Te Mwakuri ae Okoro n Tebetembwa ae Moanakin te Reirei n te Baibara

I nanon Tebetembwa ao ti na kakorakoraira ni kairi reirei n te Baibara ma kaain auti nako, ni kamanenaan te boroutia ae Ko Kona ni Kukurei n Aki Toki! A kona taari ni baireia bwa a na karaoa te bwaiania ae aki katoatai ibukin 30 te aoa. Ti na kangaa n uataboa te mwakuri ae okoro aei?

• Ni Moani Kawaran te Auti: Kamanena akun te boroutia ni kauekea te kan ongora, ao ni kabwarabwaraa aron te reirei n te Baibara. Uringia naake a kan ongora ngkoa n ikotaki ma naake ko okiokiriia. E ngae ngkana a aki kan reirei mai mwaina, e bae n anaaki nanoia n aron te angareirei ae boou aei ao n te boroutia. A aki riai ni katukaki boroutia n auti ake akea kaaina ke ni kanakoaki rinanon te kororeta nakoia naake a bon aki kan ongora mai mwaina. E kona te Komete Ibukin te Mwakuri n te Ekaretia ni bairei kairani kurubu ibukin te mwakuri ae okoro n te namwakaina anne.

• Aanga Riki Tabeua: Ngkana e kakamanenaaki n am ekaretia te kaa ni boki, katokaa naba te boroutia ae Ko Kona ni Kukurei n Aki Toki! Kaongoia naake a kan ongora, ae a kona naba ni karekea te reirei n te Baibara ae aki kabooaki ngkana a anaa aia boroutia. Kabwarabwaraa teutana aron te reirei n te Baibara n te tai anne, ao bairea karaoana imwina riki. E kona te mataniwi ibukin te mwakuri n rineiia taan uarongorongo aika mwaatai bwa a na kawari taabo ni bitineti ao ni kairi reirei n te Baibara. Ko kona naba ni kaira te reirei n te Baibara ma raom ni mwakuri ke aomata nako aika ko kaitiboo ma ngaiia n am tai n uarongorongo n te tai ae e aki baireaki.

E tua Iesu bwa ti na ‘karekeia taan rimwina’ ao n “reireinia.” (Mt 28:19, 20) E bia riki te mwakuri ae okoro aei bwa buokara ni kakororaoa tiara aei, ni kamanenaan te boroutia ae Ko Kona ni Kukurei n Aki Toki!