Nnen Titiraki

◼ Tera ae ti riai n iaiangoia imwaini matera ngkana ti kan anga ara bwai tabeua ke ni kabane, nakon ana botaki Iehova?

Ngkana a mate aomata, a aikoa kona n tau mwin aia bwai nako. (TeMin. 9:5, 6) Ma a bati aomata aika korea mwin aia moti i aan te tua imwaini mateia, ae kabwarabwaraaki iai aron tibwaakin aia bwai nako. (2Uea 20:1) E kaotaki naba n te moti anne, aran te aomata ae mwiokoaki bwa e na bairei taekani bwaai akanne ni kaineti ma ana moti te aomata ae mate. N aaba aika bati, ngkana akea ana moti te aomata ae mate, e na baireaki man te tautaeka tibwaakin ana bwai nako. Ma ngkana iai ara moti ae okoro ni kaineti ma ara bwai, bwa tao ti na anga tabeua mai iai nakon ana botaki Iehova ke ti na anga ni kabane, e kakawaki ngkanne bwa ti na korea ara moti i aan te tua ao ti na rinea raoi te aomata ae ti na mwiokoia bwa e na bairei taekan ara bwai nako ni kaineti ma ara moti.

E rangi ni kakawaki taben te aomata ae mwiokoaki bwa e na bairei taekani bwaai akanne. E kainnanoa karaoan ana babaire ao kabanean ana tai ae bati ibukin ikotakin ao tibwatibwaakini bwaai akanne, ni kaineti ma mwaitin ana mwane ke ana bwai ni kabane te aomata ae mate. Irarikin anne, iai ana tua te tautaeka aika riai n iraki nanoia. Tiaki nanona bwa tii kaain te ekaretia ni kabane aika a tau ni mwiokoaki bwa a na bairei taekani bwaai akanne. Ti riai ni kakoauaa raoi te aomata ae ti mwiokoia, bwa e konabwai, ti onimakinna ao e tauraoi ni karaoa ae ti tangiria.

Ngkana Ko Mwiokoaki Bwa Ko na Bairei Taekan Ana Bwai te Aomata ae Mate: Ngkana e tuangko temanna imwaini matena bwa ko na tararuai ana bwai nako, ko riai moa ni wareka mwaitin te mwane ni kakoauaa raoi bwa e eti, ao tataroakinna bwa ko na kakororaoa mwiokoam anne. (Ruka 14:28-32) Imwini maten te aomata anne, ko riai ni weteiia taani bwaibwai ni kabane. Ngkana ko a anganaki inaomatam n tibwai bwaai akanne, bon tabem bwa ko na tibwatibwai bwaai akanne ni kaineti ma te tua ao ana moti naba te mate. E riai n ataia raoi te aomata ae mwiokoaki bwa e aki riai ni karaoa ana babaire ae okoro ma are e a tia ni moti, e ngae ngke e rangi ni bati ke e uarereke ana mwane ao ana bwai te mate. Bwaintangira nako ake a kabonganai Ana Tia Kakoaua Iehova ni kaineti ma te tua ao ana moti te mate, boni bwain ana botaki Iehova.—Ruka 16:10; 21:1-4.