Antai Aika Neboa Te Atua Ni Boong Aikai?

“Ara Uea ao Atuara, Ko riai n anganaki te neboaki ma te karineaki ma te mwaka.”​—TE KAOTIOTI 4:11.

1, 2. (a) Taekin katoto aika kaotaki iai aroia aomata ni moani karaoi bwaai man katotongan ana karikibwai te Atua? (b) Tera te titiraki ae rio mai iai, ao tera kaekaana?

N TE bong teuana n 1940 tabun, ao e a kaira ana kamea te intinia ae kaain Switzerland ae arana George de Mestral bwa e na kaukiang n nakonako ma ngaia. Ngke e a okira mwengana, ao e nori kateketeke n nim i aoni kunnikaina ao ni buraen naba ana kamea. E rangi ni kan atai aron kateketeke aikai teuaei, mangaia are e a ukeuke i aona ni kabongana te bwai ni kataratara. E rangi ni mimi ngke e nori iai bwaai aika titeboo ma matau i aon kateketeke aikai, aika a kona n nim nakoni bwaai aika buraerae. Imwin tabeua te tai, ao e a riki teuaei bwa te moan aomata ae karaoa te bwai ni kanim ae katotongan bwaai ni kateketeke aikai, ae e aranaki bwa te Velcro. Tiaki tii De Mestral ni karaoi bwaai man katotongan ana karikibwai te Atua. A karaoa naba te waanikiba taari aika uoman aika Wilbur ao Orville n te United States imwin aia ukeuke i aon aroni kibaia mannikiba aika bubura. E katea te taua i Paris te intinia temanna i Buranti ae Alexandre-Gustave Eiffel are ingoanaki n arana, man katotongan naba aron karaoan te rii–ni-beebee ae kona n uouota rabwatan te aomata.

² E kaotaki raoi mani katoto aikai, aroia aomata n aki toki ni karaoi bwaai mani katotongan ana karikibwai te Atua. Ma e ngae n anne, ao iai te titiraki ae rio mai iai ae kangai: Mwaiti raa aia tai taani karaobwai ni kamoamoaa Teuare moani karaoa te kateketeke ae uarereke, mannikiba aika bubura, riin-beebeen te aomata, ao bwaai riki tabeua aika rangi n raraoi are e boto maiai aia kukune aomata ibukini karaoan bwaai aika mwaiti? E rangi ni kananokawaki bwa e burenibwai kamoamoan ke neboan te Atua ni boong aikai, ae te bwai ae riai ni karaoaki nakoina.

3, 4. Tera nanon te taetae n Ebera ae rairaki bwa “mimitong,” ao tera ae nanonaki iai ngkana e taekinaki ibukin Iehova?

³ A kona tabeman n taetae ni mimi ni kangai: ‘E aera ngkai e riai n neboaki te Atua? E aki kamani mimitong te Atua?’ Te koaua, bwa Iehova bon te Aomata ae te kabanea ni mimitong n te iuniweeti, ma a aki bane n iangoia aomata n te aro aei. N te Baibara, te taetae n Ebera are e rairaki bwa “mimitong” e nanona naba “rawawata.” E kaineti nakoni bwaai aika a karika te aomata bwa e na taraa ni kakannato ke ni kakawaki riki nakoia ake tabeman. Ngkana e taekinaki ibukin te Atua, e nanonaki ngkanne aroaron te Atua ae kakannato n aia taratara aomata.

⁴ Tii tabeman ni boong aikai, aika tabeakin bwaai aika kaotiota kakannaton te Atua. (Taian Areru 10:4; 14:1) Ni koauana, a aki bati ni kakoauaa te Atua aomata aika kakannato mai buakoia botannaomata, ao n taai aika mwaiti a kairarangia aomata tabemwaang bwa a na kamatauninga te tia Karika te iuniweeti ae mimitong. A karaoa aei n aaro raa?

