Ko Riai ni Maiu Tii Ibukin te Bong Aio?
“I AKI kona n iaiangoi kanoan taai aika a na roko. Bwa e na bon waekoa n roko i bon irouna.” Taeka akanne aika a aki toki ni mwaneweaki irouia aomata, a iangoaki bwa ana taeka te tia rabakau temanna n te aonnaba ae rangi ni kinaaki ae Albert Einstein. A mwaiti aomata aika a namakina naba ae ai aron anne, ao a taku: “Bukin tera bwa ko na raraomaeakina kanoan taai aika a na roko?” Ke tao ko a tia n ongongo irouia tabeman aomata taeka n ai aron aikai: “Tii tabe ma baika ko na karaoi ni maium aei.” “Maiu ibukin tii te bong aio.” “Tai raraomaeakina te ingabong.”
Ni koauana, bon akea ae iruwa n te aeka n anua anne. “Amwarake, moi ao kakukureiko. Akea riki te bwai ae kakawaki irarikin aikai.” Aio bon aia boto n iango kaain te baronga ngkoa ae Ebikourio. Titeboo naba aia taratara tabeman ake a maiu n ana tai te abotoro Bauro ma aei, bwa e kangai aia koaua: “Ti na amarake ma ni moi; ba ti mate ningabong.” (1 I-Korinto 15:32) A kakoauaa bwa bon tii aio te maiu ao akea riki imwina, ao ibukin anne a kauekea te iango are e riai bwa ti na kabatiai kakukureiara ao mweeraoira n te maiu aio.
Ni kaineti nakoia mirion ma mirion mai buakoia kaain te aonnaba aio, e aki nanona moanibwaian kabatiaan kakukureiaia i bon irouia, ni karekei baike a kona n reke irouia n te maiu aei. E rangi ni kangaanga aron te maiu irouia n taai aikai ao a kunea bwa e teimatoa n rawawata ao ni kakaia te nano aron karekean maiuia. Bukin tera bwa a na iangoi kanoan taai aika a na roko, ngkai e aki toki ni kananokawaki ao ni kabwaranano taraan te “ingabong”?
Ti Riai ni Babaire Ibukin te Ingabong?
E iangoaki bwa akea manenan karaoakin babaire ibukin te ingabong irouia aomata ake a maeka n taabo aika e bebete riki iai te maiu. A kona ni kangai: “E aera bwa ti na raraomaeakina kanoan te ingabong?” A kona n taku tabeman bwa aomata ake a kakaraoi babaire, a aki toki ni kaaitara ma te aki raunnano ibukin aki koron nanon aia babaire ao a a bwara nanoia iai. E kaaitara naba ma te bwarannano ae korakora te baatua ngkoa are Iobi n noran mwin ana babaire bwa ‘e matebuaka ana iango’, are e a uruanaki iai babaire ake e a tia n iangoi raoi ibukin kukureina ma ana utu nakon taai aika a na roko.—Iobi 17:11 BK; Te Minita 9:11, BK.
Te tia ototo mai Scotland ae Robert Burns e kabotaua ara kangaanga n te maiu aio, ma aron te bun ni kimoa ngkana e urubekea ana tabo ni maeka n ana bwai n ununiki. E rawea maiuna te kimoa aei mai mwin ruanikain maiuna. E iango te tia ototo ni kangai, ‘Eng, n angiin te tai ao ti namakina akean korakorara ngkana ti kaaitara ma taian kangaanga ake a riaon ara kona, n te aro are babaire aika a iangoaki raoi a tara ni matebuaka.’
Te koaua ngkanne bwa e aki manena te babaire ibukin taai aika a na roko? Ni koauana ao e na bon karuanikai mwin te babaire ae aki karauaki raoi n iangoaki, ngkana a riki naba angibuaka ke tao kabuanibwai riki ae ai aron akanne. N te katoto, akea ae kona n totokoa rikin te angibuaka. Tiaki e na raoiroi riki ngkanne bwa ti na kaman nori ao ni babairei baika a riai ni karaoaki ibukin kauarerekean rotakin te aba ma kaaina?
Tera am iango? Iai ngkanne nanon ae ti na maiu tii ibukin te bong aio ao man aki tabe ma kanoan te bong are i mwina? Iangoa ae taekinaki n te kaongora ae imwin aei ni kaineti ma te reirei aei.
[Taamnei n iteraniba 3]
“Amwarake, moi ao kakukureiko. Akea riki te bwai ae kakawaki irarikin aikai”
[Taamnei n iteraniba 4]
A kona ni kauarerekei kangaanga kaman iaiangoan ao karaoan te kakatauraoi imwain te angibuaka?
[Te Kabwarabwaraan te Taamnei]
U.S. Coast Guard Digital