Te Bwai ae Ti Moanibwaia

1. E kanga ni kaotiotia Iesu ae e kakawaki irouna te mwakuri ni minita?

¹ E moanibwaia te mwakuri ni minita Iesu. E kakorakoraa ni mwakuri n ririanna i nanon bubua ma bubua te maire rinanon Baretain n tataekina te rongorongo ni karokoa irouia aomata aika mwaiti. E teimatoa ni kabebetea maiuna ike e a kabongana riki iai ana tai ao n tabeakina riki te mwakuri ni minita. (Mat. 8:20) Ngke a a kataia aomata aika uanao ni kawaria bwa e na katoki aorakia e taku: “I riai naba n tataekina te rongorongo ae raoiroi ae taekan ana tautaeka n uea te Atua nakoni kaawa ake tabeua, bwa ngaia aei bukini kanakoau.”​—Ruka 4:43.

2. Bukin tera ngkai e rangi ni kakawaki te mwakuri ni minita iroun Iesu?

² Bukin tera ngkai e rangi ni kakawaki iroun Iesu te mwakuri ni minita? Oin tabena ae kakawaki boni katabuan aran Iehova. (Mat. 6:9) E tangira Tamana are i kawara ao ibukin ana tangira aei are e a tangiria ni kakororaoa Nanona ao n ongeaba n Ana tua ni kabane. (Ioa. 14:31) Irarikin aei, e tabeakinia aomata mai nanona ao e tangiria ni buokiia.​—Mat. 9:36, 37.

3. Ti na kanga ni kaotiotia ae ti kaatuua iangoan te mwakuri ni minita?

³ Kakairi Iroun Iesu: E kona ni kangaanga kateimatoaani kaatuuan ara iango n aron Iesu, ibukina bwa e kani kabanea ara tai ae bati te aonnaba ao e katauraoi baika mwaiti aika a kona n anaa nanora. (Mat. 24:37-39; Ruka 21:34) Mangaia are, ti riai ni kakoauaa bwa baikara bwaai aika a kakawaki riki, ma ni bairea ara tai ni katauraoi ao n uataboa te mwakuri ni minita ni katoatai. (IBir. 1:10) Ti na kakorakoraira ni kateimatoa maiuakinan te maiu ae bebete ao n rarawa ni kabatiaa bwainan bwain aon te aba aei.​—1Kor. 7:31.

4. E aera ngkai e kakawaki kateimatoaani moanibwaian te bwai ae riai ngkai?

⁴ E moanibwaia te bwai ae kakawaki riki te aomata ae wanawana ngkana e a kimototo te tai. N te katoto, ngkana e a ataia ae e nang roko te angibuaka ae kamamate, e riai ni kaatuua iangoan kabonganaan raoi ana tai ao korakorana ni karaoa ana babaire ibukini kamaiuaia ana utu ao ni kauringia kaain rarikina. E riai ni kauarerekei karaoani mwakuri aika aki kakawaki. E a kakimototoaki te tai imwain te buaka ae Aremaketon. (Teb. 1:14-​16; 1Kor. 7:29) Ngkana ti na karekea kamaiuara ma te koraki ake a ongora iroura, ti riai n tarataraira ao n taratara te reirei, n aki ongeia bwa ti mena i nanon te ekaretia ke n taabo riki tabeua. (1Tim. 4:16) Eng, e boto kamaiuara mani kateimatoaani moanibwaian te mwakuri ni minita!