Baika Irekereke ma Ataakin Aran te Atua
IAI nanon aram ae okoro? Boni katein aaba tabeua n te aonnaba aio, anganakin te teei arana ae iai nanona. E kona ni kaotaki man te ara ae rineaki, aia koaua kaaro, aia iango ke aia kantaninga ao miitaraeani maiun te teei anne nakon taai aika a na roko.
E taneiai te aba n anganga aara ake iai nanoia. N taai ake a karakinaki n te Baibara, a kakabonganaaki aara ni kaineti ma baika a nanonaki iai. E kona n oti man aran te aomata aroarona aika a kantaningaaki bwa e na kaotiotii. N te katoto, ngke e tuangaki Tawita iroun Iehova mwiokoan natina ae Toromon nakon te tai are imwaina, ao E kangai: “E na aranaki ba Toromon [man te taeka ae nanona “rau”], ao N na anga te raoi ma te rau nakoia Iteraera i nanon ana bong.”—1 Rongorongo 22:9, BG.
N taai tabetai, e angan temanna arana ae boou Iehova ibukini mwiokoana ae boou. E anganaki buun Aberaam are e kanoabo te ara ae Tara ae nanona “te Nati n uea te aine.” Bukin tera? E kabwarabwaraa ni kangai Iehova: “N na kakabaiaa, ao N na anganiko naba natim te mwane mai rouna: eng, N na kakabaiaa, ao e na riki ba tinaia botanaomata; ao a na riki aia uea natanaomata mai rouna.” (Karikani Bwaai 17:16, BG) E a oota raoi bukin reken aran Tara ae boou bwa e irekereke ma mwiokoana ae boou.
Ma tera aron te ara ae Iehova ae te kabanea ni kakannato i buakon aara ni kabane? Tera ae nanonaki iai? Ngke e titirakinaki te Atua arana irouni Mote ao e kaeka Iehova ni kangai: “N na bon riki bwa te bwai ae N na riki.” (Te Otinako 3:14, NW) E kangai ana rairai Rotherham: “N Na Bon Riki bwa te bwai ae I tangiria.” E kaotaki nanon aran te Atua ae Iehova bwa bon te Atua ae bati baika tabeakinaki irouna. Ti na kabongana te kabotau ae bebete: E tangiria te tina ni karaoi mwiokoana aika bati i bukin tararuaaia natina ni katoa bong bwa kaanga te neeti, te tia kuuka ao te tia reirei ni kaineti ma te bwai ae riki ae e kainnanoaki. Bon titeboo naba aei ma Iehova, ma e rietata riki n arona. Ibukini kakororaoan ana kantaninga ae tatangira ibukin te botannaomata, e a kona n riki n aron are e tangiria ni karaoani mwakuri ni kabane aika kainnanoaki. Ngkanne, e irekereke kinaakin aran Iehova ma otara ao arora ni kaotiota te karinerine ma te kakaitau nakoina ibukin ana mwakuri aika bati.
E kananokawaki bwa a kona n raba aroaron te Atua aika moan te tamaroa mairouia ake a aki kinaa n arana. Ngkana ko ukeuke n reirei n te Baibara, ko a kona iai ni kakaitau ibukin nakoan Iehova n aron aika kaotaki aika tii tabeua ikai, te tia Anga te reirei ni kairiri ae wanawana, te tia Kamaiu ae mwaaka, ao te tia Anganga ae tituaraoi. E boni kamimi te bwai ae nanonaki n aran Iehova.
E ngae n anne, e bon aki bebete n taai nako kinaakin te Atua n arana. E na kaotaki bukina n te kaongora ae i mwina.