E Riai bwa Ko na Kaaina te Aro?

‘I AKI riai ni kaaina te Aro ke ni katoa tai n taromauri bwa I aonga n onimakina te Atua!’ Anne aron aia iango aomata aika mwaiti ibukin kaainakin te Aro. Ni koauana, a taku tabeman bwa a namakinna ae a kaan riki ma te Atua ngkana a karekei kukureia i tinaniku, n taratarai bwaai aika karikaki, nakon are a na kaei botaki n taromauri n te umwantabu. Ni boong aikai, e a taabangaki bwainakin te iango, ae te reitaki ke te bobotaki ma te Aro teuana, e aki kainnanoaki ibukin kakoauan te Atua.

Ma e kaokoro aia namakin tabemwaang iai. A kakoauaa bwa kaainakin te Aro ao te roroko iai, e boni kainnanoaki ngkana e na karekea akoana te aomata i matan te Atua. Mangaia are te titiraki ibukin te reitaki ma te Aro, bon te bwai ae kakawaki iangoana irouia aomata nako ao tiaki tii ibukia taan rabakau i aon taekan te Aro. Ibukin anne, kioina ngke e irekereke iai ara iraorao ma te Atua, e aki riai ngkanne bwa ti na ukoukoria bwa tera ana iango te Atua i aon te itera aei? Tera ngkanne ae ti kona n reiakinna man ana Taeka ae te Baibara ibukin te itera aei?

Aron Ana Reitaki te Atua ma Aomata Rimoa

E kaania 4,400 te ririki n nako, rikin te ieka ae karuanikai are e rota te aonnaba ni kabutaa. E kangaanga mwanuokinan te bwai ane riki anne, mangaia are iai taekana n aia rongorongo nikawai botannaomata nako n te aonnaba. E ngae ngke e kakaokoro karakinana, ma a bati bwaai aika a titeboo iai, n ikotaki naba ma te koaua are tii tabeman aomata ao maan ake a reke maiuiia.

Te koaua bwa aomata ake a kamaiuaki n te Ieka, a manennanti n reke maiuiia man te kamaunanakoaki? E kaotaki n te rongorongo man te Baibara bwa tiaki ngaia anne ae riki. E kakawaki ataakin ae e aki kaongoia aomata n tatabemania nako te Atua, taekan te Ieka are e nang roko. Ma e tuanga Noa, are e a manga kauringia aomata n te tai anne taekan kaanin te Ieka.​—Karikani Bwaai 6:13-​16; 2 Betero 2:5.

E boto te kamaiuaki i aon kaainakin te botaki ae a uaia n ibuobuoki kaaina, ao i aon naba te ingaingannano ni butimwaea ana kairiri te Atua are e anga rinanon Noa. A kamaiuaki man te Ieka naba maan ake a mena i nanon te ake ibukina bwa a ikoikotaki ma te koraki aei. E anganaki Noa te kaetieti ae raoiroi bwa e na karaoa ana babaire ae riai ibukin kamaiuaia maan.​—Karikani Bwaai 6:17–​7:8.

Tabebubua te ririki imwina, ao a tautoronaki kanoan Noa rinanon natina are Tem, i Aikubita. Ma ana kaantaninga te Atua, bwa e na kainaaomataia ao n uotiia nakon te aba are e a tia ni beritanna nakon aia bakatibu are Aberaam. E bon aki kaotaki aei nakoia aomata n tatabemania nako, ma e kaotaki moa nakoia te koraki ake a rineaki bwa taan kairiri, aika Mote ao tarina are Aaron. (Te Otinako 3:7-10; 4:27-31) Imwin kainaaomatakiia te koraki aei n tautoronakia i Aikubita ngkoa, ao a anganaki ana Tua te Atua n te Maunga are Tinai ao a riki bwa te natannaomata are Iteraera.​—Te Otinako 19:1-6.

E reke te kainaaomataki irouia I-Iteraera, tii ibukina bwa a kaaina te kurubu n aomata ae kateaki iroun te Atua, ao a iri aia kaetieti taan kairiri iai ake a rineaki. A kariaiakaki naba I-Aikubita tabeman bwa a na kaaina te koraki ae akoaki iroun te Atua aei. A iri aomata aikai ngke a kitana Aikubita I-Iteraera, ao a karekei naba iai ana kakabwaia te Atua.​—Te Otinako 12:37, 38.

Rimwi riki n te moan tienture, ao e a moana ana mwakuri n uarongorongo Iesu, n ikotiia aomata bwa a na riki bwa taan rimwina. E mwakuri ma te kurubu aei, e ngae ngke e mutiakina temanna ma temanna irouia ni kaineti ma kainnanoia. E taku Iesu nakoia ana abotoro ake 11 ake a kakaonimaki: “Ngkami bon aika kam memena ma Ngai ni kaririakiu; ao Ngai I motika ueami nako imi, n ai aron Tamau ngke E motika ueau nako Iu.” (Ruka 22:28, 29) Imwina riki ao e ruo taamnein te Atua nako aoia taan rimwin Kristo ngke a botaki n te kurubu.​—Mwakuri 2:1-4.

A kaotaki raoi ni katoto aikai, bwa n taai ake rimoa ao e aki toki n reitaki te Atua ma ana aomata n te kurubu ae baireaki raoi. Aomata tabeman ngkoa, ake e rangi ni kaan ana reitaki te Atua ma ngaiia n aron Noa, Mote, Iesu ao tabeman riki, a manga kabonganaki irouna ibukin karekean Ana itoman ma te koraki aika a aki toki n airiri ma aomata aikai. Akea bukina ae e na kakoauaki bwa e kaokoro aron te Atua ni mwakuri ma ana toro ni boong aikai. Mangaia are, ti a kairaki iai nakon te titiraki riki teuana ae kangai: E aki akaka bwa tera te Aro ae N na reitaki ma ngaia? Ti na maroroakina te titiraki ae kakawaki aei n te kaongora are imwina.

[Taamnei n iteraniba 4]

E a kaman reitaki te Atua ma ana aomata n te kurubu ae baireaki raoi