Ti Bia Karaoa Ara Kabanea ni Kona Ibukini Kaotiotan Ara Kakaitau n te Bae E a Tia ni Karaoia Iehova E na Karaoaki te Kauring n Eberi 17
1. Baikara ana taeka te tia areru ae rangi n tonu raoi ma namwakainan te Kauring?
1 E titiraki ni kangai te tia areru ibukin nanona ni kakaitau ibukin ana nanoanga ao ana kakamaiu Iehova aika bati: “Tera ae N na manga angan Iehova ba boon ana akoi ni kabane nako iu?” (TaiAre. 116:12) E bati riki bukin aia kakaitau ana toro te Atua ni boong aikai. N tienture ake imwini korean taeka aika kairaki koreaia aikai, ao e a angania botannaomata Iehova te bwaintituaraoi ae moanibaan te tamaroa ae te kaboomwi. Iai bukina ae raoiroi iroura bwa ti na kaotiota ara kakaitau n ara tai ni katauraoi ibukini kauringaani mateni Kristo n Eberi 17.—IKoro. 3:15.
2. Baikara bukina tabeua aika ti kakaitau iai ibukin te kaboomwi?
2 Kakabwaia Man te Kaboomwi: Ti na kona ni karekea “kabwaraan ara bure” rinanon te kaboomwi. (IKoro. 1:13, 14) E a kairira aei bwa ti na taromauria Iehova ma mataniwin nanora aika itiaki. (Ebera 9:13, 14) Ti aki kona ni maaku n taetaenikawai ma Iehova ngkana ti kawaria n te tataro. (Ebera 4:14-16) A a karekea te kantaninga ae moanibaan te raoiroi ae te maiu are aki toki te koraki ake a onimakina te kaboomwi!—Ioa. 3:16.
3. Ti na kanga ni kaotiota ara kakaitau nakon Iehova ibukin te kaboomwi?
3 Arora ni Kaotiota Ara Kakaitau: Te anga teuana ae ti kaotiota iai ara kakaitau ae nako mai nanora, boni man iangoani karaoan ara wareware n te Baibara ni katoa bong ae baireaki imwain te Kauring ao kananoan ara iango i aona. E a tia ni katauraoaki te kaongora aei n te Taua-n-Tantani ae bwaini Beberuare 1, 2011 n te taetae n Ingiriti, ae kangai atuna “Are You Prepared for the Most Important Day of the Year?” are e na buokira ni karaoa aei. Ti kona naba ni kaota nanora n ataakini kakawakin te kaboomwi rinanon te tataro nakon Iehova. (1Tet. 5:17, 18) E kaotiotaki ara kakaitau n ongeabara n te bwai are e tua Iesu ngkana ti kaea te Kauring are e na karaoaki. (1Kor. 11:24, 25) Irarikin anne, ti kona ni kakairi n ana tangira Iehova ae raababa nako ao ni kaoia aomata aika mwaiti riki bwa ti na kaea te Kauring ma ngaiia.—Ita. 55:1-3.
4. Tera ae ti riai ni motinnanoia?
4 A na aki iangoa te Kauring are e na karaoaki ana toro Iehova aika a kakaitau, bwa tii te arona ma botaki ake tabeua. Bon te botaki ae rangi ni kakawaki riki i nanon te ririki! Ngkana e a uakaan te Kauring ao e bia riki ara motinnano n ai aron te tia areru are e korea ae kangai: “Karaoiroa Iehova, tamneiu, ao tai manuoki ana akoi ni kabane.”—TaiAre. 103:2.