Kakabwaiaani Maiuna Man Ana Beku Ibukin te Atua

N te tai ae waekoa, I a irekereke ma te aekaki n ekitiaiti ae e kona ni kamarurunga te rabwata ao ni kakorakoraa. N tokina I a kauka au bitineti ibukin te kamarurung n rabwata i aon San Leandro, California, U.S.A ao ni mwakuri ma taani kamarurunga te rabwata, n ikotaki naba ma temanna are e reke irouna te ara ae Mr Amerika. E ngae ngke e rikirake ni mwatikura rabwatau, ma bon akea rauakin nanou iai.

KAKABWAIAAN AU KAKAAE

E ataia raoraou n au bitineti aei, ae I tangiria bwa N na ota ni kanoan te Baibara, ao e a tuangai bwa I riai ni kaitiboo ma temanna are e kinaa. N te ingabong are imwina, e a roko n au auti temanna Ana Tia Kakoaua Iehova. E kaekai raoi au titiraki man te Baibara i nanon aua te aoa. I a tuangnga ngkanne bwa e na manga okirai n tairikin naba te bong anne, ao ti a maroroakini kanoan te Baibara ni karokoa te nukanibong. I a rangi ni kukurei ni baike I reiakin ao I tuangnga naba bwa I kona n airi mangaia n te bong are imwina bwa N na nora aroni karaoan te mwakuri ni minita. I rangi ni mimi n arona ni kauka ana Baibara ao ni kaota kaekaan aia titiraki aomata nakoia. N noran anne, I a iaiangoia bwa bon anne te bwai ae I kani karaoia!

Ngaia are I a katoka au bitineti ao I a kabanea riki au tai n te mwakuri ni minita ma te bwaiania aei n aron ae a aranaki iai Ana Tia Kakoaua Iehova aika a kabwanina aia tai iai. Ni Mei 1948, I a bwabetitoaki n te bwabwaro ae boo n te Cow Palace Arena ae te tabo n takaakaro i San Francisco i California. Rimwi riki ni bon te ririki naba anne I a riki bwa te bwaiania.

N te tai aei, I a bubutiia taani Kakoaua bwa a na kawara tinau. E rangi n ingainga ni kan ongora ao e aki maan imwina, e a riki bwa temanna Ana Tia Kakoaua Iehova. N aki ongea kaitaraana mairouia ana utu, e boni kakaonimaki naba nakon te Atua i nanon ririki aika bati ake imwina riki ni karokoa matena. Akea ma i buakoia ara utu ae a a tia n riki bwa taani Kakoaua.

KAITIBOOU MA TE AINE ARE E NANG RIKI BWA BUU

N 1950 ao I a mwaingi nako Grand Junction i Colorado ike I a kaitiboo iai ma Billie. E bungiaki neiei n 1928 ao e ikawairake i nanon te tai ae rangi ni kangaanga ae aranaki bwa te Great Depression. E wawarekaki te Baibara nakoina iroun tinana ae Minnie ni katoa tairiki n otan te taura te raenten ae te karatin bwaana. E a kona ni wareware Billie ngke ai aua ana ririki ao a a rangi ni matenikuna karaki man te Baibara aika bati irouna. N raabanen 1940 tabun ngke e reiakina te Baibara tinana ma taani Kakoaua, e a ataia ae bon tiaki te tabo ni kammaraki moone ma bon ruanimateia aomata. (Te Minita 9:5, 10) E a riki tinana are Minnie ma buuna bwa taani Kakoaua.

N 1949, e a oki Billie man te reirei ae rietata i Boston ao e a moana ana reirei n te Baibara ma nanona ni koaua. N oneani mwin are e na riki bwa te tia reirei, e a iangoia bwa e na katabua maiuna nakon te Atua. E bwabetitoaki neiei n 1950 n te bwabwaro ibukin aaba aika kakaokoro ibukia Ana Tia Kakoaua Iehova n te Yankee Stadium ae te tabo n takaakaro i New York. E aki maan imwin anne, ti a kaitiboo, ti mare ao ni kaai ni moana kabwaninan ara tai n te mwakuri ni minita.

