‘Am Taeka Ni Kauring Nako Bon Au Bwai Ni Kukurei’

“Bwa bwaai ni kabane ake a koreaki ngkoa a koreaki i bukin reireiara.”​—I-ROM 15:4.

1. E kanga ni kauringira Iehova, ao bukin tera bwa ti kainnanoa aei?

E KATAURAOA te kauring nakoia ana aomata Iehova ibukini buokaia ni kaaitarai karawawata n taai aika kangaanga aikai. Ti riki n atai kauring aikai man warekan te Baibara i bon iroura ao n ara kaekaeka n taai ni bobotaki ni Kristian. A aki boou nakoira angiin baika ti wareki ke ti ongo n taai aikai bwa ti a boni bae n tia ni mamaroroakin mai imwaina. Ma ibukina bwa ti aki toki ni mwamwaninga, ti teimatoa ngkanne ni kainnanoa kaururingakira ni kaineti ma ana kaantaninga, ana tua, ao ana kaetieti Iehova. Ti bon riai ni kakaitau ibukin kauringakira mairoun te Atua. A kaungaira naba bwa ti na teimatoa ni kaatuua iangoan baike a anaaki iai nanora ngkoa nakon maiuakinan ae e kukurei iai te Atua. E anene ni kangai te tia areru nakon Iehova: “Am taeka [“kauring,” NW] nako bon au bwai ni kukurei.”​—Taian Areru 119:24.

2, 3. (a) E aera Iehova ngkai e kawakini rongorongoia aomata ake a taekinaki n te Baibara, ni karokoa boong aikai? (b) Baikara rongorongo man te Baibara aika a na rinanoaki n te kaongora aei?

² E ngae ngke a koreaki Ana Taeka te Atua n tienture aika bwaka nako, ma e bon teimatoa naba ni mwaaka. (Ebera 4:12) A karakinaki iai rongorongo ni koaua ibukia aomata ake a maiu rimoa. E ngae naba ngkai e a korakora bitakin katei ao iango ni kabotauaki ma taai ake a koreaki iai te Baibara, ma n angiin te tai kangaanga aika ti kaaitara ma ngaai, bon titeboo ma ake rimoa. E kawakinaki iai karaki aika manena nakoira. A riinga te nano banna ni katoto aikai bwa bon taekaia aomata aika tangira Iehova ao ni kakaonimaki nakoina, ribuakon karawawataiia. N rongorongo ake tabeua riki, ti kaongoaki iai aaro aika e ribai te Atua. E baireia Iehova bwa a na bane ni koreaki n te Baibara rongorongoia aomata aika raoiroi ao aika buakaka bwa bwaai ni kauring. E korea ae kangai te abotoro Bauro: “Ba bwaai ni kabane ake a koreaki ngkoa ao a koreaki i bukin reireiara, ba ti na karekea te kaantaninga n taotaonan te nano ma te nano ae kabebeteaki n te Baibara.”​—I-Rom 15:4.

³ Ti na kaatuua ngkai ara iango i aon rongorongo man te Baibara aika tenua: rongorongon ana mwakuri Tawita nakon Tauro, rongorongoia Anania ao Tabeire, ao aroaron Ioteba nakoni buun Botiba. Iai reireiara aika kakawaki man karaki aikai ni kabane.

Kakaonimaki Nakon Ana Babaire te Atua

4, 5. (a) Tera te bwai are e riki are a irekereke iai te Uea ae Tauro ao Tawita? (b) Tera aron Tawita ni kaineti ma ribaakina iroun Tauro?

⁴ E aki kakaonimaki nakon Iehova te Uea ae Tauro ao e a aki tau n tautaeka i aoia Ana aomata. Mangaia are e a ribaia te Atua ao e tua nakon te burabeti ae Tamuera bwa e na kabira Tawita bwa uean Iteraera nakon taai aika a na roko. Ni kaotiotan rakan rabakaun Tawita ni buaka ma ninikoriana, ao kamoamoakina naba irouia aomata, e a moanna n iangoa Tawita Tauro bwa aiana. E okioki Tauro ni kataia n tiringnga, ma e rawea maiuna Tawita n taai aikai ni kabane kioina ngkai e memena Iehova irouna.​—1 Tamuera 18:6-12, 25; 19:10, 11.

