Kakawakin te Kamauri
“MAURI! Ko uara n te bong aei?”
Akea te nanououa bwa n angiin te tai ao ko kamauriia aomata n aron aei. Ko bae naba n iobai ke n irabwati ngkana ko kamauri. A bae ni kakaokoro katei ao taeka aika kamanenaaki n te aba teuana ma teuana, ma titeboo te boto n iango iai. Ni koauana, ngkana ko aki kamauri ke ni kaekaa te aomata e kona n iangoaki bwa akea am tangira ke ko aki ataa te katei.
Ma a aki bane aomata ni kani kakamauri. Tabeman a tabwara ni kamauri bwa a maamaa ke a iangoia bwa akea bongaia. Tabeman e kangaanga irouia bwa a na kamauriia naake a kaokoro aia reeti, aia katei, ke nakoaia. Ma e ngae n anne, e kona naba te kamauri ae kimototo ni karekei mwina aika rangi n raraoi.
Titirakiniko ni kangai: ‘Tera ae kona n reke n te kamauri? Ao tera reireiau iai man Ana Taeka te Atua?’
KAMAURIIA “AEKA N AOMATA NAKO”
Ngke e butimwaea te moan Tientaire are Korenerio te abotoro Betero nakon te ekaretia ni Kristian ao e taku: “E bon aki inanonano te Atua.” (Mwa. 10:34) Imwina, e koreia Betero bwa te Atua “e tangiriia aomata nako bwa a na rairi nanoia.” (2Bet. 3:9) Ti kona ni kairekerekei kiibu akanne ma te aomata ae reiakina te koaua. Ma e kaumakiia naba Kristian Betero ni kangai: “Karineia aeka n aomata nako, tangiriia tarimi nako i nanon te onimaki.” (1Bet. 2:17) Tiaki bwa ti karaoa ae raoiroi ngkana ti kamauriia tabemwaang n aki ongea kaokoron aia reeti, aia katei, ke nakoaia? Ni karaoan anne, ti a kaota iai karineaia ao tangiraia.
E kaumakiia kaain te ekaretia te abotoro Bauro ni kangai: “Kam na imwanemwane i marenami, n aron naba te Kristo ngkai e mwaneingkami.” (IRom 15:7) E nanonia riki Bauro taari ake ‘taani buokia aika a kakorakoraa.’ Ai batira riki ngkanne kainnanoani kakorakoraaia taari ni boong aikai ngkai ti a kaaitara ma unin Tatan ae korakora nakoia ana aomata te Atua!—IKoro. 4:11, kbn.; TeKao. 12:12, 17.
E kaotaki ni katoto man te Baibara bwa e kona ni bati riki ae reke n te kamauri nakon ae a na tii namakina butimwaeaia raoi aomata.
TE KARAUNANO, TE KAUNGAUNGA, AO TE TANGIRA
Ngke e a boo ana tai Natin te Atua bwa e na kamwaingaki maiuna nakoni birotoni Maria, e kanakoa Iehova te anera bwa e na taetae nakon neiei. E moanna ni kangai: “Ko na mauri ngkoe ae ko rangi n akoaki iroun te Atua, e mena Iehova iroum.” E ‘nako nanon’ Maria bwa e aki koaua bwa e aera ngke e taetae te anera nakoina. E ataa aei te anera ao e taku: “Tai maaku Maria, bwa ko akoaki iroun te Atua.” E kabwarabwaraa te anera bwa bon ana kantaninga te Atua bwa e na bungia te Mesia neiei. E aki teimatoa n tabeaianga Maria ma e ongeaba ni kaeka ni kangai: “Noria! ngai ana toro Iehova, ae te aine! Ke e riki nakoiu n ai aron am taeka.”—Ruka 1:26-38.
Bon te kakabwaia nakon te anera aei ngke e riki bwa ana tia uataeka Iehova, ao e aki iangoia bwa e a mangori ngke e kataetaea te aomata ae aki kororaoi. E moana ana taeka ma te kamauri. Iai reireiara ae reke man te katoto anne? Ti riai n tauraoi ni kamauriia tabemwaang ao ni kaungaia. Ti kona ni buokiia tabemwaang bwa a na kakoauaa ae boni ngaiia naba ana aomata Iehova, tii man ara taeka aika kimototo.