“A Bukinaki n Aia Bure”

5. A kanga ni kabwarabwaraa rikin te karikibwai ae kamimi taan rabakau aika bati?

⁵ A mwaiti taan rabakau aika imanono n taekinna bwa bon akea te Atua. Ao a na kanga ngkanne ni kabwarabwarai bwaai aika kamimi karikaia n ikotaki naba ma karikaia aomata? A iangoi bwaai aika kamimi aikai bwa a manennanti n riki i bon irouia, ae taekan te ewarutin. N te katoto, e korea ae kangai Stephen Jay Gould are e boutokaa te iango ae te ewarutin: “Ti maiu ngkai, ibukina bwa ti riki man te kurubu n ika teuana ae kaokoro ae iai ingiia aika kamimi aika a kona n onikaki nakon waeia maan . . . Tao ti kona n tangira kabwarabwarana ae ‘kakawaki riki’ nakon aei, ma bon akea.” N aron naba anne, a korea ae kangai Richard E. Leakey ao Roger Lewin: “Tao a manennanti n riki aomata bwa uaan te kabuanibwai ngkoa teuana.” E ngae ngke iai taan rabakau tabeman aika kamoamoai tikiraoin bwaai aika karikaki, ma a bon aki kamoamoaa iai te Atua.

6. Tera ae anai nanoia aomata man kamoamoan te Atua, ae te bwai ae riai ni karaoaki nakoina ngkai bon te tia Karikiriki ngaia?

⁶ Ngkana a imanono aomata aika rietata aia reirei n taku bwa bon te koaua rikin bwaai rinanon te ewarutin, a nanonna ngkanne bwa tii aomata aika nanobaba aika a rawa ni kakoauaa aei. Tera aroia aomata aika mwaiti nakon te rongorongo ae akea koauana aei? Tabeua te ririki n nako ao e titirakinia aomata ake a kakoauaa te ewarutin, te aomata ae bubura ana atatai i aon te ewarutin. E taku: “I kunea bwa angiia aomata aika kakoauaa te ewarutin, a kakoauaa kioina ngkai a tia n tuangaki ae a kakoauaa te iango aei aomata aika wanawana ni kabane.” Eng, ngkana a kaota ae a kakewea te Atua aomata aika rietata aia reirei, a manga anai nanoia iai aomata tabeman man anganakin te Atua te kamoamoaki ae e riai n anganaki, ngkai boni ngaia te tia Karikibwai.​—Taeka N Rabakau 14:15, 18.

7. N aron ae kaotaki n I-Rom 1:20, BK, tera ae teretere raoi man noran bwaai aika karikaki, ao bukin tera?

⁷ A kakoauaa te ewarutin taan rabakau ibukina bwa a bati bwaai ni kakoauaa iai? A bon aki! Ti a otabwaniniaki ni bwaai aika kakoauaa bwa iai te tia Karikiriki. E korea ae kangai te abotoro Bauro ibukina: “Aron te Atua aika a aki noraki, ba makana ae akea tokina ao arona n Atua. Ma a kona n nori baikanne aomata ni wanawanaia, i muini karikan aonaba. Ba a noraki ni baike e karaoi te Atua. Ma ngaia ae a boni bukinaki n te bure [te koraki ake a aki kakoauai].” (I-Rom 1:20, BK) E teretere raoi nakoira te koaua ae bon iai te tia Karikiriki man noran mwin ana mwakuri. Mangaia are e taekinna Bauro bwa ni moa man karikaia aomata, e a boni kona n ‘noraki’ irouia koauan ae bon iai te Atua, man ana karikibwai aika noraki. A ngaa bwaai ni kakoaua aikai?

8. (a) E kanga karawa ni kaotiota mwaakan te Atua ma wanawanana? (b) Tera ae kaotia bwa iai te Mwaaka ae Karika te iuniweeti?

