Ko Riai ni Bwaina te Koaua n Taai Nako?

A bwaina te koaua n taai tabetai aomata nako, ma a bati aika tao a bwabwainna n angiin te tai. Ma iraman aika ko ataiia bwa a kakorakoraia ni bwaina te koaua n taai nako?

E a taabangaki ni boong aikai kerikaakini bwainan te koaua n iterani maiura aika rangi ni bati. Ma e rangi n ataaki ana kantaninga te Atua ibukini bwainan te koaua. N te katoto, a taneiai angia aomata ma taeka aika n te kawanua n tua man Tuua Ake Tebwina ae kangai: “Ko na tai ira.” (Te Otinako 20:15, BG) Ma a bati aika a iangoia bwa n taai tabetai ao ibukini baika riiriki nakoia, iai ngkanne riain te iraa ke aaro riki tabeua ake e aki bwainaki iai te koaua. Ti na rinanoi tenua katoton te iraa aika taabangaki iangoaia bwa a riai.

E Riai te Iraa Ngkana Ko Maiu ni Kainnano?

E taku ngkoa bwakuakun te tautaeka n Rom temanna: “Te maiu ni kainnano bon nibwan te kakeru.” Tao e kona n iango ane e maiu ni kainnano bwa iai riaina n iraa. Tao a kona naba ni boraoi n iango ma aei taani mataku. Ma tera ana iango Iesu n te titiraki aei? E bon uataboa te rawawata n aroarona nakoia ake a maiu ni kainnano. “E nanoangaiia.” (Mataio 9:36) Ma n aki ongei baika riki, akea te tai ae e a tia ni kariaia iai te iraa. Tera ngkanne ae e riai ni karaoia ane e maiu ni kainnano?

E nanoangaiia te Atua ake a ongeaba ma nanoia ni koaua ao e na kakabwaiai aia kakorakora ni karekeani baika kainnanoi. (Taian Areru 37:25) E beritanaki n te Baibara ae kangai: “E na aki kitana tamnein te aomata ae raoiroi Iehova ba e na baki: Ma E tewea nako te bwai ae tangiraki iroun te aomata ae buakaka.” (Taeka N Rabakau 10:3, BG) E kona ni kakoauai taeka aikai te aomata ae maiu ni kainnano? E boni kakoauaa aei Victorine.

E aki bebete uotan Victorine bwa e a tia ni mate buuna ao iai natina aika niman aika a bane n reirei. E maeka neiei n te aba ae e a tibwa karikirakea kaubwaina ike e a tianaki iai te mwane ni buoka man te tautaeka. N angiin te tai, a memena i tinanikun te auti ibukini karekeani maiuia ni katoabong ike a a rangi ni bati iai aanga n iraa. E aki kaririaki Victorine bwa e na iraa, ma e kekeiaki ni karekei baike e kainnanoi ibukini maiuna n arona ni bwabwaina te koaua n ana tai ni kabooi nako bwaai i rarikin te kawai. E aera ngkai e teimatoa ni bwaina te koaua?

E taku: “Te moan, I kakoauaa bwa e bwabwaina te koaua te Atua ao e na bwabwainna naba n aroarona nakoiu ngkana I kakairi irouna. Te kauoua, a kona n reiakinaki natiu bwainan te koaua tii ngkana a norai ni maiuakinna.”

E kanga n tokanikai neiei ni karaoan aei? E taku: “Iai kanara, kunnikaira, ao ara auti. Ma n taai tabetai, I butiia raoraou bwa a na buokai tao n aroni kabwakaani boon au bwainnaoraki ae te bwai ae I aki kantaningaia. A bon rereke baika I kainnanoi n taai nako. Bukin tera? Ibukina bwa a ataia raoraou ae I bwaina te koaua n taekinani baika riiriki nakoiu ao I aki kataia ni karekei baika bati riki nakon ae I kainnanoia.

“A karikirakea bwainan te koaua natiu n aia tai n ikawairake. N taai aika tibwa nako ao e kawarai kaain rarikiu ao e nori tianti tabeua n raea n ara taibora ao e titirakinai bwa I raraoma bwa rimwi a anaia natiu ke I aki. E kangaanga iroun neiei kakoauaan au taeka ae akea te tai ae a a tia n anaa iai te mwane natiu. Ngaia are e a iangoia bwa e na tuoia natiu n akea ataakina irou. E karabaa ni katikui uoua te maibibi ae 100-franc n ara auti n te tabo ae kai noraki irouia ataei. E roko n te bong are imwina ao e rangi ni kubanako ngke a bon tiku naba n te tabo arei mwaane akekei. E bongana riki rekeia natira aika a bwabwaina te koaua nakon rekeni bwaikorakin te maiu aei aika bati.”

