Kakorakorako N Ukoukora Kakabwaiaam Mairoun Iehova
“Bon [te Atua] te tia karekei kaniwangaia te koraki ake a kakorakoraia n ukoukoria.”—I-EBERA 11:6.
1, 2. (a) Tera aroia aomata aika bati n ukeri kakabwaiaaia mairoun te Atua? (b) E aera ngkai e anaaki riki nanora ni karekean te kakabwaia mairoun Iehova?
NGKANA e mwatie temanna, ao e tataneiai n ongongo te aba n aaba tabeua aia taeka aomata ae kangai: “E na kakabwaiako te Atua!” A kona n noraki mataniwi n Aaro aika kakaokoro ni kakabwaiaia aomata, maan ao bwaikoraki. A kona ni burebureaki aomata bwa a na mwananga nakon taabo tabeua aika kakawaki irouia Aaro ibukini kantaningaan te kakabwaia. A aki toki ni butiia te Atua taan tautaeka bwa e na kakabwaiaa aia botannaomata. N am iango, e nako raoi mai nanoia aeka ni bubutii akanne? Iai uaan aia bubutii? Antai raoi aika a reke kakabwaiaaia mairoun te Atua, ao bukin tera?
2 E a kaman taekinna Iehova bwa i nanoni boong aika kaitira ao a na reke ana aomata aika itiaki ao n rau mai buakoia botannaomata nako, ake a na tataekina taekan te Tautaeka n Uea nako tabon aonnaba, n aki ongea te riribai ao te kakaaitara. (Itaia 2:2-4; Mataio 24:14; Te Kaotioti 7:9, 14) Iai mai buakora aika a tia ni butimwaea te mwioko ae a na riki bwa ana aomata. Ti tangira ana kakabwaia te Atua ao ti kainnanoia naba, bwa ngkana akea ao e bon aki kona n nakoraoi ara waaki. (Taian Areru 127:1) Ma ti na kanga ni karekea te kakabwaia mairoun te Atua?
A Taonako Kakabwaiaaia Aomata Aika Ongeaba
3. Tera ae na riki ngke arona bwa a ongeaba I-Iteraera?
3 Wareka Taeka N Rabakau 10:6, 7. Imwain raoi rinin te botannaomata ae Iteraera n te Aba ni Berita, ao e katerea Iehova nakoia kantaningaan te mweraoi ao kamanoaia ngkana a ongo ni bwanaana. (Te Tua-Kaua 28:1, 2, NW) A na aki tii karekei ana kakabwaia Iehova ana aomata ma a na bon “taonako” naba. A na boni kakabwaiaaki akana ongeaba.
4. Tera ae irekereke ma te ongeaba ni koaua?
4 Tera te aroaro ae a riai ni kaotiotia I-Iteraera ngkai a ongeaba? E taekinaki n Ana Tua te Atua bwa e na aki kukurei ngkana a kabwaka ana aomata n toro irouna “ma te kakatonga, ma kukurein te nano.” (Wareka Te Tua-Kaua 28:45-47, BG) E tau n anganaki Iehova ae bati riki nakon tii te ongeaba ni kaineti ma maakakini kaetieti aika onoti, n aron are a kona ni karaoia maan ke taimonio. (Mareko 1:27; Iakobo 3:3) Boni kaotan te tangira te ongeaba ni koaua nakon te Atua. E kanikinaeaki anne n te kimwareirei ae boto i aon onimakinan ae a aki rawawata ana tua Iehova, ao e na riki bwa “te tia karekei kaniwangaia te koraki ake a kakorakoraia n ukoukoria.”—I-Ebera 11:6; 1 Ioane 5:3.