⁸ Ti nora koauan ae iai te Atua ni karawa ae onrake n taian itoi. E taekinaki ae kangai n Taian Areru 19:1: “A tataekina mimitongin te Atua taiani karawa.” A kaotiota mwaakan te Atua ma wanawanana “taiani karawa,” n aron taai, namwakaina ao itoi. Ti miroaroa n nori itoi aika mwaiti kurikuri iai. Ao a aki mangaongao butin bwaini karawa aikai ma a baireaki raoi kawaia n taian tua aika kaineti ma waakin te iuniweeti.a (Itaia 40:28) Ti wanawana ngkanne, ngkana ti taekinna bwa e manennanti rikin te waaki ae baireaki raoi aei? E kakawaki ataakin ae taan rabakau aika mwaiti a taku bwa e karina n riki te iuniweeti ngkoa n te tai teuana. Ibukin kabwarabwaran nanon te iango aei, e korea ae kangai te tia rabakau temanna: “Aomata aika a aki kakoauaa te Atua ke a nanououa iai, a kai butimwaea riki te koaua ae bon iai te iuniweeti n aki toki ma ngkoa ao akea moan rikina. N aron naba anne, ngkana iai moan rikin te iuniweeti, nanona ngkanne bwa e kainnanoaki te mwaaka ni karikibwai, bwa akea ae kona ni kakoauaa ae e riki te bwai n akea ae karikia ke ni karaoia.”

9. E kanga ni kaotiotaki wanawanan Iehova ni karikaia maan?

⁹ Ti nori naba bwaai ni kakoauaa ibukin te Atua i aon te aba. E taku te tia areru: “Iehova, ai bati ra am makuri! Ko kabane baikai ni karaoi n te rabakau: A on aonaba n am bwai nako.” (Taian Areru 104:24) Boni bwaai ni kakoaua ibukin wanawanan Iehova ana “bwai nako,” n ikotaki naba ma karikaia maan. N aron ae ti taekinna ni moan te rongorongo aei, raoiroin karaoani bwaai aika maiu e manga kairia taan rabakau bwa a na kataia ni katotongi baikai naba. Iangoi katoto tabeua riki. A karaoi aia ukeuke taani Kakaae i aoni koron te ria ni kataia ni katotonga aron karaoaia bwa a aonga ni manga karaoi taiani bwara ni buaka aika matoatoa riki; a karaoa naba aia ukeuke i aoia naango ibukin raoiroin aroia ni kakauongo i aan te kaantaninga are a na kanakoraoi riki bwaai ni kakauongo; ao a karaoa naba aia ukeuke i aoni bain te aeka ni mannikiba teuana ma te iango are a na karaoiroi riki aron kibaia waanikiba ni buaka. E ngae ngke a kakorakoraia aomata ni kataia ni katotong ana karikibwai te Atua, ma a bon aki kona n roko ni kororaoin ana moani karikibwai te Atua. E taekina ae kangai te boki ae Biomimicry​—Innovation Inspired by Nature: “A a tia ni karaoi bwaai ni kabane aika ti kani karaoi, bwaai aika maiu n akea kainnanoan te kabane bwaa, uruakan te aba, ao te karuanikai nakon maiuia n taai aika a na roko.” Ai te wanawana tera ae kaotaki iai!

10. Bukin tera bwa kakewean ae iai te tia Karaobwai ae Kakannato boni kaotan te nanobaba? Kabwarabwaraa.

¹⁰ A bon teretere raoi nakoira bwaai ni kakoaua ibukin te tia Karikiriki n noran bwaini karawa ke aon te aba. (Ieremia 10:12) Ti riai ni booti nanora ma anera ake a takarua ni kangai: “Ara Uea ao Atuara, Ko riai n anganaki te neboaki ma te karineaki ma te mwaka: ba Ko karaoi bwaai ni kabane, ao bon iai baikai i bukin nanom, ao a karaoaki iai.” (Te Kaotioti 4:11) Ma e ngae ngke a mimi taan rabakau n nora raoiroin te karikibwai ni mataia, ma e aki kariaia ‘matan nanoia’ bwa baikai boni kakoauan te tia Karikibwai. (I-Ebeto 1:18) Ti kona ni kaikonaka te nanobaba aei ni kangai: Mataiakinan tikiraoin te karikibwai ma kakewean ae iai te tia Karaobwai ae Kakannato, ai aron mataiakinan tikiraoin te korobanna teuana ma kakewean ae iai te tia koro taamnei, ae bita te kunnikai ae akea korobokiana nakon te taamnei ae rangi n tamaroa. Maroaka ae a taekinaki te koraki ake a kakewea te Atua bwa “a bukinaki n aia bure”!