⁵ I nanon ririki aika mwaiti, e riai Tawita ni birinako ni karabarabaa. Ngke e a angaraoi tiringan Tauro iroun Tawita, ao a kaungaa raoraona bwa e na kamatea ao a tuangnga bwa e a anga Iehova aiana nako nanoni baina. Ma e bon rawa naba Tawita. E karaoa aei, ibukin kakaonimakina nakon Iehova ao ana karinerine ibukin Tauro ngkai bon aia uea ana aomata te Atua ae kabiraki. Tiaki e a tia Iehova n rinea Tauro bwa uean Iteraera? Bon Iehova naba ae e na kabwakaa ngkana e nora riaina. E noria Tawita bwa akea riaina ni kaeta te aro aei. Imwin karaoan ana kabanea ni konaa n taai aika riai ibukin kakerikakan ribaakina iroun Tauro, e kamatoaa ana taeka ni kangai: “E na oroia Iehova; ke e na roko te bong ae e na mate iai; ke tao e na ruo nakon te bo ni buaka, ao e na mate iai. E na tukai Iehova ba N na aki arora baiu n eka nako ana kabiraki Iehova.”​—1 Tamuera 24:3-15; 26:7-20.

6. Bukin tera bwa e kakawaki nakoira rongorongoia Tawita ao Tauro?

⁶ Iai te reirei ae kakawaki n te rongorongo aei. Ko a tia n titiraki n te taina, bwa e aera ngkai a a riki kangaanga tabeua n te ekaretia ni Kristian? E kona temanna ni karaoi mwakuri aika aki rangi n raoiroi. Tao e aki rangi n rawawata ana bure anne, ma e aki karauko. Tera arom iai? Ibukin kaotan tabeakinan raom ni Kristian ao am kakaonimaki nakon Iehova, tao ko kona ni maroro ma ngaia ma te akoi, ma ni kaantaningaa reken ae riai imwina. Ma tera ae ko na karaoia ngkana e aki reke etin te kangaanga anne? Imwin karaoan am kabanea ni konaa, tao e a riai katukan bwaai ni kabane iroun Iehova. Anne aron Tawita ngkoa.

7. Ti na kanga ni katotonga Tawita, ni kaitaraa te ribuaka nakoira ao ribaakira?

⁷ Ko kona naba ni kaaitara ma kangaanga ibukin te ribuaka mairouia aomata ke te kairiribai ibukin kaokoron te Aro. Tao bon akea ke tii teutana te bwai ae ko kona ni karaoia ibukia n te tai aei moa. E kona n rangi ni kangaanga te nanomwaaka iai, ma e reke reireiara man aron Tawita ni kaitaraa te ribuaka nakoina. Areru aika riinga te nano ake a koreaki iroun Tawita, a kaotii aron ana tataro ni bubutii ibukin kamanoana mairoun Tauro, arona n teimatoa ni kakaonimaki nakon Iehova ao nanona ni kani kamoamoaa aran te Atua. (Taian Areru 18:1-6, 25-27, 30-32, 48-50; 57:1-11) E teimatoa ni kakaonimaki Tawita nakon Iehova, e ngae ngke e boni waaki nako naba Tauro ni karaoi mwakuri n ribuaka i nanon ririki aika bati. Ti riai n teimatoa ni kakaonimaki nakon Iehova ao ana botaki n aki ongei ribuakaara ao mwakuri aika karaoaki nakoira. Ti kona n onimakina ae e atai raoi arora ni kabane Iehova.​—Taian Areru 86:2.