5. E na kanga onimakinan ana berita Iehova ni buoka te aomata n ongeaba nakon te tua ae n Te Tua-Kaua 15:7, 8?
5 Iangoa aron te aeka n ongeaba ni koaua are e kaotiotaki ni kawakinan te tua ae taekinaki n Te Tua-Kaua 15:7, 8. (Warekia.) E kona ni karekea buokaia ake a maiu ni kainnano te ongeaba nakon te tua anne n akea nanom iai, ma e koaua bwa e na karikirakea te iraorao ae kaan i marenaia ana aomata te Atua? Ma ae kakawaki riki, e koaua bwa boni kaotiotan onimakinan Iehova ni katauraoi kainnanoia ana toro ao aroia ni kakaitau ibukin reken aia tai ni kakairi n arona n tituaraoi? E bon aki! E mutiakina te aomata ae tituaraoi ma nanona ni koaua te Atua, ao e berita bwa e na kakabwaiaa n ana mwakuri ni kabane. (Te Tua-Kaua 15:10) E na kairiri onimakinan te berita anne nakon te mwakuri ao karekeani kakabwaia aika bati.—Taeka N Rabakau 28:20.
6. Tera karauan nanora man I-Ebera 11:6?
6 Irarikin onimakinan Iehova ae te tia Anga te kaniwanga, e katuruturuaki n I-Ebera 11:6 te aroaro riki teuana ae kainnanoaki ibukini karekean te kakabwaia mairoun te Atua. Noria bwa Iehova e karekei kaniwangaia te koraki ake a “kakorakoraia n ukoukoria.” Te moan taetae ae kabonganaaki ikai, e nanonaki iai te kakorakora ni mwakuri. A bon riai taeka aikai ni kakoauaa nakoira bwa a na kakororaoaki kakabwaia aikai! Bon nibwan te kakabwaia te Atua ae tii temanna ae koaua “ae aki kona ni kewe.” (Tito 1:2) E a tia ni kaotia i nanon ririki aika nga ma nga bwa e boni kona n onimakinaki te bwai are e beritanna. A aki kona ni matebuaka ana taeka; a boni kokoro bukia. (Itaia 55:11) Ai ngaia are ti kona ni kakoauaa raoi bwa ngkana ti kaotiota te onimaki ni koaua, e na bon riki iroura bwa te tia Anga te kaniwanga.
7. Ti na kanga ni karekea te kakabwaia mairoun te Atua rinanon ana “kariki” Aberaam?
7 E kaotia Iesu Kristo bwa boni ngaia te moan uaa man ana “kariki” Aberaam. Boni kaain te kauoua n uaa man “te kariki” are e a kaman taekinaki, Kristian aika kabiraki. A a tia ni mwiokoaki bwa a “na kabutaanako taekan raoiroin aroaron teuare [weteiia] man te roo nakon ana oota ae kamimi.” (I-Karatia 3:7-9, 14, 16, 26-29; 1 Betero 2:9) Ti aki kona ni kantaningaa reken ara iraorao ae kaan ma Iehova ngkana ti aki mutiakinia ake e a tia ni mwiokoia Iesu i aon ana bwai nako. Ti aki kona n ota raoi n nanoni baika ti wareki n Ana Taeka te Atua ao ataakin arora ni maiuakin, n akean ana ibuobuoki “te toro ae kakaonimaki ma ni wanawana.” (Mataio 24:45-47) Ti kona ni karekea te kakabwaia mairoun te Atua ngkana ti maiuakini baike ti a tia n reiakini man te Baibara.
Teimatoa ni Kaatuua Iangoan Nanon te Atua
8, 9. E kanga te baatua are Iakoba ni kakorakoraa ni kaboraoa maiuna ma ana bubutii?
8 E kona ni kauringira taekan te baatua are Iakoba iangoan te mwakuri korakora ibukini karekean te kakabwaia mairoun te Atua. E aki ataa aroni kakoroan nanon ana berita te Atua nakon Aberaam, ma e kakoauaa ae Iehova e na rangi ni kamwaita kanoan tibuna ake a na riki bwa te botannaomata ae bubura. Ngaia are n 1781 B.C.E., e a mwananga Iakoba nako Aran ibukini karekeani buuna. E aki tii anaaki nanona ni karekean raona ae botonnaine ma e ukoukora te aine are te tia taromauria Iehova ao are e na riki bwa te tina ae raoiroi.
