Karikirakean Rabakaura n te Mwakuri ni Minita—Katokan Reirei n te Baibara Aika Aki Uaana

BUKINI KAKAWAKINA: A riai aomata n taboa aran Iehova bwa a aonga ni kamaiuaki. (Ro 10:​13, 14) Ma bon iai naba ake a butimwaea te reirei n te Baibara ao a aki maiuakin ana kaetieti Iehova. Ti kamanenai raoi ara tai aika kakawaki n te mwakuri ni minita ni buokiia naake a kani karaoi bitaki mai nanoia ibukini kakukureian Iehova. Ngkana akea te rikirake iroun te aomata imwin te tai ae tau maanna, ti wanawana ngkana ti katoka te reirei ao ni kamanenai ara tai ni buokiia naake e katikiia Iehova nakoina ao ana botaki. (Io 6:44) Ngkana e karaoi bitaki tabeua te aomata anne imwina riki ao ni kaotia bwa e a ‘tauraoi nanona ni butimwaea te koaua ae kairia nakon te maiu are aki toki,’ ti kukurei ni manga waakina ana reirei n te Baibara.​—Mwa 13:48.

ARONI KARAOANA:

• Kamoamoaa te aomata ae reirei n te Baibara ngkai e kani karekea te atatai ae eti.​—1Ti 2:4

• Katuruturua kakawakini maiuakinani baike e reiakin.​—Rk 6:​46-49

• Maroro ma te akoi i aon ana kaikonaki Iesu ibukin te tia ununiki, ao tuangnga bwa e na iangoia bwa tera ae tukia mani maiuakinan te reirei.​—Mt 13:​18-23

• Kabwarabwaraa ma te akoi bukini katokan ana reirei

• Tuangnga bwa ko na kawaria n te tai teuana ma teuana ni kaungaa, ao e kona ni manga waaki ana reirei ngkana e karaoi bitaki rimwi riki

MATAKU N TE TAAMNEI AO KAEKAI TITIRAKI AIKAI:

• Tera reireiam man te maroro ae kaotaki iai bwa akea rikiraken te aomata ae reirei n te Baibara?

• E kangaa te tia uarongorongo ni buoka ana reirei bwa e na ataia ae e riai ni karaoi bitaki tabeua?

• Tera aron te tia uarongorongo ni kaotia bwa e tauraoi ni manga waakina te reirei ma ngaia imwina riki?