Anna Moneymaker/Getty Images
TEIMATOA N TANTANI!
A Katautaua Taan Rabakau Bwa E a Rangi ni Kaan Tain te Bong ae Karawawata—Tera ae E Taekinna te Baibara?
A taekinna taan rabakau n Tianuare 24, 2023, bwa e a rangi ni kaan ma te nukanibong tain te bong ae karawawataa, are a nanona iai kaanin rokon te toki.
“‘Tain te Bong ae Karawawata’ e a tei ibukin karuanikain aroia aomata ni kamaunaia i bon irouia. A katautaua taan rabakau n te Kauabong anne bwa e a rangi ni kaan te tai, ibukini baika a noraki rikia ngkai n aron te buaka i aon Ukraine, maakakini bwaai ni buaka aika mwaakaroiroi ao ai ruanikain maiuraoin te otabwanin.”—Man te AFP International Text Wire.
“A kaotia taan rabakau n te Kauabong bwa e a tia ni kabirimwaakaaki riki nakon 90 te tekan ‘Tain te Bong ae Karawawata’ imwain te nukanibong, are nanona bwa e a rangi ni kaan ruanikain aroia aomata ni kamaunaia i bon irouia.”—Man te ABC News.
“A a tia n anga aia kauring taan rabakau ni katobibia te aonnaba, n taekinna ae ngkana e teimatoa ni waakinako maiura aei, ao a nang boni kamaunaia i bon irouia aomata.”—Te nuutibeeba ae The Guardian.
A nang kamaunaaki aomata ao te aonnaba aei? Ti na maakui kanoan taai aika imwaira? Tera ae e taekinna te Baibara?
Kanoan taai aika imwaira
N aron ae e oti n te Baibara, “e teimatoa n aki toki te aonnaba.” (Te Minita 1:4; Taian Areru 37:29) Mangaia are a na aki kamauna te aonnaba aei aomata ke ni karikia bwa te tabo ae e na aki kona ni maekanaki.
Ma, e bon taekina tokin te bwai teuana te Baibara. N te katoto, e taekinna bwa “a tabe ni maunanako kaain te aonnaba.”—1 Ioane 2:17.
Ngkana ko kan ota riki n ae e nanonna te Baibara ngkana e taekina tokin te aonnaba, wareka te kaongora ae “Is the World Coming to an End? What Is the Apocalypse?”
Ngkana ko kan ota riki n ae e taekinna te Baibara ibukin baika a ririki n te aonnaba, wareka te kaongora ae “When Will the World End?”
Teimatoa ni kimwareirei
E kona ni buokira te Baibara bwa ti na teimatoa ni kimwareirei, n aki ongei kangaanga aika a tabe n riki n te aonnaba. Ti na kangaa ni karaoa anne?
E anganira taeka n reirei aika manena te Baibara. (2 Timoteo 3:16, 17) N te katoto, wareka te kaongora ae “How to Control Worry” n nora iai aron te Baibara ni buokiko bwa ko na teimatoa ni kimwareirei, n aki ongei kangaanga aika ko kaaitara ma ngaai ni maium.
E taekinaki n te Baibara taekan te kantaninga ae ti kona n onimakinna ibukin taai aika imwaira. (I-Rom 15:4) E kabwarabwaraaki raoi iai baika ti kona ni kantaningai rikia n taai aikai ao n taai aika imwaira, ake a a buokira bwa ti na aki bwarannano n norani baika a riki n te aonnaba.
Ngkana ko kani karekea otam ae bati man te Baibara, ti kaoko n te bong aei bwa ko na kataa te reirei n te Baibara ae e aki kabooaki.
a “Te kibuntaeka ae Tain te Bong ae Karawawata bon te iango ae kateaki ibukini kauringaan te botannaomata kaanin te tai are e nang mauna iai ara aonnaba ni bwaai n rabakau aika kakamaaku, ake a karaoi aomata. Bon tii te taeka ni kaikonaki, are e a kauringira karuanikaini maiura ao ti riai n ataia bwa ti aonga n teimatoa ni maiu i aon ara buraneti aei.”—Man te kaongora ae te Bulletin of the Atomic Scientists.