A Burebureia Aomata Aika Bati ‘Taani Kairiri Aika Mataki’

11, 12. E boto i aon te iango raa te reirei are, a a kaman tia ni baireaki bwaai ni kabane, ao tera ae e kaotia bwa e aki neboaki te Atua n te reirei aei?

¹¹ A mwaiti aomata aika kakaonimaki n aia Aaro aika kakoauaa raoi bwa a neboa te Atua n aroia n taromauri. (I-Rom 10:2, 3) Ma ni koauana, Aaro boni kanoan aia waaki aomata teuana ae e a tia naba n tukiia aomata aika mirion ma mirion mwaitiia man neboan te Atua. E na kanga ni kona n riki anne? Ti na rinanon ngkai aanga aika uoua.

¹² Te moanibwai, a kauarerekea neboan te Atua Aaro n aia reirei aika kairua. N aron anne iangoa te reirei ae, a a kaman tia ni baireaki bwaai ni kabane. E boto te reirei aei i aon te iango ae, ngkai iai mwaakan te Atua ni kona ni moantaai n nori bwaai ni kabane, nanona ngkanne bwa e bon atai tokin bwaai ni kabane. E nanonaki n te reirei aei, bwa e a kamani bairei bwaai aika raoiroi ke aika buakaka ibukiia aomata n tatabemania nako te Atua nakon taai aika a na roko. Ni kaineti ma te kaantaninga aei, e a riai ngkanne ni bukinaki te Atua ibukin karawawata ao te buakaka i aon te aonnaba ngkai. E a bon aki neboaki te Atua ngkana e bukinaki ni bwaai aika e riai ni bukinaki iai teuare karoton ana Kairiribai ae Tatan are e taekinaki n te Baibara bwa “uean aon te aba”!​—Ioane 14:30; 1 Ioane 5:19.

13. Bukin tera ngkai te iango n nanobaba iangoan ae e aki kona te Atua n tiatiana ana atatai ibukin kanoan taai aika a na roko? Kabwarabwaraa.

¹³ E bobuaka ma te Baibara te reirei ae a a kaman tia ni baireaki bwaai ni kabane ao e kabuakakaki te Atua naba iai. E kamangaoaki iai te kaokoro i marenan bwaai ake e kona ni karaoi te Atua ao bwaai ake e a bon tabe ni kaakaraoi. E kateretereaki n te Baibara te koaua ae e kona te Atua n atai kanoan boong aika a na roko. (Itaia 46:9, 10) Ma e ngae n anne, ao bon te iango n nanobaba iangoan ae e aki kona n tiatiana aron ana atatai te Atua ibukin ataakin kanoan taai aika a na roko ke e na bukinaki ibukin kangaanga aika riiriki ni kabane. Ibukini kabwarabwaran aei: Iangoia bwa aongkoa ko rangi n aintoa, ma e ngae n anne, te koaua bwa ko a boni kan tatabeki naba bwaai aika rawawata ni kabane aika ko nori? Ko na bon aki! N aron naba anne, ngkai iai iroun te Atua te kona n atai kanoan taai aika a na roko, tiaki nanona ngkanne bwa te atatai aei e na kairoroa te Atua bwa e na atai kanoan boong aika a na roko, ke e na kaman bairei bwaai ni kabane. E rinorinoa aron kamanenan ana konabwai te Atua ni kaman atai bwaai aika a na riki.b E teretere raoi ngkanne bwa e bon aki kona n neboaki te Atua n reirei aika kairua, n ikotaki naba ma te reirei ae a a kaman tia ni baireaki bwaai ni kabane.

