Titiraki Mairouia Taani Wareware

Tera te bwai ni kakoaua n tauan te kaawa rimoa ae Ieriko bwa e niniaki n te tai ae kimototo?

N aron ae taekinaki n Iotua 6:10-15, 20, a mwaati ana taanga tibun Iteraera ni katobibia Ieriko teuana te tai n tebongina i nanon onoua te bong. N te kaitiua ni bong, a katobibia te kaawa itiua te tai ao ikanne are e a kabwakaa te Atua oon Ieriko ae matoatoa. Ikai are a a kona iai tibun Iteraera n rinnakoa Ieriko ao n taua. Iai bwaai ni kakoaua mani baike a kuneaki i aantano are e kamatoaaki iai te rongorongo n te Baibara bwa e niniaki Ieriko n te tai ae kimototo?

N taai ake rimoa ao a aki toki taani kakaaitara ni katobibia moa te kaawa ae korakora bwa a na taua. N aki ongeia bwa maanra aroia ni karaoa anne bwa a aonga n tokanikai, a a kona naake a kataenikaia te aba n anai kaubwain te kaawa ma nikirani bwaina nako. E ngae n anne, a kunei amwarake aika bati taan rabakau ni bwain aantano, ni kaawan Ieriko are e uruaki. Ibukin aei, e taekinaki aio n te Biblical Archaeology Review: “A kuneaki mwangko taano imwin uruakin te kaawa ao ae rangi ni bati riki bon te uita. . . . E boni kamimi aei n aron ae noraki n taian rongorongo mai Baretain ake a kawakinaki rimoa. E bae ni kuneaki teuana ke uoua te kaatibu, ma ae kamimi boni kunean te mwaiti ni uita ae rangi ni bati.”

N aron ae taekinaki n te Baibara, iai bukina ae riai irouia tibun Iteraera ngke a aki anaa aia uita kaain Ieriko. E bon tua Iehova nakoia bwa a aki riai n anai bwain te kaawa. (Iot. 6:17, 18) A buaka tibun Iteraera tao ni Maati ke Eberi bon tibwa imwin tain te tai ae a rangi ni bati iai uita. (Iot. 3:15-17; 5:10) Te koaua ni kaineti ma kunean te nikira ni uita ae rangi ni bati i Ieriko, boni kaotaraean ae a bon ninia te kaawa n te tai ae kimototo tibun Iteraera, n aron raoi ae taekinaki n te Baibara.