“Te Buaka Ae Na Katoki Buaka Ni Kabane”
‘I berita nakoimi bwa aei te kaitira ni buaka ae na katoki buaka ni kabane.’—AIKAI ANA TAEKA TE BERETITENTI N TE U.S. (1913-21) AE WOODROW WILSON.
AIKAI ana kaantaninga aika moanibaan te raoiroi, temanna te tia kairiri n te aonnaba n tokin te Moani Buaka Are Kabutaa Aonnaba, tao 90 te ririki n nako. E rangi ni kakamaaku ao n tiritiri te buaka ae rota te aonnaba ni kabutaa aei. Ao a rangi ni kani kakoauaa aomata ake a tokanikai n te buaka aei, bwa a na reke kakabwaiaaia aika teimaan man aia kakorakora ni buaka. Ma a burenibwai ni kaetii kangaanga aia buaka aomata, ao a bon aki kona ni katoka te kangaanga ae kakaiaki riki ae bon te buaka.
Tao 20 te ririki imwin ienikurian ana berita aei te Beretitenti ae Wilson, ao e a boo naba te kauoua ni buaka are kabutaa aonnaba. E a bati riki iai te mate ao te urubwai nakon are n te Moani Buaka Are Kabutaa Aonnaba. A a tia n rikirake ni mwaatai riki aomata n tiringia aomata aika bati man rikiraken rabakau aika boou i nanon uabwi te ririki imwin te moan buaka arei. Ngke e a kaan roko n tokina te kauoua ni buaka are kabutaa aonnaba, a a noria taani kairiri n te aonnaba bwa e a kakai reke riki ngkai te buaka nakon are mai mwaina.
N 1945, ao e taekina ae kangai te U.S. General Douglas MacArthur: “Ti a tia ngkai n anganaki ara kabanea n tai are ti na kamaunai iai taiani buaka. Ngkana ti aki karekea te waaki ae raoiroi riki nakon aei, ao e nang tei i matan ara mataroa Aremaketon.”
E atai baike a riki General MacArthur imwini kabwakaani boom aika mwaakaroiroi aika uoua i aon Nagasaki ao Hiroshima ni kabaneani bongin te kauoua ni buaka are kabutaa aonnaba. N noran te urubwai ae kakamaaku man tiritiri i aoni kaawan Tiaban akana uoua akanne, e a kairaki iai teuaei bwa e na karekea nanon te taeka ae “Aremaketon” ae boou, bwa te urubwai ae kakaiaki ae taabangaki mani bwaai ni buaka aika mwaakaroiroi, ae kona n nanonaki iai katokan aia waaki aomata n ara buraneti.
A teimatoa aomata n raraoma ibukin rikin te buaka are e kabonganaki iai bwaai ni buaka aika mwaakaroiroi. N tokin 1960 tabun, a a tia ni bairea te waaki n “uaia ni kamaunaia i bon irouia” tautaeka aika mwaaka riki n te aonnaba. Tiaia boni karekean mitiaera aika tau bwa a aonga ni kamateia 25 te katebubua mwaitiia aia kairiribai aika tiaki tautia, ao 50 te katebubua taabo ni karaobwai, n aki ongeia bwa te itera raa ae moana te buaka. A karako mwaitiia aomata aika rangi n rau nanoia man te waaki ni kamanomano aei, are aongkoa e na karekea te rau n te aonnaba.
Ni boong aikai, a a rikirake ni mwaiti bwaai ni buaka aika mwaakaroiroi ao buaka n aaba tabeua aika a karika mateia aomata aika e aki kona ni warekaki mwaitiia. E boni kona naba n reke te kabuanibwai mani boom aika mwaakaroiroi aika a na kamaunaia aomata. E ngae ngke a kan nora tokin te buaka aomata ma angina a kakoauaa bwa e aki kona n toki te buaka.
Ma e ngae n anne, ao e kabwarabwaraki n te Baibara taekan te buaka ae okoro are e na katoki buaka ni kabane. E atongaki te buaka aei bwa “Aremaketon,” ae te taeka ae iangoaki irouia aomata bwa te kabuanibwai ae riki mani kabonganan boom aika mwaakaroiroi. E na kanga Aremaketon ni katoki raoi buaka? E na kaekaaki te titiraki aei n te kaongora ae imwina.
[Picture Credit Line n iteraniba 3]
DTRA Photo
[Picture Credit Line n iteraniba 3]
Nagasaki, Japan, 1945: USAF photo