8. Tera aroia Ana Tia Kakoaua Iehova ake i Mozambique ni kataakin aia kakaonimaki nakon Iehova?

⁸ Boni banna ni katoto ibukira ni boong aikai, rongorongoia tabeman Kristian ake i Mozambique ake a kakaonimaki n nimta Iehova n tain kataakia. N 1984, a aki toki ni buakanaki aia kaawa irouia tautia aika karitei nakon te tautaeka, ake a kuribwai, a kabueki auti, ao a tiritiri. E taraa n akea te bwai ae a kona ni karaoia Kristian ni koaua aikai ibukin kamanoaia. A karawawataki taani maeka n te tabo anne, bwa a aki toki n anaaki bwa kaain te taanga ni buaka ke a kairoroaki bwa a na boutokaa te buaka n aanga riki tabeua. A kakoauaa Ana Tia Kakoaua Iehova bwa e kauntaba karaoan aei, ma aroia ni Kristian ae te tei i nuka. E korakora unin te taanga ni buaka ngke a rawa ni karaoa aei. A tiringaki Taani Kakoaua aika 30 mwaitiia n tain te kangaanga aei. Ma e aki uruaki kakaonimakia Ana aomata Iehova e ngae ngke a kakamaakaki n tuangaki bwa a na mate.a N aron Tawita, a nanomwaaka naba i aan ribuakaaia ao n tokina a bon tokanikai.

Te Kauring

9, 10. (a) Ti na kanga ni kakabwaiaki ni katoto tabeua aika n te Baibara? (b) Tera aia bure Anania ao Tabeire?

⁹ E tauraoi te kauring ni kaineti ma aaro aika riai ni kararoaaki, n rongorongoia tabeman aomata aika a taekinaki n te Baibara. Ni koauana, iai n te Baibara rongorongoia aomata aika bati ao ana toro naba te Atua, ake a bure ao a a manga anaa uaana. (1 I-Korinto 10:11) Teuana te rongorongo mai iai, bon taekaia taangan Anania ao Tabeire ake kaain te ekaretia ni Kristian n te moan tienture i Ierutarem.

¹⁰ Imwin Bentekota 33 C.E., e a noraki kainnanoan te ibuobuoki ibukin maiuiia taan onimaki ake a boou, ake a teimatoa n tiku i Ierutarem, ibukin te kakabwaia are a na karekea n aia iraorao ma abotoro. A kaboo nako aia bwai tabeman kaain te ekaretia bwa a aonga ni buokiia tariia bwa a na akea ae kainnano. (Mwakuri 2:41-45) A kaboa nako abaia Anania ao Tabeire ao a tii uota mwakoron boona nakoia abotoro, ao a taekinna bwa aia bwaintangira arei boni boon te aba ni kabane. E koaua bwa a inaaomata n anga ae bati ke ae uarereke, n aron are a kukurei iai Anania ao Tabeire, ma a babakanikawai n aia mwakuri. A kan anai nanoia abotoro ibukina bwa a tangiria bwa a na iangoaki irouia aomata ao abotoro bwa a raoiroi. I aan ana kairiri te taamnei ae raoiroi, e a kaota aia kewe te abotoro Betero, ao aroia are a baka n raoiroi, ao e oroia ni kamateia Iehova.​—Mwakuri 5:1-10.

11, 12. (a) Baikara kauring tabeua ibukin maiuakinan te eti ao te koaua? (b) Baikara kakabwaia aika reke man maiuakinan te eti ao te koaua?

¹¹ Ngkana tao ti kaririaki nakoni kabwaouan te koaua ibukin tangiran kamoamoakira irouia aomata, e bia riki rongorongoia Anania ao Tabeire bwa te kauring ae ti na karaua n iaiangoia raoi n taai nako. Tao ti kona ni kekeweiia raoraora, ma ti bon aki kona ni kewea Iehova. (Ebera 4:13) E aki toki ni kaungaira te Baibara bwa ti na tataekina ae koaua i marenara, ibukina bwa a na akea nneia taani kewe n te aonnaba are e na kaitiakaki. (Taeka N Rabakau 14:2; Te Kaotioti 21:8; 22:15) Ti riai n ota raoi bwa bukin tera ngkai e karaoaki aei. Te tia boutokai keewe ni kabane bon Tatan te Riaboro.​—Ioane 8:44.

