Aroni Kamanenaan Aron te Maroro

A karaoa ae bati taari ibukini katauraoan aron te maroro, ao a bati taan uarongorongo aika noria bwa e rangi n uaana n aia aono. Ma kioina ngkai a kakaokoro baika riiriki nakoira ni katobibia te aonnaba, a kona taan uarongorongo ni kamanena te anga ae kaokoro ke ni maroroakina te reirei teuana ae okoro n aia mwakuri ni minita, ae e na anainano nakoia kaain aia aono. Ti bon riai ni kakairi n taiani kaetieti nako ibukin te mwakuri n uarongorongo ae okoro. Tiara boni kakoroan nanon te baere e tua Iesu ae tataekinan te rongorongo ae raoiroi ibukin te Tautaeka n Uea.—Mt 24:14.

Ni karaoan te reirei are n te kuura ni kataneiai, a riai taan uarongorongo ni kamanena te boto n iango are katauraoaki n aron te maroro are n te Boki n Reirei ae Maiura ao Ara Mwakuri ni Minita. Ma a kona ni bitia ngkana e boni kaotaki ae a kona n rinea te titiraki, te kibu, reitana, ke teina, ae e na angaraoi riki ma aia aono. Aei kaetan te kaetieti are e oti n te boki n reirei ae bwain Tun 2020, n iteraniba 8.