9 E ataaki iroura bwa e kaitiboo Iakoba ma ana koraki are Rakera. E tangira Rakera ao e kariaia bwa e na mwakuri iroun taman neiei are Raban i nanon itua te ririki bwa e aonga n riki bwa buuna. Bon tiaki tii te karaki ibukin te karekenano ae kakukurei aei. E ataa raoi ana berita te Atua ae Moan te Mwaaka Iakoba are e a tia ni karaoia ma tibuna are Aberaam ao ni manga taekinna nakon tamana are Itaaka. (Karikani Bwaai 18:18; 22:17, 18; 26:3-5, 24, 25) Ibukin anne, e a tuanga natina Itaaka are Iakoba ni kangai: “E na kakabaiako te Atua ae Moan te Mwaka, ao E na kauaaeko, ao E na kamaitiko ba ko aonga n riki ba te botaki ni botanaomata; ao E na anganiko kakabaian Aberaam, E na anganiko, ma am kariki ma ngkoe; ba ko aonga n abana te aba ae ko mamaeka iai, ae E angan Aberaam te Atua.” (Karikani Bwaai 28:3, 4, BG) Mangaia are ana kakorakora Iakoba ni karekeani buuna ae riai ao karikirakean ana utu, e a kaotiota iai onimakinani baike e taekin Iehova.
10. E aera Iehova ngke e kukurei ni kakabwaiaa Iakoba?
10 E aki ukera te kaubwai Iakoba ibukini mweraoin ana utu, ma e kabotoa ana iango i aon ana berita Iehova ibukia kanoana. E kaatuua iangoani kakororaoan nanon Iehova. E motinnanoia Iakoba bwa e na karaoi bwaai nako ni korakorana ni karekeani kakabwaiaana mairoun te Atua n aki ongei bwaai n tutuki. E kateimatoa aroarona anne ni karokoa karana, ao Iehova e kakabwaiaa iai.—Wareka Karikani Bwaai 32:24-29.
11. Tera te mwakuri ae ti riai ni karaoia ae boraoi ma kaotaraean nanon te Atua?
11 N aron naba Iakoba, ti aki atai rongorongo ni kabane ibukini kakororaoan ana kantaninga Iehova. Ma ti kona ni karekea ataakini bannani baika ti kantaningai ibukin “ana bong Iehova” rinanon te ukeuke n reirei n Ana Taeka te Atua. (2 Betero 3:10, 17) N te katoto, ti aki ataa raoi rokon te bong anne, ma ti ataia bwa e a kaan. Ti kakoauaa Ana Taeka te Atua ae taekinna bwa kaotiotan te rongorongo ae raoiroi n nikiran te tai ae kimototo, ti na kamaiuaki iai ma ake a ongora iroura.—1 Timoteo 4:16.
12. Tera ae ti kona ni kakoauaa raoi?
12 Ti ataia bwa e kona n roko te toki n te tai ae aki ataaki, ao e aki riai n tataninga Iehova ni karokoa kabutan te rongorongo ae raoiroi nakoia aomata n tatabemania nako n te aonnaba aio. (Mataio 10:23) Irarikin anne, ti karekea te kairiri ae riai n aroni karaoan te mwakuri n uarongorongo ae uaana. Ti uataboa te mwakuri aei ma te onimaki ni kabonganaani bwaai n ibuobuoki aika iroura n aron ae ti kona. Ti na tataekina te rongorongo ae raoiroi n taai nako n te aono ae bati te kan ongora iai? Ni koauana, ti na kanga ni kaman ataa anne? (Wareka Te Minita 11:5, 6.) Bon ara mwakuri te uarongorongo, ao ti onimakina Iehova bwa e na kakabwaiaira. (1 I-Korinto 3:6, 7) Ti kona ni kakoauaa raoi bwa e nori ara kakorakora ao e a katauraoa iai te kairiri ae riai are ti kainnanoia rinanon taamneina ae raoiroi.—Taian Areru 32:8.
Ukeran te Taamnei ae Raoiroi
13, 14. E kanga ni kaotiotaki raababan ana ibuobuoki te taamnei ae raoiroi mairoun te Atua ni kataubobongaia ana toro?
