Tera Ana Tautaeka N Uea Te Atua?

TERA oin ana rongorongo Iesu n ana mwakuri n uarongorongo? E kaotaki iroun Iesu, bwa bon rongorongon Ana Tautaeka n Uea te Atua. (Ruka 4:43) E aki toki Iesu n taekina te Tautaeka n Uea ngkana e taetae nakoia aomata. Ma a mimi aomata ke ni mangaongao ootaia iai? A titirakinna bwa tera te Tautaeka n Uea anne? A aki. Bon akea naba titiraki n aron akanne aika koreaki n taian Euangkerio. Te koaua bwa a taneiai ma rongorongon Ana Tautaeka n Uea te Atua aomata aikai?

Ni koauana, Koroboki n te Baibara nikawai aika tabu ao ni karineaki irouia kaain Iuta a taekinna n te aro ae teretere ao ni koaua raoi bwa tera te Tautaeka aei ao tera ae na kakoroi bukiia. Ni boong aikai, ti kona n reiakina riki taekan te Tautaeka n Uea aei n aroia kaain Iuta man kabonganakin te Baibara. Ti na rinanon ngkai koaua aika itiua aika e reireinira te Baibara ni kaineti ma te Tautaeka n Uea. A a kaman kaotaki koaua aika tenua nakoia kaain Iuta, imwain ao n ana bong Iesu. A kaotaki ake tenua riki iroun Kristo ke taan rimwina n te moan tienture. E kateretereaki are te kaitiua n ara bong aikai.

1. Bon te tautaeka ni koaua Ana Tautaeka n Uea te Atua, ae na teimatoa n aki toki. E kaotaki n te moan taetae ni burabeti n te Baibara bwa te Atua e na kanakoa te tia kamaiu ibukia aomata aika kakaonimaki. Boni ngaia ae e aranaki bwa te “kariki,” ae E na katoki mwin kangaanga ake a moan riki imwin aia karitei Atam ma Nei Ewa, ao Tatan. (Karikani Bwaai 3:15) E maan imwina ao e a tuangaki te Uea ae kakaonimaki are Tawita te rongorongo ae kakaongora ae taekan te “kariki” aei, ke te Mesia. E na uea n te Tautaeka n Uea aei. E na kaokoro te tautaeka aei ma tautaeka ni kabane, bwa e na teimatoa n aki toki.​—2 Tamuera 7:12-14.

2. E na kamaunai aia tautaeka aomata ni kabane Ana Tautaeka n Uea te Atua. E anganaki te miitara te burabeti are Taniera, ike e nori iai tautaeka aika korakora n teirake teuana imwin teuana, mangkekei ni karokoa ngkai. Nora tokin te miitara anne ae kakannongora: “Ao n aia bong uea akanne [kabanea n uea irouia aomata] ao E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.” Ma ngaia are, tautaeka n uea ni kabane ke taian tautaeka ma aia buaka, karawawataaki, ao te babakanikawai aika mena n te aonnaba aei, a nang bane ni kamaunaki n aki toki. N aron ae kaotaki n ana taetae ni burabeti Taniera, e a kaan roko te tai are e nang tautaekana te aonnaba ni kabutaa Ana Tautaeka n Uea te Atua. (Taniera 2:44, 45) N te koaua ni koaua, e na teimatoa te tautaeka aei n tii ngaia ao n tautaekana te aonnaba.a

3. E na katoki buaka, aoraki, ao te mate naba, Ana Tautaeka n Uea te Atua. A kakaongoraa taetae ni burabeti n te Baibara aika kaotia bwa tera ae na karaoia Ana Tautaeka n Uea te Atua i aon te aba. E na karaoi baika a aki kona ni karaoi aia tautaeka aomata n taai aika nako ao n taai aika a na roko. Iangoia ngkana a kamaunaki bwaai ni buaka ni kabane n aki toki! “E katoki buaka, ao tokina tabon aonaba.” (Taian Areru 46:9) A nang akea manga taokita, onnaoraki, ke aoraki n aekaia nako. “Ane maeka iai e na aki kangai, I aoraki.” (Itaia 33:24) A nang akea riki roongo, taren amwarake, te aoraki ae te bakitaia, ke te baki. “Ane e na bati te uita i aon te aba.” (Taian Areru 72:16) A akea manga botaki ni mate, ruua ni mate, taabo ake a kawakinaki iai rabwataia maate, ke karawawata man baikai. E nang kamaunaki ara kairiribai ae iriara n taai nako ae te mate. E nang “oongaki te mate i Rouna n aki toki; ao E na kaoi rannimata te Uea ae Iehova mani maata ni bane.”​—Itaia 25:8.