Ti moana ara mwakuri anne i Eugene Oregon ao ni karekeia raoraora ake ti rangi ni maan n ikoikotaki ma ngaiia. N 1953, ti a mwaing nako Grants Pass i Oregon ni buokiia kaain te ekaretia ae uarereke n te tabo anne. Rimwi riki n te ririki anne, ti a kaoaki nakon te ka-23 ni kuura ni Kireata ae te reirei ibukini kataneiaakia taani Kakoaua bwa mitinare, n te tabo are e kaan ma Lansing mai Maiaki i New York ae tao 400 te kiromita i meang-maeaon New York City.

AU MWAKURI NI MITINARE I BRAZIL

N Ritembwa n 1954, nimaua te namwakaina imwin ara anga beeba i Kireata, ti a toka nako Brazil ngai ma Billie n te wanikiba ae uoua kiikonnangini baina. Imwin teuana te aoa ni kiba ao e a tii uruaki naba intinna teuana, ma e ngae n anne ti titiku rikaaki n akea te kabuanibwai i aoni Bermuda. Imwin tikura rikaaki teuana riki ngke ti aitara ma te kangaanga i Cuba ao n ikotaki ma 36 te aoa n te mwananga ae rangi ni kakua, ti a roko n aia aobiti n tararua Ana Tia Kakoaua Iehova i Rio de Janeiro i Brazil.

Imwin tikura ikanne n te tai ae kimototo, ti a raonaki ngai ma Billie irouia uoman mitinare aika aine n nako Bauru i Sao Paulo ike ti a moani kauka aia auti mitinare ae boou iai. E a riaon 50,000 mwaitin ana botannaomata te kaawa ane bubura anne ao boni ngaira taani Kakoaua aika ti moan roko iai.

Ti a moana ngkanne kawaraia aomata n aia auti, ma n te taina e a kaitaraa ara mwakuri te mitinare ni Katorika n te tabo anne. E ririmwira ao e tuangia aomata bwa a na aki ongora. Ma i nanon tabeua te wiki, ti a reirei n te Baibara ma te utu teuana ae bubura ao a butimwaei koaua mai iai ao imwin anne a a boni bwabetitoaki. A boni moana aia reirei n te Baibara tabeman naba n te tai ae waekoa.

Iai te mwaane temanna ae te beretitenti n te kirabu ae rangi n ataaki, ae aia koraki kaain te utu ake a a tia ni bwabetitoaki. I karaoa au babaire ibukini kabonganaan te kirabu bwa e na karaoaki iai te runga. E tuatua te mitinare n te tabo arei bwa e na katokaki aia boraraoi, ngaia are e a tewea ana boowi te beretitenti ma naake a bukinibwai n te tabo arei ma ni kangai nakoia: “Ngkana kam katokiia ao ngai N na kerikaaki.” E boni kariaiakaki bwa e na boo te botaki iai.

N te ririki are imwina, n 1956 ti a kaoaki nakon te bwabwaro ae boo i Santos, São Paulo. E kaania 40 taani Kakoaua man ara ekaretia aika a mwananga nako ikanne n te turein. N okiran Bauru, I a nora teuana te reta i nanon te meeri bwa I a kaoaki bwa N na beku bwa te mataniwi ae mwamwananga ni kakawari aia ekaretia Ana Tia Kakoaua Iehova. Ngaia are ti a moana ara mwakuri ni mwamwananga aei n te maan ae kaania 25 te ririki i Brazil ni kawari angiin taabo n te aba ane e bubura anne.

ARON TE MWAKURI NI MINITA

E rangi ni kangaanga te mwamwananga ni boong akanne. N tokina ti mwakuri ni kabutaa te aba anne n te bwati, te turein, te kaa ae kokokaki n aoti, te bwatika ao ai boni waera. Te moani kaawa are ti kawaria bon Jau i S’ao Paulo. N te tabo anne ao iai te mitinare ae e kaaitaraira.

E kakaonako ni kangai: “Kam na aki uarongorongo nakoia ‘au tiibu!’”

Ti kaekaa ni kangai: “Tiaki am aomata bwa ana aomata te Atua.”

