ ‘પુષ્કળ અનાજ પાકશે.’—ગીતશાસ્ત્ર ૭૨:૧૬

બાઇબલમાંથી શીખો, આશીર્વાદ પામો

ચોથા અને પાંચમા પાન પરનાં વચનો જોઈને તમને કેવું લાગે છે? એ બસ મનની કલ્પના જ નથી. ઈશ્વરે એ વચનો આપ્યાં છે. એમ જરૂર થશે! બાઇબલ એના વિશે વધુ જણાવે છે.

બાઇબલ એ પણ જણાવે છે કે હમણાં આપણે કેવી રીતે સુખી થઈ શકીએ. કદાચ તમને પૈસાની તંગી હોય. કોઈ બીમારી હોય. કે પછી પરિવારમાં કોઈ સગાં-સંબંધીના મોતને લીધે શોકમાં ડૂબેલા હશો. કુટુંબમાં નાની-મોટી બીજી તકલીફો પણ હશે. બાઇબલ એ બધી તકલીફો હિંમતથી સહન કરવા મદદ આપે છે. બાઇબલ આ સવાલોના જવાબ પણ આપે છે:

• આપણા પર દુઃખો કેમ આવે છે?

• જીવનની ચિંતાઓ સહેવા શું મદદ કરી શકે?

• કઈ રીતે કુટુંબ સુખી બની શકે?

• મરણ પછી વ્યક્તિનું શું થાય છે?

• આપણે ગુજરી ગયેલાં સગાં-વહાલાંને ફરી જોઈ શકીશું?

• આપણે કેમ ભરોસો રાખી શકીએ કે ઈશ્વરનાં વચનો જરૂર પૂરાં થશે?

તમે આ પુસ્તક વાંચો છો, એ જ બતાવે છે કે તમને બાઇબલ વિશે જાણવું છે. એ તમને ઈશ્વરના વિચારો જણાવશે. આ પુસ્તકમાં ફકરાના નંબર પ્રમાણે દરેક પાનને અંતે સવાલો છે. ફકરો વાંચો. પછી સવાલ-જવાબથી ચર્ચા કરો. યહોવાના સાક્ષીઓ સાથે લાખો લોકો આ રીતે બાઇબલમાંથી વધુ શીખે છે. આ પુસ્તકમાંથી તમે પણ જોઈ શકશો કે બાઇબલમાં કેવું અનમોલ સત્ય છે. એનાથી તમને મનની શાંતિ મળશે, ખુશી મળશે. અમારી પ્રાર્થના છે કે ઈશ્વરની કૃપા તમારા પર રહે!