14. A kamatauninga te Atua n te aro raa botaki n Aro?

¹⁴ Te kauoua, a kamatauninga te Atua botaki n Aro, n aroaroni maiuia kaaina. A kaantaningaki Kristian bwa a na tou mwin ana reirei Iesu. Ibuakon ana reirei ake tabeua riki, e tuangia naba taan rimwina Iesu bwa a na “i tangitangiri” ao n teimatoa n riki bwa “tiaki ana bwai te aba ngaiia.” (Ioane 15:12; 17:14-​16) Ma tera aroia mataniwin Aaro ake aongkoa Kristian ngaiia? Te koaua bwa a a tia n tou mwin reirei aikai?

15. (a) Tera rongorongoia mataniwin Aaro ni kaineti ma aia buaka botannaomata? (b) Tera ae e a tia n riki nakoia aomata aika mirion ma mirion mwaitiia ibukin aroaroia mataniwin Aaro?

¹⁵ Iangoi rongorongoia mataniwin Aaro akanne ni kaineti ma te buaka. A kariaia ao a boutokaa kairan te waaki ni buaka irouia botannaomata aika mwaiti. A kakabwaiaia taanga ni buaka ao a kariaia te tiritiri. Ti a kairaki iai bwa ti na titiraki ni kangai, ‘Te koaua bwa a bon tuai ni karaua n iangoia mataniwin Aaro aikai, ae titeboo te bwai ae a kaakaraoia ma mataniwin Aaro n aaba ake a buaka ma ngaiia?’ (Nora te bwaoki ae, “E Boutokaa te Itera Raa te Atua?”) A aki neboa te Atua mataniwin Aaro, kioina ngkai a bukina te Atua bwa e boutokai buaka n tiritiri, ao a aki neboia naba ngkana a taku bwa a a bane tain kaetieti ake n te Baibara, ao a aki-bure aeka ni wene ni bure nako. A kauringira raoi taekaia mataniwin Aaro, ake e taekinia ngkoa Iesu bwa a “kakaraoa ae buakaka” ao “taani kairiia mataki aika mataki.” (Mataio 7:15-​23; 15:14) E a kani mauna tangiran te Atua irouia aomata aika mirion ma mirion mwaitiia ibukin aroaroia mataniwin Aaro.​—Mataio 24:12.

Antai Aika A Bon Neboa te Atua?

16. Bukin tera bwa ti riai ni kakaaea n te Baibara kaekaan te titiraki ae antai aika a bon neboa te Atua?

¹⁶ Ngkana ngaia bwa a aki neboa te Atua angiia aomata aika kakannato ao aika bwakuaku i aon te aonnaba, antai ngkanne aika a bon neboa te Atua? Ti riai n nora kaekaan te titiraki aei n te Baibara. N aron ae e ataaki, iai inaaomatan te Atua n taekinna bwa tera aron neboana, ao e a bon tia ni korei kaetieti aikai i nanon ana Taeka, ae te Baibara. (Itaia 42:8) Ti na rinanon ngkai aanga aika tenua ibukin neboan te Atua, bwa ti na nora iai kaekaan te titiraki ae, antai aika a bon neboa te Atua ni boong aikai.

17. E kanga ni kaotia Iehova ae e kakawaki irouna neboan arana, ao antai ni boong aikai aika kamoamoaa aran te Atua ni kabuta te aonnaba?

¹⁷ Te moanibwai, ti kona n neboa te Atua ngkana ti kamoamoaa arana. E kamatataaki man ana taeka Iehova nakon Iesu bwa e kakawaki irouna bwa ti na karaoa aei. E tataro ni kangai Iesu tabeua te bong imwain matena: “Tamau, neboa aram.” Imwina e kaekaaki n te bwanaa ae kangai: “I a kaman neboia, ao N na manga neboia.” (Ioane 12:28) Akea te nanououa bwa bon Iehova are e taetae. E teretere raoi ngkanne man ana kaeka bwa e kakawaki irouna neboan arana. Antai ngkanne ni boong aikai aika neboa Iehova n aroia n tataekina ao ni kamoamoaa arana ni kabuta te aonnaba? Bon Ana tia Kakoaua Iehova, ao a karaoa aei n aaba aika 235 mwaitiia!​—Taian Areru 86:11, 12.

