“E Rangi n Abwabwaki te Mwakuri”

BON tain te botaki ae rangi ni kakawaki i Ierutarem. E ikotiia tooka, mataniwi n ana auti, ao mwaane aika korakora, te Uea ae Tawita. A rangi n ingainga ni kan ongora te katanoata ae okoro. E mwiokoaki natin Tawita are Toromon iroun Iehova bwa e na katea te tembora ibukin taromaurian te Atua ae koaua. E a tia n anganaki uean Iteraera ae e a kara aei taamnein te kateitei rinanon te taamnei ae raoiroi ao e a angan Toromon. E taku Tawita: “E rangi n abwabwaki te mwakuri, bwa bon tiaki te tembora ibukin te aomata, ma bon ibukin Iehova ae te Atua.”​—1Rong. 28:1, 2, 6, 11, 12; 29:1.

E a manga titiraki ni kangai Tawita: “Antai ngkanne ae e anga nanona bwa e na keerake n te bong aei ma te bwaintangira i nanoni baina ibukin Iehova?” (1Rong. 29:5) Ngke arona bwa ko mena ikekei, e na tera arom? Ko na kaungaaki bwa ko na boutokaa te mwakuri ae abwabwaki aei? A boni karaoa naba anne tibun Iteraera. Ni koauana, a “kimwareirei . . . n anga taiani karea ni kan anga aikai, bwa a anga taiani karea ni kan anga nakon Iehova ma te nano ae tabwanin raoi.”​—1Rong. 29:9.

N tienture ake imwina riki, e a katea te kateitei Iehova ae rangi ni kakannato riki nakon te tembora. E boni katea te tembora n taamnei ae rangi ni kakannato riki ae nanonaki iai te babaire ibukia aomata ni kaineti ma taromauriana ae boto i aon ana karea Iesu. (Ebera 9:11, 12) E kangaa Iehova ni buokiia aomata bwa a na raoiakinaki ma ngaia ni boong aikai? Bon rinanon ara mwakuri ni karekeia taan rimwini Kristo. (Mat. 28: 19, 20) E noraki mwin te mwakuri aei bwa ni katoa ririki, a kairaki reirei n te Baibara aika mirion ma mirion, nga ma nga taan rimwini Kristo aika bwabetitoaki, ao a a tei bubua ma bubua ekaretia aika boou.

Ibukini ngkanne kaitaraan rikirake aikai, a a riai ni boreetiaki booki aika aanaki n te Baibara aika bati riki, ni kateaki Taabo n Taromauri ao ni kateimatoaaki raoiroia, ao ni karekeaki taabo n runga ao bwabwaro. Ko aki ngkanne kakoauaa ae e rangi n abwabwaki ao a reke kakabwaia man ara mwakuri ni kabutaanako te rongorongo ae raoiroi?​—Mat. 24:14.

Ibukin tangiran te Atua, aomata, ao te nano n umaki n te mwakuri ae tataekinan te Tautaeka n Uea, a a kaungaaki ana aomata te Atua bwa a na “keerake ma te bwaintangira i nanoni [baia] ibukin Iehova” n aroia n anga aia bwaintangira. Ai kakukureira ‘karinean Iehova n ara bwai aika kakawaki’ ao norani baikai ni kamanenaaki ma te wanawana ao n te aro ae riai n te mwakuri ae moan te abwabwaki mangkekei ni karokoa ngkai!​—TaeRab. 3:9.