¹² Ti karekei kakabwaiara aika bati man maiuakinan te eti ao te koaua. Mai buakon aikai boni mataniwin te nano ae itiaki ao te raunnano ibukin ataakin onimakinara irouia aomata. N taai aika bati, ao a a tia n reke aia mwakuri Kristian, ke n teimatoa iai ibukin aroia ni maiuakina te eti ao te koaua. Ma te kakabwaia ae moan te kakawaki, bon reken ara iraorao ma te Atua ae Moan te Mwaaka ibukin kaotiotan te kakaonimaki.​—Taian Areru 15:1, 2.

Rarawa Nakon te Wene ni Bure

13. Tera te aroaro are e kaaitara ma ngaia Ioteba, ao tera arona iai?

¹³ E kabooaki nako Ioteba, ae natin te baatua ae Iakoba bwa te kaaunga ngke 17 ana ririki. Ao e a roko Ioteba n ana auti Botiba, ae te mataniwi iroun te uea i Aikubita, ao e a tataanna buun ana toka. E kani wene ni bure neiei ma Ioteba, ae te rorobuaka ae botonimwaane, ao e teimatoa ni kaumaka Ioteba ni katoa bong ni kangai: “Wene ma ngai.” E a bon tionako ngkai Ioteba mairouia ana utu ao e a maeka n te aba ae akea ae kinaa iai. Tao e boni kona ni wene teuaei ma neiei n akea aomata aika a ataia. Ma e ngae n anne, ngke e katikaki iroun buun Botiba, ao e birinako.​—Karikani Bwaai 37:2, 18-28; 39:1-12.

14, 15. (a) Bukin tera bwa e kakawaki rongorongon Ioteba ibukira? (b) Bukin tera bwa e kakaitau temanna te aine ae te Kristian imwin mutiakinan ana kauring te Atua?

¹⁴ E kaikawaki Ioteba n te utu ae mamaaka te Atua, ao e ataia bwa e bure te wene n taanga irouia aomata aika tuai ni mare. Mangaia are e titiraki: “N na iranna iai ni karaoa te bure ae ababaki aei, ma ni bure nakon te Atua?” E bae ni kairiraki ana motinnano teuaei n ataakin ana kaetieti te Atua ibukia botannaomata are e taekinaki i Eten, ae e riai n tii temanna buun te aomata. (Karikani Bwaai 2:24) A kona ni kakabwaiaki Ana aomata te Atua ni boong aikai man iaiangoan aron Ioteba nakon te aro are e kaaitara ma ngaia. A iangoia kaain taabo tabeua, bwa a inaaomata aomata ni wene n taanga ngkana a aki mareaki, ao a a kona ni kakanikoaki iai rooro-n-rikirake ake a rawa nakon te wene ni bure irouia tabon roroia. E a korakora naba kaakaraoan te wene ni kimoa ibuakoia ikawai. Mangaia are, rongorongon Ioteba, bon te kauring ae roko raoi n te tai ae e kainnanoaki iai. E teimatoa ana kaetieti te Atua ni katabua te wene ni bure ao te wene ni kimoa. (Ebera 13:4) A mwaiti ake a a tia n iraraang n te wene ni bure, aika kakoauaa imwina bwa e raoiroi riki aki-karaoan aei. Mwin karaoan aei aika aki-kakukurei, bon namakinan te maamaa ae korakora, mataniwin te nano ae aki-itiaki, te koko, te bikoukou ao te ituaki n aoraki aika ewewe n te wene ni bure. N aron ae ti kauringaki n te Baibara, “e bure nakon oin rabatana,” te aomata ae kaakaraoa te wene ni bure.​—1 I-Korinto 5:9-12; 6:18; Taeka N Rabakau 6:23-29, 32.