13 Tera ae ti na karaoia ngkana ti namakinna bwa ti aki tau ni kakororaoa mwiokoara ke ni karaoan te mwakuri n uarongorongo? Ti riai ni butiia Iehova bwa e na anganira taamneina ae raoiroi ibukini karikirakean rabakaura n ara mwakuri ibukina. (Wareka Ruka 11:13.) E kona taamnein te Atua ni katauia aomata ibukin te mwakuri ke te mwioko n aki ongei aroia ke aia atatai mai mwaina. N te katoto, imwin raoi te Otinako mai Aikubita, e angania taani kawakin tiibu ao tooro taamnein te Atua, te kona ni kabwakaia aia kairiribai n te boo ni buaka, e ngae ngke e aki tau rabakauia ni buaka. (Te Otinako 17:8-13) Imwin tabeua te tai, e kataubobongaia Betarera ao Ooriaba te taamnei ae raoiroi anne ni mwakurian taamnein te umwanrianna ae tabu are tamaroa ae kairaki koreana rinanon te taamnei.—Te Otinako 31:2-6; 35:30-35.
14 A kataubobongaaki ana toro te Atua ni boong aikai n te taamnei ae raoiroi are rangi ni mwaaka bwa a na tararuaa kainnanon te botaki ngke e kainnanoaki moani waakinan te mwakuri ni boreeti. E kabwarabwaraa n te reta Brother R. J. Martin ae mataniwin te tabo ni mwakuri n te tai anne, te bwai are e a tia ni kakororaoaki n 1927 ni kangai: “E kauka te mataroa te Uea n te tai ae riai ao ti a karekea te bwai ni boreeti ae bubura ae te rotary are ti aki ataa aroni kabutana ao karaoana. Ma te Uea e ataa aroni kanakoraoan aia iango te koraki ake a tauraoi ni karaoa aia kabanea n tamaroa ibukina. . . . I nanon tabeua te wiki, ao ti a kona ni kammwakura te bwai ni boreeti anne; ao e teimatoa ni mwakuri n te aro are a noria taani karaoia bwa e a rangi nakoraoi riki te mwakuri.” E a tia Iehova ni kakabwaiaa ara kakorakora ni karokoa boong aikai.
15. A kanga ni kakorakoraaki te koraki ake a kaaitara ma te kaririaki n I-Rom 8:11?
15 E mwamwakuri taamnein Iehova n aanga aika kakaokoro. E tauraoi te taamnei anne ibukia ana toro nako te Atua ao e buokiia n tokanikai n aki ongei kangaanga. Ma tera arora ngkana ti namakina ae ti a taonakinako n te kariri? Ti kona ni karekea te korakora man ana taeka Bauro aika kuneaki n I-Rom 7:21, 25 ao 8:11. Eng, e kona ni mwakuri i bukira “taamnein teuare kauta Iesu mai buakoia maate” ni kakorakoraira n tokanikai i aoni kaibwabwarun te rabwata. E koreaki te mwakoro anne ibukia Kristian aika kabiraki n te taamnei, ma a kaineti booto n reirei akanne nakoia ana toro te Atua ni kabane. Ti bane ni karekea te maiu ni kaotan onimakinani Kristo, kakorakorakira ni kamaunai iango aika aki riai, ao maiuakinan te kairiri mairoun te taamnei.
16. Tera ae ti riai ni karaoia bwa ti aonga ni karekea te taamnei ae raoiroi mairoun te Atua?
16 Ti kona ni kantaningaa te Atua bwa e na anganira mwaakana ae mwamwakuri ngkana akea ara kakorakora ni mwakuri? E aki. Irarikin tataroakinana, ti riai n tataningamarau ni kanuaira n Ana Taeka te Atua ae e kaira koreana. (Taeka N Rabakau 2:1-6) Irarikin anne, e memena taamnein te Atua n te ekaretia ni Kristian. Ngkana ti katoatai n iririi bobotaki, e kaotiotaki iai nanora n “ongo ana taeka te taamnei ae raoiroi nakoia taian ekaretia.” (Te Kaotioti 3:6) Irarikina, ti riai n nanorinano ni maiuakina ae ti reiakinna. Ti anganaki te reirei ni kairiri n Taeka N Rabakau 1:23, (BG) ae kangai: “Kam na rairaki n au reirei; Noria, N na nurakina taamneiu i aomi.” Ni koauana, e anga taamneina ae raoiroi te Atua “nakoia akana ongotaeka irouna bwa te tia tautaeka.”—Mwakuri 5:32.
