A reireinia natiia kaaro taekan te tangira man aia katoto
TE MWANEKA NAKONI KATOKAN TE KANGAANGA
Reiakinan te Aroaro ni Maiu ae Riai
Ni mwanangaia ataein te reirei ae baireaki ao a a bukinaki tabeman ataeinimwaane bwa a tangakoa ataein te reirei ae te mwaane. A reirei ataei aikai n te reirei ae tanoata taekan raoiroina i Kanata. Imwin te bae riki ao e a korea ae kangai Leonard Stern n te nuutibeeba ae te Ottawa Citizen: “Reken te rabakau, te reirei ae tamaroa, ao te kaubwai, a aki tukiia rooro n rikirake mani karaoani baika bubuaka.”
E kangai naba Stern: “Ko bae n iangoia bwa tiaia kaaro ae te kabanea ni kakawaki, bon reireinaia natiia te aroaro ni maiu ae riai. Ma a bati kaaro aika tabe riki ma reken te reirei ae rietata irouia natiia ao te mwane ae bati.”
E koaua bwa e kakawaki te reirei. Ma e aki naba kona te kuura n reirei ae te kabanea n tamaroa ni buoka te aomata ni buakani naano ke namakin aika bubuaka. Ti na karekea ia te reirei ae e na ibuobuoki i aon itera aikai, ae e na anganira te kairiri ibukin te aroaro ni maiu ae riai?
TE REIREI AE IAI TE KAIRIRI IAI IBUKIN TE AROARO NI MAIU AE RIAI AO TE ONIMAKI
Te Baibara kaanga ai aron te tirotaam. Ngkana ti tiroira iai ao ti nori kabwakara ma mamaarara. (Iakobo 1:23-25) Ma e bati riki ana ibuobuoki te Baibara. E buokira ni karaoi bitaki aika riai ibukini karikirakean aroaro aika karekea te rau ni koaua ao te katiteuanaaki. Aroaro akanne bon te raoiroi, te akoi, te taotaonakinnano, te taubaang, ao te tangira. E atongaki naba te tangira bwa “te bwai ni kabaebae ae katiteuanaia aomata n te aro ae kororaoi.” (I-Korote 3:14) E aera ngkai e rangi n okoro te tangira? Nora ana taeka te Baibara ibukin te aroaro aei.
“E taotaonakinnano te tangira ao e akoi. E aki bakantang te tangira. E aki taetae ni kamoamoa, ao e aki kainikatonga. E aki kakamatauninga, e aki ukera oini kabwaiana, e aki kakaiun. E aki taua mwini karawawataana. E aki kimwareirei n te buakaka, ma e kimwareirei n te koaua. E taona nanona nakoni bwaai ni kabane . . e nanomwaaka nakoni bwaai ni kabane. Akea kabwakan te tangira.”—1 I-Korinto 13:4-8.
“E aki karaoa ae buakaka nakon temanna te tangira.”—I-Rom 13:10.
“Ma ae moamoa riki, kam na kakorakoraa te itangitangiri i marenami, ibukina bwa e rabuni buure aika rangi ni bati te tangira.”—1 Betero 4:8.
Ngkana ko maeka ma aomata aika tangiriko, tera am namakin? Ko mweraoi ao akea tabeaiangam? Eng, ko ataia ae a tangira ae te kabanea n tamaroa ibukim, ao a na bon aki kani kammarakiko.
E kona naba te tangira ni kairiia aomata bwa a na taon nanoia ni baika a tangiri, ao ni bitii baika a kani kakaraoi ibukini kabwaiaia tabemwaang. N te katoto, e a reke tibun teuae ti na aranna bwa George ao e a kan titiku i rarikin tibuna. Ma iai te kangaanga. Bon te tia moko George ao e aki tangiria buun natina te aine bwa e na momoko i rarikin te teei. Tera are e karaoia George? E ngae ngke e momoko i nanon 50 te ririki, ma e a kaaki ibukin tangiran tibuna. Eng, ai mwaakara te tangira!
E buokira te Baibara ni karikirakei aroaro aika bati aika raraoi, n aron te raoiroi, te akoi, ao riki bon te tangira
Te tangira bon te aroaro ae ti reiakinna. Iai tabeia ae kakawaki kaaro ae reiakinaia natiia aroni kaotiotan te tangira. A karekei kanaia ao kamanoaia, ao a buokiia ngkana a maraki ke a aoraki. A mamaroro ma natiia kaaro aika tatangira ao a reireinia. A anga naba te reirei ni kaetieti nakoia natiia, n ikotaki ma reireinaia booto n reirei aika manena ni kaineti ma ae eti ao ae kairua. A katea naba te katoto ae raoiroi kaaro aika tatangira, n aroia n riki bwa banna ni katoto ibukia natiia.
Ma e kananokawaki bwa iai kaaro ake a aki karaoi tabeia. Nanona bwa a na aki riki natiia bwa aomata aika raoiroi? Tiaki ngaia anne! A bati naba aika a ikawai ngkai n ikotaki ma ake a ikawairake n utu aika mangaongao, ake a a tia ni karaoi bitaki aika kamimi n aroia n akoi ao ni kona n onimakinaki. N aron ae ti na noria n te kaongora ae imwina, iai naba rongorongoia naake a iangoaki bwa a aki kona ni bitii maiuia!