¹⁵ Iai bukina ae e rangi ni kakaitau iai Jenny,b ae Ana Tia Kakoaua Iehova ae akea buuna, ibukin ana kauring te Atua nakoina. N ana tabo ni mwakuri neiei, ao iai te mwaane ae babaentoo ae nano iroun neiei ao e kataia ni kababaa bwa e na iraorao ma ngaia. Ngke e a aki kona ni kabooi ana taeka teuaei Jenny, e a kakorakoraaki riki iai ana kunemwaan. E taku neiei: “I a rangi ni kakorakorai ngkanne bwa N na kateimatoa itiakiu, ibukina bwa ni bon arona, e na bae n anaaki nanon te aine ngkana iai te mwaane ae taataanna.” Ma e a ataia neiei imwina bwa ngaia e bon tii kani karakaa mwaitiia ana aine aika e a tia ni wene ni bure ma ngaiia teuaei. Ngke e a namakinna neiei bwa e a moanna n taataana teuaei, e a tataro nakon Iehova bwa e na buokia n teimatoa ni kakaonimaki Nakoina. E a kunea Jenny bwa baike e reiakin n ana ukeuke n reirei n te Baibara ao ni booki aika aanaki n te Baibara, a a riki bwa bwaai ni kauring ake a kakorakoraa ao e teimatoa ni kamanoaki iai. Teuana mai buakon kauring akanne bon rongorongon Ioteba ma buun Botiba. E motika ana iango neiei ni kangai: “Ngkana I teimatoa ni kauringai aron korakoran tangiran Iehova irou, N na bon aki maaku bwa I aki kona ni karaoa te bure ae korakora aei ao ni bure iai nakoina.”

Mutiakini Ana Kauring te Atua!

16. Ti na kanga ni kakabwaiaki man kauringaan ao kananoan ara iango i aon rongorongoia aomata ake a taekinaki n te Baibara?

¹⁶ Ti kona ni bane ni karikirakei nanora ni kakaitau ibukin ana kaetieti Iehova, man kakorakorakira riki ni karekei otara bwa e aera ngkai e a tia ni kakawakin rongorongo ake rimoa n te Baibara ibukira. Tera te reirei mai iai? Baikara aroaroia aomata ake a karakinaki n te Baibara, aika ti riai ni kakairi iai ao ni kararoai? Boni bubua ma bubua, rongorongoia aomata aika a a tia ni koreaki n Ana Taeka te Atua. A na kabwaia aomata aika tangira te reirei mairoun te Atua, ngkana a kani karina riki i nanoia te wanawana ae kakamaiu, n ikotaki naba ma reireiara ae kona n reke man katoto ake e a tia ni kawakin Iehova ibukira. N taai nako, ao e karakini rongorongoia aomata te maekatin aei, ake ti kona ni karekei reireiara mai iai. E aera bwa ko aki kabongana am tai ni kauringi rongorongo aikai?

17. Tera am namakin ibukin ana kauring Iehova, ao bukin tera?

¹⁷ Ti kona n rangi ni kakaitau ibukin ana mwamwannano Iehova are e kaotiotia ibukia te koraki ake a kakorakoraia ni kaakaraoa nanona! Ti aki-kororaoi n aroia naba mwaane ao aine ake a taekinaki n te Baibara. Ma a rangi ni manena ibukira rongorongoia aika koreaki. Ti kona ni kararoaira man karaoan buure aika kakaiaki ngkana ti mutiakin ana kauring Iehova, ao ni kakairi n aia katoto aika raraoi, te koraki ake a nakonako ni kawai aika eti. Ni karaoan aei, ti na kona ngkanne n anene ma te tia areru ni kangai: “A a kabaia [“kukurei,” NW] akana kawakin ana taeka, akana ukoukoria n nanoia ni kabane. E tauu am taeka tamneiu; ao I bati n tangiri.”​—Taian Areru 119:2, 167.

[Kabwarabwara ae nano]

Tera Am Kaeka?

• Tera reireiara n aroaron Tawita nakon Tauro?

• Tera reireiara man rongorongoia Anania ao Tabeire?

• Bukin tera bwa e aitara raoi rongorongon Ioteba ma boong aikai?

[Taamnei n iteraniba 14]

Bukin tera ngke e ribaa tiringan Tauro Tawita?

[Taamnei n iteraniba 15]

Tera reireiara man rongorongoia Anania ma Tabeire?

[Taamnei n iteraniba 16]

Tera are e kaira Ioteba bwa e na rawa nakon te wene ni bure?