17. Tera ae ti kona ni kabotaua ma mwin ana kakabwaia te Atua n ara kakorakora?
17 Kioina ngkai e kainnanoaki te kakorakora ibukini karekean te kakabwaia mairoun te Atua, uringnga bwa e aki kona ni kabotauaki te mwakuri korakora n tii ngaia ma baika bati aika raraoi ake e angania ana aomata Iehova. E kona ni kabotauaki mwini kakabwaiaan ara kakorakora ma karekeani marurungin rabwatara man amwarake aika bongana. E karaoi rabwatara te Atua n te aro are ti na kukurei n amwarake ao ni karekea ae bongana ma iai. E katauraoa naba te amwarake. Ti aki ataia raoi bwa a kanga ni karekei baika manena ibukira taian amwarake, ao a aki kona naba angiina mai buakora ni kabwarabwaraa bwa a kanga amwarake aika ti kang n anganira te korakora. Ti ataia bwa iai te mwakuri ae karaoaki ma ti ibuobuoki iai ngkana ti amwarake. Ngkana ti rinei amwarake aika iai manenaia, a na bon nakoraoi riki mwia. N aron anne, e katei kaetieti Iehova ibukin te maiu are aki toki, ao e anganira te ibuobuoki ae ti kainnanoia ibukin irakin nanoni kaetieti akanne. E teretere bwa e bati ana ibuobuoki nakoira ao e bon tau ni kamoamoaaki. Ma ti riai n aantaeka n arora ni maiuakina ae boraoi ma nanon te Atua ibukini karekean te kakabwaia.—Akai. 2:18, 19.
18. Tera am motinnano, ao bukin tera?
18 Ai ngaia are kakororaoi mwiokoam ma nanom ni kabane. Onimakina Iehova bwa e na buokiko n tokanikai. (Mareko 11:23, 24) Ngkana ko karaoa anne, karaua nanom bwa “ane ukeuke e na kunea.” (Mataio 7:8) A na kakabwaiaaki te koraki ake a kabiraki n te taamnei n anganaki “te bau ae te maiu” i karawa. (Iakobo 1:12) A kakorakoraia ana “tiibu tabemwaang” Kristo ni karekea te kakabwaia ibukia rinanon ana kariki Aberaam, ao a na kimwareirei n ongo ae taekinna Iesu ni kangai: “Nakomai ngkami aika kam kakabwaiaaki iroun Tamau, kam na karekea tibwangami n te tautaeka n uea ae katauraoaki ibukimi imwaini moan rikia ataei n te aonnaba.” (Ioane 10:16; Mataio 25:34) Eng “akana kakabaiaki i Rouna [te Atua] a na abana te aba, . . . Ao a na mamaeka iai n aki toki.”—Taian Areru 37:22, 29, BG.
Ko Kona ni Kabwarabwaraa?
• Tera ae irekereke ma te ongeaba ni koaua?
• Tera ae kainnanoaki ibukini karekean te kakabwaia mairoun te Atua?
• Ti na kanga ni karekea te taamnei ae raoiroi mairoun te Atua, ao e mwamwakuri ibukira n te aro raa?
[Taamnei n iteraniba 11]
E kaunrabwata Iakoba ma te anera ibukini karekean te kakabwaia mairoun Iehova.
Ko kakorakorako ni karaoa am kabanea ni kona n aron naba anne?
[Taamnei n iteraniba 12]
E kataubobongaa Betarera ma Ooriaba te taamnei ae raoiroi mairoun te Atua bwa a na rianako rabakauia ni mwakuri