18. Ti na kanga ni kona ni kinaia te koraki aika taromauria te Atua ma te “koaua,” ao te botaki raa are a tia n reiakinia aomata ana koaua te Baibara i nanon tebubua tabun te ririki ngkai?

¹⁸ Te kauoua, ti kona n neboa te Atua ngkana ti reiakinia aomata te koaua ibukina. E taekinna Iesu bwa “a na taromauria [te Atua] . . . ma te koaua,” taan taromauria ni koaua. (Ioane 4:24) Ti na kanga ni kona ni kinaia te koraki aika taromauria te Atua ma te “koaua”? A riai te koraki aei n rarawa nakon reirei aika aki-boto i aon te Baibara, ao aika kabuakaka te Atua ma ana kaantaninga. N onean mwin anne, a riai n reiakinia aomata taekan te koaua ae i nanon ana Taeka te Atua, n ikotaki naba ma aikai: Bon te Atua ae Moan te Rietata Iehova, ao bon tii ngaia ae riai n anganaki te nebonebo ni kaineti ma rietatana (Taian Areru 83:18); Iesu bon Natin te Atua ao boni ngaia naba are e a kaman rineaki bwa te tia Tautaeka n ana Tautaeka n Uea te Atua iroun te Mesia (1 I-Korinto 15: 27, 28); E na katabua te ara ae Iehova ana Tautaeka n Uea te Atua aei, ao e na kakoroi bukin ana kaantaninga ibukin te aonnaba aei ao nakoia naba kaaina (Mataio 6:9, 10); E riai n tataekinaki euangkerion te Tautaeka n Uea aei i aonnaba ni kabane. (Mataio 24:14) Bon tii teuana te botaki ae a a tia ni kakaonimaki kaaina n reiakini koaua aika kakawaki aikai, i nanon ririki aika tebubua tabun ngkai, ae Ana tia Kakoaua Iehova!

19, 20. (a) E na kanga ni kona n neboaki te Atua n aroaron te Kristian ae raoiroi? (b) Titiraki raa aika a kona ni buokira ni kinaia aomata aika a neboa te Atua ni boong aikai n aroaroia ni kateimatoai raoiroia?

¹⁹ Te katenua, ti kona n neboa te Atua ngkana ti maiuakini ana kaetieti. E korea ae kangai te abotoro Betero: “Kam na maeka n te aro ae raoiroi i buakoia Tientaire; ba, n te baere a bukiningkami iai ba kaanga aongkoa aomata akana kam kakaraoa ae buakaka ngkami, ao ngkai a nori ami makuri aika raraoi, ao a na neboa te Atua iai n ana bongi ni kawaria aomata.” (1 Betero 2:12) Iai irekereken aroaron te Kristian ma ana onimaki. Ngkana a noria aomata bwa e reke aroaron te Kristian ae raoiroi man ana onimaki, ao ngkanne aroarona anne e karekea neboakin te Atua.

²⁰ Antai ni boong aikai, aika neboa te Atua n aroia ni kateimatoai aroaroni maiuiia aika raraoi? Te botaki n Aro raa, ae e a tia ni kamoamoaki irouia botaki n tautaeka aika mwaiti ibukin noran aroia ni maeka ma te rau, ao n ongeaba i aan tuan abaia n ikotaki ma aroia ni kakabwakai aia angabwai? (I-Rom 13:1, 3, 6, 7) Antai aomata aika rangi n ataaki ni katobibia te aonnaba ibukin aroia ni katiteuanaki ma raoia n onimaki, n aki ongea kaokoron aia reeti, aia baronga, ke aia katei? (Taian Areru 133:1; Mwakuri 10:34, 35) Te botaki raa, ae kinaaki ni katobibia te aonnaba ibukin ana waaki n angareirei man te Baibara ae kaunga karinean tuan te aba, te nakoraoi i nanon te utu, ao maiuakinan ana kaetieti te Baibara ibukin te aroaro ni maiu ae riai? Bon tii teuana te botaki ae a kona ni kinaaki kaaina n aroaroia aika raraoi n aaro aikai ke tabeua riki, bwa bon tii Ana tia Kakoaua Iehova!