4. E rineaki iroun te Atua te Tia Tautaeka n Ana Tautaeka n Uea. E aki rineia i bon irouna te Mesia, ke n rineaki irouia aomata aika aki kororaoi. E rineaki iroun Iehova ae te Atua. A kaotaki raoi n nakoa aika Mesia ao Kristo, bwa e bon rineaki iroun te Atua. Nakoa aika uoua aikai, a nanona “Teuare Kabiraki.” Mangaia are e kabiraki te Uea aei, ke ni katauaki iroun Iehova nakon mwiokoana ae okoro. E taekinna te Atua ni kangai: “Nora au tia makuri ae I kateimatoa; ae rineaki i Rou, ae e kakatonga tamneiu i rouna: I kaki Tamneiu i aona; E na tuangia Tientaire te aro ae raoiroi.” (Itaia 42:1; Mataio 12:17, 18) Antai riki ae na ataia nakon ara tia Karikiriki bwa aekakira ara tia Tautaeka ae ti kainnanoia?

5. E a tia ni kaota koauan tauraoina i mataia aomata te Tia Tautaeka n Ana Tautaeka n Uea te Atua. E kakoauaki Iesu are te I-Natareta bwa bon te Mesia ae e a kaman burabetinaki. E bungiaki man te utu n uea ae rineaki iroun te Atua. (Karikani Bwaai 22:18; 1 Rongorongo 17:11; Mataio 1:1) Ngke e mena i aon te aba, e kakoroi bukin taetae ni burabeti aika bati ni kaineti ma te Mesia ake a a kaman koreaki irabubua te ririki imwaina. E kaotaki naba mai karawa bwa boni ngaia te Mesia. Ni kanga? Ni koauana, e taetae mai karawa te Atua ni kaotia bwa bon Natina; a kaotia anera bwa Iesu bon te Mesia ae burabetinaki; ao e kakaraoi naba kakai Iesu i mataia aomata aika bubua ma bubua ke aika ngaa ma ngaa mwaitiia. A kakoauai raoi ni mataia bwa e karaoi kakai ni mwaakan te Atua.b E okioki ni kaotia Iesu bwa aekakira arona ngkana e riki bwa te tia Tautaeka. E aki tii iai mwaakana ni buokiia aomata ma e boni kan buokiia naba. (Mataio 8:1-3) E anganga boni ngaia, e boto i aon te akoi ana nanoanga, e ninikoria, ao e nanorinano naba. A mena rongorongon maiuna n te Baibara, bwa a aonga ni warekia aomata ni kabane.

6. A na tautaeka ma Kristo aomata aika 144,000 mwaitiia n Ana Tautaeka n Uea te Atua. E taekinna Iesu bwa a na uea tabeman ma ngaia i karawa, n ikotaki ma ana abotoro. E araniia te koraki aei bwa te “nanai ae uarereke.” (Ruka 12:32) Imwina riki, e tuangaki te abotoro Ioane mwaitin te nanai ae uarereke aei, bwa 144,000. A na karekea mwiokoaia ae kamimi i karawa, bwa a na tautaeka ma Kristo bwa uea ao ibonga.​—Te Kaotioti 5:9, 10; 14:1, 3.

7. E a tautaeka ngkai Ana Tautaeka n Uea te Atua i karawa, ao e nang tauraoi n tautaekana te aonnaba ni kabutaa. E kakannongora riki reiakinan te kaitiua ni koaua aei. E anga bwaai ni kakoaua aika mwaiti te Baibara, bwa e a bon tia n anganaki te mwaaka n tautaeka Iesu, bwa te Uea i karawa. E a tautaeka ngkai i karawa, ao e a kaan te tai are e nang karababaa iai ana tautaeka nakon te aonnaba ni kabane, ao ni kakoroi bukin taetae ni burabeti aika raraoi ake ti a tia n taekin. Ma ti na kanga ni kakoauaa raoi bwa e a bon tautaeka Ana Tautaeka n Uea te Atua ngkai? Ao n ningai ae nang moana iai tautaekanakin te aonnaba?

[Footnotes]