Te Taamnei ae Boou Ibukin Moanakin te Reirei n te Baibara

E a kona n reke irouia aomata aika bati te taamnei ae kimototo ae atuna Why Study the Bible? n te atureti ae jw.org. E katauraoaki te taamnei aei ibukini kaungaan nanoia aomata aika kan ongora, bwa a na butimwaea te reirei n te Baibara n akea boona. E kona n reke ngkana ko nakon “Request a Bible Study” ae mena n te home page i nano ke ni karekea te kaeka n te QR (quick response) code ae mena i akun nako taian turaeki. Aikai kawai tabeua ae ti kona ni kamanena raoi iai te taamnei.

• Ni manga okiran te aomata anne imwina, tuanga ni kangai: “I kona ni kaota nakoim te taamnei ae kimototo ae kabwarabwaraaki iai arom ni kona ni karekei kaekaan am titiraki n te Baibara. Ngkana e kariaia, kaotia nakoina n am tareboon ke n ana kaombiuta.

• Ngkana ko katuka te turaeki ae boou n am tai n uarongorongo n te tai ae aki baireaki n ana tabo te botannaomata, kaota nakoina te QR code ao kaungaa bwa e na karekea n ana tareboon. Kioina ngkai a a bati taetae aika ko kona ni karekei n QR code ae e kona ni kairiko nakon te taamnei anne n te atureti ae kakawaraki n te Internet, ko a kona ngkanne ni kaota te taamnei anne iai ni kamanena am tareboon.

• Tuangia raoraom ni mwakuri, raom n reirei, am koraki ao tabeman riki aika ko kinaia taekan taamnei anne ao kaotia nakoia bwa a na mataku iai. Ke kanakoa am reta nakoia rinanon te Internet ni kaineti ma aroia are a na kona ni karekea te taamnei anne ao tuangia bwa a na mataku iai i bon irouia.

Ngkana ti kamanena raoi te babaire ae boou aei, ti bae ni kona ni moana te reirei n te Baibara ao ni buokiia “te koraki nako ake a tauraoi nakon te maiu are aki toki” ni kaineti ma aia onimaki.​—Mwa. 13:48.