“A Kakaraoia Aomata ni Kabane”

E a taabangaki te iraa n te tabo ni mwakuri. Ao ibukin anne, a bati aika a iango ni kangai, “a kakaraoia aomata ni kabane, ngaia are e aera bwa N na aki karaoia?” Ni kaitaraan anne, e kangai te Baibara: “Ko na tai kakairi iroun te koraki ae bati ni karaoa ae buakaka.” (Te Otinako 23:2, BG) E mutiakina te kaungaunga aei Victoire. Ma iai uaana aika raraoi?

Ngke 19 ana ririki Victoire, ao e a reke ana mwakuri n te tabo ni karao oera man te baam. E waekoa n noria neiei bwa iai taani mwakuri aika 40 aine ake a kararabai koraani baam n aia bwaene. A kaboonakoi koraa aikai naakai ni katoa wikeen n te boo ae boraoi ma booia ibukin tenibong ke abong. E taku Victoire: “Ni koauana, a boni kakaraoa aei aomata nako. A kantaningaai bwa N na karaoia ma I rawa ao I tuangia bwa I bwabwaina te koaua ni maiu. A kakanikoai, ao a taku bwa bon akea te bwai ae I kona ni karekea.

“N te bong teuana ngke ti nang kitana te tabo ni mwakuri ao e a karina naba ni kaoti te manatia. E tuoi aia bwaene aomata nako ao e kunei koraani baam ni bwaene nako ma tii au bwaene ae akea iai. A na bane ni kamotirawaaki ngkekei naba ke a na mwakuri i nanon uoua te wiki n aki kabooaki te koraki ake a reke n te bure. Ni wiki akana uoua akanne, a a moanna ni kakoauaa aine aikai ae a na bon reke au bwai aika bati.”

“Ngkana Ko Kunea te Bwai Teuana, Ko Kona ni Kawakinna”

Tera am namakin ngkana ko kunea te bwai ae moan te kakawaki ae ana bwai temanna ae bua mairouna? Irouia aomata aika bati, e tokarake naba ngkekei nanoia bwa bon aia bwai, n te aro are a aikoa kani kaokia nakon are ana bwai. A ira nanon te karioiango are “ngkana ko kunea te bwai teuana, ko kona ni kawakinna.” Tao tabeman a iangoia bwa akea ae e na maraki ni karaoan aei. Bwa ni koauana, a iangoia bwa e a kaaki taekana te aomata are ana bwai bwa n ana iango e a aki kona ni manga reke irouna. A taku ake tabeman bwa tiaki tabeia ukeran te aomata are ana bwai bwa bon te mwakuri ae irekereke ma te kakorakora ae bati.

Ma tera ana iango te Atua n te waaki aei? E kaotaki n Te Tua-Kaua 22:1-3, (BG) bwa e na aki tii kawakina te bwai anne teuare e kunea ma e na kawakinna “ni karokoa ukoukorana iroun [teuare ana bwai], ao [e] na manga kaokia nako ina.” Ngkana e aki kaota te bwai are e kunea te aomata aei, e a kona ni bukinaki bwa e iraa. (Te Otinako 22:9) E bongana te reirei aei ni boong aikai? E kakoauaa Christine bwa e bongana.

Bon te tarekita Christine n te reirei teuana ae ana bitineti te aomata. N te Katenibong teuana, ao e anaa ana bwakabwai ibukin te namwakaina anne. N aron ae a kakaraoia aomata aika bati i Aberika Maeao, e niri ana mwane ao e waekoa ni karinna n ana baeki. Imwina e katea te rebwerebwe ae tatangoaki ao e waekoa n toka iai nakon te botaki. N rokona n te tabo ni botaki, e ienikuri n ukeri tianti n ana baeki ao n anga bwa kantokana. E bwaka ana bwakabwai are e niria i aontano, n te rotongitong anne ao e aki ataia.

Tabeua te miniti imwina, e a toua te kawai anne Blaise ae 19 ana ririki are ai tibwa ana moantai n roko n te tabo anne. E boraraoi teuaei bwa e na kaitiboo ma raoraona temanna n te botaki are e iria naba Christine. E kunei mwaane ake a niraki teuaei ao e karin ni buan ana kawaerake. Ni bwaran te botaki, e a kaongoa raoraona bwa iai te bwai ae kunea i tinanikun te tabo ni botaki ao e tuangnga bwa ngkana iai ae e bua ana bwai ao e na tareboonia ao ni kaotia bwa tera te bwai anne.

Ngke e a roko Christine n ana auti n te tairiki anne, e a rangi n uruaki nanona ngke e a noria bwa e a bua ana bwakabwai. Teuana te wiki imwina, e a taekina ana bwai are e bua nakon raoraona ae Josephine, ao e a kaongoaki bwa iai te bwai ae kunea te aomata are e roko ngkoa n te botaki. E tareboonia Blaise Christine ao e kabwarabwaraa ana bwai are bua. E rangi ni kimwareirei neiei ngke e a kaokaki ana mwane irouni Blaise. Ma tera aroni Blaise? E kawakina te mwane aei i nanon teuana te wiki ma e taku, “e korakora riki kimwareireiu ni kaokan te mwane nakoni kawakinana.”

