I Kantaningaaki Bwa N na Kaaina Ana Tia Kakoaua Iehova Ngkana I Reirei n te Baibara ma Ngaiia?

Ko aki, ko aki taumatoaaki nako iai. A a tia mirion ma mirion n reirei n te Baibara, ma a aki riki bwa Ana Tia Kakoaua Iehova.a Oin raoi te reirei n te Baibara bwa e na kaotii nakoim taian reirei aika nako man te Baibara. E bon nakoim am motinnano ni kaineti ma taeka n reirei akanne. Ti ataia bwa te bae rangi ni kainnanoaki n te itera aei bon te onimaki.​​—Iotua 24:15.

I kona ni kamanena oin au Baibara n tain te reirei n te Baibara?

Eng. Ti kukurei n anganiko am katoto ae aki kabooaki ae Te Baibara ae Tabu​—Te Rairai ae te Aonnaba ae Boou ngkana ko tangiria, ma ti rangi ni kukurei naba ngkana ko boni kamanena oin am Baibara. Ko kona n reiakina ana rongorongo te Baibara i aon taekan te kantaninga ao te kamaiuaki, n taetae aika rangi ni bati.

E aera ngkai kam kan reirei ma aomata aika tiaki kaain ami onimaki?

• Bukina ae moamoa riki bon tangiran Iehova ae te Atua are tangiriia Kristian bwa a na tibwai reireiaia nakoia tabemwaang. (Mataio 22:​37, 38; 28:​19, 20) Iroura, akea riki te mwioko ae te kabanea n tamaroa nakon te riki bwa “raon te Atua ni mwakuri” ni buokaia aomata bwa a na reiakina Ana Taeka.​​—1 I-Korinto 3:​6-9.

• Ti kaungaaki naba n tangiraia raora n aomata. (Mataio 22:39) Ti kukurei ngkana ti tibwai nakoia tabemwaang reireiara ni kaineti ma baika rangi n tamaroa.​​—Mwakuri 20:35.