A bati ake e kinaia Bauro n ekaretia ake i Asia Minor ao Eurobe. E kamauriia tabeman ake e kaotii araia n ana reta. Ti nora aei n I-Rom mwakoro 16. E anga ana kamauri Bauro nakoia raona ni Kristian aika bati. E taekina Boibe bwa “mwaanera,” ao e kaumakiia taari bwa a na “butimwaeia i nanon te Uea n te aro ae riai ibukia te koraki aika itiaki, ao n anganna te ibuobuoki ae e kainnanoia.” E kamaura naba Beritika ao Akura, ake e “kaitau nakoia, ma tiaki tii [ngaia], bwa a kaitauia naba kaain ekaretia nako ake i buakoia natannaomata aika tiaki I-Iutaia.” E kamauriia naba tabeman ake a bon aki kinaaki ni boong aikai n aron—“Ebaineto ae tangiraki [irouna]” n ikotaki naba ma “Nei Terubaina ma Nei Terubota ake a mwakuri korakora i nanon te Uea.” Eng, e boni kamauriia Bauro tarina ma mwaanena n te onimaki.—IRom 16:1-16.
Iangoa kimwareireia naakai n ataakin ae a ururingaki. Ai korakorara tangirani Bauro ao aia itangitangiri i marenaia! Ao a boni bae ni kaungaaki Kristian ake tabeman riki ngke a ongoraei kamauri aikai, ao a buokaki iai n teimatoa n nene n te onimaki. Eng, taeka ni kamauri aika kaota te mwamwannano ao kamoamoaan temanna, e kamatoaa te iraorao ao te katiteuanaaki irouia ana toro te Atua aika kakaonimaki ni koaua.
Ngke e roko Bauro n te matabaiawa i Buteori i aoni kawaina nako Rom, a mwananga Kristian bwa a na kaitiboo ma ngaia ikanne. Ngke e noriia Bauro mai kiraroa, e “kaitaua te Atua ao e kaungaaki nanona.” (Mwa. 28:13-15) N tabetai, tao ti kona ni wingare ke ni kateitei baira bwa ai ara kamauri naba. Ma karaoan anne, e a kona naba ni kaungaa te aomata ae tao e rawawata nanona ke e nanokawaki.
BUKIN TE KAMAURI
E riai te tia rimwini Kristo ae Iakobo n anga te reirei ni kairiri ae matoa. Tabeman Kristian a riki bwa taani wene ni kimoa n te aro n taamnei ngkai a iraorao ma kaain te aonnaba. (Iak. 4:4) Ma nora aroni moanakin ana reta:
“Ngai ae Iakobo ae ana toro te Atua ao te Uea ae Iesu Kristo, nakoia baronga ake 12 ake a uamae n taabo aika kakaokoro: Kam na mauri!” (Iak. 1:1) Akea te nanououa bwa naake a wareka aei a noria bwa e a bebete riki irouia butimwaean ana taeka n reirei ngke a noria n ana kamauri bwa titeboo aroia i matan te Atua. Eng, e kona te kamauri ma te nanorinano ni kamaraua te nano imwaini maroroakinani kangaanga aika kakaiaki.
Te kamauri ae uaana, e riai n nako raoi man te nano ao ni kaotiotaki iai te tangira ni koaua e ngae naba ngkana e kimototo. E riai ni karaoaki anne, e ngae naba ngkana e aki noraki. (Mat. 22:39) N te taina ao te tari te aine temanna i Ireland e roko n te Tabo n Taromauri ngke e nang moanaki te botaki. Ngke e ienikuri n rin, e taraia temanna te tari te mwaane, e wingare nakoina, ao e taku: “Mauri. Ti kukurei n noriko.” Imwina, e a tekateka neiei.
Tabeua te wiki imwina, e a kawara te tari te mwaane arei neiei ao e tuangnga ae e kekeiaki i nanon tabeua te tai ma te kangaanga teuana ni mwengana. E taku: “E rangi ni maraki nanou n te tairiki anne ao I a kuri n aki roko n te Tabo n Taromauri. I aki kona n uringi angiini baika taekinaki n te botaki, ma I tii uringa am kamauri. I namakinna bwa I butimwaeaki raoi ao n tangiraki. Ko rarabwa.”
E aki ataia teuaei ae e korakora ringan nanon neiei n ana taeka ni kamauri ae kimototo. E taku: “Ngke e tuangai neiei aron ringan nanona n au taeka ake a kimototo akanne, I rangi ni kukurei ngke I karaoa anne. I kakatonga naba iai.”
E korea aei Toromon: “Kanakoa am kariki i aon te ran, bwa ane e na manga reke iroum imwini boong aika bati.” (TeMin. 11:1) Ngkana ti ataa kakawakini kamauraia aomata, moarara riki raora ni Kristian, ti boni kaungaia iai ao ngaira naba. Ngaia are ti bia aki kakeaa bongani kakawakin te kamauri.