Ko Bon Neboa te Atua?

21. Bukin tera ngkai ti riai n tirotiroi arora bwa ti neboa raoi iai Iehova?

²¹ Ti bon riai n titirakinira n tatabemanira nako ni kangai, ‘Te koaua bwa I neboa Iehova?’ Ni kaineti ma ae taekinaki n Taian Areru 148, a neboa te Atua angiin bwaai aika karikaki. A bane ni kamoamoaa Iehova anera, bwaini karawa, bwain aon te aba, ao maan aika karikaki. (Kibuna 1-​10) Ai kananokawaki ra ngkai angiia aomata ni boong aikai a bon aki! Ngkana ko maiuakina te maiu ae neboaki iai te Atua, ko katiteuanaki iai ma taiani karikibwai aika neboa Iehova. (Kibuna 11-​13) Bon tii aei te aro ae riai ibukin kamanenan maium.

22. Ko na kakabwaiaki n aaro raa ngkana ko neboa Iehova, ao tera ae ko riai ni motinnanoia?

²² Ko na boni kakabwaiaki n aaro aika mwaiti ngkana ko neboa Iehova. Ngkana ko onimakina ana karea ni kaboomwi Kristo, ko a raoiakinaki iai ma te Atua ao e na reke am iraorao ma Tamam are i karawa, ae karaunano ma ni kakukurei. (I-Rom 5:10) Ngkai ko a tabe n ukoukora angam n neboa te Atua, e na rikirake ngkanne kukureim ao nanom ni kakaitau. (Ieremia 31:12) Imwina, ko a tauraoi ni buokia aomata tabeman bwa a na kona ni karekea te maiu ae kakukurei man uaana, ao n te aro anne ko a namakina iai te kukurei ae bati riki. (Mwakuri 20:35) Ko bia mena i buakoia te koraki ake a motinnanoia bwa a na neboa te Atua ngkai, ao n aki toki!

[Kabwarabwara ae nano]

Ko Uringnga?

• Bukin tera ngkai ti kona n taekinna bwa a aki buokia aomata n neboa te Atua, angiia taan rabakau?

• Baikara aaro aika uoua are a totokoaki iai aomata man neboan te Atua irouia botaki n Aro?

• Ti kona n neboa te Atua n aaro raa?

• E aera ngkai ko riai n iangoia bwa ko neboa raoi Iehova?

[Te Bwaoki n te iteraniba 22]

“E Boutokaa te Itera Raa te Atua?”

E ururing ni kangai temanna te mwaane ngkoa are kaain ana Taanga ni Buaka Tiaman n tain te Kauoua ni Buaka are Kabutaa Aonnaba, ma e a manga riki bwa kaain Ana tia Kakoaua Iehova:

“Te bwai ae katabetabea au iango i nanon ririki ni buaka akanne . . . bon norakia mataniwin angiin Aaro n aron te Katorika, Lutheran, Episcopal, aika a kakabwaiaiia waanikiba ni buaka ma kaaina imwain kibanakoia ni kabwaka boom. I aki toki n iaiangoia bwa ‘e boutokaa te itera raa te Atua?’”

“A roonia tautian Tiaman n te roo ae korobokiaki n taeka aikai, Gott mit uns ae nanona, bon raora te Atua. Ma I mimi iai ao I taku, ‘Bukin tera bwa e na aki raonia tautia ake n te itera are teuana te Atua, aika titeboo aia Aro ma te koraki aei, ao titeboo naba Atuaia ae a tataro nakoina?’”