ATUN TE MAEKATIN | ANA TAUTAEKA N UEA TE ATUA—E KAKAWAKI IROUM?

Ana Tautaeka n Uea te Atua—Ko na Kangaa ni Kakabwaiaaki Iai?

Ko bae n ota mani kaongora ake imwain aei bwa a bati kakabwaiaaia Ana Tia Kakoaua Iehova man Ana Tautaeka n Uea te Atua. Ao tao e anaaki nanom ni kakabwaia tabeua nakon taai aika a na roko man Ana Tautaeka n Uea te Atua ake a a tia ni maroroakinaki. N te tai naba aei, ko bae n iangoia bwa a na waekoa ni koro bukini berita akanne ke a na aki.

Ko wanawana ngkana ko taratara raoi, n oneani mwin are ko a boni kakoauai naba bwaai ni kabane ake ko ongo. (Taeka N Rabakau 14:15) E kona ni kabotauaki n aaro tabeua arom n taratara raoi n aroia kaaini Beroia rimoa.a Ngke a moan tuangaki naakai taekan te rongorongo ae raoiroi ibukin te Tautaeka n Uea, a boni butimwaea te bwai are a ongo, ma tiaki ibukina bwa a kani kakoauai. Ma a kabatiaa riki te ukeuke n te Baibara bwa a kan ataia “bwa a koaua baikekei ke a aki.” (Mwakuri 17:11) N taeka riki tabeua, a boni kabotaua te rongorongo ae raoiroi are a ongo kaaini Beroia ma te bwai are e taekinaki n te Baibara. Imwin tabeua te tai, a a moanna ni kakoauaa bwa e boni boboto te rongorongo ae raoiroi anne i aon Ana Taeka te Atua.

A kukurei ni kaoko Ana Tia Kakoaua Iehova bwa ko na karaoa naba anne. Ti anganiko am tai rinanon ara waaki n angareirei n te Baibara ma aomata n akea boona, bwa ko na kabotaui baika a kakoauai Ana Tia Kakoaua Iehova ibukin Ana Tautaeka n Uea te Atua ma ana reirei te Baibara.

Irarikin reiakinan Ana Tautaeka n Uea te Atua, ko kona ni buokaki man reiakinan te Baibara bwa a na reke iroum kaekaan titiraki tabeua aika rangi ni kakawaki aikai:

Ti riki mai ia?
Tera te kantaninga ibukin te maiu?
E aera ngkai e aki katoka te rawawata te Atua?
Tera ae riki nakoira ngkana ti mate?
E koaua bwa e na kamaunaaki te aonnaba?
Tera kiingin te kakukurei n te utu?

Ma ae rangi ni kakawaki i buakoni bwaai ni kabane, ko na buokaki ngkana ko reirei n te Baibara bwa ko na “kaania te Atua.” (Iakobo 4:8) Ibukin anne, ngkana ko kaaniko riki ma te Atua, ane ko na rangi n ota raoi n aron Ana Tautaeka n Uea te Atua ni kona n anganiko baika raraoi, tiaki tii ngkai ma n aki toki. E taekina aei Iesu n ana tataro nakon Tamana: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”—Ioane 17:3.

A kona Ana Tia Kakoaua Iehova ni kamanena te boki aei n reirei iai ma ngkoe n te Baibara.

Ngkana ko na bubutii bwa ko kan reirei n te Baibara n akea boona, tuanga temanna Ana Tia Kakoaua Iehova ke kanoa te booma n te atureti ae www.jw.org. (Nora REQUEST A BIBLE STUDY n te moan iteraniba n ara atureti n te Internet)

a Beroia boni kaawani Maketonia rimoa

Bukini Kakawakin te Tautaeka n Uea Iroun Neiei

N taai aika tibwa nako, e mwiokoaki n ana reirei te ataeinnaine ae tebwina ana ririki ae arana Folake bwa e na korea te rongorongo ae kangai atuna: “Te Bwai ae Moan te Kakawaki Irou n te Aonnaba Aei.” E rineia Folake bwa e na korea bukin tangiran tataekinan Ana Tautaeka n Uea te Atua nakoia tabemwaang.

E kabwarabwaraa Folake ni kangai: “Bon te tautaeka ni koaua Ana Tautaeka n Uea te Atua. Ma e aki kona n noraki ngaia are kam aki kona n noria, e ngae naba ngkana kam kabongana te kiraati ni mata!”

E reitaanako ana kororongorongo Folake ibukini kakabwaia ake e rangi ni kariariai man te Tautaeka n Uea anne. Ngke e taekini kangaanga tabeua ake a kona ni katokaki n te Tautaeka n Uea anne, e korea ae kangai: “I rangi n nanokawaki n noriia aomata aika akea mwengaia ake a maeka i nanoni kawai,” n ikotaki naba ma “ataei ake a bora ni baki ni karokoa mateia n aaba aika kakaokoro n te aonnaba.” E reitia ni kangai: “I a manga kukurei ngke I wareka Itaia 65:21 (BG).” Ni kaineti ma aomata ake a na maeka i aan Ana Tautaeka n Uea te Atua, e beritanaki n te kibu anne ni kangai: “A na katei auti, ao a na maeka i nanoia; ao a na uniki kurebe, ao a na kang uaaia.”

E taekinna naba Folake bwa e kariariaa te tai are a na kamaunaaki iai aoraki ni kabane rinanon Ana Tautaeka n Uea te Atua. E mwanewea Te Kaotioti 21:4 n ana kororongorongo are te Atua “e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.” E motika ana rongorongo neiei ngke e a manga taekina taekan Iehova ao ana Tautaeka n Uea bwa te bwai ae moan te kakawaki iroun neiei n te aonnaba aei. E teretere ngkanne bwa e rangi ni kakawaki taekan Ana Tautaeka n Uea te Atua iroun te ataeinnaine aei!