Ti baireia ngkanne bwa ti na kaota te birim ae taekan ara mwakuri n uarongorongo ni katobibia te aonnaba ae atuna The New World Society in Action, ma e ikoikotiia aomata aika bati te mitinare arei bwa a na kaaitaraira. Ti boni waekoa n te tai naba anne ni kaongoia bureitiman. Ngke e a roko n te tabo n taamnei te mitinare ma kaain ana Aro aika bati, a tei bureitiman n aron te oo ae matoatoa ma aia katii ni kaaitaraia. A uanao taani mataku aika rangi ni kukurei n te birim anne.

E riki te aro naba anne ae te kairiribai ao te kakaaitara irouia Aaro n taabo nako ake ti mwamwakuri iai n taai akekei. N te katoto, ti kaitiboo ma uoman bwaiania aika a beku i aani kaitaraakia ae korakora i aon Brusque are e uakaan ma Blumenau i Santa Catarina. Ma a reke kakabwaiaaia aika rangi ni bati man nanomwaakaia ao teimatoaia. E a riaon 50 te ririki imwina riki ngkai, ao a a raka i aon 60 mwaitin ekaretia aika maiureirei n te tabo anne n ikotaki naba ma te Tabo Ibukin te Runga ae rangi n tamaroa ae uakaan ma te kaawa ae Itajai.

Te bwai ae rangi ni kakannongora n ara mwakuri ni mwamwananga, bon taai ake a rangi ni kakukurei ake ti kaai ni mwakuri iai ma raora aika taani Kakoaua ibukini karaoani katauraoi imwaini bwabwaro aika bubura. N 1970 tabun, I a mwiokoaki ni karaoan te beku bwa te mataniwi ibukin te bwabwaro n te tabo n takaakaro ae bubura ae te Morumbi Stadium. E kanakoaki te bubutii nakoia ekaretia aika tao tebubua n taabo ake a uakaan, ibukini karekeaia aomata aika kaka tengaun bwa a na kaitiaka te tabo anne n te tairiki are imwain te bwabwaro.

N te tairiki anne, a kitana te tabo n takaakaro taani butibooro ao e ongo te aba aia bwainingare tabeman mai buakoia ae kangai: “Ao bon taraia ni kabane ataeinnaine ma bwain taean te timanti ao kamwauana bwa tao n aia iango a kona ni kaitiaka te tabo n takaakaro aei.” Ma e ngae n anne, e a itiaki raoi te tabo n takaakaro anne ngke e a nukanibong! E taku te manatia n te tabo n takaakaro arei: “Kam kaitiakia tii i nanon tabeua te aoa, ma a na boni kabanea teuana te wiki au tia mwakuri ni karaoan anne!”

MANGA OKIRAN TE UNITED STATES

E mate tamau n 1980 ao ti a waekoa n oki nakon te United States imwina riki ni kawakina tinau i Fremont California. E a reke ara mwakuri ae kaitiakan auti ni mwakuri n te tairiki ao n reitaanako ara bwaiania ma ni buokia aomata aika kaaini Botukare n ara aono aei. Imwina, ti a mwaing nakon San Joaquin Valley ae uakaan nakoira ike ti a ukeria iai aomata aika a kamanena te taetae ni Botukare n te aono ae rangi ni bubura are mai Sacramento nako Bakersfield. Ma n te tai aei ao tao ai tebwina ekaretia i aon California aika a kamanena te taetae ni Botukare.

Imwini maten tinau n 1995, ti a mwaing nako Florida ao ni manga kawakina taman Billie ni karokoa e mate. E a tia ni mate tinan neiei n 1975. N 2000, ti a mwaing nakon te tabo ae karereua ae rietata i maiaki-maeaon Colorado ao ti kabwanina ara tai n uarongorongo nakoia kaain raoi Amerika n aono aika Navajo ao Ute. E kananokawaki bwa e mate Billie ni Beberuare 2014.

Ai kukureira ngai bwa 65 te ririki n nako ao I kaitiboo ma temanna Ana Tia Kakoaua Iehova are e kaekai au titiraki aika bati boni man te Baibara! I rangi ni kukurei riki bwa I kakoauaa raoi ae baike e taekini, boni kanoan raoi te Baibara. I kairaki n aei bwa e na kakabwaiaaki maiu N au beku ibukin te Atua.