E Koaua ae te Maiu ni Kainnano Boni Kanikinaean ae Ko Aki Tangiraki Iroun te Atua?
E TUANGIA tibun Iteraera ake rimoa te Atua ni kangai: “A na aki mena akana akea aia bwai [ke aika “maiu ni kainnano,” NW] i buakomi.” Ibukina bwa n te Tua are e angania tibun Iteraera te Atua, iai kaetieti i nanona ibukin aron tabeakinan ao kakeaan aia taarau aika a maiu ni kainnano. (Te Tua-Kaua 15:1-4, 7-10) Ai ngaia are, e bon riai n akea i buakoia tibun Iteraera te aomata ae maiu ni kainnano, ngkai e beritanna Iehova bwa e na kakabwaiaia. Ma e ngae n anne, a tii kona ni karekea te kakabwaia anne tibun Iteraera ngkana a ongeaba nakon te Tua anne, are a kabwaka iai n ira nanona.
Ma e aki nanonaki n aei bwa a tangiraki riki aika maiu ni kaubwai iroun te Atua ao a aki bati n tangiraki aika a maiu ni kainnano. A mwaiti i buakoia ana toro aika kakaonimaki ngkoa te Atua aika a maiu ni kainnano. Bon te tia kawakin tiibu ae mangori ao te tia kiniki uaanikai naba n taai tabetai te burabeti are Amota. (Amota 1:1; 7:14) Ngke e roko te rongo i aon Iteraera n ana bong Eria are te burabeti, ao e a kamaiuaki Eria n ana akoi te aine ae mate buuna ae maiu ni kainnano, are e teimatoa n reke n te aro ni kakai ana burawa ao ana oera ake a bon aki tau ngkoa n tain te rongo. A bon aki riki ni kaubwai Eria ke te aine ae mate buuna arei, ma e bon tii teimatoa Iehova ni katauraoi baike a kainnanoi ibukini maiuia.—1 Uea 17:8-16.
A kona ni waekoa ao n aki kantaningaaki rikia aomata ni maiu ni kainnano mani kangaanga aika karina n riki. A kona kangaanga aika karina n riki ao te aoraki n tuka mwakurin te aomata i nanon tabeua te tai ke ni kabane maiuna. Ao te mate e kona ni katikuia ataei n akea aia karo ao aine n akea buuia. Ma e ngae n anne, aeka ni kangaanga aika kakaiaki aikai bon tiaki kaotan ae ko aki tangiraki iroun te Atua. Bon te katoto ae kaunganano rongorongon Naomi ao Ruta ni kaineti ma aron Iehova ni mwannanoia aika maiu ni kainnano. E ngae ngke a tiku ni maiu ni kainnano Naomi ao Ruta imwini mateia buuia, ma e boni kakabwaiaia Iehova ae te Atua ni katauraoi baika a kainnanoi ibukini maiuia.—Ruta 1:1-6; 2:2-12; 4:13-17.
E teretere ngkanne, bwa te maiu ni kainnano bon tiaki kanikinaean ae ko aki tangiraki iroun te Atua. A kona te koraki ake a onimakina Iehova ae te Atua n onimakin raoi ana taeka te Uea ae Tawita aika kangai: “Bon te tei ngai ngkoa, ao I a kara ngkai; Ma I tuai men nora te aomata ae raoiroi ae kitanaki, Ma natina aika bububuti te amarake.”—Taian Areru 37:25.
[Taamnei n iteraniba 8]
A bon kakabwaiaaki ao ni mwannanoaki raoi Naomi ao Ruta iroun te Atua, e ngae ngke a maiu ni kainnano