Bukini Kakorakoraaia ni

Bwaina te Koaua n Taai Nako

A kakaokoro aia tabo ni maeka Victorine, Victoire, ao Blaise ao a aki kinaia. Ma iai baika a katiteuanaaki iai. Bon Ana Tia Kakoaua Iehova ngaiia ake a boutokaa ana taeka te Baibara ni bwainan te koaua. A kariariaa kakoroani bukin ana berita te Atua n te waaki ae boou i aon te aba. “Ni kaineti ma ana berita, ti kariariaa karawa ae boou ao te aonnaba ae boou, ae e na mena iai te raoiroi.” A na bane ni maeka n te tai anne akana raoiroi ao ni bwabwaina te koaua.​—2 Betero 3:13.

E karako iroun Victorine kantaningaan ae e na rangi n nakoraoi ana kangaanga ibukin te mwane n te tai aei moa, ma tii ngkana a a bitaki bwaai nako iroun te Atua, are a nang kona n nakoraoi iai. Ma e rangi ni korakora ana onimaki, ae te bwai ae aki kona ni kabooaki n te mwane. A bwabwaina te koaua natina ao a ataa te katei. Ni katoa Taabati, ‘e taonako kimwareireia’ ngkana a taetae ma kaain rarikia ibukin raoiroin te Atua ao ni kabwarabwaraan arona ni kanuaiia “akana weteia n te koaua ni kabaneia” ao e na kawakinia “akana tangiria ni kabaneia.”​—Taian Areru 145:7, 18, 20, BG.

Imwin tabeua te tai, e a kitana ana mwakuri n te tabo ni karao oera man te baam Victoire. E a moana ana bitineti n te mwakete ike e a kakabooa nako iai te garri (ae te tabioka ae buabuaaki). Ibukini bwainan te koaua irouna, a anaaki nanoia aomata aika bati bwa a na boobwai irouna. N te tai ae waekoa, e a kona ni kauarerekea ana tai n te mwakete ao e a kabatiaa riki ana tai n taetae ma aomata ibukin te kantaninga are ti nangi maeka n te aonnaba ae akea bwainakin te kewe iai. Imwina riki, e a mare neiei ao a kaai n riki bwa minita ike a a kabwanina aia tai iai.

E bua ana mwane Christine i matan aia Tabo n Taromauri Ana Tia Kakoaua Iehova. E kinaia tabeman mai buakoia ake a roko n te botaki Blaise, ma e ataia bwa bon tarina ao mwaanena n te onimaki ake a kataia ni bwaina te koaua n taai nako.

Iraman aika ko ataiia bwa a kakorakoraia ni bwaina te koaua ma nanoia ni kabane n taai nako? Karaua iangoia bwa aongkoa ko mena i buakoia aeka n aomata akanne aika 50, 100, ke 200 mwaitiia. Bon anne te aeka ni kukurei ae a namakinna Ana Tia Kakoaua Iehova n aia Tabo n Taromauri. E aera bwa ko aki nako iai ao n ikikina ma ngaiia?

[Kabwarabwaraan n iteraniba 21]

“E bongana riki rekeia natira aika a bwabwaina te koaua nakon rekeni bwaikorakin te maiu aei aika bati.”​—VICTORINE

[Te Bwaoki n te iteraniba 23]

E Boutokaa te Iraa Taeka N Rabakau 6:30?

E taekinaki ae kangai n Taeka N Rabakau 6:30, BG: “Tiaki a riba te tia ira aomata? Eng, e boni ngae n ira ni kanua birotona ngkana e mate ni baki, ao a ribaia naba.” E boutokaaki ngkanne te iraa n taeka aikai? E bon aki. E kaotaki ni bwaninin te rongorongo bwa e teimatoa te Atua ni bukina te tia ira ibukin ana bure. E kangai te kibu ae imwina: “Ao ngkana tao e reke, ao e na manga kaboa ni kaitiua boona; E na anga bwaai ni kabane aika i nanon ana auti.” (Taeka N Rabakau 6:31, BG) E ngae ngke tao tiaki titeboo rawawatani bukinakin te tia iraa are e iraa ibukini bakina ma ane e iraa ibukin nanonrangina ke ibukin oin nanona ni kani kammaraka raona, ma e teimatoa ni bukinaki bwa e na “manga kaboa” mwina ke ni kabwaraa. A riai n aki irekereke ma aaro n iraa ni kabane te koraki ake a kan akoaki iroun te Atua.